Domingo
Noviembre 8
1. TI KASOM DI PAY NATAMING
a. Sino ti addaan iti kaso a di pay nataming iti pangocoman? 2 Corinto 5:10. Sino ti pangrugianna? 1 Pedro 4:17.
“Bayat ti pannakalukat dagiti libro iti pangocoman, ti biag dagiti amin a namati ken Jesus maamirisda iti sango ti Dios. Mangrugi kadagiti immuna a nagbiag iti rabaw ti daga, iparang ti Mangibabaet cadatayo dagiti kaso ti tunggal agsasaruno a kaputotan ket agserra kadagiti sibibiag. Tunggal nagan ket maawagan, tunggal kaso ket siiinget a mausisa.” – GC, p. 483.
b. Kaano ti pannakaocom ti kaaduan a tattao? Hebreo 9:27. Apay?
k. Iti ania nga evidencia a maibasar ti pannakaocom? Apocalipsis 20:11, 12. Ania ti nakasurat kadagiti libro? Jeremias 2:22; Malakias 3:16; Nahemias 13:14.
Lunes
Noviembre 9
2. TI PAGIBASARAN KEN TI MANGIBAGI
a. Ania ti pagibasaran a pakaocomantayo? Santiago 2:10-12. Ania ti kababalin daytoy a pagibasaran, ken ania ti gutogutenna? Salmo 19:7; Mateo 5:48.
“Ti linteg ti Dios ti pagibasaran a pakasuotan ti kababalin ken biag dagiti tattao inton ocom.” – GC, p. 482.
“Kadagiti panursuroNa, impakita ni Cristo no kasano kalawa ti sakop dagiti prinsipio ti linteg a naisao idiay Sinai. Inaramidna a nabiag ti pannakaipakat dayta a linteg a dagiti prinsipiona agtalinaed iti agnanayon a pagibasaran ti kinalinteg – ti pagibasaran a pakaocoman ti amin iti dayta naindaclan nga aldaw inton marugian ti panangocom, ket malukatan dagiti libro.” – 1 SM, p. 211.
b. Ania ti dusa ti saan a nalinteg? Roma 6:23. Adda kadi namnama ti tao nga addaan dakes a rekord? 1 Juan 2:1, 2.
“Ti ipapatay ti awan tulawNa nga Anac ti Dios ti agsacsi a ti ‘dusa ti basol ket patay’ (Roma 6:23), a tunggal salungasing iti linteg ti Dios umawat iti nalinteg a supapak. Ni Cristo nga awanan basol nagbalin a basol para iti tao. InawitNa ti dusa ti salungasing, ken ti pannaka-ilemmeng ti rupa ti AmaNa, agingga a naburac ti pusoNa, ken nailupit ti biagNa. Amin a sacrificioNa ket naaramid tapno masubbot ti managbasol. Awanen ti sabali a wagas a mawayawayaan ti tao manipud iti dusa ni basol.” – GC, p.540.
k. Kasano a maawattayo ti daton ti pannakicappia? Roma 3:25; 1 Juan 1:9.
“Dagiti ehemplo iti sao ti Dios ti napudno a panagbabawi ken panagpakumbaba ipalgacda ti espiritu ti panagconfesar nga awan ti ekskyus para iti basol wenno panangpadas a mangpalinteg iti bagi. Saan nga inkagumaan ni Pablo a sinalacniban ti bagina; pininturaanna ti basolna iti kasipngetan a maris, dina pinadas a pabassiten ti basolna. . . .
Ti napakumababa ken naliday ti pusona, pinasuko ti napudno a panagbabawi, apresiarenna ti ayat ti Dios ken ti pateg ti Calvario; ket kas ti anac nga agconfesar iti naayat nga ama; kasta met ti sipupudno nga agbabbabawi – isangbayna amin a basbasolna iti sango ti Dios. Ket nakasurat, ‘No ipudnotayo dagiti basbasoltayo, isu ti mapagtalcan ken nalinteg a mamacawan cadagiti basbasoltayo ken mangugas kadatayo iti kinakillo’ (1 Juan 1:9).” – SC, p. 41.
Martes
Noviembre 10
3. PANAWEN TI PANNAKAOCOM
a. Ania ti mapasamac kadagiti sipupudno nga immawat iti Mangibabaet? Juan 11:25; Juan 5:24-29.
“Amin a sipupudno a nagbabawi, ken babaen iti pammati tinontonda ti dara ni Cristo kas mangabbong a sacrificioda, naaddaanda iti pannakapakawan a naisurat kadagiti nagnaganda iti libro sadi langit; bayat ti panagbalinda a makipaset iti kinalinteg ni Cristo, ti kababalinda masarakan a maitunos iti linteg ti Dios, dagiti basbasolda mapunasto, ket maibilangda a maikari iti biag nga agnanayon.” – GC, p. 483.
b. Inton agsubli ni Cristo, ania ti itugotNa, ken ania ti aramidenNa iti dayta? Apocalipsis 22:12; 2 Timoteo 4:7, 8.
k. Ania ti mapasamac pay nga umuna tapno gun-gunaan ni Cristo dagiti namatalec? 1 Timoteo 5:24; 1 Pedro 4:17; Lucas 20:35, 36.
“Sacbay a maipaay ti kaudian a gun-guna, kasapulan a maikeddeng no sino ti maitutop a makibingay iti tawid dagiti nalinteg. Kasapulan a maaramid ti keddeng sacbay ti maikadua a yaay ni Cristo kadagiti ulep ti langit; ta inton umay Isuna, ti panggun-guna adda Kencuana, ‘tapno gun-gunaanNa ti tunggal maysa cas maiyanatup iti aramidna’ (Apocalipsis 22:12). Sacbay ti yaayNa, ti kababalin ti tunggal aramid ti tao naikeddeng, ket iti tunggal maysa kadagiti pasurot ni Cristo ti gun-guna naituding cas maiyannatup iti aramidna.
“Kabayatan ngarud a dagiti tattao ket agnanaedda pay laeng iti daga a maar-aramid ti nausisa a pannakaocom kadagiti corte ti langit. Ti biag dagiti amin nga agkunkuna a pasurot ni Cristo maamirisda iti sango ti Dios. Amin ket maeksamen maitutop iti rekord dagiti libro ti langit ken maiyanatup kadagiti ar-aramid, ti keddeng ti tunggal maysa ket naitudingen iti agnanayon.” – COL, p. 310.
“Awanton ti probasyon iti masacbayan a panagsagana para iti agnanayon. Ditoy a biag nga ikawwestayo ti pagan-anay ti kinalinteg ni Cristo. Daytoy laeng ti gundawaytayo a mangsukog iti kababalin para iti pagtaengan nga insagana ni Cristo para kadagiti agtulnog kadagiti bilbilinNa.” – Ibid., p. 319.
Mierkules
Noviembre 11
4. TI PANNAKAPUNAS DAGITI BASBASOL
a. Anianto ti mapasamac kadagiti basbasol dagiti nalinteg nga umawat iti gun-gunada iti tiempo ti panagungar? Mikias 7:19; Isaias 43:25.
“Ti trabaho ti mangus-usisa nga ocom ken ti pannakapunas kadagiti basbasol, maaramidda sacbay ti maikaddua a yaay ti Apo. Idinto ta maocom dagiti natay basar kadagiti banbanag a nakasurat kadagiti libro, imposible a dagiti basbasol dagiti tattao mapunasda agingga a malpas ti pannacaocom isu a pakausisaan dagiti kasoda. Ngem ni apostol Pedro kinunana a silalawag a mapunas dagiti basbasol dagiti mamati ‘inton umay dagiti aldaw ti bang-ar aggapu iti sangoanan ti Apo; Ken ibaonna coma ni Jesu-Cristo’ (Aramid 3:19, 20). Inton agserra ti mangus-usisa nga ocom, umayton ni Cristo ket ti panggun-guna adda Kencuana tapno ipaayNa iti tunggal tao kas maiyanatup iti aramidna.” – GC, p. 485.
b. Ilawlawag no kasano nga ipakita ti pangarig ti adipen a dakes (Mateo 18:23-35) ti nagdumaan ti pannakapakawan ken ti pannapunas ti basol. Nupay mabalin a namatalectayo ita, ania ti naparbeng a kinapudno ti mamagtalinaed kadatayo a naridam? Ezequiel 33:13-16.
k. Ania ti mapasamac iti nagan ti saan a namatalec a tao a naisurat ti naganna iti libro ti biag? Exodo 32:32, 33. Kasano ngamin a naisurat ti naganna sadiay, ken akinnagan ti agtalinaed? Filipos 4:3; Apocalipsis 3:5.
“Agbibiagtayo iti naindaclan nga aldaw ti pannakaabbong. Iti tipical a servicio, kabayatan nga ar-aramiden ti nangato a padi ti pannakaabbong para iti Israel, magutogut ti amin a mangpaldaang iti kararuada babaen iti panangibabawi iti basol ken panagpakumbaba iti sango ti Apo, di la ketdi ta matayda iti nagbabaetan ti ili. Iti isu met a wagas, amin nga agtarigagay nga agtalinaed ti naganda iti libro ti biag, kasapulan nga iti nabatbati nga alaldaw ti probasyonda, paldaangenda ti kararuada iti sango ti Dios babaen iti panagladingit gapu iti basol ken napudno a panagbabawi. Adda coma nauneg, napudno a panangsukisoc iti puso. . . Nupay amin a nacion aglasatda iti pangocoman iti sango ti Dios, Isu amirisenNa ti kaso ti tunggal tao babaen iti nainget ken naannad a panangusig a kasla awanen ti sabali a tao iti rabaw ti daga.” – Ibid., pp. 489, 490.
Hueves
Noviembre 12
5. EKSAMINASYON KEN GUN-GUNA
a. Tapno mapunas dagiti basbasol, ania ti mapasamac nga umuna, kas nailadawan iti pangarig ti tao nga awanan iti cawes ti makiboda? Mateo 22:9-14. Ania ti isimbolo ti cawes ti makiboda? Apocalipsis 19:8; Filipos 3:9.
“Iti panangamiris ti ari kadagiti sangaili iti rambac ti boda irepresentarna ti trabaho ti ocom. Dagiti sangaili iti rambac ti evangelio isuda dagiti tattao nga agkukuna nga agserserbida iti Dios, a ti naganda nakasurat iti libro ti biag. . . .
“Babaen iti cawes ti makiboda iti pangarig maiparang ti nadalus, awan tulawna a kababalin nga adda kadagiti pudno a pasurot ni Cristo. . . Isu ti kinalinteg ni Cristo, ti bukodNa a kababalin nga awanan tulaw, a babaen iti pammati maibingay kadagiti amin nga umawat Kencuana kas personal a Mannubbotda.” – COL, p. 310.
b. Ania a trabaho ti ar-aramiden ni Cristo para iti tunggal agbab-bawi a managbasol ita ken ania a pacdaar ti maaramidto inton malpas ti trabaho? Hebreo 2:17; Apocalipsis 22:11, 12; Daniel 12:1.
k. Yantangay ta ti ocom agpatingga iti kaudian a puli a mausig bayat a sibibiag, ania ti ballaag ni Jesus kadatayo? Marcos 13:33. Ania a talged ti adda kadatayo? Hebreo 4:14-16; 13:20, 21.
“Maar-aramiden ti pannacaocom iti santuario idiay ngato. . . Iti mabiit – awan macaammo no kasano kabiit – maipanton kadagiti kaso dagiti sibibiag.” – GC, p. 490.
Viernes
Noviembre 13
PERSONAL A PANGREPASO A SALSALUDSOD
1. Apay a ti tiempo ti pannacaocom ket nasolemne a tiempo a pagbiagan?
2. Kasano a masiguradotayo a maocomtayo a “saan a nagbasol”?
3. Apay a ti pannakaocom dagiti agkunkuna a mamati maaramid sacbay ti Maikadua a Yaay?
4. Ania ti pagdumaan ti pannakapakawan ken pannakapunas ti basol?
5. Ania a kapadasan ti kasapulan nga adda kadagiti pudno a pasurot ni Cristo a maocom bayat a sibibiag?