Domingo
, Enero 12
1. ANG PAGSUGOD SA MINISTERYO NI CRISTO
a. Diin man si Jesus magsugod sa Iyang ministeryo dinhi sa yuta? Juan 2:1, 2.
“Si Jesus wala magsugod sa Iyang ministeryo pinaagi sa pipila ka dagkong buhat atubangan sa Sanhedrin sa Jerusalem. Diha sa usa ka panagkatigom sa panimalay sa usa ka gamayng balangay sa Galilea ang iyang gahum gigamit aron sa pagdugang sa kalipay sa kombira sa kasal. Sa ingon Iyang gipakita ang Iyang simpatiya sa mga tawo, ug ang Iyang tinguha sa pag-alagad sa ilang kalipay. Diha sa kamingawan sa tentasyon Siya sa Iyang kaugalingon nakainom sa kopa sa kaalaut. Siya mianhi aron sa paghatag ngadto sa mga tawo sa kopa sa panalangin, pinaagi sa Iyang panalangin sa pagbalaan sa mga relasyon sa tawhanong kinabuhi.”—The Desire of Ages, p. 144.
b. Unsay nahitabo sa hapit na matapos ang kombira sa kasal? Juan 2:3.
“Si [Maria] nangandoy nga [si Jesus] magpamatuod ngadto sa pundok nga Siya mao gayud ang Pinasidunggan sa Dios. Naglaum siya nga adunay kahigayonan alang Kaniya sa pagbuhat ug milagro sa ilang atubangan.
“Maoy nabatasan sa mga panahon nga ang mga selebrasyon sa kaminyoon magpadayon sa pipila ka mga adlaw. Niini nga okasyon, sa wala pa matapos ang kombira nakaplagan nga ang suplay sa bino nakulangan na. Kini nga pagkadiskobre nakahatag ug dako nga kahasol ug pagmahay. Kini diili naandan nga walay bino diha sa mga okasyon sa kombiora, ug ang pagkawala niini daw nagpaila sa usa ka kakulang sa pagkamaabiabihon.”— Ibid., pp. 145, 146.
Lunes
, Enero 13
2. SI CRISTO UG ANG IYANG INAHAN
a. Unsay gisulti sa inahan ni Cristo, ug unsa may Iyang tubag? Juan 2:3, 4.
“[Gikutlo ang Juan 2:4.] Kini nga tubag, nga alang kanato daw kalit, wala magpahayag ug kabugnaw o pagka-walay pagtahud. Ang porma sa Manluluwas sa pagtawag ngadto sa Iyang inahan nahiuyon sa kostumbre sa Sidlakan. Kini gigamit ngadto sa mga tawo kang kinsa kini gitinguha sa pagpakita ug pagtahud. Ang matag buhat ni Cristo sa yutan-ong kinabuhi nahiuyon sa sugo nga Iyang gihatag, ‘Tahuron mo ang imong amahan ug imong inahan.’ Exodo 20:12. Didto sa krus, sa Iyang katapusang buhat sa kalooy ngadto sa Iyang inahan, si Jesus misulti pag-usab kaniya sa samang paagi, samtang Iyang gitugyan siya ngadto sa pag-atiman sa Iyang labing hinigugma nga tinon-an. Pareho didto sa kombira sa kasal ug diha sa krus, ang gugma nga gipahayag diha sa tono ug tinan-awan ug gawi naghubad sa Iyang mga pulong.”— The Desire of Ages, p. 146.
b. Unsa ang gisulti sa inahan ni Cristo ngadto sa mga sulugoon—ug sa unsa nga paagi nga kini nga mga pulong aplikado usab kanato karon? Juan 2:5.
“Ang mga sumosunod [ni Cristo] kinahanglan nga mahimong mas labi pa nga usa ka dakong gahum sa pagmantala sa kamatuoran samtang sila nagkaduol ngadto sa kahingpitan sa pagtoo ug sa gugma alang sa ilang mga igsoon. Ang Dios naghatag ug balaang tabang alang sa tanang mga emerhensya diin ang atong tawhanon nga tinubdan dili paigo. Siya magahatag sa Balaang Espiritu aron sa pagtabang sa matag kalisdanan, sa paglig-on sa atong paglaum ug kasigurohan, aron sa pagdan-ag sa atong mga hunahuna ug pagputli sa atong mga kasingkasing. Siya nagpasabot nga ang paigo nga mga pasilidad itagana alang sa pagbuhat sa iyang mga plano. Giawhag ko kamo pangayo ug tambag gikan sa Dios. Pangitaa Siya uban sa tibook kasingkasing, ug ‘bisan unsa ang Iyang ginasulti nganha kaninyo, buhata.’ Juan 2:5.”—Testimonies for the Church, vol. 6, pp. 414, 415.
c. Unsay gisulti ni Jesus nga buhaton sa sulugoon didto sa kasal? Juan 2:6–8.
“Sa kilid sa pultahan nagbarog ang unom ka dagkong bato nga tadyaw sa tubig, ug si Jesus misugo sa mga sulugoon nga punoon kini sa tubig. Ug nahimo kadto. Unya sa diha nga ang bino gikinahanglan alang sa dihadiha nga paggamit, Siya miingon, ‘Pagkuha na karon, ug dad-a ngadto sa gobernador sa kombira.’ Imbes tubig ang gisulod sa mga sudlanan, didto miagas ang bino.”— The Desire of Ages, p. 148.
Martes
, Enero 14
3. ANG BINO NI CRISTO
a. Sa dihang ang bino gisilbi na, giunsa sa gobernador sa kombira pagtubag? Juan 2:9, 10.
“Ang nangulo sa kombira ni ang mga dinapit sa kinatibuk-an wala makamatikod nga nahutdan ug bino. Sa dihang nakatilaw niadtong gidala sa mga sulogoon, ang nangulo nakakaplag niini nga mas labaw kay sa tanan nga iyang nainom kanhi, ug lahi ra kaayo niadtong gisilbi diha sa pagsugod sa kombira.”- The Desire of Ages, p. 148.
b. Unsang matang sa bino ang gitagana ni Cristo? Isaias 65:8.
“Ang bino nga gitagana ni Cristo alang sa kombira, ug kadtong Iyang gihatag ngadto sa mga tinon-an ingon nga simbolo sa Iyang kaugalingong dugo, mao ang lunsay nga duga sa ubas. Niini ang manalagna nga si Isaias nagtumong sa dihang siya naghisgot bahin sa bag-ong bino ‘diha sa pungpong,’ ug nagaingon, ‘Ayaw kini paglaglaga; kay ang usa ka panalangin anaa niini.’ Isaias 65:8 . . . .
“Ang bino nga dili makahubog nga Iyang gitagana alang sa mga dinapit sa kasal maoy usa ka maayo ug makapalagsik nga ilimnon. Ang epekto niini mao ang pagdala sa lami ngadto sa kaharmoniya sa usa ka makapahimsog nga gana.”— Ibid., p. 149.
c. Unsa ang giingon sa Kasulatan bahin sa bino nga gipaaslom? Proverbio 20:1; 23:29–35.
“Si Cristo mao ang diha sa Daang Tugon naghatag ug pasidaan ngadto sa Israel, ‘Ang bino usa ka tigtamay, ang maisug nga ilimnon mao ang sabaan: ug bisan kinsa nga masayop tungod niini dili maalamon.’ Proverbio 20:1. Ug Siya sa Iyang kaugalingon wala maghatag ug ingon niana nga ilimnon. Si Satanas nagtintal sa mga tawo sa pagpatuyang nga mahimong magpagabon sa kaisipan ug magpabinhud sa espirituhanong mga pagpanabut, apan si Cristo nagtudlo kanato sa pagdala sa ubos nga kinaiyahan ngadto sa pagpasakop. Ang iyang tibook kinabuhi maoy usa ka ehemplo sa pagdumili sa kaugalingon. Aron sa pagbungkag sa gahum sa gana, Siya miantus alang kanato sa labing grabe nga pagsulay nga antuson sa tawo. Si Cristo mao ang nagmando nga si Juan Bautista kinahanglan nga dili moinom ug bino o maisog nga ilimnon. Siya mao ang nagmando sa sulosama nga pagpugong diha sa asawa ni Manoa. Ug Siya nagpahayag nga usa ka tunglo sa tawo nga magbutang sa botelya sa mga ngabil sa iyang silingan. Si Cristo wala mosupak sa Iyang kaugalingong pagtulon-an.”— Ibid.
Mierkules
, Enero 15
4. EHEMPLO NI CRISTO DIHA SA SOSYAL NGA MGA KATIGUMAN
a. Unsang mga tumong ang nakab-ut pinaagi sa presensya ni Cristo ug sa Iyang milagro diha sa kombira sa kasal, bisan alang kanato karon? Juan 2:11.
“Si Cristo nahibalo sa tanang butang; Siya nagatan-aw paubos sa mga katuigan nganhi sa atong panahon, ug nakita kon unsa ang kahimtang sa sosyedad dinhi sa pagtapos sa kasaysayan sa kalibutan. Iyang nakita ang libo ka mga linibo ang nangamatay diha sa paggamit sa bino ug isog nga ilimnon. Ang kalibutan anam-anam nga midangat ngadto sa sama nga kahimtang ingon sa nahitabo sa mga adlaw sa wala pa ang lunop. Apan ang langit nag-isa sa usa ka makatalagmanon nga ilhanan, aron nga ang mga tawo makabaton ug pasidaan, nga ang mga tawo makadawat sa pasidaan, ug mokooperar sa Dios alang sa ilang kaugalingon nga pagpreserbar. Naghatag siya kanato ug mga ehemplo sa hingpit nga paglikay, ug naghatag pahimangno nga, kon sundon, moresulta sa paghimo ug pagpreserbar sa kusog, kahanas, ug kahalangdon sa atong mga anak.”— The Signs of the Times, Abril 16, 1896.
b. Ihubit ang makapalagsik nga matang sa kinaiya nga gipakita ni Cristo sa tibook Niyang pag-ministeryo. Mateo 11:29.
“Gisugdan ni Jesus ang buhat sa repormasyon pinaagi sa pagduol sa suod nga simpatiya uban sa katawhan. Samtang Siya nagpakita sa labing dako nga pagtahud sa balaod sa Dios, Iyang gibadlong ang nagpakaaron-ingnon nga pagkadiosnon sa mga Fariseo, ug misulay sa pagpalingkawas sa mga tawo gikan sa walay hinungdan nga mga lagda nga naggapus kanila. Iyang gitinguha ang pagguba sa mga babag nga nagbulag sa lainlaing klase sa katilingban, aron nga Iyang matigom ang mga tawo ingon nga mga anak sa usa ka pamilya. Ang iyang pagtambong sa kombira sa kasal gidesinyo aron mahimong usa ka lakang ngadto sa paghimo niini.”— The Desire of Ages, p. 150.
“Gibadlong ni Jesus ang pagpatuyang sa kaugalingon sa tanang matang niini, apan Siya makigsandurot sa Iyang kinaiya. Gidawat niya ang pagkamaabiabihon sa tanan nga klase, nagabisita sa mga balay sa adunahan ug kabus, ang makinaadmanon ug ang walay alamag, ug nagtinguha sa pagpataas sa ilang mga hunahuna gikan sa mga pangutana sa ordinaryo nga kinabuhi ngadto niadtong mga butanga nga espirituhanon ug walay katapusan. Wala siya naghatag ug katugotan sa pagpatuyang sa kalingawan, ug walay landong sa kalibutanong kabuangan ang nakadaut sa Iyang paggawi; bisan pa niana Siya nakakaplag ug kalipay diha sa mga talan-awon sa inosente nga kalipayan, ug pinaagi sa Iyang presensya mitugot sa katilingbanon panagtapok. Ang kaminyoon sa mga Judeo maoy usa ka mabulokon nga okasyon, ug ang kalipay niini dili makapasilo sa Anak sa tawo. Pinaagi sa pagtambong niini nga kombira, gipasidunggan ni Jesus ang kaminyoon ingon nga usa ka balaanon nga tinukod.” — Ibid., pp. 150, 151.
Huebes
, Enero 16
5. MAHIMSUG SOSYAL NGA INTERAKSYON
a. Unsay atong makat-onan gikan sa panig-ingnan ni Cristo nga nagpaila Kaniya nga lahi sa relihiyoso nga mga pangulo sa Iyang kaadlawan? Proverbio 18:24.
“Ang ministeryo ni Cristo maoy usa ka klaro nga katugbang nianang sa mga pangulo sa Judeo. Ang ilang pagtagad sa tradisyon ug pormalismo nagdaut sa tanang matuod nga kagawasan sa hunahuna ug buhat. Sila nabuhi diha sa makanunayon nga kahadlok nga mahugawan. Aron sa paglikay nga makatandog sa ‘mahugaw,‘ sila kanunay magpalain, dili lamang gikan sa mga Gentil, kon dili gikan sa kadaghanan sa ilang kaugalingon nga katawhan, sa dili pagtinguha sa pagtabang kanila ni sa pagpakighigala kanila. Pinaagi sa kanunay nga pagpabilin dinhi niining mga butanga, ilang napa-inano ang ilang mga hunahuna ug nagpa-piut sa agianan sa ilang mga kinabuhi. Ang ilang panig-ingnan nagdasig sa pagpasigarbo sa kaugalingon ug pagkadili makisanduroton sa tanang matang sa mga tawo.”- The Desire of Ages, p. 150.
b. Unsa gyud ang atong tumong diha sa tanang sosyal nga interaksyon? Proverbio 11:30.
“Mapakita nato ang usa ka libo gamay nga pagtagad diha sa mahigalaon nga mga pulong ug makapahimuot nga tinan-awan, nga maipakita pag-usab dinhi kanato. Ang dili mahunahunaon nga mga Cristohanon maipakita pinaagi sa ilang pagpasibaya sa uban nga sila wala mahiusa uban kang Cristo. Imposible nga mahiusa kang Cristo apan dili mabination ngadto sa uban ug malimot sa ilang mga katungod.
“Kinahanglan kitang tanan mahimong mga saksi alang kang Jesus. Sosyal nga gahum, nga nabalaan pinaagi sa gracia ni Cristo, kinahanglan pauswagon diha sa pagdani sa mga kalag ngadto sa Manluluwas. Himoa nga ang kalibutan makakita nga kita wala natugob sa atong kaugalingong mga interes, kon dili nga kita nagtinguha sa uban sa pagpakig-ambit sa atong mga panalangin ug mga pribilehiyo. Ipakita kanila nga ang atong relihiyon wala maghimo kanato nga dili mabination o mapig-uton. Kinahanglan nga ang tanan nga nag-angkon nga nakakaplag kang Cristo magapangalagad sama sa Iyang gibuhat alang sa kaayohan sa mga tawo. Dili gayud nato ihatag sa kalibutan ang sayop nga impresyon nga ang mga Cristohanon usa ka masulub-on, dili malipayon nga mga tawo.”— The Adventist Home, p. 428.
Biernes
, Enero 17
PERSONAL SUBLI NGA MGA PANGUTANA
1. Ihulagway ang espirituhanong mga bunga nga nadala pinaagi sa milagro ni Cristo didto sa Cana.
2. Ihulagway ang relasyon tali ni Cristo ug sa Iyang inahan.
3. Nganong nagpakitag kahibulong ang nagdumala sa kombira?
4. Unsang matanga sa bino ang haom nga nagsimbolo sa dugo ni Cristo?
5. Diha sa sosyal nga mga pagtipon, unsay angay natong mahinumdoman gikan sa panig-ingnan ni Jesus?