1. “VA’AI FA’ALEAGAGA” FA’ALEAGAINA Ulua’i Aso Novema 24

a. O le a le mea leaga mata’utia e tatau ona tatou mataala i ai – ma aisea? Iakopo 3:14, 15. “O le tagata na te tatalaina atu lona loto i musumusuga a le fili, ma ia taliaina ai masalosaloga leaga, ma fa’apelepeleina ai le fuā, e masani lava ona ia fa’auigaseseina lenei mafaufau-leaga, ma ia fa’aigoaina ai o le va’ai-mamao fa’apitoa, iloaina o le eseesega, po’o le va’ai fa’aleagaga fo’i e iloa ai le agasala ma malamalama ai i faufauga leaga a isi. Ua ia manatu o se meaalofa tāua lava ua tu’uina atu ia te ia; ma ia vavae ese ai loa mai i uso tonu lava ia e tatau ona latou loto gatasi; na te a’e a’e i luga o le nofoa fa’amasino, ma tapunia lona loto i lona uso lea na te manatu o loo sese, e peisea’i o ia e lē mafai ona fa’aosoosoina. O Iesu ua vavae ese mai ia te ia, ma tu’ua ai loa o ia e savali i aloiafi na ia tutuina e ia lava.“Aua lava ne’i umi atu ona mitamita se tasi o outou e tete’e ai i le upu moni e ala i lona fa’ailoa mai e fa'apea, o lenei uiga o se i’uga tatau lea o le a’oa’iina ma le fa’amaoni o i latou e fai mea sese, ma le tula’i e puipuia le upu moni. O le poto e fa’apea le to’atele tagata e fiafia i ai, peita’i e matuā taufa’asese lava ma fa’amanu’alia ai. E lē sau mai i lugā, ae o le fua o se loto lē fa’afouina. O lē na amata mai ai, o Satani lava ia. Aua lava ne’i vi’ivi’ia e se tagata o loo tu’ua’iina isi, ia lava, i lona fai mai ua ia mauaina le va’ai fa’aleagaga; auā o lona faia fa’apena, na te fa’aofuina ai uiga o Satani i ofu o le amiotonu. Ou te vala’au atu ia te outou lo’u au uso, ina ia fa’amamāina le malumalu o le loto mai i nei mea uma lava e fa’aleagaina ai; auā o a’a nei o le ita tauimasui.” – The SDA Bible Commentary [E. G. White Comments], vol. 7, pp. 936, 937.

---

2. UIGA O’ONA E OTI AI Aso Gafua Novema 25

a. Fa’amatala le i’uga mautinoa o le ita loto leaga ma le fa’atupu maseiga. Iakopo 3:16. “O le tagata e to’atasi i totonu o se fa’alapotopotoga poo se ekalesia na te fa’atagaina manatu lē agalelei e ala i lona tautala leaga e fa’atatau i le au uso, e mafai ona ia save’uina a’e lagona sili ona leaga o le loto fa’aletagata, ma fa’asalalau atu ai se mea fa’afefete o le leaga, lea o le a galue i totonu o i latou uma lava o le a mafuta ma feso’ota’i ma ia. I lenei auala, o fili o le amiotonu uma ua ia maua le manumalo, ma o le i’uga o lana galuega, o le fa’alēaogaina lea o le tatalo a le Fa’aola ina ua Ia aioi ina ‘ia tasi Ona so’o e fa’apei ona tasi o Ia ma le Tamā.” – The SDA Bible Commentary [E. G. White Comments], vol. 7, p. 937. b. I le eseesega ma uiga fa’aletagata e osofia mai e le fili o ō tatou agaga, e fa’apefea ona tatau ona tatou galulue fa’atasi ma isi? Ioane 13:34. “Ua ē faia lau fa’ai’uga i luga o tagata ta’itasi, ma ē fa’ailoa ai ou manatu e fa’atatau i o latou ala ma a latou amio, ae e te lē iloa o latou olaga poo la latou galuega. E te va’ai i mea o loo tutupu mai i lou lava manatu, ma ua ē sauni ai loa e fesiligia pe ta’uleagaina le ala ua latou filifilia, e aunoa ma lou auiliiliina ma le fa’amaoni o le mataupu i itu uma. E leai sou iloa i tiute o isi, ma e lē tatau ona ē manatu e fa’amasinoina oe mo a latou gaioiga, peita’i, fai lou lava tiute, ae tu’u isi tagata i le Ali’i. Ia tausi lo outou agaga i le onosa’i, ia fa’atumau le filemu ma le to’a lelei o le mafaufau, ma ia ē fa’afetai. . . .“E te matuā tigā gofie, ma afai e tautalagia se upu e ta’uleleia ai se sini e ese mai i lea o loo ē mulimulita’ia, ua ē tigā. Ua ē lagona ua tu’ua’iina oe, ma e tatau ona ē puipuia oe, ma lavea’i lou ola; ma i lau taumafaiga finafinau ina ia lavea’iina lou ola, ua ē lē maua ai lou ola. Ua ia te oe se galuega e tatau ona ē faia ina ia ē oti ia te oe lava, ma ia fausiaina a’e se uiga o le fa’apalepale ma le onosa’i.” – Testimonies for the Church, vol. 2, p. 424.“O i latou e faitioina ma ta’usesēina e le tasi le tasi, o loo latou talepeina poloa’iga a le Atua, ma o i latou o se mea inosia ia te Ia. Latou te lē alolofa i le Atua po’o o latou uso a tagata. Tuagane ma uso, ia tatou fa’amamā ese le lapisi o faitioga ma masalosaloga ma muimuiga, ma aua e te māitaita gofie. O nisi e matuā a’afia gofie, o lea e lē mafai ai ona fa’amalamalamaina. Ia matuā faigofie ona vave lou lē fiafia e fa’atatau i le uiga tonu o le tausiaina o le tulafono a le Atua, po’o ē tausia poo ē solia fo’i le tulafono. O le mea lenei o loo finagalo le Atua ina ia tatou ma’ale’ale gofie ai.” – The SDA Bible Commentary [E. G. White Comments], vol. 7, p. 937.

---

3. FOFŌINA O MATAUPU E LĒ FA’AMALIEINA AI Aso Lua Novema 26

a. O le a se mea o loo tusia e fa’atatau ia i latou e alolofa i le tulafono a le Atua? Salamo 119:165. “Fa’agalo le manatu e fa’apea e lē o sa’o le fa’aaogaina o oe, ma fa’apea ua ta’useseina oe, ma e i ai se tagata o loo mana’o na te maitauina oe pe fa’amanu’aliaina fo’i oe. O loo ē va’ai e ala atu i mata sese. E ta’ita’ia oe e Satani ina ia ē taliaina nei manatu fa’aseseina e fa’atatau i mea o loo tutupu.” – Testimonies for the Church, vol. 2, p. 424.“O le lalolagi e fiafia i le agasala, ma inoino i le amiotonu, ma o le mafua’aga lenei o lona ita ia Iesu. O i latou uma lava e te’ena Lona alofa lē mafuatia, o le a latou manatu o le fa’akerisiano o se mea lea e fa’alavelaveina ai. O le malamalama o Keriso e tafieseina ai le pogisa o loo ufitia ai a latou agasala, ma o le mana’omia o le toe fuata’iga, ua fa’aalia. A’o amata ona fai taua i latou e gaua’i i le a’afiaga o le Agaga Paia, ia i latou lava, a’o i latou e pipi’i atu i le agasala, latou te fai taua atu i le upu moni ma i latou o loo fa’atusalia mai le upu moni.“Ua fa’apena ona foafoaina fete’ena’iga, ma o so’o o Keriso ua tu’ua’iina e fa’apea o i latou o loo fa’atupu fa’alavelave i tagata. Peita’i, o le mafuta fa’atasi ma le Atua lea e aumaia ai ia i latou le feitaga’i ma le lalolagi. O loo latou tauaveina le tu’ua’iga o Keriso. O loo latou savalia le ala na savalia e Lē e silisili Lona amio lelei i le lalolagi. E lē o le fa’anoanoa, ae o le olioli, e tatau ona latou fetaia’i ai ma sauāga. O tofotofoga ta’itasi e pei o le afi, o le mea faigaluega lea a le Atua mo le fufuluina o i latou. O tofotofoga ta’itasi nei o loo saunia ai i latou mo la latou galuega o le avea ma tagata faigaluega fa’atasi ma Ia. O tauiviga ta’itasi e i ai lona nofoaga i le taua tele mo le amiotonu, ma o tauiviga ta’itasi fo’i nei, o le a fa’aopoopo i le olioliga o lo latou manumalo mulimuli. O lo malamalama la i lenei sini, o le tofotofoga o lo latou fa’atuatua ma lo latou onosa’i, o le a taliaina ma le fiafia, ae lē o le fefe i ai ma ‘alo ese mai ai.” – The Desire of Ages, p. 306. b. A agaleagaina moni lava i tatou i se tulaga fa’aitū’au, o le a se mea ua fa’amanatuina mai ia i tatou? Mataio 5:11, 12, 41; 1 Peteru 4:12-15. “O Ia, o le Ulu fa’aleatua o le ekalesia, o le toa manumalo sili ona malosi, Na te finagalo e fa’asino atu Ona so’o i Lona soifuaga, i Ana galuega faigata, o Lona olaga fa’afitia e Ia o Ia lava, o Ana tauiviga, ma Ona puapuaga, e ala i le fa’atauemu, e ala i le te’ena o Ia, amusia, upu faifai, sauāina, inosiaina, o tu’ua’iga sese i le ala aga’i atu i luga i Kalevario i le va’aiga o le fa’asatauroga, ina ia fa’alototeleina ai i latou ia aga’i pea i luma i le tini, mo le fa’ailoga ma le taui o le tagata manumalo. O le manumalo ua fa’amautinoa mai e ala i le fa’atuatua ma le usita’i. Ia tatou fa’atatauina ma fa’atinoina loa upu a Keriso i o tatou lava olaga ta’ito’atasi.” – The Review and Herald, July 24, 1888.

---

4. POTO MAI I LUGĀ Aso Lulu Novema 27

a. O le a le uiga muamua lava o le poto mai i le lagi – ma aisea e aogā tele ai lenei poto mo i tatou? Iakopo 3:17 (vaega muamua); Mataio 5:8. “O le a lē ulufale atu lava i totonu o le aai a le Atua se mea leaga. O i latou uma o le a nonofo ai iina, o le a mamā muamua ō latou loto iinei. I totonu o lē o loo a’oga mai ia Iesu, o le a fa’aalia ai se inoino fa’atupulaia mo uiga fa’atautala lē fa’autauta, o gagana lē taupulea, ma manatunatuga lē mafaufau. A afio Keriso i totonu o le loto, o le a i ai le mamā ma le fa’aleleia atili o manatunatuga ma uiga.“Peita’i o upu a Iesu, ‘Amuia ē e loto mamā,’ e i ai lona uiga e sili atu ona loloto – e lē na o le mamā i le uiga lea e malamalama ai le lalolagi i le mamā, a’o le sa’oloto mai i uiga o lagona o le tino, mamā mai i le tu’inanau, ae e moni lava i sini ma mafua’aga lilo o le loto, sa’oloto mai i le fa’amaualuga ma le sa’ili’ili o le tagata mo ia lava, ae agamalu, lē fa’apito, ma e fa’apei o se tamaitiiti.” – Thoughts From the Mount of Blessing, pp. 24, 25. b. Fa’amatala poo le a la tatou autū e tatau ona i ai i la tatou sauniuniga mo Keriso. 1 Ioane 3:2, 3. “I lo tatou olaga i aso ta’itasi, tatou te iloa ai le lelei o le [Atua] ma Lona alofa mutimutivale i le fa’aaliga o Lana ta’ita’iga. Tatou te iloa o Ia i le amio a Lona Alo. E ave e le Agaga Paia le upu moni e fa’atatau i le Atua ma Lē na Ia auina mai, ma tatala atu i le malamalama’aga ma le loto. O ē e mamā o latou loto, latou te va’ai i le Atua i se so’otaga fou fa’apelepeleina, e avea ma o latou Fa’aola; ma a’o latou va’aia la le mamā ma le matagofie o Lana amio, latou te fa’anaunau ai ina ia latou lafoia atu Lona fa’atusa. Latou te va’ai ia te Ia e fa’apei o se Tamā o loo naunau e fusi atu i se atali’i ua salamō, ma o ō latou loto ua fa’atumulia i le olioli e lē mafa’amatalaina ma tumu i le mamalu.“O ē mamā ō latou loto latou te iloa le Atua foafoa i galuega a Lona aao malosi, i mea matagofie o loo aofia uma i le iunivesa. I totonu o Lana upu tusia latou te faitauina ai i laina sili atu ona manino, le fa’aaliga o Lona alofa mutimutivale e umi ona puapuagatia, o Lona agalelei, ma Lona alofa tunoa. O upu moni o loo natia mai i ē popoto ma atamamai, o loo fa’aalia i pepe poo tama meamea. O le matagofie ma le tāua tele o upu moni ia e lē iloa e tagata popoto fa’alelalolagi, o loo fa’aalia i taimi uma lava ia i latou e i ai le fa’anaunauga talitonu fa’alagolago e fa’apei o se tamaitiiti, ina ia iloa ma ‘ia faia le finagalo o le Atua. Tatou te iloa le upu moni e ala i lo tatou tofusia i le natura fa’alelagi.“O i latou e mamā o latou loto, latou te ola e peisea’i o loo latou i ai i luma tonu lava o le silafaga va’aia a le Atua i le taimi lea ua Ia foa’iina mai ia i latou i lenei lalolagi.” – Ibid., pp. 26, 27.

---

5. UIGA TĀUA E SILI ATU ONA TELE Aso Tofi Novema 28

a. A mavae le uiga mamā, ta’u mai uiga e lima o loo soso’o mai o le poto na fanaua mai e le lagi – a aunoa ma le poto lea, ua lē aogā lo tatou a’afiaga. Iakopo 3:17 (vaega ogatotonu). “E te mana’omia le agalelei, fa’aaloalo, agamalu, ma le loto maulalo o Keriso. O loo ia te oe agava’a tāua e tele lava ia e mafai ona fa’aatoatoaina mo auaunaga silisili lava, pe afai e fa’apaiaina i le Atua. E tatau ona ē lagonaina le tāua o lou fa’alatalata atu i lou au uso i le agalelei ma le fa’aaloalo, ae lē o le sauā ma le loto ma’a’a. E te lē o iloaina le manu’a e te faia e ala i lou uiga ita, fia pule ia i latou. O faifeau i le tou koneferenisi ua fa’avaivaia, ma leiloa ese atu ai le loto tele na latou ono maua pe ana ē tu’uina atu ia i latou le fa’aaloalo, agalelei, mautinoaga, ma le alofa. O lou uiga aga’i ia i latou, ua ē vavaeeseina ai loto o lou au uso mai ia te oe, o lea ua lē tele ai se a’afiaga o lau fautuaga ia i latou mo le lelei.” – Christian Leadership, pp. 6, 7.“Afai e lē o taunu’u mea o loo ē mana’o e faia, o le a lamatiaina oe i lou fa’avaivai ma lē onosa’i, ma ē mana’o ai loa i se suiga. E tatau ona ē inoino i se uiga o le faitio, ma le tulei i lalo. Ia ē taumamao lava mai i mea uma e fa’aalia ai le uiga o le taufa’aleaga. E lē o fiafia mai le finagalo o le Atua mo lenei uiga i le maua i totonu o so’o se tasi o Ana auauna ua umi tausaga o lona iloa. E fetaui mo se talavou, pe afai e fa’aofuina i le agamalu ma teuga i totonu, lona fa’aaliaina o le finafinau ma le vilivilita’i; peita’i a fa’aalia loa se vilivilita'i fa’ata’alise ma se uiga taufa’aleaga e se talavou e na o ni nai tausaga itiiti lava le umi o lona iloa i le auaunaga, e matuā lē fetaui lava ma inosiaina. E leai se mea e mafai ona vave le fa’aumatiaina ai o lona a’afiaga, nai lo lenei. O le uiga agamalu, alofa agalelei, onosa’i, umi ona puapuagatia, e lē ita gofie, e onosa’i i mea uma, e fa’amoemoe i mea uma, e tumau onosa’i i mea uma – o fua nei o loo fua mai i luga o le la’au tāua tele o le alofa, lea e mai le lagi lona ulua’i tupu a’e. O lenei la’au, afai e fafagaina lelei, o le a fa’amaonia o se la’au e tumau le lanu meamata o ona lau i tau eseese uma lava. O ona lālā o le a lē pala, o ona lau o le a lē mamae. E ola e fa’avavau, e fuiina i taimi uma e matāua o le lagi.” – Testimonies for the Church, vol. 2, pp. 134, 135.

FESILI TOE FA’AMANATU Aso Faraile Novema 29

1. O a mea e tutupu o loo fa’aosoosoina ai a’u ina ia ou fa’amasino i mafua’aga o gaioiga a isi tagata, ma ou fa’aigoaina ai lo’u uiga fa’amasino o le va’ai fa’aleagaga? 2. E fa’apefea ona solia poloa’iga a le Atua e le masaniga o le faitio i isi? 3. A lafo loa aga’i mai ia te a’u uiga o’ona e oti ai, o le a se mea e tatau ona ou manatua? 4. O le a le uiga o le “mamā i totonu o le loto”? 5. E fa’apefea ona mafai ona ou maua le uiga fa’auo – e faigofie ona “fa’atauanauina”?