Kwasiɖagbe
Kele 13 lia
1. NUSI NANA TSITSI LE GBƆGBƆME
a. Gblɔ ale si Yakobo 1:2 ate ŋu ava eme le mía me ƒe nya ɣaɣla. Nexemya 8:10 .
“Dodokpɔ siwo katã woaxɔ abe nufiafia ene la ahe dzidzɔ vɛ. Subɔsubɔgbenɔnɔ bliboa anye nusi doa ame ɖe dzi, si ade bubu ame ŋu, aʋẽ lilili kple nya nyuiwo kple dɔwɔwɔwo. Edzɔa dzi na futɔa ŋutɔ be luʋɔwo lé blanui, woƒe dzi gbã, wole konyi fam hele hũ ɖem; edi be amewo nakpɔ ŋusẽ ɖe míaƒe xɔse ƒe ŋusẽkpɔɖeamedzi dzi nenema tututu. Gake Mawu meɖoe be ame ƒe susu na nɔ ɖoƒe si ke abɔbɔ te ɖe anyi o. Edi be luʋɔ ɖe sia ɖe naɖu dzi le Ðela la ƒe ŋusẽ me léle ɖe asi me.”— Testimonies for the Church, babla 6, axa 365, 366.
b. Nukatae Mawu ɖea mɔ be dodokpɔwo woava mía dzi? Yakobo 1:3; Romatɔwo 5:3 .
“Ne míeɖu míaƒe dodokpɔwo dzi eye míeɖu Satana ƒe tetekpɔwo dzi la, ekema míedoa dzi le míaƒe xɔse ƒe dodokpɔ si xɔ asi wu sika la me, eye míesẽna wu eye míedzrana ɖo nyuie wu be míado go esi kplɔe ɖo. Gake ne míenyrɔ ɖe anyigba eye míeɖe mɔ na Satana ƒe tetekpɔwo la, míagbɔdzɔ eye míagakpɔ fetu aɖeke ɖe dodokpɔa ta o eye míadzra ɖo nyuie nenema gbegbe ɖe esi kplɔe ɖo ŋu o. To mɔ sia dzi la, míagbɔdzɔ ɖe edzi, va se ɖe esime Satana nakplɔ mí aboyoe le eƒe lɔlɔ̃nu nu. Ele be Mawu ƒe aʋawɔnu bliboa nanɔ mía si eye míanɔ dzadzraɖodzi ɣesiaɣi ɖe avuwɔwɔ kple viviti ƒe ŋusẽwo ŋu.”— Early Writings, axa 46.
Dzoɖagbe
Kele 14 lia
2. METSONU NYUIWO WU SIWÒ MÍESUSU
a. Ðe viɖe siwo le dzigbɔɖi me. Yakobo 1:4; Luka 21:19.
“Mawu nye nunyala kple ame nyui akpa be wòaɖo míaƒe gbedodoɖawo ŋu ɣesiaɣi le ɣeyiɣi si tututu míedi nu. Awɔ geɖe wu eye wòanyo na mí wu be wòana míaƒe didiwo katã nava eme. Eye esi míate ŋu aka ɖe Eƒe nunya kple lɔlɔ̃ dzi ta la, mele be míabiae be wòalɔ̃ ɖe míaƒe lɔlɔ̃nu dzi o, ke boŋ ele be míadi be míage ɖe Eƒe tameɖoɖo me ahawɔe wòava eme. Ele be míaƒe didiwo kple nusiwo me míetsɔ ɖe le nabu le Eƒe lɔlɔ̃nu me. Numetoto siawo siwo doa xɔse kpɔna la ɖea vi na mí. Woawo dzi woɖenɛ fiana nenye be míaƒe xɔse nye nyateƒe eye wònye anukwareɖe, enɔ te ɖe Mawu ƒe nya ɖeɖeko dzi, alo nenye be le nɔnɔmewo nu la, kakaɖedzi mele eŋu o eye wòtrɔna. Dɔwɔwɔ doa ŋusẽ xɔse. Ele be míana dzigbɔɖi nawɔ eƒe dɔ blibo, eye míaɖo ŋku edzi be ŋugbedodo xɔasiwo le Ŋɔŋlɔawo me na amesiwo le Aƒetɔ lalam.”— The Ministry of Healing, axa 231.
b. Aleke Yakobo ɖe nɔnɔmetata si lolo wu ɣeyiɣi kpui aɖe ƒe nukpɔsusu dzrodzro ko le ŋusẽ kple nudzedziname ŋu le xexe gbegblẽ sia me fia mí eye nukatae? Yakobo 1:9–11.
“Le ɣeyiɣi sia me, hafi xaxa mamlɛtɔ gã la nava, abe alesi wònɔ do ŋgɔ na xexeame ƒe tsɔtsrɔ̃ gbãtɔ ene la, amegbetɔwo ƒo wo ɖokui ɖe vivisesewo kple sidzedzenuwo yometiti me. Esi nusiwo wokpɔna kple nusiwo nɔa anyi ɣeyiɣi kpui aɖe ƒe nu le dzi na wo ta la, woƒe ŋku bu nusiwo womekpɔna o kple esiwo nɔa anyi tegbee ŋu. Le nusiwo tsrɔ̃na ne wozã wo ta la, kesinɔnu siwo megblẽna o tsɔm sa vɔe. Ele be woado woƒe susu ɖe dzi, woakeke woƒe agbe nukpɔsusu ɖe dzi. Ele be wonyɔ wo tso xexeame ƒe drɔ̃ekuku ƒe kuviawɔwɔ me.
“Tso dukɔwo ƒe dziyiyi kple anyidzedze abe alesi woɖee fia kɔte le Agbalẽ Kɔkɔe ƒe axawo dzi ene la, ele be woasrɔ̃ alesi viɖe aɖeke mele gotagome kple xexeame ƒe ŋutikɔkɔe dzro ko ŋu o. Babilon, kple eƒe ŋusẽ kple eƒe gãnyenye katã, si tɔgbi míaƒe xexeame mekpɔ kpɔ tso ɣemaɣi o—ŋusẽ kple gãnyenye si dze abe ɖe wòli ke eye wònɔa anyi ɖaa na ɣemaɣi me tɔwo ene—aleke gbegbe wòva yi keŋkeŋ enye si! Abe ‘gbe ƒe seƒoƒo’ ene la, etsrɔ̃. Aleae nusiwo katã Mawu me nye gɔmeɖokpe na o la tsrɔ̃na. Nusi bla ɖe Eƒe tameɖoɖo ŋu eye wòɖea Eƒe nɔnɔme fiana koe ate ŋu nɔa nyi. Eƒe gɔmeɖosewo koe nye nusiwo li ke míaƒe xexeame .”— Education, axa 183.
“Xexeame ƒe kesinɔnuwo nu yina ɣeyiɣi kpui aɖe ko. Kristo dzi koe míate ŋu akpɔ kesinɔnu mavɔwo.”— The Review and Herald, December 10, 1901.
Braɖagbe
Kele 15 lia
3. LE AƲA ƑE DZOXƆXƆME ME
a. Le tetekpɔwo me toto me la, nukae wòle be míawɔ le gbedodoɖa me, eye nukatae? Yakobo 1:12 .
“Miɖe aʋatsokaka kple ŋusẽkpɔɖeamedzi ɖesiaɖe ɖa. Wɔ wò amenyenye si le dzɔdzɔme nu bɔbɔe . Mito nyateƒe le tamesusu kple nya kple nuwɔna ɖesiaɖe me, eye ‘le ɖokuibɔbɔ me la, amesiame nabu ame bubu be enyo wu wo ɖokui.’ Ðo ŋku edzi ɣesiaɣi be ele be woatsɔ ŋudzɔnɔnɔ kple gbedodoɖa ɣesiaɣi ado ŋusẽ agbenyuinɔnɔ ƒe nɔnɔmea. Zi alesi nèle ŋku lém ɖe Kristo ŋu ko la, èle dedie; gake ne èbu wò vɔsawo kple kuxi sesẽwo ŋu, eye nèdze veveseseɖeamenu kple alɔ̃dɔdɔ gɔme ko la, mègaka ɖe Mawu dzi o eye nèɖoa afɔku gã aɖe me.”— Testimonies for the Church, babla 4, axa 522.
“Ele be míayi ŋgɔ madzudzɔmadzudzɔe, dzi alo mɔkpɔkpɔ aɖeke magabu gbeɖe le dɔ nyui la me o, ne dodokpɔ kakee ɖale míaƒe mɔ dzi, vevesese ƒe viviti ka kee aƒo xlã mí. Dzigbɔɖi, xɔse, kple lɔlɔ̃ na dɔdoasi nye nusɔsrɔ̃ siwo wòle be míasrɔ̃. Ðokuibɔbɔ kple ŋkuléle ɖe Yesu ŋu nye gbesiagbedɔ. Aƒetɔ la magblẽ luʋɔ si ɖoa ŋu ɖe eŋu eye wòdia eƒe kpekpeɖeŋu la ɖi gbeɖe o. Agbefiakuku la nɔa aʋadziɖula ƒe mo dzi ko.”—Ibid., babla 51, axa 70, 71.
b. Nukatae wònye nu gbegblẽ be míagblɔ be Mawu ɖoa dodokpɔwo kple tetekpɔwo ɖa? Yakobo 1:13 .
“Mele be míadze agbagba aɖe míaƒe fɔɖiɖi dzi akpɔtɔ to nuvɔ̃ taflatsedodo me o. Ele be míalɔ̃ ɖe alesi Mawu bu nuvɔ̃e dzi, eye esia kpe vavã. Kalvari ɖeɖe koe ate ŋu aɖe nuvɔ̃ ƒe lolome dziŋɔ la afia. . .
“Tetekpɔ nye nuvɔ̃ ƒe ameblenu, eye esia metsoa Mawu gbɔ o, ke boŋ Satana kple mía ŋutɔwo míaƒe dzi ƒe vɔ̃ gbɔe wòtso. ‚Womate ŋu ate Mawu akpɔ kple nuvɔ̃ o, ke Eya ŋutɔ la metea amea ɖeke kpɔna o.’ Yakobo 1:13, RV
“Satana le didim be yeakplɔ mí ade tetekpɔ me, ale be míaƒe nɔnɔme ƒe vɔ̃ɖinyenye nadze le amewo kple mawudɔlawo ŋkume, bena wòagblɔ be ye tɔe míenye. . . . Futɔ la kplɔa mí yia nuvɔ̃ me, eye emegbe wòtsoa mía nu le dziƒo xexeame katã ŋkume be míedze na Mawu ƒe lɔlɔ̃ o.”— Thoughts From the Mount of Blessing, axa 116, 117.
c. Ne nutsola la dze míaƒe nɔnɔme si ŋu ɖiƒoƒo le dzi la, aleke Aƒetɔ la ʋlia mía tae? Zaxarya 3:1–4; Yohanes I, 1:9–2:1.
Kuɖagbe
Kele 16 lia
4. MAWU ƑE ŊUSẼ LE MÍAƑE GBƆDZƆGBƆDZƆ ME
a. Ðe nyagbɔgblɔ si le Aƒetɔ la ƒe gbedodoɖa me be, “Mègakplɔ mí yi ɖe tetekpɔ me o” la me. Mateo 6:13 (afã gbãtɔ); Yesaya 30:21.
“[Mawu] ɖe mɔ na mí be míado go mɔxenuwo, yometiti, kple nɔnɔme sesẽwo, menye abe fiƒode ene o, ke boŋ abe yayra gãtɔ kekeake le míaƒe agbe me ene. Tetekpɔ ɖesiaɖe si ŋu wotsi tre ɖo, dodokpɔ ɖesiaɖe si wotsɔ kple dzideƒo, naa numetoto yeye mí eye wòdoa mí ɖe ŋgɔ le amenyenye tutuɖodɔa me. Luʋɔ si to Mawu ƒe ŋusẽ dzi tsia tre ɖe tetekpɔ ŋu la ɖea Kristo ƒe amenuveve ƒe dɔwɔwɔ nyuie fiana xexeame kple dziƒo xexeame katã.
“Gake togbɔ be mele be dodokpɔ nado dziku na mí o, aleke vevesese anɔ hã la, ele be míado gbe ɖa be Mawu nagaɖe mɔ be waòkplɔ mí ava afisi mía ŋutɔwo míaƒe dzi vɔ̃wo ƒe nudzodzrowo ahe mí yi o. Le gbedodoɖa si Kristo do la wɔwɔ me la, míetsɔa mía ɖokui na Mawu ƒe mɔfiafia, hebianɛ be wòakplɔ mí ayi mɔ siwo le dedie dzi. Míate ŋu ado gbe sia le anukwareɖiɖi me, eye ke hã míatso nya me be míazɔ le mɔ ɖesiaɖe si mía ŋutɔwo míedi nu o. Míalala be Eƒe asi nakplɔ mí. . . .
“Mele dedie be míanɔ ŋugble dem le viɖe siwo míakpɔ to ɖokuibɔbɔ ɖe Satana ƒe aɖaŋuɖoɖowo dzi me o. Nuvɔ̃ hea bubumademade kple afɔku va luʋɔ ɖesiaɖe si ɖe asi le eɖokui ŋti nee dzi; gake alesi egbãa ŋku na ame eye wòblea ame le eƒe nɔnɔme me la, edzena le nudzroame ƒe nɔnɔme me. Ne míetsɔ mía ɖokui de Satana ƒe anyigba dzi la, kakaɖedzi aɖeke mele mía si be míanɔ dedie tso eƒe ŋusẽ me o. Ne míateŋui ko la, ele be míatu mɔ ɖesiaɖe si dzi tetekpɔla ate ŋu ato akpɔ mɔ age ɖe mía gbɔ.
“Gbedodoɖa be, ‘Mègakplɔ mí yi ɖe tetekpɔ me o’ la ŋutɔ nye ŋugbedodo.”— Thoughts From the Mount of Blessing, axa 117, 118.
b. Nyaƒoɖeamenu kple kakaɖedzi kae Mawu na mí ku ɖe tetekpɔ ŋu? Yakobo 1:14–16; Korintotɔwo I, 10:13.
“Nukae nye tetekpɔ? Enye mɔ si dzi woato ado amesiwo gblɔna be yewonye Mawu viwo kpɔ hedrɔ̃a ʋɔnu wo. Míexlẽ be Mawu te Abraham kpɔ, be Ete Israel-viwo kpɔ. Esia fia be Eɖe mɔ nɔnɔmewo dzɔ be woatsɔ ado woƒe xɔse akpɔ eye wòana woakpɔ mɔ na Eyama be wòakpe ɖe yewo ŋu. Mawu ɖe mɔ na tetekpɔ be wòava eƒe amewo gbɔ egbea ale be woakpɔe adze sii be ye enye woƒe kpeɖeŋutɔ. Ne wote ɖe Eŋu le wo ƒe tetekpɔme la, edoa ŋusẽ wo be woakpe akɔ kple tetekpɔa.”— In Heavenly Places, axa 251.
Yawoɖagbe
Kele 17 lia
5. DODOKPƆWO LE GƆ
a. Be míanɔ Kristo me eye míato esia me aɖe mí tso tetekpɔwo me la, nukae wòle be míatia ɣesiaɣi? Luka 4:8; Filipitɔwo 1:21.
“Tetekpɔla mate ŋu azi mía dzi gbeɖe be míawɔ vɔ̃ o. Mate ŋu aɖu susuwo dzi o negbe ɖe woɖe asi le wo ŋu le eƒe ŋusẽ te hafi. Ele be lɔlɔ̃nu nalɔ̃ ɖe edzi, ele be xɔse naɖe asi le eƒe asiléle ɖe Kristo ŋu ŋu, hafi Satana nate ŋu awɔ eƒe ŋusẽ ŋudɔ ɖe mía dzi. Gake nuvɔ̃ ƒe dzodzro ɖesiaɖe si ŋu míedea asixɔxɔe la naa afɔɖoƒe nɛ. Teƒe ɖesiaɖe si me míedo kpo Mawu ƒe dzidzenua gbɔ ɖoɖo le la nye ʋɔtru si le ʋuʋu ɖi si dzi wòato age ɖe eme ate mí kpɔ ahatsrɔ̃ mí. Eye míaƒe kpododonu alo gege ɖesiaɖe naa mɔnukpɔkpɔe wòdoa vlo Kristo.”— The Desire of Ages, axa 125.
b. Nukae wòle be wòaʋã mí be míayi ŋgɔ ayi aʋadziɖuɖu le Kristo me? Filipitɔwo 4:13; Nyaɖeɖefia 2:10 (akpa mamlɛtɔ); 3:21.
“Amesi Kristo ƒe Gbɔgbɔ yɔ fũu la, nɔa Kristo me. Nusianu si woɖo ɖe eŋu la dze Ðela la dzi, amesi tsɔ Eƒe anyinɔnɔ ƒo xlãe. Nusianu si ava egbɔ la tso Kristo gbɔ. Mehiã be wòatsi tre ɖe vɔ̃ɖinyenye ŋu o, elabena Kristoe nye eƒe akpoxɔnu. Naneke mate ŋu aka asi eŋu o negbe ɖe mía Aƒetɔ la ɖe mɔ nɛ ko, eye ‘nusiwo katã’ siwo ŋu woɖe mɔ le la ‘wɔa dɔ ɖekae hena nyuiwɔwɔ na amesiwo lɔ̃a Mawu.’ Romatɔwo 8:28.”— Thoughts From the Mount of Blessing, axa 71.
“Agbefiakuku la nɔa aʋadziɖula ƒe ta dzi ko. Na amesiame la, dɔ vevie aɖe li na Mawu esime agbe kpɔtɔ li ko.”— Testimonies for the Church, babla 5, axa 71.
Fiɖagbe
Kele 18 lia
AME ÐOKUI ƑE NYABIASEWO
1. Nu ka dzie wòle be maɖo ŋkui ɣebubuɣi si dodokpɔ sesẽ aɖe ava dzinye?
2. Nukae wòle be made dzesii le alesi Mawu ɖoa gbedodoɖa ŋui ŋu?
3. Afikae dodokpɔwo kple tetekpɔwo tsona, eye nukatae?
4. Nukae dzɔna ɣesiaɣi si míetsi tre ɖe tetekpɔ ŋu?
5. Aleke mawɔ anɔ Kristo me bliboe wu?