Xɔse Kple Lɔlɔ̃ Ðe Edzi Kpukpui Srɔ̃gblɔ: “Mana dzi yeye mi, eye maɖe gbɔgbɔ yeye mia me, maɖe kpedzi la le miaƒe dɔ me, eye mana lãkusidzi mi.” (Xezekiel 36:26).
Nuxexlẽ si wona:
Steps to Christ, ta 6, axa 49–55.
“ Màte ŋu alé avu ɖe wò nuvɔ̃ siwo nèwɔ va yi la ta o, màte ŋu atrɔ wò dzi ahawɔ ɖokuiwò kɔkɔe o. Ke Mawu do ŋugbe be yeawɔ nusiawo katã na wò to Kristo dzi. ”— Steps to Christ, axa 51.
1. TSƆTSƆKE KPLE ŊUTIFAFA Kwa, Das 2
a. Nukae nye Mawu ƒe ŋugbedodo wɔnuku si nye tsɔtsɔke kple ŋutifafa? 1. 1. Yohanes 1:9.“ Èkpɔe be ɖokuitɔdidi kple nuvɔ̃ yɔ wò agbe me fũ. Èdi vevie be woatsɔe ake ye, be woakɔ ye ŋu, be woaɖe asi le ye ŋu. Ðekawɔwɔ kple Mawu, abe Eyama ene — nukae nàte ŋu awɔ be wòasu asiwò?“ Ŋutifafae nèhiã — Dziƒo ƒe tsɔtsɔke kple ŋutifafa kple lɔlɔ̃ le luʋɔ me. Ga mate ŋu aƒlee o, nunya mate ŋu aƒlee o, nunya mate ŋu aɖo egbɔ o; màte ŋu akpɔ mɔ gbeɖe o, to wò ŋutɔ wò agbagbadzedzewo me, be yeade egbɔ o, Gake Mawu tsɔe na wò abe nunana ene, ' ga manɔmee eye asixɔxɔ manɔmee. ' Yesaya 55:1. Wò ŋutɔ tɔe wònye ne èdo asi ɖa eye lée ɖe asi ”— Steps to Christ, axa 49.b. Nukae nye ŋugbedodo vevi bubu si atrɔ ame bliboa wòazu ame yeye le ɖekawɔwɔ me kple Mawu? Ezekiel 36:26.“ Èʋu wò nuvɔ̃wo me, eye nèɖe wo ɖa le dzi me. Èɖoe be yeatsɔ ye ɖokui ana Mawu. Fifia zɔ yi egbɔ, eye nàbia be wòaklɔ wò nuvɔ̃wo ɖa, eye wòana dzi yeye wò. Ekema xɔe se be ewɔa esia elabena edo ŋugbe . Esiae nye nusɔsrɔ̃ si Yesu fia esime wònɔ anyigba dzi, be nunana si ƒe ŋugbe Mawu do na mí la, ele be míaxɔe ase be míexɔe, eye mía tɔe wònye. ”—Afim., axa 49,50 [Agbalẽŋlɔla ƒe nuŋɔŋlɔ si woŋlɔ kple asi.]
2. AGBE TO KRISTO DZI Dzo, Das 3
a. Nukae Yesu gblɔ na lãmetututɔ si nɔ Betesda la be wòawɔ, eye nukae míate ŋu asrɔ̃ tso nuteƒekpɔkpɔ sia me? Yohanes 5:1–9.“Mina míatrɔ ɖe lãmetututɔ si nɔ Betesda ƒe ŋutinya ŋu. Ame dahe si le fu kpem la mewɔ naneke o; mezã eƒe abɔwo kple afɔwo o ƒe blaetɔ̃ vɔ enyi sɔŋ. Ke hã Yesu de se nɛ be, ‘Tso, tsɔ wò aba, eye nàzɔ. ‘Dɔnɔ ate ŋu agblɔ be, ‘Aƒetɔ ne Èna nye lãme sẽ la, maɖo to Wò nya. ‘Gake, ao, exɔ Kristo ƒe nya dzi se, exɔe se be yeƒe lãme sẽ, eye wòdze agbagba zi ɖeka; edi be yeazɔ, eye wòzɔ hã. Ewɔ nu ɖe Kristo ƒe nya nu, eye Mawu na ŋusẽ. Wowɔe wòzu ame blibo.”—Steps to Christ, axa 50.“ Yesu mena kakaɖedzi aɖekee be Mawu nakpe ɖe eŋu o. Ŋutsua ate ŋu atɔ ɖi ɖikeke, eye mɔnukpɔkpɔ ɖeka si su esi be wòada gbe le eŋu la bu. Gake exɔ Kristo ƒe nya dzi se, eye le edziwɔwɔ me la, ŋusẽ su esi.“To xɔse ma ke dzi la, míate ŋu axɔ gbɔgbɔmedɔyɔyɔ. To nuvɔ̃ me la, woɖe mí ɖa le Mawu ƒe agbe me. Míaƒe luʋɔwo le lãmetutudɔ lém. Le mía ŋutɔwo gome la, míate ŋu anɔ agbe kɔkɔe abe alesi ŋutsu ŋusẽmanɔsitɔ la te ŋu zɔnae ene o. Ame geɖewo li siwo kpɔa woƒe kpekpeɖeŋumanɔamesi dzea sii, eye gbɔgbɔmegbenɔnɔ ma si ana woawɔ ɖeka kple Mawu la dzroa wo vevie; wole agbagba dzem dzodzro be yewoakpɔe. Le mɔkpɔkpɔbuɖeame me la, wodoa ɣli be, ‘Oo ame nublanuitɔ, si menye! ame kae aɖem tso ku ƒe ŋutilã sia me? ‘Romatɔwo 7:24, axadzi. Na mɔkpɔkpɔbuɖeametɔ siawo, siwo le agbagba dzem la, nafɔ mo dzi. Ðela la le bɔbɔm ɖe Eƒe ʋu ƒeƒle ŋu, hele gbɔgblɔm kple veveseseɖeamenu kple nublanuikpɔkpɔ si womate ŋu agblɔ o be, ‘Ðe ne dzi be yàhayaa? ‘Ebia tso asiwò be nàtso le lãmesẽ kple ŋutifafa me.”—The Desire of Ages, axa 203.b. Nukae wodo ŋugbe na nuvɔ̃wɔla to Kristo dzi? 2. 2. Kronika 7:14; Hosea 14:4.“ Màte ŋu alé avu ɖe wò nuvɔ̃ siwo nèwɔ va yi ta o; màte ŋu atrɔ wò dzi ahawɔ ɖokuiwò kɔkɔe o. Gake Mawu do ŋugbe be yeawɔ nusiawo katã na wò to Kristo dzi. Èxɔ ŋugbedodo ma dzi se. Èʋua wò nuvɔ̃wo me eye nètsɔa ɖokuiwò na Mawu.Àsubɔ Eyama. Abe alesi ko kakaɖedzitɔe nèle esia wɔm ene la, Mawu ana eƒe nya si wògblɔ na wò la nava eme. Ne èxɔ ŋugbedodoa dzi se be wotsɔe ke ye eye wokɔ ye ŋu-Mawu naa nyateƒea; wohaya, abe alesi Kristo na ŋusẽ lãmetututɔ la be wòazɔ esime ŋutsua xɔe se be woda gbe le ye ŋu ene. Ele nenema ne èxɔe se.“ Mègalala be yease le ye ɖokui me be yeƒe lãme sẽ o, ke boŋ gblɔ be, ‘ Mexɔe se, menye le esi mese le ɖokuinye me tae wòle nenema o, ke boŋ le esi Mawu do ŋugbe ta. ’ ”— Steps to Christ, axa 51. [Agbalẽŋlɔla ƒe nuŋɔŋlɔ si woŋlɔ kple asi.]
3. WOXƆE LE LƆLƆ̃A ME Bra, Das 4
a. Ne woxɔ Yesu be enye Ðela la, nukae dzɔna ɖe nuvɔ̃ siwo wowɔ va yi dzi? Romatɔwo 3:24, 25; 5:1, 9, 10 .“ ' Nusianu, si ke ta míado gbe ɖa le, eye míabia la, mixɔe se bena, asu mia si, eye ava ve me na mi. ' Marko 11:24. Ɖoɖo aɖe le ŋugbedodo sia me — be míado gbe ɖa le Mawu ƒe lɔlɔ̃nu nu. Gake enye Mawu ƒe lɔlɔ̃nu be wòakɔ mía ŋu tso nuvɔ̃ me , awɔ mí viawo, eye wòana míate ŋu anɔ agbe kɔkɔe. Ale míate ŋu abia yayra siawo, eye míaxɔe ase be míexɔ wo, eye míada akpe na Mawu be míexɔ wo, mɔnukpɔkpɔe wònye na mí be míayi Yesu gbɔ, eye míatsi tre ɖe se la ŋkume ŋukpe alo vɔvɔ̃ manɔmee ”— Steps to Christ, axa 51. [Agbalẽŋlɔla ƒe nuŋɔŋlɔ si woŋlɔ kple asi.]b. Tenɔnɔ kae le xɔsetɔ si le Mawu ŋkume? Romatɔwo 8:1.“Togbɔ be ɖokuibɔbɔ anɔ Kristotɔ ƒe agbenɔnɔ me hã la, mele be wòanye blanuiléle kple bubumademade eɖokui ŋu o. Enye mɔnukpɔkpɔ na amesiame ale be wòanɔ agbe ale be Mawu nakpɔ ŋudzedze ɖe eŋu ahayrae. Menye mía Fofo si le dziƒo la ƒe lɔlɔ̃nue wònye be míanɔ fɔbubu kple viviti me gbeɖe o. Kpeɖodzi aɖeke meli be ɖokuibɔbɔ vavãtɔ le yiyi kple ta bɔbɔ eye dzi yɔ fũ kple ɖokuiŋububu me o. Míate ŋu ayi Yesu gbɔ eye míakɔ mía ŋu, eye míatsi tre ɖe se la ŋkume ŋukpe kple dzimetɔtrɔ manɔmee. ”— The Great Controversy, axa 477.“ Ne míetsɔ mía ɖokui na Mawu bliboe, eye míexɔe se bliboe la, Kristo ƒe ʋu kɔa nuvɔ̃wo katã ŋu.Woate ŋu aɖe dzitsinya tso fɔbubu me.To eƒe ʋu dzixɔse me la, woate ŋu ana amewo katã nade blibo le Kristo Yesu me. . . Mele be míatsi dzi ɖe nusi Kristo kple Mawu susu tso mía ŋu ŋu o, ke boŋ ɖe nusi Mawu susu tso Kristo, míaƒe Teƒenɔla ŋu. Woxɔ mi le Lɔlɔ̃tɔ la me. ”— Selected Messages, bk. 2, axa 32, 33.c. Tɔtrɔ kae wòle be amesiwo katã ge ɖe nubabla ƒe ƒomedodo sia me kple Mawu nade dzesii? 1. Petro1:18,19;1. Korintotɔwo6:19,20;Galatiatɔwo 3:26 .“ Tso fifia dzi la, menye tɔwòe nènye o, wotsɔ asi ƒle wò [1 Petro 1:18, 19 .] Gbɔgbɔ Kɔkɔe la to Mawu dzixɔse ƒe nuwɔna bɔbɔe sia dzi dzi agbe yeye ɖe wò dzi me. Èle abe ɖevi si wodzi ɖe Mawu ƒe ƒomea me ene, eye wòlɔ̃ wò abe alesi wòlɔ̃ Via ene. ”— Steps to Christ, axa 51, 52.
4. AZƆLIZƆZƆ KPLE KRISTO Ku, Das 5
a. Aleke wokpɔa mɔ be xɔsetɔ nawɔ nui ? Kolosetɔwo 2:6.“Azɔ esi nètsɔ ɖokuiwò na Yesu la, mègahe ɖe megbe o, mègaɖe ɖokuiwò ɖa le eŋu o, ke boŋ gbe sia gbe gblɔ be, ‘Kristo tɔe menye; Metsɔ ɖokuinye na Eyama; 'eye nàbiae be wòana eƒe Gbɔgbɔ wò eye wòalé wò ɖe asi to eƒe amenuveve me.' Abe alesi wòle to ɖokuiwò tsɔtsɔ na Mawu me, kple edzixɔxɔse me ene be èzu Via la, nenema ke wòle be nànɔ agbe le Eyama me. Apostolo la gblɔ be, ‘Ale si miexɔ Kristo Yesu Aƒetɔ la ene la, nenema ke mizɔ le eyama me. ‘Kolosetɔwo 2:6.“ Edze abe ame aɖewo sena le wo ɖokui me be ele be yewoanɔ dodokpɔ me, eye ele be woaɖo kpe edzi na Aƒetɔ la be wogbugbɔ trɔ asi le yewo ŋu, hafi woate ŋu abia be Mawu ƒe yayra ye yewo. Gake woate ŋu agblɔ be Mawu ƒe yayra ye yewoxɔ fifia gɔ̃ hã. Ele be Eƒe amenuveve, Kristo ƒe Gbɔgbɔ, nanɔ wo si be wòakpe ɖe woƒe gbɔdzɔgbɔdzɔwo ŋu, alo womate ŋu atsi tre ɖe vɔ̃ɖinyenye ŋu o. Yesu lɔ̃na be míava egbɔ abe alesi míele ene, nuvɔ̃wɔlawo,kpekpeɖeŋumanɔsitɔwo, amesiwo dzi woanɔ te ɖo. Míate ŋu ava kple míaƒe gbɔdzɔgbɔdzɔwo katã, míaƒe bometsitsi, míaƒe nuvɔ̃wɔwɔ, kple eƒe afɔnu dzedze le dzimetɔtrɔ me. Enye eƒe ŋutikɔkɔe be wòaƒo mí ƒu le eƒe lɔlɔ̃ ƒe akɔnu eye wòabla míaƒe abiwo, be wòakɔ mía ŋu tso ɖiƒoƒo ɖesiaɖe me ”— Steps to Christ, axa 52.b. Nukae nye ɖoɖo si wowɔ ɖe vodada siwo wowɔ le nusɔsrɔ̃a me ŋu? 1. 1. Yohanes 2:1, 2.“Ðe ɖikeke si nye be menye wòe wodo Mawu ƒe ŋugbedodowo na o la ɖa. Wole na sedzidala ɖesiaɖe si trɔ dzime. Wona ŋusẽ kple amenuveve to Kristo dzi be mawudɔla subɔlawo atsɔe ava luʋɔ xɔsetɔ ɖesiaɖe gbɔ. Ame aɖeke menye nuvɔ̃wɔla ale gbegbe be mate ŋu akpɔ ŋusẽ, dzadzɛnyenye, kple dzɔdzɔenyenye le Yesu, amesi ku ɖe wo ta la me o. Ele lalam be yeaɖe woƒe awu siwo ŋu nu vɔ̃ ƒo ɖi le eye woƒo ɖi wo, eye yeado dzɔdzɔenyenye ƒe awu ɣiwo na wo; Egblɔ na wo be woanɔ agbe eye womagaku o.”—Afim., axa 52,53.c. Ðe alesi wodo ŋusẽ mí le mɔzɔzɔ sia me la me. 1. 1. Yohanes 1:7; Galatiatɔwo 5:16, 17, 25.“Ame siwo zɔna le nunya ƒe mɔwo dzi la, le xaxa me gɔ̃ hã la, wokpɔa dzidzɔ ŋutɔ; elabena Ame si woƒe luʋɔ lɔ̃na la, zɔna, ame makpɔmakpɔ, le wo xa. Le afɔɖeɖe ɖesiaɖe si yi dzi me la, wodea dzesi Eƒe asi ƒe asikaka eŋu nyuie wu; le afɔɖeɖe ɖesiaɖe me la, ŋutikɔkɔe ƒe keklẽ siwo klẽna wu tso Nu Makpɔmakpɔ gbɔ la gena ɖe woƒe mɔ dzi; eye woƒe kafukafuhawo, siwo ɖoa gbeɖiɖi si kɔkɔ wu ɣesiaɣi la, lia yia dzi be yewoawɔ ɖeka kple mawudɔlawo ƒe hadzidziwo le fiazikpuia ŋgɔ”— Thoughts from the Mount of Blessing, axa 140.
5. FOFO LA ƑE LƆLƆ̃ SI XƆA AME Yaw, Das 6
a. Nɔnɔme kawoe li hafi Mawu naxɔe? Yesaya 55:7; 44:22.“ Mawu mewɔa nu ɖe mía ŋu abe alesi ame siwo seɖoƒe li na wɔa nu ɖe wo nɔewo ŋu ene o. Eƒe tamesusuwo nye nublanuikpɔkpɔ, lɔlɔ̃, kple dɔmetɔtrɔ ƒe tamesusuwo. ”— Steps to Christ, axa 53.“ Ame sia ame le Mawu ƒe mokaname te atsɔ nuvɔ̃meʋuʋu kple dzimetɔtrɔ abɔbɔ luʋɔ, abe alesi Dawid wɔe ene la, aka ɖe edzi be mɔkpɔkpɔ li nɛ. Ame sia ame si axɔ Mawu ƒe ŋugbedodowo le xɔse me la , akpɔ tsɔtsɔke. Aƒetɔ la matsɔ luʋɔ ɖeka si trɔ dzime vavã la aƒu gbe gbeɖe o. ”— Patriarchs and Prophets, axa 726.b. Nukae nye mía Fofo si le dziƒo la ƒe nɔnɔme vavãtɔ ɖe amesiwo katã tra mɔ ŋu? Ezekiel 18:32; Luka 15:18 – 20 .“ Satana le klalo be yeafi Mawu ƒe kakaɖedzinya yayrawo adzoe. Edi be yeaɖe mɔkpɔkpɔ ƒe keklẽ ɖesiaɖe kple kekeli ƒe keklẽ ɖesiaɖe ɖa le luʋɔ la me, gake mègaɖe mɔ nɛ be wòawɔ esia o. Mègaɖo to tetekpɔla o, ke boŋ gblɔ be, ‘ Yesu ku be manɔ agbe. Elɔ̃m, eye medi be matsrɔ̃ o... Lododoa gblɔ alesi woaxɔ tsaglãla la na mi: [Woyɔ Luka 15:18 – 20 ƒe nyawo].“Gake lododo sia gɔ̃ hã, togbɔ be evivi eye wòwɔa dɔ ɖe ame dzi hã la, mete ŋu ɖe dziƒofofo la ƒe dɔmetɔtrɔ si seɖoƒe meli na o la afia o. Aƒetɔ la ɖe gbeƒã to eƒe nyagblɔɖila dzi be, ‘Melɔ̃ wò kple lɔlɔ̃ mavɔ, eyata metsɔ amenuveve he wò. ‘Yeremya 31:3. Esi nuvɔ̃wɔla la gale adzɔge ʋĩ tso Fofo la ƒe aƒe gbɔ, hele eƒe nunɔamesiwo gblẽm le dzronyigba dzi la, Fofo la ƒe dzi le didim vevie ɖe eŋu; eye didi ɖesiaɖe si nyɔ le luʋɔ me be yeatrɔ ayi Mawu gbɔ la nye Eƒe Gbɔgbɔ ƒe kukuɖeɖe vividoɖeameŋutɔe ko, si le nu ƒom, le kuku ɖem, hea tsaglãla la yia Fofoa ƒe lɔlɔ̃ ƒe dzi gbɔ.”—Steps to Christ, axa 53,54. [Agbalẽŋlɔla ƒe nuŋɔŋlɔ si woŋlɔ kple asi.]
AME ƉOKUI ƑE NYABIASEWO Fi, Das 7
1. Nukae gena ɖe luʋɔ si wotsɔ eƒe nuvɔ̃wo ke la me?2. Nukatae lãmetututɔ si nɔ Betesda la te ŋu zɔ zi ɖeka?3. Ne míexɔ Kristo abe míaƒe Ðela ene la, ŋugbedodo kae nye mía tɔ?4. Nukae nye aʋadziɖuɖu zɔzɔ kple Kristo ƒe nya ɣaɣla?5. Ðe vovototo si le Satana ƒe vɔ̃ɖinyenye kple Fofo la ƒe lɔlɔ̃ si xɔa ame ɖe agbe dome la me.