Usa ka Mensahe Alang sa Katapusang Mga Adlaw
Handurawa ang talan-awon: Ang Balaang Espiritu gibubo diha sa unang iglesya sa madagayaong gahum sa unang ulan. Si Pedro ug si Juan anaa sa ganghaan sa templo, diin, diha sa ngalan ni Jesu Cristo nga Nazaretnon, si Pedro nimando sa usa ka tawo nga bakol gikan sa pagkatawo sa pagtindog ug paglakaw. Iyang gigunitan siya sa kamot ug ang tawo misugod sa paglakaw, naglukso-lukso, ug nagadayeg sa Dios.
Kining makatingalahang panghitabo, siyempre, mohimog kagubot sa mga tawo, kay sila nasayud nga siya mao kinsa naglingkod nagapangayo ug limos. Karon si Pedro naghatag sa tanang himaya ngadto sa Dios ni Abraham, ni Isaac, ug ni Jacob – ug nagsaysay kanila mahitungod sa Balaang Usa, ang Prinsipe sa kinabuhi. Iyang gipadayag nga pinaagi sa ngalan ni Jesus, ang bakol nga tawo nahimong kusganon pinaagi sa pagtuo diha Kaniya. Unya si Pedro maisugon nga mipahayag sa tinuod nga sila naglimod sa Ginoo atubangan sa mga kagamhanan sa Roma ug gipalabi ang usa ka mamumuno kay sa Usa nga Dinihogan sa Dios. Siya dayon miingon nga sila nakaangkon niini nga sala pinaagi sa pagkawalay alamag, apan dugang gipadayag nga ang pag-antus ni Cristo maoy katumanan sa tagna.
Apan unsay angay nilang buhaton bahin niini karon? Ang mga pulong milanog:
Busa, managhinulsol kamo, ug managbalik kamo, aron pagapalaon ang inyong mga sala, kay sa ingon niana moabut ang mga panahon sa kahamungaya gikan sa atubangan sa Ginoo; Ug nga igapadala niya si Cristo, nga iyang gitudlo alang kaninyo, Nga mao si Jesus: Nga kinahanglan pagadawaton sa langit hangtud sa pagpahiuli sa tanang mga butang, nga gisulti sa Dios pinaagi sa baba sa iyang balaang mga manalagna, sukad pa sa sinugdan. (Buhat 3:19-21).
Sa konteksto, kini nga pahayag klaro nga gihimo sa wala madugay pagkahuman sa pagkayab ni Cristo. Apan adunay usa ka pagkasunod-sunod sa mga panghitabo alang sa mga Cristohanon gikan nianang panahona hangtud sa umalabot:
1. Paghinulsol – karon
2. Managbalik – karon
3. Aron ang inyong mga sala (kay sa inyong mga ngalan) mahimong mapapas.
4. Kanus-a? Diha sa panahon sa hukom inbestigatiba sa dili pa mobalik si Cristo, sa dihang ang mga panahon sa kahamugaya – ang Balaang Espiritu sa ulahing ulan nga gahum – igabubo nga walay sukod.
5. Unya ang Langit mopadala ni Jesu Cristo. Nganong dili man dayon? Si Jesus magpabilin didto sa langitnong mga sawang hangtud ang matag prinsipyo sa Iyang moral nga balaod mapasig-uli diha sa mga kasingkasing sa tawo – sa bisan kinsa nga motugyan ngadto sa Iyang kabubut-on pinaagi sa pagdawat Kaniya sa kinasingkasing, ug sa kinatibuk-an.
“Diha sa pagkausab sa dagway, si Jesus nahimaya sa Iyang Amahan. Nadungog namo Siya nga nag-ingon: ‘Karon ang Anak sa tawo gihimaya, ug ang Dios nahimaya pinaagi Kaniya.’ Sa ingon niini sa wala pa ang Iyang pagbudhi ug paglansang Siya nalig-on alang sa Iyang katapusan makalilisang nga mga pag-antus. Maingon nga ang mga membro sa lawas ni Cristo nagkaduol sa panahon sa ilang katapusan nga panagbangi, ‘ang panahon sa kaguliyang ni Jacob,’ sila motubo diha kang Cristo, ug moambit sa hilabihan sa Iyang espiritu. Sa ingon nga ang ikatulong mensahe mobuswang ngadto sa usa ka makusog nga singgit, ug ingon sa dakong gahum ug himaya magauban sa katapusang bulohaton, ang matinud-anong katawhan sa Dios moambit niana nga himaya. Kini mao ang ulahing ulan nga nagpabuhi ug nagpalig-on kanila sa pagsagubang sa panahon sa kasamok. Ang ilang mga dagway mosanag uban sa himaya niana nga kahayag nga nag-uban sa ikatulo nga manulonda.”1
Panahon na ba nga moanhi si Jesus? Oo, gayud! Unsaon nato nga kita maandam? Ang mga lakang sa Buhat 3:19-21 maoy klaro. Atong tun-an pag-ayo kining mensahe alang sa katapusang mga adlaw niining Semana sa Pag-ampo ug sa makugihon ibutang kini sa atong mga kasingkasing!