Human ang tawo misupak sa balaod sa Dios didto sa Eden, “ang nagalibot nga himaya, diin ang Dios naghatag sa balaan nga Adan, nagtabon kaniya ingon nga usa ka bisti, mihawa kaniya human sa iyang paglapas. Ang kahayag sa himaya sa Dios dili makatabon sa malinapason ug sala. Ingon nga baylo sa maayong panglawas ug kaabunda sa mga panalangin, kakabus, kasakitan, ug pag-antus sa tanang klase nahimong usa ka bahin sa mga anak ni Adan.”2 Makasusubo, ang tawo nawad-an sa dakong mga pribilehiyo kabaylo sa mga dagta sa sala.

“Nahimo ni Satanas ang pagkahulog sa tawo, ug sukad niana nga panahon nahimo na niya nga bulohaton ang pagwagtang diha sa tawo sa dagway sa Dios, ug sa pagbutang diha sa mga kasing-kasing sa tawo sa iyang kaugalingong dagway.”3

“Sa wala pa mosulod ang sala, si Adan nakatagamtam sa dayag nga pakigdugtong sa iyang Maglalalang; apan sukad ang tawo nahimulag gikan sa Dios pinaagi sa paglapas, ang kaliwatan sa tawo naputlan gikan niining halangdon nga pribilehiyo. Pinaagi sa plano sa pagtubos, bisan pa, usa ka paagi naabli diin ang mga pumoluyo sa yuta aduna gihapon kadugtongan sa langit.”4

Ang kamatayon ni Adan ug Eva tungod sa pagsupak maoy sigurado. Kon dili pa tungod sa plano sa kaluwasan, sila mamatay diha-diha dayon sa ilang pagkaon sa gidili nga prutas.

“Apan ang Dios nagapasundayag sa iyang kaugalingong gugma alang kanato, nga, sa mga makasasala pa kita, si Cristo namatay tungod kanato” (Roma 5:8). Ang kalawom sa gugma sa Dios gipadayag diha sa mga pulong, “Kay gihigugma sa Dios ang kalibutan” (Juan 3:16), mahimong mas masabtan pinaagi sa kahibulongang pagpadayag sa Cordero sa Dios nga “gipatay gikan pa sa pagtukod sa kalibutan” (Bugna 13:8).

Gipalihok pinaagi sa gugma nga naglungtad bisan pa sa wala pa kita gilalang, ang Dios naghimo ug usa ka pakigsaad sa panagbangi batok sa usa ka dautan (tan-awa ang Genesis 3:15). “Samtang [kini nga saad] nagtagna ug gubat tali sa tawo ug kang Satanas, kini nagpamatuod nga ang gahum sa dakong kaaway sa katapusan mabungkag.”5

“Walay lain kon dili si Cristo ang makahimo sa pagtubos sa nahulog nga tawo gikan sa tunglo sa kasugoan ug magdala kaniya pag-usab ngadto sa pagkahiuyon sa langit.”6 Ang kahibulongang gugma sa Dios napadayag diha sa plano sa kaluwasan sa pagpasig-uli sa Iyang hingpit nga plano alang sa tawhanong rasa. Ang Ginoo nagtukod sa mga paghalad nga mga serbisyo aron klaro mapadayag ang Iyang plano sa kaluwasan.

MGA SIMBOLO UG MGA MONUMENTO SA PAGPASIG-ULI NI CRISTO

Ang kabayaran mao ang pagpasig-uli sa Dios uban sa katawhan pinaagi sa paghalad sa kamatayon ni Cristo. Human sa pagdeklarar sa plano sa kaluwasan ngadto kang Adan ug Eva, ang Dios nag-ilis sa nawala nga bisti sa kahayag ug ang mga sapot sa dahon sa higuera uban sa kupo sa mga panit, nagsimbolo sa pagkamatarung ni Cristo ug ang bisti sa kaluwasan. Ang paghimo niadtong mga kupo, usa ka halad ang kinahanglan pagahimoon, kay, “ug gawas sa pag-ula sa dugo walay pagpasaylo” (Hebreohanon 9:22), naghulagway nang daan sa sakripisyo ni Cristo didto sa krus.

Gikan sa halaran nga gitukod ni Abraham didto sa yuta sa Moriah sa paghalad kang Isaac ingon nga usa ka sakripisyo, ngadto sa templo nga gitukod ni Solomon ibabaw sa Bukid sa Moriah alang sa presensya sa Dios ug sa mga sakripisyo sa dugo sa hayop sa tanang kapanahonan, mga simbolo ug mga monumento nga nagpahayag sa pagka-epektibo sa dugo ni Cristo sa pagpapas sa mga sala sa tawo maoy pagpamatuod (Genesis 22:2; 2 Cronicas 3:1). “Ang insaktong pagsabot sa pagpangalagad didto sa langitnong sanctuaryo mao ang pundasyon sa atong pagtuo.”7

“Ang termino ‘sanctuaryo,’ nga gigamit sa Biblia, nagtumong, una, sa tabernakulo nga gitukod ni Moises, ingon nga usa ka hulad sa langitnong mga butang; ug, ikaduha, ngadto sa ‘tinuod nga tabernakulo’ didto sa langit, diin ang yutan-ong sanctuaryo nagpunting.”8

Samtang sila nagpanaw padong sa Canaan, ang Dios nagsugo sa Israel pinaagi kang Moises sa paghimo Kaniya ug usa ka sanctuaryo; aron Siya magapuyo sa taliwala nila (Exodus 25:8). “Ang Dios nagpakita kang Moises didto sa bukid ug usa ka talan-awon sa langitnong sanctuaryo, ug nagsugo kaniya sa paghimo sa tanang butang sumala sa sumbanan nga gipakita kaniya.”9

Ang yutan-ong sanctuaryo o tabernaculo gilangkuban sa sawang, ang balaang dapit, ug ang labing balaang dapit diin nagrepresentar sa natagna nga bulohaton ni Cristo gikan sa Iyang pagkatawo ngadto sa Iyang pagpapas sa sala.

1. Ang sawang (Exodus 27:9-18), ang dapit nga naglibot sa tabernakulo ug diin didto ang tanang mga halad gipamatay, maoy usa ka tepo sa yuta diin si Jesus, ang dakong anti-tepo nga halad, nga gitakda nga mamatay alang sa atong mga sala (Juan 12:32, 33).10 Ang matag pagsulod ngadto sa sawang diin ang makasasala magdala sa ilang halad sa sala, nagpahinumdom kanato sa pagtuo diha kang Cristo ingon nga bugtong nga kadugtongan sa atong pakigsaad nga relasyon uban sa Dios (Juan 10:7, 9). Ang halaran sa halad nga sinunog (Exodus 27:1-8) sa kilid niini ang dugo sa sakripisyo gibubo ug ang mga abo sa halad nga sinunog gibutang (Leviticus 6:10; Deuteronomio 12:27), gilandongan sa pagbuhos sa bililhong dugo ni Jesus, nga motanggal sa tunglo sa sala gikan niining yutaa, ug magaandam sa dalan alang sa iyang pagputli pinaagi sa kalayo (Malaquias 4:1, 3).11 Ang dugo sa sakripisyo usab nagtudlo nga pinaagi sa dugo ni Jesus lamang nga kita adunay dayag nga pagsulod ngadto sa presensya sa Dios sa sulod sa sanctuaryo (Hebreohanon 10:19, 20 (ESV, ISV). Ang dolang sa tubig (Exodus 30:17-21) sa tunga-tunga sa agianan sa sawang ug sa tabernakulo ug diin ang mga pari manghugas sa ilang mga kamot ug mga tiil sa dili pa sila mosulod sa tabernakulo, maoy usa ka angayan nga ilustrasyon sa kamatuoran nga gitudlo kang Nicodemus mahitungod sa espirituhanong paghinlo nga gikinahanglan sa pagsulod sa presensya sa Dios, diin ang bautismo usab maoy usa ka simbolo (Juan3:5).12

2. Ang tabernakulo nabahin ngadto sa balaang dapit ug ang labing balaang dapit (Hebreohanon 9:1, 2).

A. Ang balaang dapit adunay mga mosunod nga simbolikanhong mga muwebles: Ang tinapaynga gipahamutang sa atubangan sa Dios (Exodus 25:23-30) nga nagkatagbo sa katumanan niini kang Jesus, ang tinapay sa kinabuhi (Juan 6:48, 33, 51).13 Ang tangkawan (Exodus 25:31-40) nagrepresentar sa iglesia (Bugna 1:12, 20) nga mao ang nagsangga sa lamparahan sa pulong (Salmo 119:105) samtang ang lana sulod sa matag lampara nagsimbolo sa buhat sa Balaang Espiritu dinhi sa yuta (Zacarias 4:1-6, 10; Bugna 5:6). Ang halaran sa incienso (Exodus 30:1-7) nagrepresentar sa walay hunong nga kahumot sa pagpataliwala ni Jesus inubanan sa atong mga pag-ampo (Hebreohanon 7:25; Bugna 8:3, 4).

B. Ang labing balaang dapit (Hebreohanon 9:3-5) adunay mosunod nga simbolikanhong muwebles ug mga butang: Ang arca sa tugon (Exodus 25:10-22), usa ka simbolo sa balaang presensya sa Dios.14 Sa sulod sa arca anaa ang duruha ka papan nga bato uban sa Napulo ka Mga Kasugoan nga gisulat sa tudlo sa Dios (Deuteronomio 10:4, 5). Kini mao ug nagpabilin nga pagpahayag sa dili mausab nga kinaiya sa Dios.15 Ang lingkoranan sa kalooy (Exodus 25:17-21) nagtabon sa nalapas nga balaod, diin ang makita nga presensya sa Dios napadayag (Exodus 25:32; 30:6). Kini nagrepresentar sa panaghiusa sa kalooy ug hustisya diha sa plano sa pagtubos ug usa ka haum nga simbolo sa trono sa halangdon nga Dios, nga nagmantala sa Iyang ngalan ingon nga “maloloy-on ug mapuangoron, mahinay sa pagkasuko, ug daku sa mahigugmaong-kalolot ug kamatuoran,” (Exodus 34:5-7).16 Ang kolon sa mana (Hebreohanon 9:4) maoy usa ka pahinumdom sa matagnaong pag-amoma sa Dios sa dihang Siya nagpaulan sa tinapay sa Iyang katawhan didto sa kamingawan aron mapadayon ang ilang kinabuhi (Exodus 16:32, 33). Busa, karon, sa Iyang pag-amoma kanato, ang Dios nagpaulan kanato sa bililhong bidlisiw sa kahayag diha sa punto sa pagkaon nga mopamatuod nga usa ka panalangin sa tanan nga nagtigom kanila.17 Samtang kita magpahat niini nga kahayag, mga pultahan maabli alang sa pagsangyaw sa ebanghelyo. Sa ingon, ang mensahe sa kahimsog mao ang tuo nga kamot sa mensahe sa ikatulong manulonda.18 Ang kang Aaron nga sungkod nga nanalingsing (Hebreohanon 9:4) maoy usa ka pahinumdom sa pagtahud sa sistema sa kahusay ug pagkapangulo nga gitukod sa Dios alang sa Iyang iglesya.19

Ang yutan-on nga sanctuaryo ug ang tipikal nga mga serbisyo niini temporaryo nga gitukod sa Dios sa pagtudlo sa Israel ug kanato mahitungod sa sistema sa pagsakripisyo, ang hingpit ug kompleto nga plano sa kaluwasan ug ang pagpangalagad ni Cristo sa langitnong sanctuaryo. Ang kamatayon ni Cristo didto sa krus nagpapas sa mga ordinansa sa pagsakripisyo sa yutan-ong sanctuaryo ug nga sila wala nay dugang nga kahulogan karon (Colosas 2:14; Hebreohanon 9:8-14).

Adunay talagsaong mga kalainan tali sa pagkasacerdote ni Jesus nga lahi sa yutan-ong pagkasacerdote.

Ang Dios nagpili sa banay ni Levi sa pagpangalagad diha sa pagkasacerdote sa yutan-ong tabernakulo (Numeros 1:50; Exodus 28:1; Leviticus 21:17-23). Apan si Jesus dili mahimong usa ka labaw nga sacerdote dinhi sa yuta, “Kay dayag gayud nga ang atong Ginoo natawo gikan kang Juda; nga niining banaya si Moises wala magsulti mahitungod sa mga sacerdote” (Hebreohanon 7:14). Ang usa ka labawng sacerdote pinili gikan sa iyang katawhan (Hebrohanon 5:1). Kay si Jesus mahimong labawng sacerdote sa katawhan didto sa langit, Siya “wala mokuha diha kaniya sa kinaiyahan sa mga manulonda; apan siya mikuha diha kaniya sa kaliwat ni Abraham” (Hebreohanon 2:16). Dili sama sa Levihanon nga pagkasacerdote, ang pagkasacerdote ni Jesus sunod sa laray ni Melchisedec walay sinugdanan o katapusan (Hebreohanon 7:3).

Duha ka panghitabo ang nagtimaan sa pagbalhin gikan sa yutan-on ngadto sa langitnon nga pagkasacerdote. Sa dihang si Cristo gilansang sa krus, “ang pagkapikas sa tabil sa templo nagpakita nga ang mga sakripisyo ug mga ordinansa sa Judeo dili na pagadawaton.”20 “Pinaagi sa paggisi sa iyang bisti, [si Caiaphas] nagputol sa iyang kaugalingon gikan sa pagkarepresentante. Siya wala na dawata sa Ginoo ingon nga nagdumala nga labawng sacerdote.”21

Ang adlaw-adlaw nga mga serbisyo sa pagsakripisyo ginahimo diha sa sawang ug sa balaang dapit nagpunting sa unahan sa sakripisyo sa Mesias didto sa krus. Ang makasasala kinahanglan magdala ug usa ka walay lama nga hayop (nateng carnero) ingon nga usa ka halad sa sala. Ang nateng carnero (Exodus 12:21) nagrepresentar kang Jesus ang Cordero sa Dios nga nagwagtang sa mga sala sa kalibutan (Juan 1:29; 1 Corinto 5:7). Ang makasasala mopatong sa iyang mga kamot diha sa ulo sa hayop samtang nagasugid sa iyang mga sala ingon nga siya personal nga mopatay sa hayop.

Ang sacerdote mokuha sa iyang dugo, mowisik niana diha sa mga sungay sa halaran ug mobubo sa nabilin diha sa ubos sa halaran o mowisik niana sa atubangan sa tabil ibabaw sa halaran sa incienso diha sa balaang dapit o mokaon sa kabahin sa halad sa dili pa mosulod sa balaang dapit. Ang kinatibuk-an nga serbisyo nagtimaan sa pagbalhin sa mga sala gikan sa makasasala ngadto sa sanctuaryo (Hebreohanon 9:6; Leviticus 4:3, 7, 22, 23; 6:10; 10:17, 18).

“Samtang ang mga sacerdote sa buntag ug gabii mosulod sa balaang dapit sa panahon sa incienso, ang inadlaw nga sakripisyo andam na nga ihalad diha sa halaran sa sawang sa gawas. . .

[ang mga magsisimba] nagkahiusa sa hilom nga pag-ampo, uban sa ilang mga nawong atubang sa balaang dapit. Sa ingon ang ilang mga pangamuyo mosaka uban sa panganod sa incienso, samtang ang pagtuo nagkupot sa mga merito sa gisaad nga Manluluwas naghulagway sa mapasig-uli nga sakripisyo.”22

“Ang mga sala sa Israel sa ingon gibalhin ngadto sa sanctuaryo, ang balaang mga dapit nahugawan, ug ang pinasahi nga bulohaton nahimong gikinahanglan alang sa pagwagtang sa mga sala. Ang Dios nagmando nga ang pagtabon sa sala pagahimoon sa matag sagrado nga mga lawak, maingon ang halaran, sa paghinlo niini, ug balaanon kini gikan sa kahugawan sa mga kaanakan sa Israel.’ ”23

Ang Adlaw sa Pagtabon sa Sala (Yom Kippur) mao ang ikanapulo ka adlaw sa ikapitong bulan sa Tishrei (tunga-tunga sa Septembre ug Oktobre) ug nagpabilin nga pinakabalaang adlaw sa kalendaryo sa Judeo (Leviticus 23:27).

“Kausa sa usa ka tuig, diha sa dakong Adlaw sa Pagtabon sa Sala, ang labawng sacerdote mosulod sa labing balaang dapit alang sa paghinlo sa sanctuaryo. Ang bulohaton didto nga himoon nagkompleto sa tinuig nga hugna sa pagpangalagad (Hebreohanon 9:7).”24

“Ang matag tawo mosakit sa iyang kalag samtang ang bulohaton sa pagtabon sa sala nagpadayon. Ang tanan nga bulohaton gipadaplin, ug ang tibuok katilingban sa Israel migamit sa adlaw diha sa solemne nga pagpaubos sa atubangan sa Dios, uban ang pag-ampo, pagpuasa, ug lawom nga pagsusi sa kasing-kasing. . . . Ingon ana ang pagpangalagad gihimo ‘nga nagaalagad nianang hulad ug landong sa mga butang nga langitnon’ (Hebreohanon 8:5).”25

Human sa pagkayab sa langit, Siya misugod sa Iyang bulohaton ingon nga atong Labawng Sacerdote. “Sa desye-otso ka mga siglo kini nga bulohaton sa pagpangalagad nagpadayon diha sa unang lawak sa sanctuaryo. Ang dugo ni Cristo, nangamuyo alang sa mahinulsulon nga mga magtutuo, nakasiguro sa ilang kapasayloan ug pagdawat uban sa Amahan, apan ang ilang mga sala nagpabilin sa talaan sa mga libro.”26

“Ingon sa tipikal nga paghinlo sa yutan-on nahimo pinaagi sa pagtanggal sa mga sala diin kini nakapahugaw, busa ang aktuwal nga paghinlo sa langitnon pagahimoon pinaagi sa pagtanggal, o pagpapas, sa mga sala nga anaa didto natala. Apan sa dili pa kini mahimo, kinahanglan adunay usa ka pagsusi sa natala sa mga libro aron sa pagsuta kung kinsa, pinaagi sa paghinulsol sa sala ug pagtuo diha kang Cristo, may katungod sa mga kaayohan sa Iyang pagtabon sa sala. Busa ang paghinlo sa sanctuaryo naglangkob sa usa ka bulohaton sa pagsusi usa ka bulohaton sa paghukom. Kini nga bulohaton kinahanglan himoon sa dili pa ang pag-abot ni Cristo sa pagtubos sa Iyang katawhan.”27

“Niining dakong adlaw sa katapusang pagtabon sa sala ug paghukom inbestigatiba ang mga kaso lamang nga pagatagdon mao kadtong sa mga nagaangkon nga katawhan sa Dios [1 Pedro 4:17]. Ang paghukom sa mga dautan maoy usa ka lahi ug bulag nga bulohaton, ug kini mahitabo sa katapusang panahon.”28

“Diha sa panahon nga natudlo alang sa paghukom – ang pagsira sa 2300 ka mga adlaw o katuigan, sa 1844 – nagsugod ang bulohaton sa pagsusi ug pagpapas sa mga sala. Ang tanan nga nagdala diha sa ilang kaugalingon sa ngalan ni Cristo kinahanglan moagi sa mabinantayong pagsusi. Parehas ang buhi ug ang patay pagahukman ‘gikan niadtong mga butanga nga nahisulat sa mga basahon, sumala sa ilang mga binuhatan.’”29

“Ang rekord sa mga basahon sa langit, diin ang mga pangalan ug mga binuhatan sa mga tawo nakarehistro, maoy motino sa mga disisyon sa paghukom. . . .

“Ang basahon sa kinabuhi naglangkob sa mga pangalan sa tanan nga misulod sa pagpangalagad sa Dios. . . . [Lucas 10:20; Filipos 4:3; Daniel 12:1; Bugna 21:27.]

“Usa ka basahon sa handumanan gisulat sa atubangan sa Dios, diin didto nasulat ang maayong mga binuhatan ‘sila nga nahadlok sa Ginoo, ug sila nga naghunahuna sa Iyang ngalan’ (Malaquias 3:16; Nehemias 13:14). . . . Ang matag binuhatan sa pagkamatarung dili pagakalimtan.

“Adunay usa ka rekord usab sa mga sala sa mga tawo.”30 Ang matag dautang binuhatan, ang tanan nga walay pulos nga pulong nga nasulti pagahukman (Ecclesiastes 12:14; Mateo 12:36, 37; 1 Corinto 4:5; Isaias 65:6, 7).

“Mga sala nga wala mahinulsuli ug gisalikway dili pagapasayloon ug dili papason gikan sa rekord sa mga basahon, apan kini mobarug sa pagsaksi batok sa makasasala diha sa adlaw sa Ginoo. . . . Ang sala tingali gitago, gilimod, gitabonan gikan sa amahan, inahan, asawa, mga anak, ug mga kaubanan; walay usa apan ang mga sad-an mahimong mopangga sa labing gamay nga pagduda sa sayop; apan kini gibutyag sa atubangan sa mga manggialamon sa langit. . . . Ang Dios adunay insakto nga rekord sa tanan nga dili matarung nga balanse ug tanan nga dili patas nga pakigsabot.”31

“Ang matag binuhatan sa tawo moagi sa pagsusi atubangan sa Dios ug nakarehistro alang sa pagkamatinud-anon o dili pagkamatinud-anon. Katugbang sa matag ngalan diha sa mga basahon sa langit nahisulod uban sa teribli nga pagkainsakto sa tanang mga sayop nga pulong, tanang dalo nga binuhatan, tanang wala matuman nga mga katungdanan, ug ang tanang sekreto nga sala, uban sa tanang malimbungong pagtago.”32 “Unsa ka solemne ang panghunahuna! Matag adlaw nga manglabay, moagi ngadto sa walay katapusan, nagdala sa iyang lulan sa mga natala sa mga basahon sa langit. . . . Ang atong mga binuhatan, atong mga pulong, bisan pa ang atong pinaka sekreto nga mga motibo. . . bisan pa sila atong malimtan, sila magadala sa ilang pagpamatuod sa pagpahigawas o pagsilot.”33

“Apan kong may uban nga makasala, may manlalaban kita uban sa Amahan, si Jesu Cristo nga matarung” (1 Juan 2:1). Tan-awa usab ang Hebreohanon 9:24.

“Samtang ang rekord sa mga basahon giablihan diha sa paghukom, ang mga kinabuhi sa tanan nga mitoo kang Jesus ginasusi atubangan sa Dios. Sugod niadtong unang nabuhi sa yuta, ang atong Manlalaban nagpresentar sa mga kaso sa matag sunod-sunod nga henerasyon, ug matapos sa mga buhi. Ang matag pangalan gihisgotan, ang matag kaso hugot nga giinbestigahan. Mga ngalan gidawat, mga ngalan gisalikway. Sa dihang si bisan kinsa adunay mga sala nga nahabilin sa talaan sa mga basahon, nga wala mahinulsoli ug wala mapasaylo, ang ilang mga pangalan pagapapason sa basahon sa kinabuhi, ug ang talaan sa ilang maayong mga binuhatan pagapapason gikan sa basahon sa handumanan sa Dios. . . .

“Ang tanan nga adunay tinuod nga paghinulsol sa sala, ug pinaagi sa pagtuo makaangkon sa dugo ni Cristo ingon nga ilang makatabon nga sakripisyo, adunay kapasayloan nga gitala katugbang sa ilang mga ngalan diha sa mga basahon sa langit; samtang sila mahimong umalambit sa pagkamatarung ni Cristo, ug ang ilang mga kinaiya makaplagan nga kauyon sa kasugoan sa Dios, ang ilang mga sala mapapas, ug sila sa ilang kaugalingon pagaisipon nga takus sa walay katapusang kinabuhi.” [Isaias 43:25; Bugna 3:5; Mateo 10:32, 33.]34

Ang atong pagsabot sa bulohaton sa hukom inbestigatiba nagkinahanglan kanato sa pagbaton ug desidido nga pagbuhat mahitungod sa atong kaluwasan.

“Ang tanan nga gusto nga ang ilang mga pangalan magpabilin sa basahon sa kinabuhi kinahanglan nga karon, sa pipila nga nahabilin nga mga adlaw sa ilang gihatag nga panahon, magsakit sa ilang mga kalag atubangan sa Dios pinaagi sa pagkasubo sa sala ug tinud-anay nga paghinulsol. Kinahanglan adunay lawom, matinud-anong pagsusi sa kasing-kasing. Ang walay pagtagad, kabuangan nga espiritu gipatuyangan sa hilabihan ka daghan nga nag-angkon nga mga Cristohanon kinahanglan isalikway.”35

Kita kinahanglan mobuhat sa atong kaugalingong kaluwasan uban ang pagkahadlok ug pagkurog. (Filipos 2:12) “Kon ang bulohaton sa hukom inbestigatiba mosira, ang padulngan sa tanan aduna nay hukom alang sa kinabuhi o kamatayon. Ang kahigayonan matapos sa hamubo nga panahon sa dili pa mopadayag ang Ginoo diha sa kapanganoran sa langit. Si Cristo . . . nagpahayag: ‘Ang dili matarung, mag-dili-matarung gihapon siya; ug ang mahugaw, magmahugaw gihapon siya; ug ang matarung, magmatarung gihapon siya; ug ang balaan, magbalaan gihapon siya. Ania karon, moanhi ako sa madali, ug ang akong balus uban kanako sa paghatag sa tagsatagsa sumala sa iyang buhat.”36

“Ang matarung ug ang dautan buhi sa gihapon dinhi sa yuta diha sa ilang mamalatyon nga kahimtang – mga tawo magapananom ug managtukod ug gambalay, magapangaon ug magapanginom, ang tanan wala makamatikod nga ang katapusan, dili mausab nga desisyon gipahayag na didto sa sanctuaryo sa itaas. . . . Sa kahilom, sa wala mahibaloi ingon sa kawatan sa tunga-tunga sa kagabhion, moabot sa natakdang panahon nga maoy magtimri sa linungtaran sa matag tawo, ang katapusang pagkuha sa tanyag sa kalooy ngadto sa masal-anon nga mga tawo.

“ ‘Busa managtukaw kamo: . . . Tingali unya kong sa pag-abot niya sa kalit hingkaplagan kamo nga nangatulog’ (Marcos 13:35, 36). Makatalagmanon ang kahimtang niadtong kinsa, nagakaluya sa ilang pagbantay, miliso sa ilang mga atraksyon sa kalibutan. Samtang ang negosyante natugob sa iyang tinguha sa ganansya, samtang ang mahigugmaon sa kalingawan nagapangita sa pagpatuyang, samtang ang mga babaye sa urog naghan-ay sa iyang mga dayan-dayan – mahimo nianang orasa ang Maghuhukom sa tibuok kalibutan mopahayag sa hukom: ‘Ikaw ginatimbang diha sa timbangan, ug nakita nga kulangan.’ Daniel 5:27.”37

Dili hangtud nga ang Dios molaglag sa tigpasiugda sa sala, ang katawhan sa Dios magatagad sa ilang kaugalingon nga hiluwas gikan sa lulan sa sala. Karon ang panahon sa pagsakit sa atong mga kaugalingon, lawom nga pagsusi sa atong mga kasing-kasing ug mag-ampo sa masibuton alang sa pagpapas sa atong mga sala inay sa pagpapas sa atong mga ngalan gikan sa basahon sa kinabuhi. Amen.