Minahal nga mga Kaigsoonang Lalaki ug Babaye,

Ato bang gituohan uban sa tibuok nga kasing-kasing nga si Cristo sa dili madugay moanhi ug nga kita karon adunay katapusang mensahi sa kalooy nga igahatag sa masal-anon nga kalibutan? Ang atong panig-ingnan haom ba sa gikinahanglan? Kita ba, pinaagi sa atong kinabuhi ug balaan nga pakighinabi, nagpakita niadtong nagapalibot kanato nga kita nagalantaw nianang mahimayaong pagpadayag sa atong Ginoo ug Manluluwas nga si Jesu Cristo, nga magailis nining mahugaw nga mga lawas ug dayandayanan kini sama sa iyang mahimayaong lawas? Ako nahadlok nga kita wala motoo ug makaamggo niining mga butanga isip mahinungdanon. Kadtong nagatoo sa kamahinungdanon sa mga kamatuoran nga atong giangkon, kinahanglang magabuhat sumala sa ilang pagtuo. Adunay daghang nagapangita sa mga kahilayan ug sa mga butang aron makuha ang pagtagad niining kalibutana; ang hunahuna nagapabilin sa pagdalagan sa hilabihan diha sa bisti, ug ang dila nahilambigit sagad sa pagkatamhangan ug walay hinungdan nga panagtabi, nga naghimong bakak sa atong pag-angkon, kay ang atong panaghisgot dili langitnon, diin kita nagapangita sa atong manluluwas.

Ang mga manulonda nagatan-aw ug nagabantay kanato; kita sagad nakapasubo niining mga manulonda pinaagi sa pagpatuyang sa mga binuang nga panagtabi, pasiaw ug binuang, ug padayon nga pagkunhod ngadto sa pagkatamhangan, ug kulang sa kahibalo nga kahimtang. Bisan pa kita karon ug unya mohimo sa pagpaninguha ngadto sa pagdaug ug pagkab-ot niini, apan kon kita wala motuman niini, hinonoa mokunhod ngadto sa tamhangan, ug kakulang sa pagtagad nga kahimtang, dili makalahutay sa mga tentasyon ug makabatok sa kaaway, kita dili makalahutay sa mga pagsulay sa atong pagtuo nga labing hamili kay sa bulawan. Kita wala magaantus alang kang Cristo, ug nagahimaya diha sa kalisdanan.

Adunay dakong kakulangon sa Cristohanon nga kalig-on ug mag-alagad sa Dios gikan sa prinsipyo. Kita dili mangita sa pagpahimoot ug pagtagbaw sa atong kaugalingon, apan sa pagpasidungog ug paghimaya sa Dios, ug sa tanan natong gihimo ug gipamulong nga nahiusa ang panan-aw ngadto sa iyang himaya. Kon kita motugot nga ang atong kasing-kasing mapalig-on diha sa mosunod mahinugdanon nga mga pulong, ug kanunay nga hinumduman, dili kita dali nga mahulog ngadto sa tentasyon ug ang atong mga pulong mahimong dyutay ug maayo nga pagkapili: “Siya nasamaran tungod sa atong kalapasan, siya napangos tungod sa atong mga kasal-anan; ang silot sa atong pakigdait diha sa ibabaw niya; ug tungod sa iyang mga labod kita nangaayo.” “Matag pulong nga walay pulos nga ginapamulong sa mga tawo, magahatag sila ug husay sa adlaw sa paghukom.” “Ikaw oh Dios nakakita kanako.”

Kita dili makahunahuna niining mahinungdanon nga mga pulong, ug mahinumdom sa mga pag-antus ni Jesus nga kita kabus nga makasasala mahimong makadawat sa kapasayloan ug mamaluwas ngadto sa Dios pinaagi sa Iyang hamili nga dugo, nga walay pagbati sa usa ka balaan nga pagpugong nganhi kanato ug usa ka mainiton nga tinguha sa pag-antus alang Kaniya kinsa nag-antus ug milahutay pag-ayo alang kanato. Kon kita magapabilin niining mga butanga, minahal kong kaugalingon, uban ang dungog niini, mamahimong mapaubos, ug sa iyang dapit mapuno sama sa bata nga sa ka yano magdala sa pagbadlong sa uban ug dili dali nga masuko. Ang usa ka dili matambagan nga espiritu dili unya mosulod sa pagmando sa kalag.1

Sa dihang akong maamgohan kung unsa kadaku ang iyang gibuhat kanato aron kita mamatul-id, ako madala ngadto sa pagsinggit, Oo, unsa nga gugma, unsa ka kahibulongan nga gugma, sa Anak sa Dios alang kanatong makaloloy nga makasasala! Kita ba magpakabuang ug dili magpakabana samtang ang tanan ginabuhat alang sa atong kaluwasan nga kinahanglan pagahimoon? Ang tibuok langit interesado kanato. Kita kinahanglan aktibo ug nagmata sa pagpasidungog, paghimaya, ug pagsimba nianang Usa nga hataas ug halangdon. Ang atong kasing-kasing kinahanglan magaawas sa gugma ug pagpasalamat Kaniya kinsa puno sa gugma ug kalooy kanato, Sa atong kinabuhi kinahanglan atong pasidunggan Siya, uban sa putli ug balaan nga binuhatan nagpakita nga kita gipanganak gikan sa itaas nga kining kalibutana dili atong puloy-anan, apan kita lumalabay ug dumuloong dinhi, nagapanaw ngadto sa maayong nasud.

Daghan kinsa nagaankon sa ngalan ni Cristo ug nagaankon sa haduol niyang pag-abot, wala masayod kon unsa ang pag-antus alang kang Cristo. Ang ilang mga kasing-kasing wala mabuntog sa grasya, ug wala mamatay ang ilang kaugalingon, ingon sa kasagaran mapadayag sa nagkalainlain nga paagi. Sa sama nga higayon sila nanaghisgot nga sila adunay mga pagsulay. Apan ang nag-unang hinungdan sa ilang mga pagsulay mao ang wala madaug nga kasing-kasing, nga nagahimo sa kaugalingon nga hilabihan ka sensitibo nga sagad masungag. Kon kini maamgohan kon unsa ang buot ipasabot isip usa ka mapainubsanong sumosunod ni Cristo, usa ka matuod nga Cristohanon, sila magsugod sa maayong kasibot ug magsugod sa insakto. Sila mamatay una sa ilang kaugalingon, dayon sa hinanali mag-ampo, ug susihon ang matag taras sa kasing-kasing. Isalikway ang imong pagsalig sa kaugalingon, ug ang pagkamaayo sa kaugalingon, mga igsoon, ug sundon ang maaghop nga Sumbanan. Kanunay ibutang si Jesus sa inyong hunahuna isip siya ang inyong sumbanan, ug kinahanglan ninyo sundon ang Iyang mga lakang. Tutok kang Jesus, ang Magbubuhat ug ang Maghihingpit sa atong pagtoo, nga tungod sa kalipay nga gibutang sa Iyang atubangan nagaantus sa cruz, nga nagatamay sa kaulawan. Siya milahutay sa mga pagsupak sa mga makasasala batok Kaniya. Siya tungod sa atong mga sala usa ka maaghop, gipatay nga cordero, nasamaran, napangos, gibunalan ug gisakit.2

Kita halayo pa kaayo isip katawhan nga gusto sa Dios mahitabo kanato, tungod kay wala nato gipatuboy ang kalag ug paghapsay sa kinaiya kauyon diha sa kahibulongang pagpadayag sa kamatuoran sa Dios ug sa iyang mga katuyoan. “Ang pagkamatarung nagabayaw sa usa ka nasud; apan ang sala maoy usa ka kaulawan sa bisan unsang katawohan.” (Proverbio 14:34). Ang sala maoy usa ka magbubungkag. Bisan asa nga kini gipangga — diha sa matag usa ka kasingkasing, diha sa panimalay, diha sa Iglesya — adunay pagkabungkag, panag-away, pagkabahinbahin, pagdumot, kasina, pagpangabugho, tungod kay ang kaaway sa tawo ug sa Dios adunay gahum sa pagkontrolar ibabaw sa hunahuna. Apan pasagdi nga ang kamatuoran higugmaon, ug mapadayag diha sa kinabuhi, ug ingon man gipasiugdahan, ug ang mga lalaki ug babaye magadumot sa sala, ug mamahimong buhi nga representante ni Jesu Cristo dinhi sa Kalibutan.

Ang katawhan nga nagaankon mituo sa kamatuoran dili paggahukman tungod kay wala kanila ang kahayag, apan tungod kay sila adunay dakong kahayag ug wala nila dal-a ang ilang kasing-kasing sa pagsulay sa daku moral nga sumbanan sa pagkamatarung sa Dios. Ang katawhan nga nagaangkon nga mituo sa kamatuoran kinahanglang mapataas pinaagi sa pagkinabuhi niana. Ang matuod nga biblikanhon nga relihiyon kinahanglan mapatubo ang kinabuhi, mapahapsay, ug halangdon ang kinaiya, magahimo niini nga labi ug mas labi pa kahisama sa balaan nga panig-ingnan. Unya ang panimalay mahimong kusganon sa pag-ampo, uban ang pagpasalamat ug pagdayeg sa Dios. Ang mga manulonda magaalagad niana nga panimalay ug makig-uban sa mga magsisimba ngadto sa balay alampoanan.

Tugoti nga ang mga iglesya nga naga-angkon nga nagatuo sa kamatuoran, kinsa nagpasiugda sa balaod sa Dios, magatuman niana nga balaod ug mobiya gikan sa tanang kadautan. Himoa nga ang matag-usa ka membro sa igslesya mobatok sa mga tentasyon sa pagbuhat ug dautan ug sa pagpatuyang sa sala. Tugoti nga ang iglesya mosugod sa bulohaton sa pagputli atubangan sa Dios pinaagi sa paghinulsol, pagpaubos, lawom nga pagsusi sa kasing-kasing, tungod kay kita ania sa antetipikal nga adlaw sa pagtabon sa sala — solemne nga takna puno sa walay katapusang resulta.

Himoa nga kadtong nagatudlo sa kamatuoran mopresentar niini ingon nga kini anaa kang Jesus. Ilalum sa madaugon, makabalaan, makapaputli nga inpluwensya sa kamatuoran sa Dios sila ingon sa limpyo nga mga sudlanan. Himoa nga sila mapatubo uban ang Biblikanhon nga relihiyon, ug unsa ka daku nga inpluwensya gikan kanila ngadto sa kalibutan! Himoa nga ang matag usa ka membro sa iglesya magmaputli, lig-on, dili matarog, kanunay nga madagayaon sa gugma ni Jesus, ug sila gilayon mahimong iwag sa kalibutan. Himoa nga ang mga tawo nga nagabarog isip mga magbalantay ug isip usa ka magbalantay sa panon mo sangyaw sa solemne nga kamatuoran, ipatingog ang nota sa pasidaan sa tibuok katawhan, mga nasud, ug mga pinulongan. Himoa silang buhi nga mga representante sa kamatuoran nga ilang gipasiugdahan, ug motahod sa balaod sa Dios pinaagi sa strikto ug balaan nga pagsunod uban sa mga gikinahanglan, nagalakaw atubangan sa Ginoo diha sa kaputli, sa kabalaan, ug usa ka gahum nga magauban sa pagmantala sa kamatuoran nga mopadan-ag sa kahayag bisan asa.

Ang Dios dili mobiya sa katawhan o sa matag-usa hangtud nga sila mobiya Kaniya. Ang dayag nga pagsupak dili makahimo sa pagtuo sa katawhan sa Dios, kinsa nagabantay sa Iyang mga kasugoan, nga modulom. Ang pagpasagad sa pagdala sa kaputli ug kamatuoran diha sa buhat makapasubo sa Espiritu sa Dios ug makapahuyang kanila tungod ang Dios wala sa taliwala nila aron sa pagpanalangin. Sulodnon nga kadunotan modala ug mga pagsalikway sa Dios niini nga katawhan sama sa iyang gibuhat sa Jerusalem. Oh, himoa ang mga pagpangalyupo nga mga tingog, himoa ang matinguhaon nga pag-ampo madungog, aron kadtong nagwali sa uban dili sa ilang kaugalingon mahimong mga sinalikway. Mga igsoon, wala kita nasayud unsay anaa sa umalabot ug ang atong kasigurohan mao lamang ang pagsunod sa Kahayag sa kalibutan. Ang Dios mobuhat uban kanato ug alang kanato kon ang sala nga nagdala sa Iyang kapungot nianang daan nga kalibutan, sa Sodoma ug sa Gomorra ug sa karaang Jerusalem, dili maoy atong salaod.

Ang pinakagamay nga paglapas sa Balaod sa Dios nagadala ug kasal-anan diha sa makasasala, ug kon walay matinguhaon nga paghinulsol ug pagbiya sa sala siya sa kasiguro mahimong hulog. . . Kita isip katawhan, kutob sa mahimo, hinloan ang campo sa moral nga kahugawan ug mas seryoso nga mga sala. Sa diha ang sala moasdang sa matag katawhan kinsa nagaankon nga nagpataas sa moral nga sumbanan sa pagkamatarung, unsaon nato pagdahom nga ang Dios mobalik sa Iyang gahum kanato ug moluwas kanato isip katawhan nga nagahimo sa pagkamatarung? . . . Ingon nga usa ka katawhan nga wala nato ipabilin ang atong kaugalingon diha sa pagtuo ug dili lamang sa nagpasiugda uban sa sinulat ug tingog sa kasugoan sa Dios, apan gibantayan ang matag usa, wala magasupak bisan usa ka lagda nga nasayran, unya ang kahuyang ug kalaglagan moabot kanato. Kini maoy usa ka buhat ang angayan natong tagaan ug pagtagad sa atong matag usa nga mga iglesya. Ang matag tawo kinahanglan mahimong Cristohanon.

Himoa nga ang sala sa garbo igasalikway, himoa nga ang tanang naghinubra nga bisti madaug, ug ang paghinulsol ngadto sa Dios mabansay alang sa hilabihang pagpangawat ngadto kaniya nga mao ang pagpugong sa salapi nga modagayday unta sa panudlanan alang sa pagpadayon sa buhat sa Dios diha sa iyang bulohaton nga mga kaumanhan. Himoa ang buhat sa pagreporma, sa tinuod nga pagkakabig, mabutang sa atubangan ug moaghat sa katawhan. Himoa ang atong mga binuhatan, atong binistihan, motakdo sa atong mga buhat niining panahona, aron kita makaingon nga “Sumunod kamo kanako ingon nga ako nagsunod kang Cristo.” Atong ipaubos ang atong mga kalag atubangan sa Dios pinaagi sa pagkamapinaubsanon, pagpuasa ug pag-ampo, paghinulsol sa sala ug pagsalikway niini.

Ang tingog sa matuod nga magbalantay gikinahanglang madungog karon sa tibuok linya. “Ang buntag modangat, ug ang gabii usab” (Isaias 21:12). Ang trumpeta kinahanglan mohatag sa husto nga tingog tungod kita ania sa dakung adlaw sa pagpangandam sa Ginoo. . . . Adunay daghang bul-og sa mga doktrina sa atong kalibutan. Adunay daghang bul-og sa relihiyon nga naihap sa mga linibo ug tinagpulo ka libo, apan adunay usa lamang nga nagdala sa sinulat ug selyo sa Dios. Adunay usa ka relihiyon sa tawo ug usa ka relihiyon sa Dios. Kita kinahanglan sa atong kaugalingong kalag natapot diha sa walay katapusang Bato. Matag butang diha sa kalibutan sa Dios, ang mga tawo ug mga doktrina ug kinaiyahan mismo, nangatuman sa sigurado nga pulong sa Dios sa propesiya ug sa iyang daku ug panapos nga buhat sa kasaysayan sa kalibutan.

Kita kinahanglan andam ug magpaabot sa mga mando sa Dios. Mga nasud makutaw sa ilang pinakasentro. Ang supporta wagtangon niadtong nagawali sa sumbanan sa pagkamatarung sa Dios, ang siguro nga sulayanan sa kinaiya. Ang tanan kinsa dili moyukbo sa mando sa nasudnong konseho ug tumanon ang nasudnong balaod sa pagpatigbabaw sa igpapahulay nga gitukod sa tawo sa sala, sa pagsalikway sa balaan nga adlaw sa Dios, mobati, dili sa maipitong gahum sa papado lamang, apan sa Protestante nga kalibutan, ang larawan sa mananap nga mapintas.

Si Satanas mobuhat ug milagro sa paglimbong: siya mobutang sa iyang gahum isip labaw. Ang iglesya makaplagan nga daw mahulog, apan kini wala mahulog, samtang ang mga makasasala sa Sion pagaayagon — ang tahop ilain gikan sa bililhong trigo. Kini mao ang makalilisang nga kasinatian, apan bisan pa niana kini kinahanglang mahitabo. Walay lain kondili kadtong nakadaug pinaagi sa dugo sa Kordero ug sa pulong sa ilang mga pagpamatuod makaplagan nga maunongon ug matinud-anon, walay lama o dagta sa sala, walay limbong sa ilang mga baba. Kinahanglang isalikway nato ang atong kaugalingong pagkamatarung ug isul-ob ang pagkamatarung ni Cristo.3

Ako gipakitaan nga sa dihang ang katawhan sa Dios dili maninguha sa ilang bahin, apan magpaabot sa kahamugaya nga moabot ibabaw nila ug wagtangon ang ilang mga sayop ug itul-id ang ilang mga kasaypanan; kung sila magsalig niana sa paghinlo kanila gikan sa kahugawan sa ilang unod ug espiritu, ug maghaum kanila sa pag-apil sa pagsinggit sa makusog sa ikatulong manulonda, sila makaplagan nga makulangan. Ang kahamugaya o gahum sa Dios moabot lamang niadtong nag-andam sa ilang kaugalingon niana pinaagi sa pagbuhat sa gisugo sa Dios kanila, ginganlag, paghinlo sa kaugalingon gikan sa tanang kahugawan sa unod ug espiritu, hingpit nga pagkabalaan diha sa pagkahadlok sa Dios. 4.

Ang salin nga nagputli sa ilang mga kalag pinaagi sa pagtuman sa kamatuoran nagatigum ug kusog gikan sa masulayong pamaagi, nagpakita sa kaanindot sa pagkabalaan taliwala sa nagapalibot nga pagkahulog. Kining tanan, siya miingon, “Ako na ikaw nga gisilsil sa mga palad sa akong mga kamot” (Isaias 49:16). Sila gigunitan sa walay katapusan, dili mawagtang nga handumanan. Kita nagkinahanglan ug pagtuo karon, buhi nga pagtuo. Kita nagkinahanglan ug buhi nga pagpamatuod nga mohiwa sa kasingkasing sa makasasala. Subra ka daghan ang pagpangwali ug hilabihan ka gamay lamang ang pagpangalagad. Nagkinahanglang kita ug balaan nga pagdihog. Kinahanglan nato ang espiritu ug kainiton sa kamatuoran. Daghan sa mga ministro nga katunga paralisado tungod sa kaugalingong depekto sa kinaiya. Nagkinahanglan sila ug makapakabig nga gahum sa Dios.

Kadtong gikinahanglan sa Dios kang Adan sa wala pa ang pagkahulog mao ang hingpit nga pagtuman sa iyang balaod. Ang Dios nagkinahanglan karon sama sa iyang gipangayo kang Adan, hingpit nga pagtuman, pagkabalaan nga walay ikasaway, walay nakulang sa Iyang panan-aw. Ang Dios motabang kanato sa paghatag Kaniya sa tanang gikinahanglan sa Iyang balaod. Dili nato kini mahimo kung wala ang pagtuo nga modala kanato ngadto sa pagkamatarung ni Cristo diha sa matag adlaw nga buhat.

Minahal kong mga kaigsoonan, ang Ginoo mobalik. Ipataas ang inyong mga hunahuna ug mga ulo ug pagmaya. Oh, kita magaisip nga kadtong makadungog sa malipayon nga mga balita, kinsa nagaangkon sa gugma ni Jesus, mapuno sa kalipay nga dili matukib ug puno sa himaya. Kini mao ang maayo, ang malipayon nga balita nga makapalagsik sa atong matag kalag, nga kinahanglan balik-balikon sulod sa atong mga panimalay ug isulti niadtong sa atong mahibalag sa kadalanan. Unsa ka labing malipayon nga mga balita nga atong masugilon. Ang pagpanglibak ug panagbingkil sa mga magtutuo o dili magtutuo dili mao ang buluhaton nga gihatag sa Dios kanato nga buhaton.

Kung si Cristo ang akong manluluwas, ang akong sakripisyo, ang akong tigpasig-uli, nan dili gayud ako malaglag. Magatuo Kaniya, ako adunay kinabuhing dayon. Oh, nga ang tanan nga motuo sa kamatuoran motuo kang Jesus isip ilang personal nga manluluwas. Wala ako magpasabot mahitungod sa yano nga pagtuo nga wala ubani sa mga binuhatan, apan diha sa kamatinguhaon, pagkinabuhi, kanunay, malahutayong pagtuo, nga nagkaon sa unod ug nagainom sa dugo sa Anak sa Dios. Gusto nako, nga dili lamang sa mapasaylo tungod sa paglapas sa balaang balaod sa Dios, apan gusto nako nga mabayaw ngadto sa kahayag sa panagway sa Dios. Dili lamang aron madawat sa langit, kondili aron adunay madagayaon nga pagsulod.

Kita ba walay pagbati isip usa ka pinasahi nga katawhan, usa ka balaang nasud, sa dili matukib nga gugma nga gipakita sa Dios kanato? Ang kaluwasan dili sa pagpabautismo, dili aron mahasulat ang atong mga pangalan sa mga basahon sa iglesya, dili sa pagwali sa kamatuoran. Apan kini ang buhi nga panaghiusa kang Jesu Cristo, nga mabag-o sa kasingkasing, nagabuhat sa buluhaton ni Cristo diha sa pagtuo, ug buhat sa gugma, sa pagpailub, kaaghop, ug paglaum. Ang matag kalag, nga nadugtong kang Cristo mahimong usa ka buhing magwawali sa tanang naglibot kaniya. Siya mobuhat alang niadtong anaa sa haduol ug anaa sa halayo. Siya walay pinili nga pagbati, dili interesado sa pagtukod lamang ug usa ka sanga nga buhatan diin siya nagdumala ug didto mohunong ang iyang kasibot. Ang tanan mobuhat uban ang tinguha aron mahimong lig-on ang matag sanga. Wala nay gugma sa kaugalingon, walay hakog nga tinguha. Ang bulohaton usa, ang kamatuoran usa ka dako nga kinatibuk-an.

Hinaut nga ang pangutana ipangutana uban sa mainiton, mabalak-on nga kasing-kasing, “Ang kasina ba gipangga, ang pangabugho gitugutan ba nga makakita ug dapit sa akong kasingkasing?” Kon mao wala diha si Cristo. Ako ba nga gihigugma ang balaod sa Dios, ang gugma ba ni Jesu Cristo ania sa akong kasingkasing?” Kon kita maghigugmaay sa usag usa ingon nga si Cristo nahigugma kanato sa ingon kita nangandam alang sa bulahan nga kalinaw sa langit ug kapahulayan. Walay pakigbisog didto nga mamahimong una, aron makabaton sa pagkalabaw; ang tanan mohigugma sa ilang silingan sama sa ilang kaugalingon. Oh, nga ablihan sa Dios ang salabutan ug mamulong sa mga kasing-kasing sa atong mga iglesya pinaagi sa pagpukaw sa matag usa nga mga membro. . . .

Kadtong anaa sa kasayon sa Sion kinahanglan nga mapukaw. Daku ang ilang tulubagon kinsa nagdala sa kamatuoran apan wala mobati sa kabug-at nga gipas-an sa mga kalag. Oh, alang sa lalaki ug babaye nga nagaangkon sa kamatuoran mapukaw, sa pagpas-an sa yugo ni Cristo, sa pagpas-an sa iyang mga palas-anon. Adunay daghang gipangita kinsa dili lamang sa ngalan nga interesado apan sama kang Cristo nga interes, dili dalo — usa ka hilabihang kadasig nga dili maluya ilalum sa mga kalisdanan o kabugnaw tungod kay ang sala midaghan. . .

Kita nagabarog sa pinakautlanan sa walay katapusang kalibutan. Kasarangang panahon nga Cristohanon, dili maoy gikinahanglan alang niini nga buhat. Ang mabalatyagon ug maanindot nga relihiyon dili gikinahanglanon karon. Kinahanglan adunay kusog nga gidala sa atong pagtuo ug sa pagmantala sa kamatuoran. Sultihan ko kamo, usa ka bag-ong kinabuhi ang nagapadayon gikan sa satanasnong mga ahensya aron magtrabaho uban ang gahum nga wala pa nato maamgohi. Ug dili ba ang usa ka bag-ong gahum gikan sa itaas makapanag-iya sa katawhan sa Dios? Ang kamatuoran, makapabalaan nga inpluensya niini, kinahanglan nga maawhag sa katawhan. Kinahanglan adunay matinguhaon nga mga pagpangamuyo ihalad ngadto sa Dios, nagaagulo nga pag-ampo ngadto Kaniya, nga ang atong mga paglaum ingon nga katawhan dili matukod sa mga pangagpas, kondili sa walay katapusan nga mga katinuoran. Kita kinahanglan masayud sa atong kaugalingon, pinaagi sa mga ebidensya sa mga pulong sa Dios, kung kita anaa ba sa pagtuo, padulong sa langit o dili. Ang moral nga sumbanan sa kinaiya mao ang balaod sa Dios. Ato ba nga natuman ang mga gikinahanglan? Ang mga katawhan ba sa Ginoo nagdala sa ilang mga kabtangan, ilang panahon, ilang mga talento, ug tanan nilang inpluwensya ngadto sa buhat alang niini nga panahon? Magmata kita. “Busa, kong nangabanhaw kamo uban kang Cristo, pangitaa ninyo ang mga butang nga atua sa itaas diin atua si Cristo, nga nagalingkod sa toong kamot sa Dios.” (Colosas 3:1).5