Kadaghanan kanato sinati sa kasinatian ni Felipe sa dihang gitawag siya nga makigsulti sa usa ka inpluwensyado nga tawo gikan sa Etiopia.

“Ang manulonda sa Ginoo nagsulti kang Felipe, nga nagaingon, Tumindog ka, ug umadto ka sa habagatan sa dalan nga lugsongon gikan sa Jerusalem padulong sa Gaza, nga kamingawan. Ug siya mitindog ug miadto: ug, ania karon, ang usa ka Etiopiahanon, eunuco nga gamhanan ilalum ni Candace, ang reina sa mga Etiopiahanon, kansang mga bahandi siya ang tinugyanan, nga miadto sa Jerusalem aron sa pagsimba, sa nagapauli na siya, ug nagalingkod sa iyang karwahe nga nagbasa sa Isaias nga manalagna. Unya ang Espiritu miingon kang Felipe, Dumuol ka, ug umadto ka niana nga karwahe. Ug si Felipe midalagan ngadto kaniya, ug hindunggan kini nga nagabasa kang Isaias nga manalagna, ug miingon: Nakasabut ka ba sa imong ginabasa? Ug nag-ingon siya, Unsaon ko paghimo kong walay usa nga magtudlo kanako? Ug gihangyo niya si Felipe aron nga mosakay ug molingkod sa uban kaniya. . . . Unya gibuka ni Felipe ang iyang baba, ug misugod sa mao nga kasulatan, ug nagwali ngadto kaniya mahitungod kang Jesus” (Buhat 8:26–31, 35).

Kini dili lamang usa ka storya, apan usa ka tinuod nga makasaysayanon nga panghitabo. Kanunay ba natong gitagaan ug pagtagad kung unsa kini ka hinungdanon sa matag usa kanato karon?

“Kining Etiopiahanon nagrepresentar sa usa ka dako nga hut-ong nga kinahanglang tudloan sa maong mga misyonaryo sama kang Felipe — mga tawo nga makadungog sa tingog sa Dios ug moadto diin Siya magpadala kanila. Adunay daghan nga nagbasa sa Kasulatan nga wala makasabut sa ilang tinuod nga kahulogan. Sa tibuok kalibutan ang mga lalaki ug mga babaye nagtan-aw sa langit. Ang mga pag-ampo ug mga luha ug mga pangutana gikan sa mga kalag nga nangandoy alang sa kahayag, alang sa grasya, alang sa Balaang Espiritu. Daghan ang anaa sa ngilit sa gingharian, naghulat lamang nga tigumon.

“Usa ka manulonda migiya kang Felipe ngadto sa usa nga nangita sa kahayag ug kinsa andam sa pagdawat sa ebanghelyo, ug karon ang mga manulonda mogiya sa mga tunob niadtong mga magbubuhat nga motugot sa Balaang Espiritu sa pagbalaan sa ilang mga dila ug pagputli ug pagtuboy sa ilang mga kasingkasing. Ang manulonda nga gipadala ngadto kang Felipe makahimo sa pagbuhat sa iyang kaugalingon alang sa Etiopiahanon, apan kini dili maoy paagi sa Dios sa pagbuhat. Kini maoy Iyang plano nga ang mga tawo mobuhat alang sa ilang isigkatawo.

“Sa pagsalig nga gihatag ngadto sa unang mga tinon-an, mga magtutuo sa matag kapanahonan mipahat. Ang matag usa nga nakadawat sa ebanghelyo gihatagan ug sagrado nga kamatuoran aron ipaambit ngadto sa kalibutan. Ang matinud-anon nga mga tawo sa Dios kanunay nga agresibo nga mga misyonaryo, nagpahinungod sa ilang mga kapanguhaan alang sa kadungganan sa Iyang ngalan ug maalamon nga naggamit sa ilang mga talento diha sa pag-alagad kaniya.

“Ang dili hinakog nga paghago sa mga Cristohanon kaniadto kinahanglan nga usa ka leksyon ug usa ka inspirasyon alang kanato. Ang mga membro sa iglesia sa Dios kinahanglan nga magmakugihon sa maayong mga buhat, nga magbulag gikan sa kalibutanon nga ambisyon ug maglakaw sa mga tunob Niya nga naglakaw sa pagbuhat ug maayo. Uban sa mga kasingkasing nga napuno sa simpatiya ug kalooy, sila magaalagad niadtong nanginahanglan sa tabang, nga magadala ngadto sa mga makasasala ug kahibalo sa gugma sa Manluluwas. Ang maong bulohaton nagkinahanglan ug paghago, apan kini nagdala ug madagayaong ganti. Kadtong nagabuhat niini uban sa pagkasinsero sa katuyoan makakita sa mga kalag nga madaug ngadto sa Manluluwas, kay ang inpluwensya nga nagauban sa praktikal nga pagtuman sa diosnon nga sugo dili kapugngan.

“Dili lamang sa ordinado nga ministro ang responsibilidad sa pag-adto aron sa pagtuman niini nga sugo. Ang matag usa nga midawat kang Cristo gitawag sa pagbuhat alang sa kaluwasan sa iyang isigkatawo. . . ."

“Ang sugo sa Manluluwas gihatag ngadto sa tanan nga mituo sa Iyang ngalan. Ang Dios mopadala ngadto sa Iyang ubasan ug daghan nga dili matinugyanon ngadto sa pangalagad pinaagi sa pagpandong sa mga kamot.”1

“Sa kasinatian ni Felipe ug sa Etiopiahanon gipresentar ang buhat diin ang Ginoo nagtawag sa Iyang katawhan. . . Adunay mga tawo sa kalibutan nga nagabasa sa Kasulatan, apan dili makasabut sa ilang kahulogan. Ang mga lalaki ug mga babaye nga adunay kahibalo sa Dios gikinahanglan sa pagpasabut sa pulong niini nga mga kalag.”2

Kon ikaw napanalanginan niini nga kahibalo, ikaw usa kanila!.