Pag-Adto Sa Tibuok Kalibutan
Si Jesus mihatag ug usa ka makapainteres nga sambingay: “Usa ka tawo naghimo ug usa ka dakong panihapon, ug midapit sa daghan: Ug sa takna sa panihapon nagsugo sa iyang ulipon sa pag-ingon sa mga dinapit, Umari kamo, kay ang tanan andam na. Ug silang tanan sa usa ka pag-uyon misugod sa pagpangatarungan kanila: Ang nahauna miingon kaniya: Nakapalit ako ug usa ka luna sa yuta, ug kinahanglan nga moadto ako ug tan-awon ko kini: Ako naghangyo kanimo nga pasayloa lang usa ako. Ug ang usa miingon: Nakapalit ako ug lima ka pares nga mga vaca, ug moadto ako sa pagsulay kanila: Ako naghangyo kanimo nga pasayloa lang usa ako. Ug ang usa miingon: Ako nangasawa ug usa ka asawa, ug tungod niini dili ako makaadto. Busa ang ulipon miadto, ug nagsugilon sa iyang agalon niining mga butanga. Unya ang tag-iya sa balay, nga nasuko, miingon sa iyang sulogoon: Umadto ka pagdali ngadto sa mga kalye ug mga kadalanan sa ciudad, ug dad-a dinhi ang mga kabus, ug ang amang, ug ang mga bakol, ug ang mga buta. Ug ang sulogoon miingon: Ginoo, natuman na ang imong gisugo, ug aduna pay dapit. Ug ang agalon miingon sa sulugoon, Umadto ka sa mga kadalanan ug sa mga kasiklatan, ug pugsa sila sa pagsulod, aron ang akong balay mapuno” (Lucas 14:16–23).
Kinsa ang una nga duha ka grupo nga giagda dinhi niini nga panihapon, ug unsa ang kahulogan niini?
“Pinaagi sa dakong panihapon, si Cristo nagrepresentar sa mga panalangin nga gitanyag pinaagi sa ebanghelyo. Ang tagana walay lain kondili si Cristo mismo. Siya mao ang tinapay nga nanaug gikan sa langit; ug gikan Kaniya ang mga sapa sa kaluwasan midagayday. Ang mga mensahero sa Ginoo nagmantala ngadto sa mga Judeo sa pag-anhi sa Manluluwas; ilang gipunting si Cristo ingong ‘ang Kordero sa Dios, nga nagakuha sa sala sa kalibutan.’ Juan 1:29. Sa pista nga Iyang gitagana, ang Dios mitanyag kanila sa labing dako nga gasa nga ikahatag sa Langit. . . . ‘Kon adunay mokaon niini nga tinapay,’ si Cristo miingon, ‘siya mabuhi hangtud sa kahangturan.’ Juan 6:51.”1
Gikan sa kinutlo sa ibabaw atong masabtan ang duha ka nindot nga mga punto:
Ang ibitasyon unang gihatag sa mga Judeo, nga nagrepresentar sa mga Cristohanon karon ingon nga piniling katawhan sa Dios. “Ug kon kamo iya ni Cristo, nan kaliwat kamo ni Abraham, ug mga manununod sumala sa saad” (Galacia 3:29).
Isip mga alagad ug mga mensahero sa Dios ngadto sa kalibutan, kita adunay pribilehiyo sa paghatag ngadto sa kalibutan ug usa ka pagdapit sa pagdawat sa walay bayad nga gasa sa tinapay sa kinabuhi, nga mao si Cristo mismo. “Ug si Jesus miingon kanila, Ako mao ang tinapay sa kinabuhi” (Juan 6:35).
Ang nasud nga Judeo misalikway sa pagdapit tungod sa ilang spirituhanong kahimtang — naghunahuna nga sila “dato, ug dagaya sa mga butang, ug walay kinahanglan sa bisan unsa” (Bugna 3:17). Dayon ang inbitasyon gihatag ngadto sa ikaduhang klase sa mga tawo. Gisultihan dayon sa agalon ang sulugoon sa Lucas 14:21, “Pangadto kamo pagdali ngadto sa mga dalan ug mga agianan sa ciudad, ug dad-a dinhi ang mga kabus, ug ang mga amang, ug ang mga bakol, ug ang mga buta.” Kini dili kaayo naghisgot sa literal nga kahulogan kondili sa spirituwal nga kahulogan. Kung kadtong nagrepresentar nga katawhan sa Dios karon maoy mga dato sa spirituwal, unya kadtong anaa sa mga kalye ug mga kadalanan kinsa mao kadtong mga kabus, bakol, ug buta sa spiritwal.
“Ang sulogoon nga midala sa mga kabus ug mga buta mitaho ngadto sa iyang agalon, ‘Natuman na ang imong gisugo, ug aduna pay dapit. Ug ang Ginoo miingon sa sulugoon, Umadto ka sa mga dagko nga kadalanan ug sa mga kasiklatan, ug pugsa sila sa pagsulod, aron mapuno ang akong balay. Dinhi gipunting ni Cristo ang buhat sa ebanghelyo gawas sa gisakopan sa Judismo, diha sa mga kadalanan ug mga kasiklatan sa kalibutan.”2
Unsa ang mahitungod sa katapusang duha ka grupo nga gihisgotan sa sambingay, ingon nga mga kadalan ug mga kasiklatan? Kini nga mga grupo gitawag sa Inspirasyon isip mga tawo sa kalibutan, kadtong gawas sa atong pagtuo.
Atol sa bag-o nga mga sesyon sa pagbansay sa misyonaryo sa daghang mga simbahan, akong gipasiugda ang atong mga paningkamot — o kulang niini — sa pagkab-ot niadtong wala sa atong tinuohan. Sa pagsugod sa usa ka klase, akong gihangyo ang mga estudyante sa pagtan-aw sa palibot ug sa pag-ila kon pila sa lawak ang bag-ong mga magtutuo gikan sa gawas sa simbahan, nga giabiabi sulod sa milabay nga lima ka tuig. Sa maong dakong grupo, usa o duha lamang ang bag-o lang nakabaton ug pagtuo gikan sa “kalibutan.” Kini nagpatunghag kritikal nga pangutana alang sa matag usa kanato: Isip mga sulugoon ni Cristo, aktibo ba kita sa pagtabang ug pagdapit sa uban ngadto sa dakong kombira, diin si Jesus mismo mao ang tinapay sa kinabuhi?
Kita mahimong maghunahuna, “Unsaon nako pagbuhat kini nga buluhaton? Sa pagpiho, kinsa sa kalibutan ang akong maabut?” Mahimong mobati kitag kawalay kasigurohan bahin sa pag-abot sa mga tawo gikan sa lainlaing mga kaagi —kon sila ba edukado kaayo, adunahan, o tingali naghupot ug mga pagtuo nga lahi sa tradisyonal nga Cristohanong mga pagtulon-an. Ang uban tingali mobati nga layo sa mga relihiyosong komunidad tungod sa personal nga mga pagpili, makasasala nga estilo sa kinabuhi, o kultural nga mga panglantaw. Adunay kasagaran nga pagduhaduha kon ang maong mga indibiduwal interesado ba sa spirituwal nga mga butang o abli sa pag-apil sa simbahan.
Daghan kanato tingali maghunahuna nga tingali dili husto o angay nga dad-on ang maong mga indibiduwal ngadto sa simbahan. Kini nga mga pagduhaduha mahimong motumaw kung gikonsiderar ang pagpangalagad. Aron sa paghumpay niini nga mga pagduhaduha, bililhon ang pagpamalandong sa unsay gisulti sa Inspirasyon mahitungod sa unang grupo nga gidapit ngadto sa kombira sa ebanghelyo — kadtong anaa sa “dagkong mga kadalanan.”
“Ang pagdapit sa kapistahan unang gihatag ngadto sa mga Judeo nga katawhan, ang mga tawo kinsa gitawag sa pagbarug isip mga magtutudlo ug mga lider taliwala sa mga tawo. . . . Sa diha nga ang tawag sa ebanghelyo gipadala ngadto sa mga Gentil, adunay sama nga plano sa pagbuhat. Ang mensahe una nga ihatag ‘sa mga dagkong kadalanan’ — sa mga tawo nga adunay aktibong bahin sa buluhaton sa kalibutan, ngadto sa mga magtutudlo ug mga pangulo sa katawhan.
“Tugoti nga ang mga mensahero sa Ginoo maghunahuna niini. Ngadto sa mga magbalantay sa panon, ang mga magtutudlo nga gitudlo sa Dios, kini kinahanglan nga moabut ingon nga usa ka pulong nga pagapatalinghugan. Kadtong nahisakop sa hataas nga mga ranggo sa katilingban kinahanglan pangitaon uban ang malumo nga paghigugma ug inigsoon nga pagtagad. Mga tawo sa negosyo nga kinabuhi, sa taas nga mga posisyon sa pagsalig, mga tawo nga adunay daghang mga kahanas sa pag-inbento ug siyentipikong panabot, mga tawo nga batid sa kaalam, mga magtutudlo sa ebanghelyo kansang mga hunahuna wala pa matawag sa pinashi nga mga kamatuoran alang niining panahona — kini sila kinahanglan nga una nga makadungog sa panawagan. Ngadto kanila kinahanglang ihatag ang pagdapit.
“Adunay usa ka buhat nga pagabuhaton alang sa mga adunahan. Ang adunahan nga tawo nagkinahanglan sa imong paghago diha sa gugma ug kahadlok sa Dios. Kasagaran siya misalig sa iyang mga bahandi, ug dili mobati sa iyang kakuyaw. Ang mga mata sa iyang hunahuna kinahanglan nga madani sa mga butang nga malungtaron nga bili. . . . .
“Kadtong kinsa nagbarug nga hataas sa kalibutan alang sa ilang edukasyon, bahandi, o tawag, panagsa ra nga hisgutan sa personal mahitungod sa mga interes sa kalag. Daghang Cristohanong mga magbubuhat ang nagpanuko sa pagduol niini nga mga klase. Apan dili kini angay.”3
Usa ka hinigugma nga higala sa akong amahan nahisakop niini nga klase. Makasusubo, sa panahon sa pagkamatay sa akong amahan, anaa pa ako “sa kalibutan.” Apan human sa pagbalik sa pagtuo ug nahimong magbubuhat (Bible Worker), napugos ako sa pagkontak sa higala sa akong amahan. Siya usa ka mahigalaon nga tawo, mao nga ako mibisita sa iyang balay ug kami manihapon. Samtang nagpadayon ang among panaghigalaay, ako nangita sa Ginoo ug paagi sa pagpapahat sa ebanghelyo ngadto kaniya tungod kay siya agnostic o wala moila nga adunay Dios. Sa dihang moduaw ko sa iyang balay, iyang ipakita kanako ang iyang ligid sa kolon ug tapahan, kay ganahan siyang maghimog kolon ingon nga kalingawan. Sa makadaghan nangutana siya kon gusto ba kong maghimog mga kolon uban niya, apan kanunay kong mobalibad, kay dili kini makapainteres kanako. Apan, samtang nagpadayon kami sa pagbisita, nag-ampo ko nga adunay paagi sa pagpakigbahin sa ebanghelyo ngadto kaniya. Dayon usa ka adlaw samtang ako nag-ampo, ako nadasig nga ipadayon ug dawaton ang iyang tanyag nga magdungan ug paghimo ug mga kolon (pottery) — nakaamgo nga mahimo kining usa ka makapasulod nga bahin sa pagpakigbahin sa ebanghelyo.
Sa dihang gisultihan nako kining dungganon nga tawo nga gusto kong makakat-on unsaon paghimo ug mga kolon, siya nalipay kaayo. Sa unang higayon didto, kami adunay nindot nga kasinatian nga magkauban—moto niini o dili, nakapaambit ako sa pipila ka spirituhanong mga aplikasyon kon sa unsang paagi si Cristo ang magkokolon, ug kita ang yutang kolonon. Human niini nga panag-uban, nakahimo ko sa pagpugas ug pipila ka mga binhi sa ebanghelyo dinhi ug didto — ug ang among panaghigalaay nagkalawom. Nagsugod ako sa pagsabot ug dugang bahin sa pamaagi ni Cristo sa pagdaug sa kalag:
“Ang pamaagi ni Cristo lamang ang makahatag ug tinuod nga kalampusan sa pagkab-ot sa mga tawo. Ang Manluluwas nakigsagol sa mga tawo ingon nga usa nga nagtinguha sa ilang kaayohan. Siya nagpakita ug simpatiya alang kanila, nangalagad sa ilang mga panginahanglan, ug nakuha ang ilang pagsalig. Unya Siya nag-awhag kanila, ‘Sumunod ka Kanako.’ ”4 Kini naglangkob sa pagpalawom sa mga relasyon ug pagdaug sa pagsalig sa usa ka tawo. Dayon samtang magpalambo kita ug mas suod nga panaghigalaay sa usa ka tawo, mas makapaambit kita sa ebanghelyo. Karon, human sa 10 ka tuig, kining mao nga tawo ug ako suod gihapon nga managhigala — ug nagpadayon ko sa pagpugas sa mga binhi sa kamatuoran, nga nagalaum nga usa ka adlaw anaa siya sa gingharian sa langit
Kita gisultihan pinaagi sa Inspirasyon nga si Cristo mihimo ug dakong paningkamot niining gitumong nga klase sa mga tawo — ug kita usab gipakita kon giunsa Niya sila pagkab-ot. Si Jesus “nangita ug kaila nga adunahan ug edukado nga Pariseo, sa Judeong halangdon, ug sa Romanong magmamando. Siya midawat sa ilang mga inbitasyon, mitambong sa ilang mga kombira, mihimo sa Iyang kaugalingon nga pamilyar sa ilang mga interes ug mga trabaho aron Siya makaangkon ug agianan sa ilang mga kasingkasing, ug makapadayag ngadto kanila sa dili madunot nga mga bahandi.”5 The byways
Kita usab gisultihan sa pagkab-ot niadtong anaa sa “mga kadalanan” o “mga kasiklatan.” Namulong gikan sa panahon ni Moises, ang Biblia naghisgot “ang dumuloong, ug ang ilo, ug ang balo nga babaye, nga anaa sa sulod sa imong mga ganghaan, moabut, ug mokaon, ug mabusog” (Deuteronomio 14:29). Ang inspirasyon nagsulti kanato, “dili lamang kita maghunahuna sa mga bantugan ug batid nga mga tawo, ngadto sa pagpasagad sa mas kabus nga mga hut-ong. Si Cristo nagpahimangno sa Iyang mga mensahero sa pag-adto usab niadtong anaa sa mga kadalanan ug mga kasiklatan, ngadto sa mga kabus ug mga timawa sa yuta. Diha sa mga korte ug mga agianan sa dagkong mga ciudad, sa mingaw nga mga agianan sa nasud, anaa ang mga pamilya ug mga indibiduwal — tingali mga stranghero sa usa ka langyaw nga yuta — kinsa walay relasyon sa simbahan, ug kinsa, sa ilang kamingaw, mibati nga ang Dios nakalimot kanila.”6
Isip usa ka batan-on, nag-canvass ako mga lima ka oras kada adlaw aron makatabang sa pagbayad sa akong gipuy-an ug tuition sa eskwelahan. Ang among magtutudlo mitudlo kanamo ug daghang maayong mga baruganan nga makita sa sambingay sa dakong panihapon. Ang usa mao nga kinahanglan natong i-canvass ang tanan nga mga klase sa mga kasilinganan, dili lamang ang mga lugar kung diin kita nakahimo sa daghang halin. Usa ka adlaw moadto kami sa mga dato, sa sunod nga adlaw sa tungatunga nga klase ug sa laing adlaw sa mga kabus nga kasilinganan.
Samtang nag-canvass sa usa ka kabus nga kasilinganan usa ka adlaw, ako adunay usa ka makapalamdag nga kasinatian. Sa dihang nagkaduol na sa atubangan nga pultahan, akong namatikdan ang pipila ka mga butang nga nagpadayag sa pipila ka bagis nga mga kinaiya nga nagpuyo niini nga balay. Tungod kay nagdako ako sa mas dako nga Los Angeles, California, nakaila ako sa usa ka mabangis nga baho — sa pag-abli sa pultahan, nakita nako ang usa ka grupo sa mga lalaki sa sala nga nag-inom ug alkohol ug nanigarilyo ug marijuana. Ako usab nailhan ang mga kolor ug klase sa sinina nga gisul-ob nga lagmit mga membro kini sa gang. Sa pagsugod sa akong canvass, ang una nakong gihunahuna mao nga sultihan ko, “Dili interesado!” ug ang pultahan mobunal sa akong nawong.
Apan dili ingon niini ang nahitabo. . . . Nakahimo ako sa pagcanvass sa tanan mga upat o lima ka libro nga akong gikuptan samtang ang tawo mapailubon nga naminaw. Sa dihang nahuman na ako, miingon siya, “Kadiyot lang,” ug mibalik nga may dala nga $20 nga kwartang papel, nga nag-ingon, “Kuhaon ko kana,” nga nagtudlo sa usa ka spirituhanong libro. Sa dihang miadto ko aron ihatag kaniya ang iyang sukli (kay niadtong mga panahona ang mga libro $10 ra,) siya miingon, “Imoha na ang sukli, ipadayon ang pagbuhat nga imong gibuhat, ug panalanginan ka sa Dios!”
Samtang mibiya sa maong balay, akong gipamalandong ang bililhon kaayong leksyon nga akong nakat-onan. Sa una nakong pag-abot sa balay, aduna koy gihunahuna nang daan. Ilabi na sa dihang giablihan ang pultahan, naghunahuna ko, “Nganong nanuktok ko niini nga pultahan? Kining mga tawhana klaro nga nagbuhat ug mga butang nga supak sa Dios ug sa Iyang pulong, busa nganong mag-usik man ako sa akong panahon ug sa ila pinaagi sa pagpaambit ug usa ka butang nga dili sila interesado? Apan wala gayud gisulti ang Biblia kanato nga adunay ingon niana nga mga ideya bahin sa mga kalag. Kini yanong nag-awhag kanato sa pagpangita ug pagluwas sa nawala (Lucas 19:10). Samtang gitudloan kami ug mahinungdanon nga mga butang mahitungod sa canvassing, sama sa pagsul-ob ug maayo nga sinina, pagkahibalo pag-ayo sa among canvass ug pagpabiling maayong pagkontak sa mata, nagtuo ko nga nakadayeg kini sa tawo. Tingali siya naghunahuna, “Mao kini ang paagi nga angay nakong buhaton ang akong kinabuhi,” o lagmit, “Tugoti ko nga suportahan kining batan-ong lalaki, kay anaa siya sa hustong dalan.” Ako usab nagtuo nga ang usa ka binhi gitanom uban sa libro — ug nga siya mismo gusto nga moadto sa husto nga dalan.
“Ang Dios mihatag ug pinasahi nga mando nga atong tagdon ang dumuloong, ang sinalikway, ug ang kabus nga mga kalag nga huyang sa moral nga gahum. Daghan nga makita nga bug-os nga walay pagtagad sa relihiyoso nga mga butang anaa sa kasingkasing nga nangandoy sa kapahulayan ug kalinaw. Bisan tuod sila naunlod ngadto sa kahiladman sa sala, adunay posibilidad sa pagluwas kanila. . . .
“Sultihi ang mga kabus nga nawad-an sa paglaum nga nahisalaag nga sila dili kinahanglan nga mawad-an sa paglaum. Bisan sila nasayup, ug wala makatukod ug usa ka matarung nga kinaiya, ang Dios adunay kalipay sa pagpasig-uli kanila, bisan ang kalipay sa Iyang kaluwasan. Siya nahimuot sa pagkuha sa dayag nga walay paglaum nga materyal, niadtong pinaagi kang Satanas nagtrabaho, ug naghimo kanila nga mga sakop sa Iyang grasya. Siya nalipay sa pagluwas kanila gikan sa kaligutgut nga moabut sa ibabaw sa mga masupilon. Sultihi sila nga adunay kaayohan, paghinlo alang sa matag kalag. Adunay usa ka dapit alang kanila diha sa lamesa sa Ginoo. Siya naghulat sa pagabi-abi kanila.”7 Pagkanindot nga pagpadasig samtang atong sugdan kini nga buluhaton! Ang Dios gusto nga gamiton kamo ug ako sa pagpahat sa Iyang ebanghelyo aron Iyang mapahiuli ngadto sa Iyang kaugalingong dagway ang mga tawo sama sa tawo sa storya sa ibabaw, ug naghulat Siya nga hatagan sila ug dapit sa Iyang lamesa samtang sila motubag sa Iyang tawag sa pagdapit.
Laing pinasahi nga storya bahin sa usa ka hinigugma nga kalag sa “mga kasiklatan” miabut sa ulahi sa dihang nanguna ako sa usa ka colporteur nga programa sa estado sa Washington. Adunay usa ka batan-ong babae nga ginganlag Daisy sa programa (tugoti ako sa paggamit sa iyang unang ngalan). Naghinamhinam kaayo siya nga makasinati ug makakat-on ug canvassing, kay unang higayon pa niya kini. Siya adunay tinguha sa pagkab-ot sa mga kalag — ug samtang ang mga canvasser makatipig ug bahin sa ilang kinitaan, siya usab naghinamhinam nga makakwarta aron makaadto sa eskwelahan sa misyonaryo.
Usa ka adlaw samtang nagcanvass kaming tanan, nasurprisa ako sa pagkakita ni Daisy nga hilabihan ka hinam ug gani nalipay. (Siya sa kasagaran hilomon ug kalmado.) Nahitabo nga siya adunay nindot nga kasinatian uban sa usa ka babaye kinsa bag-o lang mipalit ug pipila ka mga libro pinaagi sa paghatag kaniya ug usa ka supot sa pagkaon nga puno sa salapi aron ibayad alang kanila. Sa kinatibuk-an adunay gibanabana nga $350 sa bag sa nagkalainlaing bili sa kwarta nga papel. Sa katingala, ang ubang mga canvasser nangutana kang Daisy kabahin niining babaye. Dato ba siya?
“Dili,” tubag ni Daisy. “Siya mao ang baliktad niini, ug wala siya nagpuyo sa labing maayo nga mga kahimtang.” Niadtong higayona, nakaplano ako sa pagduaw sa babaye aron pasalamatan siya sa dakong kontribusyon sa pagtabang kang Daisy ug sa pagtan-aw kon makuha ba nako ang iyang inpormasyon sa pagkontak aron ang lokal nga pastor maka-follow up kaniya. Samtang gipaambit ni Daisy ang nahimutangan sa balay, miparada ako tabok sa kalsada sa usa ka gubaon nga balay ug milakaw paingon sa pultahan. Diha sa atubangan sa balkonahe mao ang usa ka walay sapin, hugaw nga batan-ong babaye mga 12 anyos, nagtan-aw sa pipila ka mga libro nga bag-ong napalit sa iyang inahan pinaagi ni Daisy.
Samtang gihangyo ang babaye nga makigsulti sa iyang inahan, ang pultahan nga abli, usa ka babaye nga kuwestiyonableng tan-awon ang reputasyon ug trabaho miduol sa pultahan, nga nangutana kon kinsa ako. Samtang nagpasalamat ako niya sa dako nga kontribusyon sa among igsoon nga si Daisy, mahanduraw nimo ang mga hunahuna sa akong hunahuna. Nganong kini nga babaye — sa tanang tawo — mihatag ug dako kaayong donasyon kang Daisy, ug nganong interesado man siya sa mga libro o sa spirituwal nga mga butang?
Natubag dayon ang akong mga pangutana. . . . Ako nangutana kaniya kon mahimo ba ako magbilin ug dugang nga mga libro, tungod kay kami adunay uban nga wala niya madawat, ilabina kay siya adunay igo nga donasyon. Ako nangutana usab kon makuha ba nako ang iyang kontak nga numero aron ang lokal nga pastor makatanyag ug pag-ampo, pagtuon sa Biblia, ug uban pa.
Siya mitubag nga dili niya ihatag ang iyang numero alang sa mga pagtuon sa Biblia, ug uban pa, apan nga iya kining itagana alang sa usa ka butang: Siya misulti kanako nga nakadayeg kaayo siya sa atong igsoong babaye nga si Daisy, sa iyang pamatasan, ug sa iyang tinguha sa pagsunod sa Dios ug sa pag-adto sa misyonaryong eskwelahan, nga isip nag-inusarang ginikanan gusto niya ang samang butang alang sa iyang anak nga babaye. Gusto niya nga dawaton nako ang iyang anak sa canvassing nga programa. Sa akong pagpahibalo kaniya nga ang iyang anak nga babaye gamay pa kaayo, misaad ko nga kami bisan pa niana iapil siya — ug moanhi aron sa pagkuha kaniya — aron mouban kanamo samtang manglakaw sa lainlaing laag sa panahon nga walay trabaho.
Ang babaye nagsulti kanako sa paghulat, samtang siya mipadayon sa pagsulod sa balay aron sa pagkuha ug laing supot sa pagkaon nga puno sa kuwarta (laing $350 nga gibanabana). Samtang ako mobiya na sa programa sulod sa usa ka semana nianang gabhiona, gisultihan ko ni Daisy ug niadtong nahabilin nga nagdumala nga ilang nakuha ang babaye sa makaduha aron iapil siya sa lainlaing mga laag ug nga ang binhi sa ebanghelyo natanom.
Samtang akong gihunahuna pag-uab kini nga storya nahinumdom ko sa storya ni Maria Magdalena samtang didto sa balay ni Simon. Kini nga babaye, sama ni Maria, andam nga mohatag sa tanan nga anaa kaniya alang sa usa ka higayon nga makaangkon sa mahangturong katigayunan sa grasya sa gingharian sa Dios alang sa iyang anak nga babaye. Sa pagbiyahe diha sa atong panaw, samtang kita makahimamat sa uban sa mga ka kasiklatan sama niini nga babaye ug sa lalaki sa miaging storya, kinahanglan natong pangutan-on ang atong kaugalingon, “Ako ba, kita ba, sama ni Simon nga Pariseo, puno sa paghukom ug panghimaraut — o sama ba kita kang Cristo?
“Ang tagbalay mitalikod gikan niadtong nagtamay sa iyang kadagaya, ug nagdapit sa usa ka klase nga wala mabusog, kinsa walay mga balay ug mga yuta. Siya nagdapit niadtong mga kabus ug gigutom, ug kinsa mopasalamat sa mga gasa nga gihatag. ‘Ang mga maniningil sa buhis ug ang mga bigaon,’ si Cristo miingon, ‘mag una kaninyo sa pag-adto sa gingharian sa Dios’ (Mateo 21:31). Bisan unsa pa ka alaut ang mga matang sa katawhan nga gi daugdaug ug gisalikway sa mga tawo, dili sila ubos kaayo, alaut kaayo, alang sa pagtagad ug gugma sa Dios. Si Cristo nangandoy nga adunay mga tawo nga gikapoy, sinalikway, gidaugdaug nga moduol Kaniya. Ang pinaka mga makasasala mao ang tumong sa Iyang lawom, mainitong kalooy ug gugma.”8
Hinigugma nga mga kaigsoonan, ug mga batan-on! Tubagon ba nimo ang tawag sa pagpangita ug pagluwas sa nawala?
Ang pagdapit sa ebanghelyo ihatag ngadto sa tibuok kalibutan — “sa matag nasud, ug kaliwatan, ug pinulongan, ug katawhan” (Bugna 14:6). Ang katapusang mensahe sa pasidaan ug kalooy mao ang pagpadan-ag sa tibuok yuta sa iyang himaya. Kini aron maabot ang tanang klase sa mga tawo — dato, kabus, taas, ug ubos. “Panggula kamo ngadto sa mga kadalanan ug sa mga kasiklatan,” miingon si Cristo, “ug pugsa sila sa pagsulod, aron ang Akong balay mapuno” (Lucas 14:23). Usa sa labing maayong paagi sa pagtuman niini nga tawag mao ang pagpadala sa inyong mga anak, apo, pag-umangkon nga lalake, ug pag-umangkon nga babaye sa mga programa sa colporteur ug misyonaryong mga eskwelahan, diin sila mabansay sa pagpaambit sa ebanghelyo uban ang kaisog ug gugma. Kamo, usab, mahimong mapanalanginan ug makatuman sa inyong pagkatinawag pinaagi sa pagtukod ug mga relasyon uban niadtong anaa sa inyong komunidad — bisan sila adunahan nga mga propesyonal, nanlimbasug nga mga silingan, o bisan kinsa nga layo sa pagtuo — pinaagi sa pagpakita sa gugma ni Cristo pinaagi sa mabination nga mga lihok, praktikal nga tabang, mga pulong sa paglaum, o pinaagi lamang sa pagpaminaw uban ang pagbati. Pagpahat sa mga tinubdan sama sa pagkaon, bisti, o spirituhanon nga literatura, uban niadtong kinsa mahimong nalimtan o sinalikway sa katilingban, ug makiglambigit usab sa mga edukado ug inpluwensyado uban sa mahunahunaon nga mga diskusyon mahitungod sa walay katapusan nga mga kamatuoran. Pinaagi sa pagpakig-uban sa tanang tawo, sama sa gibuhat ni Cristo, atong makuha ang ilang pagsalig ug madapit sila sa Dakong Panihapon.
Hinaut nga ang Ginoo mogamit sa matag usa kanato, pinaagi sa organisado nga mga paningkamot ug personal nga pagsaksi, sa pagtuman sa Dakong Sugo (Mateo 28:19, 20) ug mahimong kahayag sa kalibutan samtang kita moadto, nga magdapit sa uban ngadto sa Dakong Panihapon. Amen!