Patgen a Cacabsat a lallaki ken babbai,

Mamatitayo cadi iti amin a puso nga umayton ni Cristo iti mabiit ket addaantayon iti maudi a mensahe ti asi nga iti agnanayon naipaay iti nagbasol a lubong? Ti ehemplotayo kadi ket cas iti rebbengna? Datayo kadi, babaen iti biag ken nasantoan a panagsasaotayo, maipakita cadagiti adda iti aglawlawtayo a kumitkitatayo para iti nagloriaan a panagparang ti Apotayo ken Mangisalacan a ni Jesu-Cristo, sino ti mangbalbaliw cadagitoy narugit a bagi ket tubayen ida cas iti nagloriaan a bagi? Mabutengac a saantayo a mamati ken maamiris dagitoy importante a kinapudno nga ibunannagtayo, rumbeng a pagtinayantayo ti pammatitayo. Adu unay ti panangsapul iti pagliwliwaan ken cadagiti banbanag a mangala iti imatangtayo iti daytoy a lubong; ti panunot ket nabati a sipapanunot iti cawes, ket ti dila masansan a maaramat iti inaangaw ken burburitog a panagsasao, a mangted iti kinaulbod iti ibagbagatayo, ta ti panagsasaritatayo ket saan nga iti langit, a kumitkitaantayo iti Mangisalacan.

Dagiti angel nga agbanbantay cadatayo, masansan a paldaangentayo ida babaen iti burburitog a panagsasarita, pakpakatawa ken panagaangaw, nga agbalinton a minamaag a casasaad. Nupay ita ikagumaantayo ti manggun-od iti balligi, ngem no saantayo a pagtalinaeden daytoy, no di lumnedtayo iti isu met la natagubaya, di mangigin-gina a kasasaad, saan a makaandor iti suot ti pammatitayo a napatpateg pay ngem balitoc. Saantayo nga agsagsagaba maigapu ken Cristo ken agdayag iti panagsagaba.

Adda naindaclan a pagkurangan iti Nacristinoan a kired ket panagservi iti Dios a matitutop iti principio. Saantayo a rumbeng a paragsaken ken penneken ti bagi, no di ket idayaw ken igloria ti Dios, ket iti amin nga aramiden ken saoentayo, ti matatayo nakaturong iti dayagNa. No palubosantayo ti pusotayo a mamalditan cadagiti sumaganad a sasao ken kankanayon a sipapanunot, saantayo a nalaca a matnag iti sulisog ket dagiti sasaotayo ket manmano ken napili a nasayaat. “Gapu cadagiti basbasoltayo Isu nasugatan, ken gapu cadagiti kinadangkestayo napalitem; InnalaNa ti dusa a babaen iti dayta addaantayo iti talna, ket gapu cadagiti sugatNa naimbagantayo.” “Ta tunggal awan maayna a sao a saoen dagiti tattao, sungbatandanto iti aldaw ti panangocom.” “Sica O Dios makitkitanac.”

Saantayo a mapanunot dagitoy importante a sasao, ket lagipen dagiti panagsagaba ni Jesus tapno datayo a napanglaw a managbasol mabalin nga umawat iti pammakacawan ken masubbot babaen iti kapatgan a daraNa, a saan a maricna ti nasantoan a panangtengngel cadatayo ken napasnec a tarigagay nga agsagaba para Kencuana a nagsagaba ken nagibtur iti casta unay para cadatayo. No agtalinaedtayo cadagitoy a banbanag, patpatgen a bagi, agraman ti dignidadna, maipakumbabanto ket iti saadna okuparan ti casla ubing a kinasimple a mangawit iti pannubngar ti sabali ken saanto a nalaca a maprobokar. Saanto ngarud a makastrec ti nasukir nga espiritu tapno mangituray iti cararua.” – Early Writings, pp. 111, 112.

Bayat iti panangamirisco no kasano caadu ti naaramid para cadatayo tapno agtalinaedtayo a nalinteg, naiturongac a mangipuccaw, ‘Anian nga ayat, nacascasdaaw a panagayat ti Anac ti Dios cadatayo a kakaasi a managbasol! Agbalintayo kadi a nakuneng ken naliway kabayatan nga amin a banag ket naaramiden para iti pannakaisalacantayo? Amin a langit ket intresadoda cadatayo. Rumbeng a naregtatayo ken mariing a mangidayaw, mangidayag ken raemen ti Maysa a nangato ken natan-oc. Ti pusotayo agluppias coma iti ayat ken panagyaman Kencuana nga aglablabonan iti ayat ken dungngo cadatayo. Cadagiti biagtayo rumbeng nga idayaw-tayo Isuna ket buyogen ti nadalus ken nasantoan a panagsasao ipakita a naiyanactayo manipud ngato, a saantayo nga agtaeng iti daytoy a lubong, no di ket agdaldaliasat ken gan-gannaettayo ditoy, nga agturongtayo iti naim-imbag a pagilian.

Adu cadagiti agibunbunannag iti nagan ni Cristo ken mangibagbaga a kitkitaenda ti asidegen a yaayNa, ngem saanda nga ammo no ania a talaga ti agsagaba maigapu ken Cristo. Dagiti pusoda ket saan a naparucma babaen iti parabur, ket saanda a natay iti bagida, a masansan a naipakita iti nagduduma a wagas. Casta met a saosaoenda nga addaanda cadagiti suot. Ngem ti kangrunaan a gapu dagiti suotda ket ti saan a naisuco a pusoda a namagbalin cadacuada a sensitibo unay. No maamiris ti casta no kasano ti agbalin a napakumbaba a pasurot ni Cristo, maysa a pudno a Cristiano, rugiandan ti agtrabaho iti naimbag a kinapasnec ken mangrugida a nalinteg. Umuna, matayda iti bagida, ket agbalinda a naalisto iti cararag ken sukimatenda ti tunggal tarigagay ti pusoda. Isucoyo ti panagtalecyo iti bagiyo ken ti kinaan-anayyo iti bagiyo, cacabsat, surotenyo ti naemma a Modelo. Kanayon a pagtalinaeden ni Jesus iti panunotyo nga Isu ti pagwadanyo ken masapul a surotenyo dagiti tugotNa. Kitaenyo ni Jesus, ti namungay ken mangleppas iti pammatitayo, a gapu iti dayta a rag-o a naisaad iti sangoananNa, inibturanNa ti cruz, inanusanNa ti pannakaibabain. InibturanNa ti panagsusupadi dagiti managbasol maibusor iti Bagina. Isu gapu cadagiti basbasoltayo ket dati a naemma, napapatay a cordero, nasugatan, napalitem, nasaplit ken naparigat.” – Ibid., pp. 113, 114.

Adayotayo pay iti panagbalin nga ili a kayat ti Dios a pagbalinantayo, gapu ta saantayo nga itan-oc ti cararua ken papintasen ti kababalin a maitunos iti nacascasdaaw a pannakaibutactac ti kinapudno ti Dios ken dagiti panggepNa. “Ti kinalinteg itag-ayna ti maysa a nacion; ngem ti basol pakaibabainan ti aniaman nga ili” (Proverbio 14:34). Ti basol ket mangdadael iti urnos. Sadinoman a pakaipateganna – iti indibidual a puso, iti pagtaengan, iti iglesia – adda gulo, gura, panagduduma, binnusor, apal, imon gapu ta ti cabusor ti tao ken ti Dios addaan iti mangkontrol a pannacabalin iti panunot. Ngem palubosan ti kinapudno nga ipateg ken isangbay iti biag, casta met nga irupir, ket dayta a lalaki ken babai guraenna ti basol ket agbalin a sibibiag a mangibagi ken Jesu-Cristo iti lubong.

Dagiti tattao a mangtontonton a mamati iti kinapudno saanto a macondinar gapu ta awananda iti lawag, ngem gapu ta addaanda iti naindaclan a lawag ngem saanda nga insangbay cadagiti pusoda tapno suoten ti naindaclan a pagibasaran-moral ti kinalinteg ti Dios. Dagiti tattao nga agkuna mamati iti kinapudno masapul a maitag-ay gapu ta pagbiaganna daytoy. Ti pudno a relihion ti Biblia masapul a levaduraanna ti biag, aramidenna ti kababalinna a natan-oc, aramidenna daytoy nga ad-adda a cas iti nadiosan a modelo. Iti casta ti pagtaengan ket agsasao buyogen ti cararag, buyogen ti panagyaman ken panagdayaw iti Dios. Dagiti angel agservi iti pagtaengan ken kumuyogda nga agdaydayaw iti balay ti cararag.

Dagiti iglesia coma a mangtontonton a mamati iti kinapudno, a mangitandudo iti linteg ti Dios, salimetmetanda dayta a linteg ket sumina cadagiti amin a kinadangkes. Tunggal miembro ti iglesia pagkedkedanda coma dagiti sulisog a mangisanay iti kinadakes ken mangpalugod iti basol. Rugian coma ti iglesia ti trabaho a mapasudi iti sango ti Dios babaen iti panagbabawi, kinapacumbaba, nauneg a panangsukisoc iti puso, ta addatayon iti antitipical nga aldaw ti panangabbong – solemne nga oras a napno cadagiti agnanayon a resulta.

Dagidiay coma mangisuro iti kinapudno iparangda daytoy cas ti adda ken Jesus. Babaen ti mangpasuco, mangpasanto, mangpasudi nga impluensia ti kinapudno ti Dios, agbalinda cas nadalus a vasiha. Malevuradaan coma iti relihion ti Biblia, ket anian nga impluensia ti rummuar cadacuada nga agturong iti lubong! Dagiti indibidual a kameng ti iglesia ket nadalus, natibker, di magaraw, kanayon nga aglaplapusanan iti ayat ni Jesus, iti casta agbalindanto a silaw iti lubong. Dagiti lallaki nga agtactacder a cas agbambantay ken cas pastor ti arban iwaragawagda coma ti napasnec a kinapudno, ipuccawda dagiti nota ti ballaag cadagiti amin a tattao, nacion ken pagsasao. Agbalinda coma a sibibiag a pannakabagi ti kinapudno nga itantandudoda, ken idaydayawda ti linteg ti Dios babaen iti nainget ken nasantoan a panangtungpal cadagiti gutogutenna, a magna iti sango ti Apo iti kinadalus, iti kinasanto ken maysa a pannacabalin ti mangtaming iti pannakaiwaragawag ti kinapudno a mangyanninaw iti lawag iti sadinoman.

Pulos a saan nga ilacsid ti Dios ti ili wenno indibidual agingga nga isuda iti mangilacsid Kencuana. Ti akinruar nga oposisyon saanna a gubuayen ti pammati ti ili ti Dios a mangsalsalimet iti bilbilinNa, tapno agbalin a nalidem. Ti panangbaybay-a a mangyeg iti kinadalus ken kinapudno iti biag ket mangpaladingit iti Espiritu ti Dios ken mangpakapuy cadacuada gapu ta awan ti Dios iti tengngada a mangbendicion, Ti makin-uneg a kinarugit ket mangyeg cadagiti pammabalaw ti Dios iti daytoy nga ili a cas iti inaramidNa iti Jerusalem. O, mangngeg coma dagiti agpakpakaasi a timec, ken napasnec a cararag, tapno dagidiay mangasaba cadagiti sabsabali, saanda a mismo a maibelleng. Cacabsatco, saantayo nga ammo no ania ti adda iti sangoanantayo, ket ti kakaisuna a talgedtayo ket ti panangsurot iti Silaw ti lubong. Agtrabaho ti Dios cadatayo ken para cadatayo no dagiti basbasol a nangisangbay iti guraNa iti daan a lubong, iti Sodoma ken Gomora ken iti daan a Jerusalem, saan nga agbalin a krimentayo.

Ti kabassitan a salungasing iti linteg ti Dios a mangisangbay iti basol iti nagsalungasing, ken awanan iti napasnec a panagbabawi ken panangilacsid iti basol, sigurado a mamagbalin kencuana nga apostata (nagbaw-ing manipud pammati). . . . Datayo cas maysa nga ili, agingga a mabalin, dalusantayo ti campo iti moral a pannakarugit ken mangpakaro a basol. No ti basol ket agmartsa cadagiti tattao nga agkunkuna nga itantandudoda ti moral a pagibasaran ti kinalinteg, kasano a namnamaentayo nga isubli ti Dios ti pannacabalinNa iti biangtayo ken isalacanNatayo cas maysa nga ili a nagaramid iti kinalinteg? . . . . No cas maysa nga ili saantayo a pagtalinaeden ti bagitayo iti pammati ken saan laeng nga itantandudo babaen ti pluma ken timec ti bilin ti Dios, no di ket salimetmetan ti tunggal maysa, a ditay salungasingen ti uray maysa a pagalagadan a siaammo, no casta umayto cadatayo ti kinakapuy ken pannakadadael. Trabaho daytoy a masapul a tamingen ti tunggal maysa iti iglesiatayo. Tunggal tao masapul nga agbalin a Cristiano.

Maickat coma ti basol ti kinatangsit, mapagballigian coma amin a sobra a panagcawcawes, ken maipacat ti panagbabawi nga agturong iti Dios para iti nakaro a panagtakaw nga agturong Kencuana a nanglapped iti kuarta a rumbeng nga agayus iti pagidulinan iti gameng tapno masustiner ti trabaho ti Dios cadagiti tay-ac ti misionna. Ti aramid ti repormasion, ti pudno a pannakakomberte, ket maisaad iti sango ken maiyunay-unay cadagiti tattao. Bay-an a dagiti aramidtayo, dagiti tigtignaytayo, maitunosda iti trabaho para iti daytoy a tiempo, tapno maibagatayo, "Surotennac a cas iti panangsurotco ken Cristo." Ipakumbabatayo ti cararuatayo iti sangoanan ti Dios babaen ti kinapakumbaba, panagayuno ken panagcararag, panangibabawi iti basol ken panangilacsid iti daytoy.

Ti timec ti pudno nga agbanbantay ket kasapulan itan a mangngegan iti unos ti amin a linia, “Ti bigat umay, ken uray ti rabii” (Isaias 21:12). Ti trumpeta masapul nga ipaayna ti masinunuo nga aweng ta addatayon iti naindaclan nga aldaw ti panagsag-sagana ti Apo. . . . Nakaad-adu dagiti doctrina nga agdama iti lubongtayo. Nagadu dagiti relihion ita nga agbilang iti ribu ken sangpulo a ribu, ngem adda laeng maymaysa nga agawit iti selio ti Dios. Adda ti relihion ti tao ken ti relihion ti Dios. Maimuntar coma dagiti cararuatayo iti agnanayon a Bato. Tunggal banag iti lubong ti Dios, agpada a tattao ken doctrina ken ti nakaparsuaan a mismo, ti mangtungtungpal iti sigurado a sao ti padto ken mangipatpatungpal iti dackel ken pangserra a trabaho ti pakasaritaan daytoy a lubong.

Nakasaganatayo coma ken agur-uray para cadagiti ibilin ti Dios. Dagiti nacion makiborda iti mismo a sentroda. Maickat dagiti suporta manipud cadagidiay a mangipacdaar iti maymaysa a pagibasaran ti kinalinteg, ti maysa laeng a sigurado a suot ti kababalin. Ket amin a saan nga agcurno iti bilin ti nacional a consejo ken agtungal cadagiti nacional a linlinteg tapno maitag-ay ti sabbath nga impasdec ti tao ni basol, tapno di maikankano ti santo a linteg ti Dios, maricna, saan a ti mangidadanes a pannacabalin ti kinapapa laeng, no di ti lubong ti Protestante, ti ladawan ti animal.

Aramiden ni Satanas dagiti milagrona tapno mangallilaw, isaadna ti pannacabalinna cas cangatoan. Ti iglesia agparang a casla matnagen, ngem saan a matnag. Agtalinaed, kabayatan a dagiti managbasol ti Sion ket makibkibor – dagiti garami maisina iti napateg a trigo. Nakaam-amac daytoy a rigat, nupay casta masapul a mapasamac. Awan no di laeng dagiti nagballigi iti dara ti Cordero ken ti sao ti pammanecnecda ti masaracan a cadua dagiti mapagtalcan ken napudno, awanan tulaw wenno mantsa ni basol, awan ulbod cadagiti ngiwatda. Masapul a malabusantayo iti bucod a kinalinteg ket maarcosan iti kinalinteg ni Cristo.” – Selected Message, bk. 2, pp. 377-380.

Naipakita caniac a ti ili ti Dios saan nga agaramid iti peksa cas pasetda no di ket aguray iti bang-ar a sumangbay cadacuada ket maickat dagiti kamalida ken maatur dagiti biddutda; no agsanggirda iti dayta a mangdalus cadacuada manipud iti kinarugit ti lasag ken espiritu, ket itutop ida a mairaman iti natbag a puccaw ti maikatlo nga angel, masaracandanto nga agkurang. Ti bang-ar wenno pannacabalin ti Dios sumangbay laeng cadagidiay nangisagana cadagiti bagbagida para iti daytoy babaen iti panangaramidda iti trabaho nga imbilin ti Dios cadacuada, cas iti panangdalus iti bagida manipud iti amin a kinarugit ti lasag ken espiritu, nga an-anayen ti kinasanto iti buteng ti Dios.” – Testimonies for the Church, vol. 1, p. 619.

Dagiti natda a mangdalus cadagiti cararuada babaen ti panagtulnog iti kinapudno a mangummong iti pigsa manipud iti mangsuot a proseso, a mangipakpakita iti kinapintas ti kinasanto iti baet ti apostasia iti aglawlaw. Amin dagitoy, kinunaNa, “Inyukitco cadagiti daculap dagiti imac” (Isaias 49:16). Natengngelda iti agnanayon, di agrupsa a pakalaglagipan. Kayattayo ti pammati ita, sibibiag a pammati. Kayattayo ti maaddaan iti sibibiag a pammanecnec a mangsugat iti puso ti managbasol. Adu unay ti panagsermon ken bassit unay ti panagservi. Kayattayo ti nasantoan a mangpabang-ar. Kasapulantayo ti espiritu ken kinaregta ti kinapudno. Adu cadagiti ministro ti gudua a paralisado gapu cadagiti bucodda a depecto ti kababalin. Kasapulanda ti mangcomverter a pannacabalin ti Dios.

Daydi ginutogut ti Dios ken ni Adan sacbay ti pannacatnagna ket perpecto a panagtulnog iti lintegNa. Gutoguten ti Dios ita no ania ti ginutogutNa idi ken ni Adan, naan-anay a panagtulnog, kinalinteg nga awanan tulaw, awanan pagkurangan iti imatangNa. TulonganNatayo ti Dios a mangipaay Kencuana ti amin a gutoguten ti lintegNa. Saantayo a maaramid daytoy, no awan dayta a pammati a mangisangbay iti kinalinteg ni Cristo iti inaldaw nga aramid.

Patgen a cacabsat, umayen ti Apo. Itag-ayyo ti kapanunotanyo ken ti uloyo ket agrag-o. Ipagaruptayo a dagidiay makangngeg iti naragsac a damag, nga agkunkuna nga ay-ayatenda ni Jesus, mapnodanto iti rag-o a di maibaga ken napno iti dayag. Daytoy ti naimbag, ti naragsac a damag a rumbeng a maulit cadagiti pagtaengantayo ket maibaga cadagiti masabettayo iti kalsada. Anian a makaparagsac a damag ti maipakaammo! Ti pannakikontra ken pannakisupiat cadagiti mamati wenno saan a mamati ket saan nga isu ti trabaho nga inted ti Dios cadatayo nga aramidentayo.

No ni Cristo ti Mangisalacanco, ti sacrificioc, ti pangabbongco, diacto mapucaw. Iti panamatic Kencuana, maaddaanac iti biag nga agnanayon, O, ta amin a mamati iti kinapudno patienda coma ni Jesus cas bucodda a Mangisalacan. Saanco a saoen ti nalaca a pammati a saan a nasuportaran cadagiti ar-aramid, no di ket dayta napasnec, sibibiag, agtultuloy, agtataeng a pammati a mangan iti lasag ken uminum iti dara ti Anac ti Dios. Saanco laeng a kayat ti mapacawan iti panangsalungasingco iti nasantoan a linteg ti Dios, no di ket kayatco ti maipangato iti silnag ti init ti rupa ti Dios. Saan laeng a tapno macastrec iti langit, no di ket tapno maaddaan iti nawadwad a pagsercan.

Ditay kadi maricna cas naidumduma nga ili, nasantoan a nacion, iti di maiyebkas nga ayat nga imparangarang ti Dios cadatayo? Ti pannakaisalacan ket saan a mabuniagan, saan a tapno dagiti nagantayo adda cadagiti libro ti iglesia, saan a tapno icasaba iti kinapudno. No di ket sibibiag a pannakikaysa ken ni Jesu-Cristo, tapno mapabaro ti puso, ar-aramiden dagiti aramid ni Cristo iti pammati ken aramid ti ayat, iti anus, kinaemma ken namnama. Tunggal cararua a naikaysa ken Cristo agbalin a sibibiag a misionero iti amin nga aglawlawna. Agtrabaho isuna para cadagiti adda iti asideg ken adayo. Awan ti nabennebenneg a riknana, awanto ti interesna a mangbangon iti maysa laeng ti sanga ti trabaho nga isu ti idauloanna ket sadiay agpatingga ti regtana. Agtrabahonto amin a buyogen ti interes tapno agbalin a natibker ti tunggal sanga. Awanto ti panagayat iti bagi, awan ti naimbucodan nga interes. Ti makagapu ket maymaysa, ti kinapudno ket dackel a pakabuclan.

Bueno mabalin a maidamag ti saludsod buyogen ti napasnec, madandanagan a puso, "Ipatpateg kadi ti apal, mapalubosan kadi ti imon a makasarac iti lugar iti pusoc?" No casta, awan ni Cristo. "Ay-ayatec kadi ti linteg ti Dios, adda kadi iti pusoc ti ayat ni Jesu-Cristo?" No agpipinnategtayo a cas iti panagayat ni Cristo cadatayo ngarud agsagsaganatayo para iti bendito a langit ti talna ken inana. Awan ti agsalisal sadiay nga umun-una, tapno maaddaan iti kinatan-oc, amin ayatenda dagiti kaarrubada a cas iti bagbagida. O, ta luctan coma ti Dios ti pannakaawat ket agsao iti puso dagiti iglesiatayo babaen iti panangriingNa cadagiti indibidual a miembro. . . .

Dagiti nakaaliwacsay idiay Sion masapul a mariing. Dackel ti panagsungbatda a mangawit iti kinapudno nupay casta saanda a maricna ti dagsen ken masecnan cadagiti cararua. O, para cadagiti lallaki ken babbai a mangibunbunannag iti kinapudno mariing coma a mangala iti sangol ni Cristo, tapno maitag-ay dagiti dadagsenNa. Adda a kasapulan dagidiay saan laeng nga addaan iti nominal nga interes no di ket cas ken Cristo nga interes, naayat – nasneban a kinaregta a saan a mangibandera iti sidong dagiti rigat wenno aglamiis gapu ta aglablabonan ti kinadangkes. . . .

Agtactacdertayon cadagiti beddeng ti agnana-yon a lubong. Dagiti nasayaat ti tiempona a Cristiano saan a kalikaguman iti daytoy a trabaho. Saan a kasapulan dagiti arisagid ken naraman a relihion para iti daytoy a tiempo. Masapul nga adda puersa a maisangbay iti pammatitayo ken iti pannakaipacdaar ti kinapudno. Ibagac cadacayo, ti baro a biag ket agtultuloy manipud cadagiti sinasatanas nga ahensia nga agtrabaho a buyogen ti pannacabalin a ditay pay nabigbig agingga ita. Ket saan kadi a ti baro a pannacabalin manipud ngato ti mangtagicua cadagiti tattao ti Dios? Ti kinapudno, a makasantificar iti impluensiana, masapul a maidagadag cadagiti tattao. Masapul nga adda dagiti napasnec a panagpakaasi a maidaton iti Dios, umas-asog a cararag Kencuana, tapno dagiti namnamatayo cas maysa nga ili ket saan a naibatay cadagiti panagkuna, no di ket cadagiti agnanayon a kinapudno. Masapul nga ammotayo para cadagiti bagbagitayo, babaen cadagiti pamma-necnec ti Sao ti Dios, no addatayo iti pammati, no mapan sadi langit wenno saan. Ti moral a pagibasaran ti kababalin ket ti linteg ti Dios. Maaramidtayo kadi dagiti gutogutenna? Dagiti tattao ti Dios kadi ket isangsangbayda ti tiempoda, dagiti talentoda, ken amin nga impluensiada iti trabaho para iti daytoy a tiempo? Agriingtayo. “No ngarud nakipagungar ken Cristo, birokenyo dagiti adda idiay langit a yan ni Cristo a situtugaw iti tronoNa. Iti makanawan ti Dios” (Colosas 3:1).