Calpasan a sinukir ti tao ti linteg ti Dios idiay Eden, ti lawag a dayag, nga inted ti Dios ken ni santo nga Adan, a nangabbong kencuana a cas maysa a pagan-anay, simmina kencuana calpasan ti panagsalungasingna. Ti lawag ti dayag ti Dios dina mabalin nga abbongan ti kinasukir ken basol. Iti saad ti salun-at ken kinawadwad dagiti bendicion, ti kinapanglaw, sakit ken panagsagaba iti tunggal kita ket agbalinen a paset dagiti annac ni Adan." (Selected Messages bk. 1, p. 270). Nakalkaldaang ta napukaw ti tao dagiti naindaclan a pribilehio a sinukatan ti mantsa ti basol.

“Insayangcat ni Satanas ti pannakatnag ti tao, ket sipud iti dayta a tiempo nagbalinen a trabahona ti mangiccat iti tao ti ladawan ti Dios ket imalditna cadagiti nataoan a puso ti bucodna a ladawan.” – God’s Amazing Grace, p. 161.

“Sacbay ti iseserrc ti basol, sinagrap ni Adan ti layang a pannakisasao iti Namarsuana; ngem sipud idi insina ti tao ti bagina iti Dios gapu iti panagsalungasingna, ti nataoan a puli naisinan manipud iti daytoy nangato a gundaway. Babaen iti plano ti panangsubbot, nupay casta, maysa a dalan ti nailucat tapno dagiti agnaed iti daga ket mabalinda pay laeng ti makikonecta iti langit.” – The Great Controversy, p.c. 2, (1888 edition).

Ti pannakatay da Adan ken Eva gapu iti panagsukir ket sigurado. No saan a gapu iti plano ti pannakaisalacan, natayda coman nga insegida kalpsan a nanganda iti maiparit a bunga.

“Ngem impaay ti Dios ti ayatNa cadatayo, ta, idi a managbasoltayo pay laeng, natay ni Cristo para cadatayo” (Roma 5:8). Ti kauneg ti ayat ti Dios naipeksa cadagiti sao, “Ta casta la unay ti panagayat ti Dios iti lubong” (Juan 3:16), naim-imbag a maawatan babaen iti nacascasdaaw a panayag a ti Cordero ti Dios “natay sipud pay idi pundasion ti lubong” (Apocalipsis 13:8).

Natignay babaen ti ayat nga adda uray pay idi sacbay ti pannakaparsuatayo, inkari ti Dios ti pannakibusor iti dakes (kitaen iti Genesis 3:15). “Bayat a daytoy a kari impadtona ti gubat iti nagbaetan ti tao ken Satanas, indeclarana a madadaelto iti udina ti pannacabalin ti naindaclan a cabusor.” – The Faith I Live By, p. 75.

“Awan no di laeng a ni Cristo ti macabalin a mangsubbot iti tao manipud lunod ti linteg ket naisangbay manen Isuna a maitunos iti Langit.” (Patriachs and Prophets, p. 63). Ti nacascasdaaw ngaayat ti Dios ket naipanayag babaen iti plano ti pannakaisalacan tapno maisubli ti perpecto a planoNa para iti nataoan a puli. Impasdec ni Jehova ti sacrificio a servicio tapno makita ti naipanayag a planoNa a mangisalacan.

DAGITI SIMBOLO KEN MONUMENTO ITI PANANGABBONG NI CRISTO

Ti panangabbong ket ti pannakicappia ti Dios iti sangataoan babaen iti sacrificio nga ipapatay ni Cristo. Calpasan ti panangideclara ti Dios iti plano ti pannakaisalacan cada Adan ken Eva, sinucatan ti Dios ti simmina a cawes a lawag ken dagiti abbong a bulong ti higos cadagiti bado a lalat, a mangisimbolo iti cawes ti kinalinteg ni Cristo ken ti cawes ti pannakaisalacan. Tapno maaramid dagita a cabal, masapul a maaramid ti maysa a sacrificio, ta no awan ti pannakaibocboc ti dara awan ti pannakapacawan” (Hebreo 9:22), a mangiyanninaw iti daton ni Cristo iti cruz.

Manipud iti altar a binangon ni Abraham iti daga ti Moria tapno idatonna ni Isaac cas maysa a sacrificio, agingga iti templo a binangon ni Solomon iti Bantay Moria para iti presencia ti Dios ken ti dara ti animal a maisacrificio iti unos ti panawen, dagiti simbolo ken monumento a mangipacpacdaar iti kinasamay ti dara ni Cristo a mangpunas cadagiti basbasol ti tao nagbalin a nalawag (Genesis 22:2; 2 Cronicas 3:1). “Ti husto a pannakaawat iti panagservi iti nainlangitan a santuario isu ti pundasion ti pammatitayo.” – Evangelism, p, 221.

“Ti termino a ‘santuario,’ cas nausar iti Biblia, agingga iti tabernaculo nga imbangon ni Moises, cas maysa a modelo dagiti nainlangitan a banbanag; ken maikadua, ‘iti pudno a tabernaculo’ sadi langit, nga isu ti itudtudo ti naindagaan a santuario.” – The Faith I Live By, p. 202.

Bayat ti panagdaliasatda nga agturong iti Canaan, imbilin ti Dios iti Israel babaen ken ni Moises nga iyaramidan Isuna iti santuario, tapno makipagtaeng Isuna cadacuada (Exodo 25:8). “Imparang ti Dios iti sango ni Moises idiay bantay ti buya ti nainlangitan a santuario, ket imbilinNa kencuana nga aramidenna amin a banbanag cas maitutop iti modelo a naipakita kencuana.” – Patriarchs and Prophets,343.

Ti naindagaan a santuario wenno tabernaculo ket binukel ti paraangan, ti nasantoan a disso ken ti kasasantoan a disso a nangirepresentar iti naipadto a trabaho ni Cristo manipud iti pannakaiyanacNa agingga iti pannakapunas ti basol.

1. Ti paraangan (Exodo 27:9-18), Ti lugar a nanglicmut iti tabernaculo ken pangpatayan cadagiti amin a daton, ket maysa a pagilasinan ti daga a sadiay ni Jesus, dagiti naindaclan nga antitipico a daton, ket naikeddeng a matay gapu cadagiti basoltayo (Juan 12:32, 33).” Haskell, S.N., The Cross and its Shadow, pp. 176, 178. Ti maymaysa a pagserkan iti paraangan, isangbay ti managbasol iti datonna para iti basol, ket ipalagipna cadatayo iti pammati ken Cristo cas kakaisuna a pagsercan iti tulagtayo a pannakirelasion iti Dios (Juan 10:7, 9).

Ti altar ti mapuoran a daton (Exodo 27:1-8) iti sibay a pakaibocbocan ti dara ti daton ken ti dapo a mapuoran (Levitico 6:10; Deuteronomio 12:27), iyanninawna ti pannakaibocboc ti napateg a dara ni Jesus, a mangickat iti lunod ti basol manipud daytoy a daga, ken mangisagana iti dalan para iti pannakadalusna babaen ti apuy (Malakias 4:1, 3).” – Ibid., pp. 129, 130. Isuro met ti dara ti daton a babaen laeng iti dara ni Jesus a maaddaantayo iti natured nga iseserrec iti presencia ti Dios iti uneg ti santuario (Hebreo 10:19, 20). Ti planggana ti danum (Exodo 30:17-21) iti nagbaetan ti sumrecan iti paraangan ken ti tabernaculo nga isu ti pangbuggoan dagiti papadi cadagiti ima ken sakada sacbay ti iseserrecda iti tabernaculo, ket maikanatad a mangiladawan iti kinapudno a naisuro ken ni Nicodemo maipapan iti naespirituan a pannakabuggo a kasapulan tapno makastrec iti presencia ti Dios, a simbolo met ti bautismo (Juan 3:5).” – Ibid., p. 179.

2. Ti tabernaculo ket nabingay iti nasantoan a disso ken ti kasasantoan a disso (Hebreo 9:1, 2).

A. Ti nasantoan a disso addaan cadagiti sumaganad a simbolico nga alicamen: Ti tinapay ti pamarang (Exodo 25:23-30) a nangsabat ti kaitungpalanna ken Jesus, ti tinapay ti biag (Juan 6:48, 33, 51). – Ibid., p. 56. Ti candelero (Exodo 25:31-40) irepresentarna ti iglesia (Apocalipsis 1:12, 20) nga isu ti mangtapaya iti pagsilawan ti sao (Salmo 119:105) bayat a ti lana iti uneg ti tunggal pagsilawan ket isimbolona ti aramid ti Espiritu Santo ditoy daga (Zacarias 4:1-6, 10, Apocalipsis 5:6). Ti altar ti incienso (Exodo 30:1-7) inrepresentarna ti di agsarday a nabanglo a panangibabaet ni Jesus a nalaocan cadagiti cararagtayo (Hebreo 7:25; Apocalipsis 8:3, 4).

B. Ti kasasantoan a disso (Hebreo 9:3-5) addaan cadagiti sumaganad a simbolico a muebles ken banbanag: Ti lacasa ti tulag (Exodo 25:10-22), maysa a simbolo ti nadiosan a presencia ti Dios. – Testimonies for the Church, vol. 4, p. 157. Iti uneg ti lacasa adda dagiti dua a taptapi ti bato ti Sangapulo a Bilin nga insurat ti ramay ti Dios (Deuteronomio 10:4, 5). Dagitoy idi ti agtalinaed a mangipecsa iti saan nga agbaliwbaliw a kababalin ti Dios. – Reflecting Christ, p. 46. Ti tugaw ti kaasi (Exodo 25:17-21) a mangabbong iti nadadael a linteg, isu ti pakaipanayagan ti makita a kaadda ti Dios (Exodo 25:32; 30:6). Irepresentar daytoy ti panagkaykaysa ti asi ken hustisia iti plano ti pannakasubbot ken maitutop a simbolo ti trono ti naindaclan a Dios, a mangiwarwaragawag iti naganNa cas "manang-ngaasi ken naparabur, nabayag nga agitured ken aglaplapusanan iti kinaimbag ken kinapudno," (Exodo 34:5-7). – God’s Amazing Grace, p. 69. Ti banga ti mana (Hebreo 9:4) ket maysa a pakalaglagipan iti naannad a saluad ti Dios idi pinagtudoNa ti tinapay iti iliNa idiay let-ang tapno masustener ti biagda (Exodo 16:32, 33). Ngarud ita, iti saluadNa para cadatayo, pinagtudo ti Dios cadatayo dagiti napateg a sinamar ti lawag iti saludsod ti taraon a napanecnecan a bendicion cadagiti amin a mangummong cadagitoy. – Counsels on Diet and Foods, p. 269. Bayat iti panangi-bingaytayo iti lawag, dagiti ruangan mailucatda para iti pannakaicasaba ti evangelio. Gapuna a ti mensahe ti salun-at isu ti agbalin a makanawan nga ima ti mensahe ti maikatlo nga angel. – Counsels on Health, p. 219. Ti sarucod ni Aaron a nagsabong (Hebreo 9:4) ket maysa a palagip a mangraem iti sistema ti urnos ken panangidaulo nga impasdec ti Dios para iti iglesiaNa. – Patriarchs and Prophets,397, 403.

Ti naindagaan a santuario ken dagiti gagangay a serbisiona ket temporario nga inrugi ti Dios tapno maisuro iti Israel ken cadatayo ti maipapan iti sistema ti sacrificio, ti perpecto ken kompleto a plano ti pannakaisalacan ken ti ministerio ni Cristo iti nainlangitan a santuario. Ti ipapatay ni Cristo iti cruz pinunasna dagiti bilbilin ti naindagaan a sacrificio iti santuario iti casta awanen ti sabali a kaipapanan dagitoy ita (Colosas 2:14; Hebreo 9:8-14).

Adda dagiti naisangsangayan a paggidiatan ti kinapadi ni Jesus a maisupadi iti naindagaan a kinasaserdote.

Pinili ti Dios ti tribo ni Levi nga agservi iti kinapadi iti naindagaan a tabernaculo (Numeros 1:50; Exodo 28:1; Levitico 21:17-23). Ngem ni Jesus saanto nga agbalin a nangato a padi iti rabaw ti daga, “agsipud ta nalawag a nagtaud ti Apotayo iti Juda; tribu nga awan ti imbaga ni Moises maipapan iti kinapadi. (Hebreo 7:14). Ti nangato a padi ket mapili manipud cadagiti tattao (Hebreo 5:1) Ta ni Jesus agbalin a nangato a padi ti sangataoan idiay langit, ta saanNa nga innala ti galad dagiti angel; no di ket innalaNa iti Bagina ti caputotan ni Abraham” (Hebreo 2:16). Saan a cas iti kinapadi ti Levita, ti kinapadi ni Jesus a mainugot iti urnos ni Melquisedec nga awanan pangrugian wenno paggibusan (Hebreo 7:3).

Dua a pasamac ti nangmarka iti panagbalbaliw manipud iti naindagaan nga agturong iti nainlangitan a kinasaserdote. Idi nailansa ni Cristo iti cruz, "ti pannakapisang ti belo iti templo ipakitana a dagiti datdaton ken ordinansa dagiti Judio a saanen a maawat." – Early Writings, pp. 259, 260. “Babaen iti panangpisangna iti cawesna, insina ni [Caifas] ti bagina bilang mangibagi iti kababalin. Isu ket saanen nga inawat ti Dios a dadaulo a nangato a padi.” – The Desire of Ages, p. 709.

Naisayangcat dagiti inaldaw a servicio ti sacrificio iti paraangan ken nasantoan a lugar a mangitudo iti daton ti Mesias iti cruz. Nasken nga iyeg ti managbasol ti urbon nga awan pakapilawanna nga animal (cordero) cas daton gapu iti basol. Ti cordero (Exodo 12:21) irepresentarna ni Jesus a Cordero ti Dios a mangickat cadagiti basbasol ti lubong (Juan 1:29; 1 Corinto 5:7). Inkabil ti managbasol dagiti imana iti ulo ti animal bayat nga ipudnona dagiti basolna personal a patayenna ti animal.

Alaen ti padi ti darana, ibisibisna cadagiti sara ti altar ket ibocbocna ti nabati iti baba ti altar wenno iwarisna iti sango ti belo iti rabaw ti altar ti incienso iti nasantoan a disso wenno mangan iti paset ti daton sacbay a sumrec iti nasantoan a disso. Ti intero a servicio ipasimudaagna ti pannakayakar dagiti basol manipud iti managbasol maipan iti santuario (Hebreo 9:6; Levitico 4:3, 7, 22, 23; 6:10: 10:17, 18).

“Bayat ti iseserrec dagiti papadi iti agsapa ken rabii iti nasantoan a disso iti tiempo ti incienso, nakasaganan a maidaton ti inaldaw a daton iti rabaw ti altar iti paraangan iti ruar. . . . [dagiti agdaydayaw] nagkaykaysada iti naulimec a panagcararag, a ti rupada nakaturong iti nasantoan a disso. Gapuna a dagiti dawatda ket simmang-at a cadua ti ulep ti incienso, bayat a ti pammati pumetpet cadagiti merito ti naikari a Mangisalacan a naipasimudaag babaen iti daton a pangabbong." – Patriarchs and Prophets,353.

“Nayakar ngarud dagiti basbasol ti Israel iti santuario, dagiti nasantoan a disso ket narugitan, ket maysa a naisangsangayan a trabaho ti nagbalin a nasisita para iti pannakaickat dagiti basbasol. Imbilin ti Dios a maaramid ti maysa a panangabbong para iti tunggal sagrado a disso, cas iti altar, tapno ‘madalusan dayta, ken mapasanto manipud iti kinarugit dagiti annac ti Israel.” – Ibid., p 355.

Ti Aldaw ti Panangabbong (Yom Kippur) isu ti maika-10 nga aldaw ti maika7 a bulan ti Tishrei (iti nagbaetan ti Setiembre ken Oktubre) ken agtalinaed a kasasantoan nga aldaw iti calendario dagiti Judio (Levitico 23:27).

“Maminsan iti makatawen, iti naindaclan nga Aldaw ti Panangabbog, sumrec ti padi iti kasasantoan a disso para iti pannakadalus ti santuario. Ti trabaho a maaramid sadiay ti nangileppas iti tinawen a ministrasion (Hebreo 9:7).” – Ibid.

“Tunggal tao masapul nga agsagaba ti cararuana kabayatan a maar-aramid ti trabaho ti panangabbong. Amin a negosio maipaigid pay, ket ti sibubukel a kongregasion ti Israel busbusenda ti intero nga aldaw iti napasnec a panagpakumbaba iti sangoanan ti Dios, buyogen ti cararag, panagayunar ken nauneg a panangsukimat iti puso. . . . Casta a maaramid ti servicio a mayannurot iti ehemplo ken anniniwan dagiti nainlangitan a banbanag’ (Hebreo 8:5).” – Ibid.

“Calpasan ti panagpangato ni Cristo idiay langit, rinugianNa ti trabahoNa cas Nangato a Paditayo. "Iti sangapulo ket walo a siglo daytoy nga aramid ti ministerio ket nagtultuloy iti umuna a benneg ti santuario. Ti dara ni Cristo, a nagpakaasi iti biang dagiti silaladingit nga agbabbabawi a mamati, ket nagun-odda ti pammakawanda ken panangawat ti Ama, ngem dagiti basbasolda agtalinaed pay cadagiti libro ti rekord." – The Great Controversy, p. 421.

“Cas ti gagangay a pannakadalus ti naindagaan a maileppas babaen ti pannakaickat dagiti basbasol nga isu ti nakarugitanna, casta met a maileppas ti aktual a pannakadalus ti nainlangitan babaen iti panangickat wenno pannakapunas cadagiti basbasol a nairekord sadiay. Ngem sacbay a maisayangcat daytoy, masapul nga adda panangsukimat cadagiti libro ti rekord tapno maikeddeng no siasino, ti maikari cadagiti beneficio ti panangabbongNa, babaen ti panagbabawi ti basol ken pammati ken Cristo. Ti pannakadalus ti santuario ngarud ramanenna ti maysa nga aramid ti panagsukimat a trabaho ti panangocom. Daytoy a trabaho masapul a maaramid sacbay ti yaay ni Cristo tapno subbotenNa ti iliNa.” – Ibid.,

“Iti naindaclan nga aldaw ti maudi a panangabbong ken panagusisa ti ocom, dagiti laeng kaso a makonsiderar ket cadagidiay agkunkuna a tattao ida ti Dios [1 Pedro 4:17]. Ti panangocom cadagiti nadangkes ket naiduma ken naisina a trabaho ken mapasamac iti maud-udi a panawen.” – Ibid., p. 480.

“Iti tiempo a naituding para iti panangocom – iti panagserra ti 2300 nga aldaw, idi 1844 – nangrugi ti trabaho ti panagimbestigar ken pannakapunas dagiti basbasol. Amin a nangala cadagiti bagbagida iti nagan ni Cristo ket masapul a lumasat iti nainget a pannakasukimat. Agpada dagiti sibibiag ken natay maocomda ‘manipud cadagiti banbanag a naisurat cadagiti libro, cas maitutop cadagiti aramidda.’” – Ibid., 486.

"Dagiti libro ti rekord idiay langit, a nakaisuratan dagiti nagan ken aramid dagiti tattao, isu ti mangikeddeng cadagiti pangngeddeng ti pangocoman. . . .

“Ti libro ti biag naglaon cadagiti nagnagan ti amin a nakastrec iti servicio ti Dios. . . . [Lucas 10:20, Filipos 4:3; Daniel 12:1; Apocalipsis 21:27.]

"Maysa a libro a pakalaglagipan naisurat iti sangoanan ti Dios, a nakaisuratan dagiti naimbag nga aramid 'dagidiay nagbuteng iti Apo, ken sipapanunot iti naganNa' (Malakias 3:16; Nehemias 13:14). . . . Ti tunggal aramid ti kinalinteg ket agbalin nga immortal.

“Adda met ti maysa a rekord dagiti basbasol dagiti tattao.” – Ibid., pp. 480, 481. Tunggal dakes nga aramid, tunggal minamaag a sasao maocomto (Ecclesiastes 12:4; Mateo 12:36, 37; 1 Corinto 4:5; Isaias 65:6, 7).

Dagiti basbasol a saan a napagbabawian ken nabaybay-an ket saan a mapakawan ken mapunas cadagiti libro ti rekord, no di ket agtacderdanto nga agsaksi maibusor iti managbasol iti aldaw ti Dios. . . . Ti basol mabalin a nailemmeng, nailibac, naabbongan manipud iti ama, ina, asawa, annac ken cacaddua; awan ti asinoman malacsid cadagiti nakabasol a nagaramid ti mabalin a nangipateg iti kabassitan a panagsuspetsa iti dakes; ngem naibutactac dayta iti sango dagiti intelihensia ti langit. . . . Ti Dios addaan iti eksakto a rekord iti tunggal saan a nainkalintegan a kuenta ken tunggal saan a nainkalintegan a pannakilangen.” – Ibid., p. 486.

“Ti aramid ti tunggal tao ket lumasat iti pannakarepaso iti sangoanan ti Dios ken nairehistro para iti kinamatalec wenno saan a kinamatalec. Iti kasumbangir ti tunggal nagan cadagiti libro ti langit ket sumrec a buyogen ti nakaam-amac a kinaeksakto ti tunggal di umiso a sao, tunggal naimbucodan nga aramid, tunggal saan a naaramid a pagrebbengan ken tunggal nalimed a basol, iti tunggal naarte a panagpammarang." – Ibid., p. 482. "Anian a nagsolemne ti kapanunotan! Inaldaw – aldaw, a lumabas iti kinaagnanayon, awitna ti dadagsen ti rekord para cadagiti libro ti langit. . . . Dagiti aramidtayo, dagiti sasaotayo, uray dagiti nalimed unay a motibotayo. . . . nupay mabalin a malipatantayo, awitda dagiti pammanecnecda a mangplinteg wenno mangkondenar.” – Ibid., pp. 486, 487.

“No ti siasinoman a tao ket nagbasol, adda mangibabaettayo iti Apo, ni Jesu-Cristo a nalinteg” (1 Juan 2:1) Kitaen met ti Hebreo 9:24.

"Iti pannakalucat dagiti libro iti panangocom, ti biag dagiti amin a namati ken ni Jesus ket umay a marepaso iti sango ti Dios. Mangrugi cadagidiay immuna a nagbiag ditoy daga, idatag ti Mangibabaettayo dagiti kaso ti tunggal agsasaruno a caputotan, ken agserra cadagiti sibibiag. Tunggal nagan madakamat, tunggal kaso ket nainget a mausig. Adda dagiti nagnagan a maawat, ken marejectar. No ti asinoman ket addaan cadagiti basol nga agtalinaed cadagiti libro ti rekord, a saan a napagbabawian ken saan a napakawan, mapunas ti nagnaganda iti libro ti biag, ket mapunas ti rekord dagiti naimbag nga aramidda iti libro ti pakalaglagipan ti Dios. . . .

"Amin dagiti pudno a nagbabawi iti basolda, ken babaen iti pammati a tinontonda iti dara ni Cristo a cas pangabbong a sacrificioda, naaddaan iti pammakawan a simrec iti batog ti nagnaganda cadagiti libro ti langit; iti panagbalinda a makiraman iti kinalinteg ni Cristo, ken dagiti kababalinda nasaracan a maitunos iti linteg ti Dios, mapunas dagiti basolda, ket maibilangdanto a maikari iti biag nga agnanayon." [Isaias 43:25; Apocalipsis 3:5; Mateo 10:32, 33.] – Ibid., p. 483.

Ti umiso a pannakaawattayo iti trabaho ti mangus-usig a pangocoman gutogutennatayo nga agaramidtayo iti desidido nga addang maipapan iti pannakaisalacantayo.

"Amin a mangayat nga agtalinaed ti naganda iti libro ti biag ket rumbeng nga ita, cadagiti sumagmamano a nabatbati nga aldaw ti panna-kasubocda, parigatenda dagiti cararuada iti sangoanan ti Dios babaen ti panagladingit gapu iti basol ken pudno a panagbabawi. Masapul nga adda nauneg, napudno a panangsukimat iti puso. Ti nalag-an, awan maayna nga espiritu a pinalugodan ti nakaad-adu nga agkunkuna a Cristianoda masapul a maiwaksi.” – Ibid., 490.

Masapul nga itrabahotayo ti bucodtayo a pannakaisalacan a buyogen ti buteng ken panag-pigerger. (Filipos 2:12). “Inton agserra ti trabaho ti mangus-usisa a pangocoman, naikeddengton ti gasat ti amin para iti biag wenno ipapatay. Ti probasion ket agpatingga iti ababa a panawen sacbay ti panagparang ti Apo cadagiti ulep ti langit. Ni Cristo. . . . ideclaraNa: Ti nadangkes a tao, nadangdangkes lattan, ket ti narugit, narugrugit lattan; ket ti nalinteg nalinlinteg pay coma; isu a santo, nasansanto pay coma, Adtoy umayag a dagus; ket ti panggun-guna adda Caniac, tapno ipaayco iti tunggal tao ti maitutop iti aramidna.’ Apocalipsis 22:11, 12.” – Ibid.

“Ti nalinteg ken ti nadangkes sibibiagda pay iti rabaw ti daga iti mortal a kasasaadda – dagiti tattao

ket agmulmula ken agibangbangon, mangmangan ken umin-inum, aminda saanda a mapupuotan a ti maudi, saanen a mabaliwan a pangngeddeng ket naibalikasen iti santuario idiay ngato. . . . Siuulimec, a di madlaw a cas ti mannanakaw iti tengnga ti rabii, umayto ti mangikeddeng nga oras a mangmarka iti gasat ti tunggal tao, ti maudi a pannakaiccat ti asi cadagiti nakabasol a tattao.

“‘Agbantaycayo ngarud: . . . di la ketdi ta kellaat nga umay ket masaracannaca a matmaturog’ (Marcos 13:35, 36). Napeggad ti kasasaad dagidiay a, gapu ta mabannogdan iti panag-bantayda, agbaw-ingdan cadagiti makaguyogoy a banbanag ti lubong. Bayat a ti tao ti negosio ket naigamer iti pananggun-od iti ganansia, bayat a ti managayat iti ragragsac ket agsapsapul iti pakalugodan, bayat a ti balasang ti moda ur-urnosenna dagiti arkosna – mabalin nga iti dayta nga oras ti Ocom ti amin a daga ket ibalikasNa ti sentensia: "Natimbangca cadagiti timbangan, ngem nasaracanca nga agkurang.’ Daniel 5:27.” – Ibid., p. 491.

Agingga a saan a dadaelen ti Dios ti nangirugi iti basol, saan nga ibilang ti ili ti Dios dagiti bagbagida a nawaya manipud iti dadagsen ti basol. Ita ti panawen a parigatentayo ti bagitayo, sukimatentayo a naimbag dagiti pusotayo ken icararagtayo a sipapasnec ti pannakapunas dagiti basoltayo imbes a pannakapunas dagiti nagantayo manipud iti libro ti biag. Amen.