Itampoc ti Nasantoan a Surat ti pannakaipanayag ti pagarian ti Dios iti dua a nagduma a paset:

(1) ti pagarian ti parabur ken

(2) ti pagarian ti dayag.

Saan a mabalin nga adda ti dayag no awan ti immun-una a pannakaipanayag ti parabur; gapuna a nasisita ti makipaset nga umuna iti pagarian ti parabur tapno makastrec iti pagarian ti dayag.

Idi rinugian ni Jesus ti ministerioNa idiay Galilea, impacdaarNa ti isasangpet ti pagarian ti Dios cadagitoy a balikas: “Natungpal ti panawen ket asidegen ti pagarian ti Dios: agbabawicayo ket mamaticayo iti evangelio" (Marcos 1:14, 15).

Bayat ti panagdaliasat ni Jesus iti Galilea, a mangisursuro ken mangag-agas, umariwecwec a tattao ti nagdudupudop Kencuana manipud cadagiti ciudad ken puroc. . . . Pulos idi nga awan ti casta a panawen a cas iti daytoy para iti lubong. Ti langit ket naibaba cadagiti tattao. Dagiti mabisin ken mawaw a cararua a nabayagen nga agur-uray iti pannakasubbot ti Israel ket nagpiesta itan iti parabur ti naasi a Mangisalacan." – The Desire of Ages, p. 232.

Ti pagarian ti parabur, nga inwaragawag ni Jesus, ket dimmanon iti kangitingitanna iti cruz ti Calvario, a sadiay innalaNa ti lugartayo ken natay a kasukattayo tapno subbotenNatayo manipud iti panangkondenar ti basol. Babaen cadagiti sagana ti paraburNa, umawat ti sangataoan iti pannakapa-cawan dagiti basbasol, pannakicappia iti Dios, ken naan-anay a pannakaisalacan. Cas naisurat iti Efeso 2:8 "Ta babaen ti parabur naisalacancayo ​?​?babaen ti pammati; ket saan a gapu iti bagiyo; sagut dayta ti Dios."

Insuronatayo ni Jesus maipapan iti masacbayan a yaay ti pagarian ti Dios iti maikadua a yaayNa. Maibilang cadagiti nagduduma a panursuroNa, intampocNa no ania ti ibaga ti Mateo 25:31-34 iti daytoy a contrexto:

"Ngem intono ti Anac ti tao umayto iti dayagNa, ken amin dagiti angel maicuyog kencuana, isu ti panagtugawnanto iti trono ti gloriana. Ket iti sangoananna, maurnongto dagiti isuamin a nacion; ket paglalasinennanto dagiti maysa ken maysa cadagiti tattao, a cas iti pastor ilasinna dagiti carnero cadagiti calding. Ket isaadnanto dagiti carnero iti macanawanna, ket dagiti calding iti macatigidda. Iti dayta cunaento ti ari cadagit adda iti macannawanna: umaycayo, bendito ni Amac, tawidenyo ti pagarian a naisagana cadacayo nanipud iti pannacabangon ti lubong.”

Cas ti mensahe ti umuna nga iyaay ni Cristo nga inwaragawagNa ti pagarian ti paraburNa, casta met nga ipakaammo ti mensahe ti maikadua nga idadatengNa ti pagarian ti dayagNa. Ket ti maikadua a mensahe, cas iti umuna, ket naibatay cadagiti padto." – Ibid., p. 234.

Ti balikas a "pagarian" iti teksto ni Mateo, dakdakamatenna ti pagarian ti dayag ket inusar ni Jesus a cas mangiladawan no ania ti mapasamac iti panungpalan a panawen inton ipasdecNa ti pagarian ti Dios iti universo. Nupay daytoy a pasamac ket adda iti masacbayan, ti kari nga umay ti Apo ket maysa a kinapudno. Cas kinunaNa a Mismo:

"Saan coma nga agpulcoc ti pusoyo; mamaticayo iti Dios, mamaticayo met caniac. Idiay balay ni Amac, adda adu a pagianan; no coma no saan a casta, kinunac coma cadacayo, ta innac isaganaancayo ti pagianan. Ket no innac coma ket isaganaancayto ti pagianan, umayacto manen, ket icuyogcayto caniac met laeng: tapno no adino ti yanco, addacay met coma” (Juan 14:1-3).

Basar cadagitoy napapateg a panpanayag, saan laeng nga agbiag dagiti Cristiano iti talged ti pannakasubbot iti agdama no di ket pay namnama iti kaudian a pannakasubbot iti pagarian ti dayag.

Ti pannakaidayag isu ti nadiosan a sagid a mangbalbaliw iti maysa a tao, a mangwayawaya cadatayo manipud cadagiti pagbanagan ti basol ken mamagbalin cadacuada nga imortal. Usigenyo ti ideclara ti 1 Corinto 15:51, 52:

"Adtoy, ipakitac cadacayo ti maysa a palimed; saantayo a maturog amin, ngem mabaliwantayo amin, iti maymaysa a canito, iti apagdaricmat, iti camaudianan a trompeta: ta aguninto ti trompeta, ket dagiti natay agungardanto a di agrupsa ket mabaliwantayto."

Ti agdama a bagi ti maysa a mamati ken Cristo ket saan a maibagay iti nailangitan a biag, ta mortal, nababa ken nalaca a madadael. Nupay sagsagrapen ti mamati ti kinaan-anay ti Espiritu iti biagda, ti bagida awitna latta iti marka ti ipapatay. Ngarud, iti uni ti maudi a trumpeta, a mapasamacto iti maikadua nga iyaay ni Cristo, ipaay ni Cristo cadacuada ti baro a bagi.

Daytoy baro a bagi saanton nga agrupsa, nadayag, nawaya manipud iti basol, ken imortal, a naisagana para iti biag nga agnanayon. Ti gagangay a bagi ti Cristiano ket agbalinto a naespirituan a bagi a makabael a mangdaer iti dayag ti Dios ken nakasagana para iti pan nakaiyalis.

Ibingay ti Dios ti nadiosan a sagid ti panagbalbaliw iti tunggal nasubbot nga indibidual, agpadpada dagiti napagungar a sasanto ken dagiti namatalec a saan a nakapadas iti ipapatay. Ti libro a The Great Controversy sipipintasna nga impeksa dagitoy a kapanunotan:

“Balbaliwannanto dagiti nakababain a bagitayo ken aramidenNa ida a cas iti nadayag a bagiNa. Ti mortal, agrupsa a porma, nga awanan iti kinapintas, a rinugitan ti basol iti naminsan, agbalin a perpecto, napintas ken imortal." – The Great Controversy, pp. 676, 677.

Maan-anayto ti amin! Daytoy a panagbalbaliw apektaranna ti estruktura ti bagi ti tao ngem pagtalinaedenna ti personal a kinasiasino ti tunggal indibidual, a mangipalubos cadagiti nasubbot a mangbigbig iti maysa ken maysa.

“Maipreservar ti personal a kinasiasinotayo iti panagungar. . . . Maikkatto dagiti maudi nga agtaltalinaed a tugot ti lunod ti basol, ket agparangto dagiti matalec ni Cristo iti kinapintas ni Apo a Diostayo,’ iti panunot ken cararua ken bagi a mangyanninaw iti naan-anay a ladawan ti Apoda.” – The Fatih I Live By, p. 185.

No dacamatentayo ti pagarian ti dayag, panunotentayo ti Paraiso ti Dios, ti Baro a Daga, ken dagiti baro a langit. Nupay casta, napateg unay a bigbigen a ti nataoan a pagsasaotayo ta saan nga umdas a mangiladawan iti nailangitan a dayag. Amin a pamataudan ti pagsasao ket agkurang ta saan a makaanay a mangiladawan iti Paraiso ti Dios. Ti panid 675 ti The Great Controversy ipaganetgetna daytoy a punto:

“Ti nataoan a pagsasao ket saan nga umanay a mangiladawan iti gun-guna ti nalinteg. Maiyammon-to laeng cadagidiay makaimutectec iti daytoy. Saan a maawatan ti isip nga addaan patingga iti dayag ti Paraiso ti Dios.”

Iti lacsid dagiti limitasion ti pagsasao ti tao, makaalatayo iti inspirasion manipud cadagiti sasao dagiti mammadto ken bay-antayo a ti imahinasion-tayo ti mangiturong cadatayo nga agturong iti nadiosan a paraiso. Cadagiti paltiing ti Apocalipsis, nabendisionan ni Apostol Juan a mangtaldiap iti agnanayon a pagarian ti Dios. Ti impaganetgetna ket adda iti salaysay ti Apocalipsis 21:1-5, a kunana:

“Ket nakitac ti maysa a langit a baro ken maysa a daga a baro; ta daydi immuna a langit ken daydi immuna a daga napalabasdan, ket ti baybay awanen. Ket nakitac ti santo a ciudad ti baro a Jerusalem, a bimmaba manipud langit nga aggapu iti Dios, a naisagana a cas la maysa a novia a naarcosan a maipaay iti noviona Ket nangngegco ti maysa a dackel a timec a naggapu iti trono nga agcuncuna: Adtoy ti tabernaculo ti Dios adda cadagiti tattao, ket isu makipagnaedto cadacuada, ket isudanto dagiti tattaona, ket ti Dios met laeng addanto cadacuada, a Diosda: Ket punasennanto ti amin a lulua cadagiti matada; ket awanton ni patay; ket awanto metten ti sasaibbec, wenno sangsangit, wenno rigrigat; ta dagidi immuna a banbanag napalabasdan. Ket daydi situtugaw idi trono kinunana: Adtoy pagbalinec a babbaro dagiti isu-amin a banbanag. Ket kinunana: Isuratmo: ta dagitoy a sasao papatien ken napudnoda.”

Maibasar iti napaltiingan a sirmata ni Juan, maitampoctayo ti sumagmamano a pakabigbigan ti pagarian ti dayag:

Ti ekspresion “Baro a Daga” ipaawatna ti baro a parsua. Ti planeta a nakaro nga inapektaran ti basol madadaelto, mauram babaen cadagiti gil-ayab ti nadiosan nga ocom. Ni Satanas ken dagiti angelna, ken amin a nadangkes naan-anaydanto a mapucaw. Cas ibaga cadatayo ti Malakias 4:1:

“Ta, adtoy, ti aldaw umay, manguram a cas la horno; ket amin dagiti natangsit, ken amin dagiti agaramid iti dakes, pungetdanto; ket ti aldaw nga umay uramennanto ida cuna ni Jehova dagiti buybuyot, a dinto mangitidda cadacuada uray ramut uray sanga.”

Iti pannakadadael ti nangisungsong iti basol (Satanas) ken pannakadalus ti planeta, maisubli ti dayag ti Eden. Ti naiparsua maitunosto iti Namarsua, ket ti Baro a Jerusalem ti kabesera ti Baro a Daga.

Ti pannakailadawan ti Baro a Jerusalem makaay-ayo cadatayo gapu iti kinapintas ken kinaraniagna. Agraniagto dayta iti dayag ti Dios ken agsilnag a cas iti napateg a bato, cas iti jaspe, nga addaan iti cristal a kinaraniag. (Kitaen ti Apocalipsis 21:10, 11).

Ti Apo makipag-addanto iti iliNa. Pilien ti Dios ti makipagtaeng cadagiti sinubbotNa, isuda ita ti agnanayon nga annacNa. Agnanayon a sagrapenda ti napateg a presenciaNa ken ti lawagNa. Ni Cristo, Isu a nangsubbot cadacuada, agtacderto iti sibayda. Dagiti naisalacan maaddaanto iti pribilehio nga agdayaw iti Dios iti rupanrupa iti agnanayon. Ti Tabernaculo ti Dios addanto iti sidongda, a mangipasdec iti nasinged ken naayat a relasion iti nagbaetan ni Jehova ken dagiti nasubbot.

Ti ili ti Dios ket napaboran iti layang a pannakisasao iti Ama ken iti Anac. ‘Ta cumitatayo a sicucudrep babaen ti maysa a sarming.’ 1 Corinto 13:12. Maimatangantayo ti ladawan ti Dios a naiyanninaw, cas iti maysa a sarming, cadagiti ar-aramid ti nakaparsuaan ken iti pannakilangenNa cadagiti tattao; ngem makitatayto Isuna iti Rupanrupa, nga awan ti manglidlidem a belo iti nagbaetan.” – The Great Controversy, pp. 676, 677.

Inladawan ni Juan, ti propeta ti Patmos ti kasasaad ti agnanayon a rag-o ken ragsac iti paraiso ti Dios:

“Ket punasennanto ti amin a lulua cadagiti matada” (Apocalipsis 21:4).

Iti Baro a Daga, ti pagarian ti dayag isunto ti agnanayon a pagtaengan dagiti nasubbot, lugar nga awanto ti lulua, ta amin a rason ti kinaliday ken panagsangit ket banbanagdan iti napalabas.

“Ket dagiti sinuubot ni Jehova agsublidanto, ket umayda idiay Sion a mabuyogan iti cancanta; ket agnanayon a rag-o ti agtaengto iti rabaw dagiti oloda; magun-oddanto ti ragsac ken rag-o, ket ti ladingit ken sasainnec agtalawdanto” (Isaias 35:10).

Iti Baro a Daga, awanton ti sakit. Saanton a kasapulan dagiti hospital, doctor wenno panaripato ti medico. Amin dagiti imbanag ti basol ket maikkatton ket awanto ti mangibaga, “masakitac!”

“Ket ti agtaeng dinanto cunaen Masakitac; dagiti umili nga agtaeng sadiay mapacawanto ti kinadangkesda” (Isaias 33:24).

“Iti casta malucatanton dagiti mata ti bulsec, ken dagiti lapayag ti tuleng maluctandanto. Iti casta aglagtonto ti pilay a cas maysa nga ugsa ken ti dila ti umel agcantanto; ta iti let-ang pumsuacto dagiti dandanum, ken barbaresbes iti tay-ac a langalang” (Isaias 35:5, 6).

Iti naindagaan a biag, pagpatinggaen ti ipapatay ti adu a naragsac nga estoria. Iti Baro a Daga, awanton ti ipapatay, prosesion ti pumpon, wenno tanem.

“Isu inalimonna nga agnanayon ni patay; ket ni Jehova nga Apo punasennanto dagiti lulua dagiti isu-amin a ruprupa; ket ti pakaumsian ti iliNa iwacsinanto manipud iti amin a daga; ta sinao ni Jehova” (Isaias 25:8). Ket dagidiay a naglasat iti ipapatay ken nagungar iwaragawagdanto, “Ti patay inabac ti balligi” (1 Corinto 15:54).

Iti Baro a Daga, dagiti nasubbot sukimatendanto dagiti pagsidsiddaawan ti ayat ti Dios ken agtultuloy nga adalen a di mabannog tapno ad-adda a maawatanda ti pannacabalin ti Dios a mangparsua.

“Sadiay, dagiti imortal nga isip agutobto a buyogen ti di agkupas a ragsac dagiti pagsidsiddaawan a pannacabalin a mangparsua, dagiti misterio ti mangsubbot nga ayat. Awanto ti naulpit, manangallilaw a cabusor a mangsulisog tapno malipatan iti Dios. Tunggal sirib ti isip ket maparang-ay, tunggal capasidad ket mapaadu. Ti pananggun-od iti pannakaammo saanna a bannogen ti panunot wenno ibusen dagiti pigsa. Sadiay mabalin a maitultuloy dagiti kadackelan a gandat, maragpat dagiti cangatoan nga arapaap, matungpal dagiti cangatoan nga ambision; ket tumaudto latta dagiti baro a katayag tapno lasaten; baro a pagsidsiddaawan a dayawen, baro a kinapudno nga awaten, sadiwa a banbanag a mangawag cadagiti pannacabalin ti isip ken cararua ken bagi.

"Amin dagiti gameng ti universo ket silulucatto iti panagadal cadagiti sinubbot ti Dios. Saan a napengdan ti mortalidad, itayabda ti di mabannog a payacda cadagiti lubong nga adayo – dagiti lubong a namigerger iti ladingit a nakabuya ti nataoan a leddaang ken nangirugi cadagiti canta ti ragsac iti padamag ti maysa a nasubbot a cararua. Buyogen ti saan a mailadawan a ragsac dagiti annac ti daga sumrecda iti rag-o ken sirib dagiti saan a natnag a parsua. Makibingayda cadagiti gameng ti pannaka-ammo ken pannakaawat a nagun-odda iti panaglabas dagiti panawen ti panangut-utob iti aramid ti ima ti Dios. Buyogen ti di nalidem a sirmata taldiapanda ti dayag ti panamarsua - init ken bituen ken sistema, amin iti naituding nga urnosda a manglikmut iti trono ti Kinadios. Iti amin a banag, manipud iti kabassitan agingga iti kadackelan, naisurat ti nagan ti Namarsua, ket iti amin a kinabacnang ti pannakabalinNa naiparangda.

"Ket dagiti tawtawen ti kinaagnanayon, bayat nga agtulidda, isangbayda dagiti nabacbacnang ken ad-adda pay a nadayag a paltiing ti Dios ken ni Cristo. Bayat ti panagdur-as ti pannakaammo, umadu met ti ayat, panagraem, ken ragsac. No ad-adu ti masursuro dagiti tattao maipapan iti Dios, dacdackel ti panagdayawda iti kababalinNa. Bayat nga ilucat ni Jesus iti sangoananda dagiti kinabacnang ti pannakasubbot ken dagiti nacascasdaaw a gapuanan iti dackel susic ken Satanas, dagiti puso dagiti nasubbot agragsacda a buyogen ti ad-adda a napasnec a debosion, ket buyogen ti ad-adda a naragsac a rag-o sagadenda dagiti arpa a balitoc; ket sangapulo ribu a maminsangapulo ribu ken rinibu a rinibu a timec ti agkaykaysa a pumigsa iti nabileg a koro ti panagdaaydayaw." – Ibid., pp. 677, 678.

Ti panagsubli ti basol ket saanto pulos a mamagpeggad iti panagdur-as iti pagarian ti dayag, ta awanto ti manulisog wenno aniaman a peggad ti kinadakes. Casta met, nga awan ti kayo ti pannakaammo iti naimbag ken dakes a mangidiaya iti gundaway para iti sulisog. Nasaksian ti universo ti panagrebelde ni Satanas ken nakitana ti imbanagna. Ti Nadiosan a husticia naipasdec, ket ti amin a naglawa a masakupan ti Dios iwaragawagda:

“Nalinteg ken napudno dagiti daldalanMo, Sica, Ari dagiti sasanto (Apocalipsis 15:3).

Kinapudnona, addanto laeng lagip ti panaggubal ti naimbag ken dakes. Nupay nagpatingga dagiti panagsagaba, saem, ken sulisog ti Daga, ti ili ti Dios kanayonto a nalawag ken nasaririt ti pannakaawatda iti pateg ti pannakaisalacanda. Awitento latta ni Cristo iti bagiNa dagiti marka ti pannakasubbot. Iti unos ti awan patinggana a siglo ti kinaagnanayon, dagitoy a pagilasinan ti mangsaksi iti nakaad-adu nga ayat ti Dios ken ti di matucod a sacrificio ni Jesus a nangsubbot cadatayo.

"A ti Nangaramid cadagiti amin a lubong, ti Mangibabaet ti amin a destinacion, masapul nga ipaigidNa ti dayagNa ken ibabainNa ti Bagina gapu iti ayatNa iti tao a kankanayon a mangpagagar iti panagsiddaaw ken panagdayaw ti universo. Bayat a kitkitaen dagiti nacion dagiti insalacan ti Mannubbotda ken imutectecanda ti agnanayon a dayag ti Ama nga agsilsilnag iti rupaNa; bayat ti panangimutectecda iti tronoNa, a nagtaud iti kinaagnanayon agingga iti agnanayon; ket naammoan a ti pagarianNa ket awan ti patinggana, icantada ngarud iti nakangayngayed a canta: “Maikari, maikari ti Cordero a napapatay, ken nangsubbot cadatayo iti Dios babaen ti bucodNa a kapatgan a dara!’” – Ibid., pp. 651, 652.

Calpasan ti panangsukimat iti pagarian ti dayag ken dagiti awan kaaspingna a pagsidsiddaawan, tumaud dagiti nauneg a saludsod: Siasino ti addaan iti pribilehio a mangnanam cadagiti ragsac daytoy a pagarian? Siasino ti agtawid iti dayta?

Iti lawag ti nadiosan a panpanayag, masaracantayo dagiti sungbat: Dagidiay nangaracup ken nagbiag iti pagarian ti parabur ti agbalin nga iturayan ti pagarian ti dayag. Isuda dagiti nangparmec cadagiti rigrigat ti lubong, ti lasag ken dakes.

“Ti agballigi tawidennanto dagitoy amin a banbanag; ket Siacto ti Diosna, ket isunto ti anacco" (Apocalipsis 21:7).

Dagitoy ket addaan iti personal a pannakisasao ken ni Jesu-Cristo, ti Mangisalacan, ken Apo ti biagda. Nabaliwanda babaen ti paraburNa iti panawen ti pannakaisalacan.

Patgen a cacabsat ken gagayyem, agbibiagtayo cadagiti kaudian a canito ti pakasaritaan daytoy a lubong. Iti mabiit, mabiit unayen, masaksiantayton ti isasangpet ti pagarian ti dayag ket maaddaan iti gundaway a mangnanam iti agnanayon a ragsacna. Ngarud, "masapul nga aramidentayo ti kasayaatan cadagiti agdama a gundawaytayo. Awanton ti sabali a probasion a maited cadatayo a pagsaganaantayo para iti langit. Daytoy ti kakaisuna ken maudi a gundawaytayo a mangporma cadagiti kababalin a mangitutop cadatayo para iti masacbayan a pagta-engan nga insagana ti Apo para cadagiti amin a natulnog cadagiti bilbilinNa." – Last Day Events, pp. 236, 237.

Ti sincero a tarigagayco ket makapagtacdertayo a sangsangkamaysa cas nagballigi. Ditay mabalin nga ipeggad ti pannakapucaw ti pannakaisala-cantayo. Tulongan ken bendicionannatayo coma ti Dios tapno sica ken siac makiraman iti pagarian ti dayag iti nailangitan a paraiso. Amen!