Ti nakaparsuaan addaan cadagiti napipintas nga ilustrasion a mangisuro cadatayo maipapan iti naindaclan a pannacabalin ti Dios, casta met ti mangsubbot nga aramidNa iti pusotayo. Ti siklo ti kulibangbang ket buclen ti uppat a tukad, nga isu ti: itlog, larva, pupa ken nataengan. Ababa ti proseso, nga agarup makabulan laeng. Agitlog dagiti kulibangbang cadagiti siroc dagiti bulbulong dagiti mula a pagtaraonan dagiti larvada. Inton mapissaan ti itlog, bassit nga igges ti rumuar manipud iti ‘shell’ ukisna. Iti sabali a bangir, dagiti igges ket narawet; adu ti kanenda ken napartac ti panagdackelda. No makagteng ti igges iti kinataengan, mangbukel daytoy iti pupa, a maawagan met iti balcot (chrysalis). Apaman nga adda iti uneg ti balcot (chrysalis), agpasar ti igges iti panagbalbaliw a pagaammo cas metamorphosis ket kalpasan ti sumagmamano nga aldaw, manipud iti pupa rummuarto ti napintas a kulibangbang.

Ti igges aglasat iti naan-anay a panag-balbaliw. Agbalin a naan-anay a naiduma a parsua nga addaan iti naan-anay a baro ken naisangsangayan a galad. Ket daytoy ti panggep ti Dios para iti naespirituan a biagtayo ken Cristo: "Ngarud no ti siasinoman adda ken Cristo, isu ket baro a parsua' dagiti daan a banag ket napalabasdan; adtoy, amin a banag nagbalinen a baro" (2 Corinto 5:17). Ti plano ti Dios ket ti mangbalbaliw iti biagtayo, tapno isubliNa ti ladawanNa cadatayo, ken baliwanNa ti pusotayo. IbunannagNa, "Maysa a baro a puso ti itedCo cadacayo ken ikabilconto ti baro nga espiritu iti unegmo ket ikkatecto ti nabato a puso manipud iti lasagmo ket itedconto kenca ti puso a lasag. Ket ikabilconto ti espirituc iti unegyo." Papagnaenkayto ​?​?cadagiti paglintegac, ket salimetmetanyo dagiti pangngeddengco ket tungpalenyo ida” (Ezeqiuel 36:26, 27).

Ti sao a “pannakabalbaliw” ipaawatna ti pannakapabaro, agaramid ti naiduma, mabalbaliwan a naan-anay iti maysa a banag malacsid iti no ania idi. Ti ehemplo iti daytoy ket masaracan iti Juan 16:20, 'Ti ladingitmo agbalinto a rag-o" wenno iti Apocalipsis 11:6, " . . . . addaanda iti pannacabalin cadagiti danum a mamagbalin cadacuada a dara."

Isu a no pagsasaritaantayo ti pannakacomberte, pagsasaritaantayo ti mangbalbaliw nga aramid ti Dios para iti tao ken iti tao, maysa nga aramid a ti tao ket mapakawan ken mabalbaliwan, maysa a natan-oc nga aramid a mangpalinteg ken mang-santificar iti mamati. Maysa dayta nga aramid a ti daan a kinatao ket mailansa ken maitabon ken sadiay ti baro a tao ket mayanac iti baro a biag.

Ti pannakacomberter ket trabaho ti Dios iti tao babaen iti pannacabalin ti ayatNa ken ti Espiritu Santo. Adda dagiti radikal a pannakabalbaliw a cas iti pannakakomberte ni Saul, maysa a pannaka-balbaliw a namarkaan unay idi ti tao ti Tarso ket addaan iti personal a pannakilangen ken Cristo iti dalanna nga agturong idiay Damasco. Naapektaran ti biag ni Saul gapu iti pannakaipalgac ti dayag ni Cristo. Daytoy a panagsarac ket nangbalbaliw a dagus ti biagna agingga a, nasaplit iti panagbulsec ket nagrucnoy iti daga, impacdaarna: "Apo, ania ti kayatmo nga aramidec?" (Aramid 9:6). Daydiay nagturong idiay Damasco nga addaan cadagiti nasipnget a panggep maibusor iti iglesia ni Cristo, naisubli laeng ti panagkitana kalpasan ti panangbusbosna iti tallo nga aldaw a panagayunar ken panagcararag a sinaruno ti panagbuniag. Kalpasanna, dagus a rinugianna ti nagtrabaho a mangibangon iti iglesia cadagidi nga al-aldaw sacbay a nangidadanes buyogen ti kinagagar. Magagaran itan ni Saul a mangicasaba ken Cristo nga isu itan ti sentro ti biag ken mensahena. "Ket dagus nga incasabana ni Cristo nga isu ti Anac ti Dios, cadagiti sinagoga." (Aramid 9:20).

Ti pannakabalbaliw ni Saul, casta met a naawagan Pablo (a mangipasimudaag iti "bassit"), ket maysa nga aramid ti parabur ti Dios ken ti mangbalbaliw nga ayat ni Jesu-Cristo. Daytoy ti nakaigapuan ti narungsot a manangidadanes a mismo a maidadanes maigapu ken ni Jesus, ken tapno iwaragawagna ti mensaheNa a situtured, a sumangsango iti amin a kita ti rigat, uray ti ipapatay a mismo. Adda pay sabali a kita ti pannakacomberte cas iti kaso ni Nicodemo. Tallo a tawen ti napalabas kalpasan ti pannakiumanna ken ni Jesus (kitaen iti Juan capitulo 3) tapno madanon ni Nicodemo ti punto a mangipakaammo iti publico ti pammatina ken ni Jesus ken ti naan-anay a panangisucona ti bagina iti nailansa a Mangisalacan.

"Mangngeg ti angin cadagiti sangsanga dagiti kayo, nga aggargaraw cadagiti bulong ken sabong; ngem saan a makita, ket awan ti tao a makaammo no sadino ti naggapuanna wenno sadino ti papananna. Casta met ti aramid ti Espiritu Santo iti puso. Awanen ti ad-adda a mailawlawag iti dayta no di ti panaggaraw ti angin. Mabalin a saan a maibaga ti maysa a tao ti eksakto nga oras wenno lugar, wenno matonton amin a kasasaad iti proseso ti pannakabalbaliw; ngem saan a pammanecnec daytoy a saan a nacomberte. Babaen iti ahensia a di makita a cas iti angin, kanayon nga agtrabtrabaho ni Cristo iti puso. Inut-inut, nalabit saan a mapupuotan iti umawat, maaramid dagiti impresion nga agduyos a mangallucoy ti cararua ken Cristo. Mabalin a maawat dagitoy babaen ti panangut-utob Kencuana, babaen ti panagbasa iti Nasantoan a Surat, wenno babaen ti panagdengngeg iti sao manipud iti sibibiag a manangascasaba. Kellaat, bayat nga umay ti Espiritu nga addaan iti mas direkta nga apela, ti cararua siraragsac a mangisuco iti bagina ken ni Jesus. Daytoy ket maawagan iti pettat a pannakacomberte; ngem resulta dayta ti napaut a panangallucoy ti Espiritu ti Dios – maysa a naanus, napaut a proseso." – The Desire of Ages, p. 172.

“Kasanotayo ngarud a maisalacan? . . . Ti lawag nga agranraniag manipud iti cruz ipanayagna ti ayat ti Dios. Ti ayatNa ti mangawis cadatayo a mapan Kencuana. No saantayo a pagkedkedan daytoy nga awis, maiturongtayo iti sakaanan ti cruz a mangibabawi cadagiti basbasol a nangilansa iti Mangisalacan. Ket ti Espiritu ti Dios babaen iti pammati pataudenna ti baro a biag iti cararua. Dagiti kapanunotan ken tarigagay maisangbayda nga agtulnog iti pagayatan ni Cristo. Ti puso, ti panunot, mapabaroda a maiparsua iti ladawanNa a nagtrabaho cadatayo a mangpasuco iti amin a banbanag Kencuana. Ket ti linteg ti Dios maisuratda iti panunot ken puso ket makipagsaotayo ken Cristo, ‘Pakaragsacac nga aramiden ti pagayatam, O Diosco’(Salmo 40:8).” – Ibid., pp. 175, 176.

“Bayat a ti angin a mismo ket saan a makita, mangpataud dayta cadagiti epekto a makita ken maricna. Casta met iti aramid ti Espiritu iti cararua ipanayagna ti bagina iti tunggal aramid daydiay nakaricna iti makaisalacan a pannacabalinna. No sakupen ti Espiritu ti Dios ti puso, balbaliwanna ti biag. Dagiti naimbasolan a kapanunotan mailacsiddan, tallikudanen dagiti dakes nga aramid; ayat, kinapakumbaba, ken talna ti mangsucat iti pungtot, apal ken riri. Rag-o ti mangsucat iti liday ket ti rupa iyanninawna ti lawag ti langit. Awan ti makakita iti ima a mangitag-ay iti dadagsen wenno mangimutectec iti lawag a bumaba manipud cadagiti corte idiay ngato. Sumangbay dagiti bendicion, no babaen iti pammati, ti cararua isucona ti bagina iti Dios. Ket dayta a pannacabalin nga awan ti nataoan a mata ti makakita mangpataud iti baro a kinatao iti ladawan ti Dios.” – Ibid., p. 173.

“Agbabawicayo ngarud, ket agsublicayo tapno mapunas dagiti basbasolyo; iti casta umayto dagiti aldaw ti bang-ar nga aggapu iti sangoanan ti Apo” (Aramid 3:19).

“No awan ti pudno a panagbabawi, awanto met ti pudno a pannakabalbaliw. Adu dagiti naallilaw ditoy, ket masansan a ti intero a kapada-sanda mapanecnecan nga allilaw. Daytoy ti gapuna nga adu ti naikadua iti iglesia ti saan a pulos a naikadua ken Cristo.” – The Spirit of Prophecy, vol. 4, p. 298.

“Agbabawicayo, ket tallicudanyo amin a salungasingyo; tapno ti kinadangkes saanyo a pakadadaelan” (Ezequiel 18:30).

“Ti panagbabawi iramanna ti panagladingit para iti basol ken pananglicod iti daytoy. Saantayo a mailacsid ti basol malacsid no makitatayo ti kinamanagbasolna; agingga nga umadayo a sipupuso iti daytoy, awanto ti pudno a pannakabalbaliw ti biag.” – Steps to Christ, p. 23.

“Nupay casta, tapno mapadasan daytoy a kita ti panagbabawi, masapul a maawatantayo no kasano a mapaadda daytoy. “Bayat a ti managbasol macom-bictar iti basol, maay-ayo met babaen iti ayat ken kinasanto ni Cristo; ta ni Jesus awisenNa isuna iti Bagina. Awan ti tao a makapataud iti panagbabawi a nasisita para iti pannakaisalacan ti cararua. Saanna a maisangbay iti bagina ti panagbabawi a nakarkaro ngem iti panangisangbayna iti bucodna a pannaka-comberte. Maipasngay ti panagbabawi iti puso babaen ti panangimutectec iti ayat ni Cristo, a nangipaay iti biagNa a mangisalacan iti managbasol. Ti ayat ti Dios ti mangpalucneng cadagiti natangken a puso." – The Review and Herald, Sept. 3, 1901.

Ti aramid ti pannakabalbaliw ikuyogna dagiti nacascasdaaw a bungbunga: Maysa a baro a biag, maysa a nadalus ken napabaro a puso, maysa a nalinteg nga Espiritu ken sabali a bunga, nadadaeg a pammanecnec ti pannakabalbaliw. “Ngarud no adda asinoman a makicadua ken Cristo, isu ket baro a parsua: dagiti daan a banbanag napalabasdan; adtoy, amin a banag nagbalindan a baro” (2 Corinto 5:17).

· Samaritana a babai, iti pannakabalbaliwna ken Jesus, insucona ti mannaki-kamalala a biagna ket napan iti ciudad ket iconfesarna ni Jesu-Cristo cas Mangisalacan a Mesias. Juan 4:28, 29.

· Ti linuganan dagiti demonio, isu lamolamo idi nawayawayaan, makita isunan iti nasimbeng a panunotna; Naawan ti kina-lamolamona calpasan ti pannakabalbaliwna. Lucas 8:35.

· Pedro, ti saan a makabasa a mangngalap, kalpasan ti pannakabalbaliwna nagbalin a namatalec a pastor ti evangelio, de adal a lalaki ken agiwarwaragawag iti pagarian ti lawag. Mateo 4:19.

· Zaqueo: ti agsingsingir ti buis, a naakusaran a traidor ken cabusor dagiti tattao calpasan ti pannakabalbaliwna, intedna ti cagudua ti sanicuana cadagiti napanglaw ken inkeddeng nga isublina dagiti innalana cadagiti linocona. Lucas 19:8, 9.

· Maria, a linuganan ti pito a demonio gapu iti naderrep a biagna, calpasan ti pannaka-wayawayana ken pannakabalbaliwna insang-bayna ken Jesus ti napateg a sagot tapno maipeksana ti ayat ken panagyamanna. Marcos 14:3.

Ti pannakabalbaliw ti pakaigapuan ti panagrang-ay ti kinatan-oc ni Cristo iti biagtayo; addanto espiritu ti misionero, panagpasakup iti pagayatan ti Dios, kinamatalec, ken nasantoan a rag-o. Amin a natan-oc ken napintas ket aglaplapusanan iti biag ti maysa a nacomberte iti Apo.

“Ti Espiritu ni Cristo ket misionario nga espiritu. "Ti umuna unay a tarigagay ti napabaro a puso ket ti panangyeg cadagiti dadduma met iti Mangisalacan." – The Great Controversy, p. 70.

"Tunggal pudno nga adalan ket maiyanac iti pagarian ti Dios cas maysa a misionero. Ti uminum iti sibibiag a danum ket agbalin nga ubbog ti biag. Ti umawat ket agbalin a paraited." – The Desire of Ages, p. 195.

Naestilo ti agaramid iti panagibunannag iti relihion. Saan nga amin nga agkunkuna a relihiosoda ket pudno a Cristiano; adu dagiti mangawag iti bagbagida a Cristiano ti saan nga agtulnog cadagiti prinsipio ti linteg ti Dios, agtaraonda iti lakay a tao a mangay-ayo iti lasag. Inalilawda ti bagida ket patienda a nacomberteda idinto a ti kinapudnona saan met. Adu ti mangiwaragawag: "Dios, agya-manac Kenca, ta saanac a cas cadagiti dadduma a tattao, managkikil, saan a nainkalintegan, manna-kicamalala, wenno uray pay cas iti daytoy agsingsingir iti buis. Agayonarac mamindua iti makalawas, mangtedac iti apagcapullo cadagiti amin a sanicuac” (Lucas 18:11, 12). Ti panagibunannag ket awanan pateg no ti puso saan a nabaliwan.

Ti rason dagiti ulbod a pannakabalbaliw ket saan a gapu iti kinakurang ti pannakaammo wenno gundaway, no di ket iti kinakurang ti intero ken naan-anay nga isusuco, iti pannakapaay a manglucat a naan-anay iti puso ti maysa ken ni Jesus ken mangipalubos iti mangbalbaliw nga aramid ti paraburNa nga agtignay iti biag.

Ti kangrunaan a pagarigan ket ni Judas Iscariote, a pagaammo unay ti kinalatacna.

“Saan a dimteng ni Judas iti punto a naan-anay nga insucona ti bagina ken Cristo. Saanna nga insuco ti nainlubongan nga ambisionna wenno ti panag-ayatna iti kuarta. Bayat nga inawatna ti saad ti maysa a ministro ni Cristo, dina inyeg ti bagina iti sidong ti nadiosan a pannakasucog." – Ibid, p. 717.

No siaannugotca a sumina a naan-anay cadagiti amin a naimbasolan a wagasmo, maikaysaca ken Cristo, ket ti makikaysa ken Cristo ket iseserrec iti dalan ti biag ken cadagiti rehion ti cappia.

Ngarud ita ta addatayo iti Lawas ti Cararag, palubosan daytoy a gundaway a mangamiris iti pusotayo ket kitaen no adda ti aniaman a dana ti kinadangkes a sursurotentayo – no ti ayattayo ket nabingay, no addaantayo cadagiti didiosen a nangucopar iti trono ti puso ken tapno masigurado nga adda padastayo a ni Jesus ti Ari ken kakaisuna nga Ari a mangsakup iti trono ti pusotayo. (Isaias 33:22.) "Isublinacami kenca, O Apo, ket agsublikami; pabaruem dagiti al-aldawmi a cas idi un-unana" (Un-unnoy 5:21).

Tiemponan para cadatayo, cas ken Jacob, nga ikkaten dagiti didiosen nga adda cadagiti pusotayo ket ikali idan iti agnanayon (Genesis 35:2-4). Tiemponan ti mayanac manen babaen iti sao ti Dios ken ti pannacabalin ti EspirituNa (1 Pedro 1:23). Tiemponan ti agbalin a nawaya iti wayawaya nga inaramid ni Cristo cadatayo. Tiemponan a panawan ti nabingay a puso, ken babaen iti nacascasdaaw a parabur, tapno mabaliwan nga agbalin a lallaki, babbai ken agtutubo a mainugot iti puso ni Cristo (Aramid 13:22). Tiemponan ti mangibaga iti wen ken Jesus. No sumucocayo ken Jesus ita, aramiden-Na ti milagro nga awan iti biagyo. Ti panggepNa ket natibker: Ket ipaayac ida iti maysa a puso ken isaadconto ti maysa a baro nga Espiritu iti unegyo ket ikkatecto ti bimmato a puso manipud iti lasagda, ket ikkak ida iti puso a lasag. Tapno magnada iti pagalagadac ken salimetmetanda dagiti bilbilinco ket aramidenda ida ket isudanto ti ilic ket Siacto ti Diosda” (Ezequiel 11:19, 20).

Ti pannakacomberte masapul a pudno saan a parparawpaw. Ti akin-uneg a puso masapul a mabaliwan, saan laeng nga akinruar a biag; ti puso ti pammati masapul a lumabes iti ritualistico wenno seremonial. Idi kaaldawan ti Mangisalacan, dagiti Judio ken lider ti relihion ket nangaramid iti dackel a panangipakita iti kinadios, ngem indeklara ni Jesus a ti biagda ket ungaong ken imoral. Mateo 23:27, 28. Ad-adu ngem dagiti akinruar a panagbalbaliw ti kasapulan; dagitoy addaanda iti lugar, ngem ti "naespirituan a puso" – kayatna a saoen, ti panunot – ket masapul a mapabaro, ket daytoy ti mangyeg iti baro a biag.

Dagiti Judio a tattao idi al-aldaw ni Cristo nagpannurayda cadagiti daton ken ritual imbes nga iti Maysa nga itudtudo dagitoy. Ket casla saanda nga umdas, immayda sinucatan ti napukaw a presencia ti Dios cadagiti nagadu a kasapulan ti nataoan nga imbension – uray pay umadayo tapno marucod ti kinasantoda babaen iti nakaad-adu a ceremonia, idinto a ti pusoda nagtalinaed a saan a nabaliwan, a napno iti kinatangsit babaen ti panaginsisingpet.

Saan a dagiti makinruar a panagbalbaliw wenno panagrang-ay ti kasapulan, no di ket naan-anay ken kompleto a panagbalbaliw ti biag. Kayumanggi ti dutdot ti musang iti Arctic, ngem bayat ti kalam-ecna agbalin a puraw ti dutdotna a cas iti nieve. Casla ngarud naiduma a parsua ti musang, ngem iti kinapudnona ti laeng nagbalbaliw ket ti dutdotna, maysa a panagbalbaliw a mangipaay iti panglimlimo bayat ti panawen ti lam-ec. Nupay temporario nga agbaliw ti makinruar a langana, ti galadna isu met la cas iti dati, isu latta a natured, manangidadanes, mamapatay a musang.

“Ti ubbog ti puso masapul a madalusan sacbay nga agbalin a nadalus dagiti waig. Daydiay mangikagkagumaan a makadanon idiay langit babaen cadagiti bucodna nga aramid iti panangtungpal iti linteg ket padpadasenna ti maysa nga imposible. Awan ti kinatalged para iti maysa nga addaan laeng iti legal a relihion, maysa a kita ti kinadiosan. Ti biag ti Cristiano ket saan a panangbalbaliw wenno panangpasayaat iti daan, no di ket panagbalbaliw iti galad. Adda ipapatay iti bagi ken basol, ken baro a biag nga interamente. Daytoy a panagbalbaliw ket mabalin laeng a maiyeg babaen ti epektibo a panagtrabaho ti Espiritu Santo.” – Ibid., 172.

Ti pannakipagnatayo iti Dios masapul nga inaldaw; tunggal aldaw masapultayo ti paraburNa cadagiti pusotayo tapno daytoy daan a managbasol a galad – “ti daan a tao” – ket naan-anay a maparmec. Naaramiden ti panagpaliiw, bayat a ti daan a tao naitabon iti danum ti bautismo, ti nakaay-ay-ay nairana met a nalaing nga aglangoy. Ngarud, dagiti determinado a sasao ni Pablo: "matayac iti inaldaw" (1 Corinto 15:31).

Kasapulan ti kanayon a panagbantay, inaldaw a pannakabalbaliw, tapno dagiti indibidual a kaba-balintayo ket naan-anay a masantificar iti Dios. Amin a pannakabalintayo ket madalusan manipud iti rugit ti basol, ken masanay nga agservi." – This Day with God, p. 307.

“Ti pannakasantificar ni Pablo ket agtultuloy a pannakisuppiat iti bagi. ‘Inaldaw a matayac,’ kinunana. Iti inaldaw, ti pagayatan ken tarigagayna maisupadida iti pagrebbengan ken ti pagayatan ti Dios. Ngem imbes a surotenna ti pagduyosanna, inaramidna ti pagayatan ti Dios, nupay saan a makaay-ayo ken mangilansa iti kinataona. No umabantetayo iti marka ti nangato a pannaka-awagtayo ken Cristo Jesus, masapul nga ipakitatayo a naungkawantayo iti amin a bagitayo, ket maipaayantayo iti nabalitocan a lana ti parabur.” – The Youth’s Instructor, August 24, 1899.

Ni Daniel idiay Babilonia ket nailadawan cas maysa nga awan pakababalawanna a tao: "Idi dagiti presidente ken principe inkagumaanda ti mangbiroc iti gundaway maibusor ken ni Daniel mainaig iti pagarian; ngem awan ti nasaracanda nga okasion wenno biddut; ta agingga a namatalec isuna, awan met ti biddut wenno basol a nasaracan kencuana.” (Daniel 6:4).

Sadino ti ayan ti palimed ti panagbiag iti casta a namatalec a biag? Impalgac ni Ari Dario cadatayo ti palimed ni Daniel; nabigbigna iti dua a gundaway a ti palimed ni Daniel ket ti agtultuloy a pannaki-sasaona iti Dios. Tinaginayon ni Daniel ti biag ti pammati ken inaldaw a panagcararag, a ragrag-sakenna ti nasinged a pannakisasao iti Dios iti inaldaw. Kuna ti napaltiingan a rekord: "O Daniel, adipen ti sibibiag a Dios, ti Diosmo kadi, a kanayon a pagserserviam, ket makabael a mangispal kenca manipud cadagiti leon?" "Ket naragsacan unay ti ari gapu kencuana, ket imbilinna nga alaenda ni Daniel manipud iti rukib. Isu a naipangato ni Daniel manipud iti rukib, ket awan ti aniaman a pannakadangran a nasaracan kencuana, gapu ta namati isuna iti Diosna" (Daniel 6:20, 23).

“Ti pudno a pannakabalbaliw isangbayna cada-tayo ti inaldaw a pannakisasao iti Dios. Addanto dagiti sulsulisog a masaracan ken napigsa a kontra a mangiyadayo cadatayo manipud iti Dios a maisubli iti dati a kasasaadtayo a di mangikankano ken naimbasolan a pananglipat iti Dios.” – This Day with God, p. 307.

“Siac ti puon ti uvas, dacayo dagiti sanga, ti agtaeng Caniac, ket agtaengac met kencuana, adunto ti maibungana, ta no awanac, awan ti maaramidyo” (Juan 15:5).

Tunggal maysa cadatayo masapul a mangaramid iti sigurado nga indibidual a pannakaiconsagrar, personal a pannakabalbaliw. Masapultayo amin ti maysa a nabiag a kapadasan; masapul a maitrono ni Cristo iti puso, ti EspirituNa ti masapul a mangcontrol iti pagaayattayo. Kasapulanda dagiti nagannac ti mangsubbot a parabur ti Dios babaen iti personal a kapadasan a cadua ni Cristo, cas ti inaramid dagiti ubbing. Tunggal maysa masapul a maisulbong iti pudno nga uvas tapno mangipaay cadagiti bungbunga a pakaidayawan ti nainlangitan nga Amatayo. “Adtoy ti dayag ni Amac, nga agbungacayo iti adu, iti casta agbalincayo nga adalac” (Juan 15:8).

"Makilangen ti Dios cadatayo babaen iti providenciaNa. Manipud iti kinaagnanayon piniliNa-tayo nga agbalin a natulnog nga annacNa. IntedNa ti Anacna tapno matay para cadatayo, tapno masantificartayo babaen ti panagtulnog iti kina-pudno, a madalusan manipud iti amin a kinabassit iti bagi." Ita kalikagumanNa cadatayo ti personal a trabaho, personal a panangisuco iti bagi.” – The Youth’s Instructor, Aug. 24, 1899.

“Sadiay ciudad ti Dios awanto ti sumrec a makarugit. Aminto nga agtaeng sadiay addaan iti nasudi a puso. Iti maysa nga agad-adal ken Jesus, maipanayagto ti dumacdackel a saan a pannakagusto cadagiti di naannad a tigtignay, saan a maikanatad a panagsasao, ken nagubsang a kapanunotan. No agtaeng ni Cristo iti puso, addanto kinadalus ken pannakapapintas ti kapanunotan ken tigtignay.” – Thoughs from the Mount of Blessing, pp. 24, 25.

Nakipagna ni Enoc iti Dios iti 300 a tawen calpasan ti pannakaiyanac ti anacna a ni Metusela ket iti nasuroc a 300 a tawtwen inaldaw nga awisen ni Enoc ti Dios a makipagna kencuana, agingga a maysa nga aldaw immay ti Dios ket imbagaNa kencuana, “Enoc, inawisnac a nakipagna kenca cadagitoy 300 a tawen, ngarud ita immayac a mangawis kenca a makipagna Caniac,” ket innalaNa isuna sadi langit. “Ket ni Enoc nakipagna iti Dios ket saanen a nakita ta innalan ti Dios” (Genesis 5:24). Saan laeng nga incararag ni Enoc no ket sima-matalecna nga impatungpal dagiti pagrebbenganna iti Dios ken iti padana a tattao; Nasursuro ni Enoc nga ayaten ti ayaten ti Dios ken kagura ti guraen ti Dios; nagbiag babaen iti pammati, maysa a biag iti dalan ti panagtulnog, makaay-ayo iti Dios iti amin nga inaramidna. “Babaen iti pammati ni Enoc naiyalis sadi langit a saannan a nakita ni patay; ket saan a nasaracan gapu ta innala ti Dios isuna; ta sacbay ti pannakaiyalisna, nasacsian a makaay-ayo unay iti Dios” (Hebreo 11:5).

“Ita, cuna ni Jehova, agsublica Caniac iti amin a pusom, a buyogen ti panagayunar ken panagsangit ken panagladingit” (Joel 2:12). Alaen ti umdas a tiempo ita tapno utobem dagiti wagasmo ket kitaen no adda iti umno a pannakirelasyon ken Jesus.

· Kayatmo kadi nga isuco ta pusom ken Jesus ita tapno mabalbaliwan?

· Ket sica a nakaiteden ita bagim ken Jesus, kayatmo kadi nga isuco ta bagim ken Jesus tapno ti pusom kankanayon a puminpintas cas ken Cristo?

· Kayatmo kadi nga icararag itan nga itedmo ta pusom ken Jesus?

Agkaykaysatayo nga agcararag.