Apagbiit sacbay a napan ni Jesus idiay Getsemani iti maudi a gundaway tapno agcararag, impakaammoNa cadagiti adalanNa a panawanNa ida gapu ta agpatinggan ti naindagaan a misionNa ket agsublinto iti lugar a sadiay, iti agdama, ket saanda a mabalin ti makikuyog Kencuana. Iti pannakakitaNa iti natural a reaksion dagiti adalan a naladingit ken nalabit pannakabaybay-a, kinuna ni Jesus cadacuada: "Saan coma nga agpulcoc ti pusoyo" (Juan 14:1). Dagita a balikas ti nangted cadacuada iti namnama ket, cas cadacuada, tarigagayan ni Jesus nga ited iti tunggal mamati ti panagtalec iti pannakaammo a maawatanNa amin a kasasaad ti biag ken adda Kencuana ti amin a kasapulan ti cararua tapno natalna. Calpasanna kinunaNa cadacuada: "Idiay balay ni Amac adda adu a pagianan: no coma no saan a casta, kinunac coma cadacayo, ta innac isagana-ancayo iti pagianan" (Juan 14:2).

Dagita a pagianan irepresentarda ti pagtaengan ket ti pagtaengan isu ti lugar a sapasap a pakasaracantayo amin iti kinatalged, talna ken ragsac. Dayta a kari ket rumbeng a dackel nga inspirasion iti tunggal maysa cadatayo; Madanontayo ti pagtaengan a sadiay "ti lobo ken ti cordero ket agcacadua nga agtaraon, ken ti leon mangan iti garami a cas iti toro" (Isaias 65:25). Dayta a pagtaengan ket adayonto iti amin nga ita nga aldaw ket mangpataud cadatayo iti liday ken kinaawan talged, a sadiay "Punasento ti Dios ti amin a lulua cadagiti matada; ket awanton ni patay, ket awanto metten ti sasaibbec wenno sangsangit, wenno rigrigat" (Apocalipsis 21:4).

Ngem ti simmaruno a kari ket cas iti kadackel ti immun-una: "Ket no mapanac ket mangisaganaac iti lugar para cadacayo, umayacto manen, ket awaten-cayto; tapno no sadino ti ayanCo, addacayo met sadiay" (Juan 14:3). "Umayacto manen" ti balsamo, a kasapulan dagiti adalan iti dayta a canito. Saanda pay nga ammo ti pannuboc nga agur-uray cadacuada, ngem manipud idin daytoy a kari ti sentro ti imatang ken motiboda a rummuar a mangicasaba iti panag-subliNa, ken ikagumaanda nga ipakaammo ni Jesu-Cristo iti tunggal nacion, tribu, pagsasao ken tattao.

Uppat a pulo nga aldaw kalpasan ti panagungarNa, inturong ni Jesus dagiti adalanNa idiay Bantay dagiti Olivo, iti asideg ti Betania, iti sango ti ciudad ti Jerusalem a nakailacsidanNa, sa nasentensiaan iti ipapatay. Dayta ti canito ti panagpakada ken gundaway a mangted cadagiti maudi a bilin iti daytoy a grupo dagiti lallaki ken babbai a nangibagi cadagiti napukaw a carnero a nasaracan. Dagiti sasao ni Jesus ket saan a panangumsi gapu cadagiti biddut wenno pannaka-paayda, no di ket balikas ti kauunegan a kinalailo ken simpatia.

"Cadagiti imaNa a nakaunnat a mangbendicion, ken casla mangipanamnama iti mangsalacnib a panangaywanNa, In-inut a nagpangato manipud iti tengngada, a naguyod nga agpalangit babaen ti pannacabalin a napigpigsa ngem iti aniaman a naindagaan a pangguyogoy. Bayat ti panag-pangatoNa, dagiti agsidsiddaaw nga adalan ket kumitkita a buyogen dagiti nabannog a mata para iti maudi a pannakakitada iti agpangpangato nga Apoda. Maysa nga ulep ti dayag ti nangilemmeng Kencuana iti imatangda; ket nagsubli cadacuada dagiti sasao bayat ti panangawat Kencuana ti naulep a caruahe dagiti angel, ‘Adtoy, addaac cadacayo a kanayon, agingga iti panungpalan ti lubong.' Maigiddato iti dayta bimmaba cadacuada ti kasam-itan ken kararagsacan a musica manipud iti koro dagiti angel." – The Desire of Ages, pp. 830, 831.

Iti dayta a canito dua a nakabilbileg nga angel iti porma dagiti tattao, gapu iti asi ken ayatda cadagiti adalan a kumitkita sadi langit immasidegda ket nagsaludsodda cadacuada: “Lallaki a taga Galilea, apay-apay nga agtactacdercayo a cumitkita iti langit? Daytoy Jesus a naipangato sadi langit nanipud cadacayo, casta met umayto a cas ti pannacakitayo nga ipapanna sadi langit” (Aramid 1:11). Isu met la a mensahe ti namnama ti imbaga ni Jesus cadacuada idi pay laeng “Ngem inton ti Anac ti tao umayto argaman iti dayagna, ken amin dagiti angel maicuyog kencuana, isu ti panagtugawnanto iti trono ti gloriana” (Mateo 25:31. Isu met la a paltiing ti naawat ni Juan iti Isla ti Patmos. “Adtoy umay a buyogen dagiti ul-ulep ket makitanto dagiti isu-amin a matmata, ken casta met dagiti nangduyoc kencuana; ket dagiti isu-amin a capcapanunotan ditoy daga agdung-awdanto gapu kencuana. Casta coma; Amen (Apocalipsis 1:7). Impasingked dagiti angel cadacuada nga isu met la a Jesus a nakitada a nagpangato ti umayto manen cas ti panang-pangatoNa. Kinaagpaysona, umayto cadagiti ul-ulep ket tunggal mata makitadanto Isuna.

No aw-awaten iti ad-adu pay maipapan iti panawen ti panungpalan ket maysa a banag a nangguyogoy iti imatang dagiti adalan – ken rumbeng a mangguyogoy met iti imatangtayo. Immasidegda ken Jesus a pribado tapno damagenda: "Ibagam cadacami caanonto ti pannacaaramid dagitoy? ken anianto ti pagilasinan iti yaayMo, ken ti panungpalan toy lubong?" (Mateo 24:3).

Cadagiti lugar nga ad-adda a narang-ay ti teknolohia ken dagiti panagbiahe babaen cadagiti moderno a pamay-an ti transportasion, asikasuentayo a naimbag dagiti signal nga inted cadatayo ti satellite navigator wenno GPS device, maipapan iti nabati a distansia iti destinasion wenno posible a panagbal-baliw iti napili a ruta. Makatulong met cadacami dagiti karatula iti asideg dagiti kalsada. Dagiti padto ti Biblia ket umasping unay iti GPS a mangibagbaga cadatayo no sadino ti ayantayo iti panawen tapno makasagana ken maiturongtayo a sitatalged iti destinasiontayo.

"Ket ni Jesus simmungbat, ket kinunana cadacuada, kitaenyo ta awan coma ti mangulbod cadacayo. Ta adunto ti umay iti naganco, nga agcuncuna, Siac ni Cristo; ket adunto dagiti ulbodenda" (Mateo 24:4, 5) Apay nga indatag ni Cristo daytoy a cas ti umuna a pagilasinan sacbay ti panungpalan? Ti sungbat ket inted ni apostol Pedro: “Agparbengcayo, agsalucagcayo; ti diablo a cabusoryo, cas la leon a ngumerngernger, magmagna iti sibayyo nga agsapsapul ti alun-unenna" (1 Pedro 5:8). Patgen a cacabsat a lallaki ken babbai, ammo met ni Satanas dagiti padto ti Biblia ken ammona a ti yaay ni Cristo ti mamagpatingga iti turayna a nakabutbuteng. Dayta ti gapuna a buyogen ti dackel a kinasicap ken nasicap nga intriga-cas met laeng iti leon a mangpaliiw cadagiti biktimana sacbay a rautenna ida – iyam-ammona dagiti palso a doctrina a nalaocan cadagiti paset ti kinapudno tapno matnag dagiti mamati cadagiti silona. Ti panagsacnap ti Islam, Budismo, agnosticismo ken dadduma pay a pilosopical nga ayus iti intero a lubong ti nangballicog iti panangmatmat dagiti tattao iti cababalin ti kakaisuna a pudno a Dios, ken Namarsua iti langit ken daga, ken inyadayona ida manipud iti kakaisuna a pudno a gubuayan ti pannakaammo, ti Biblia.

Ti laeng talgedtayo ket agsanggir iti panagadal-tayo cadagiti Nasantoan a Sursurat a buyogen ti adu a cararag ken dedicasion. Isu laeng ti makasalcacnib cadatayo manipud iti biddut. No aramidentayo ti casta, sigurado a mabaelantayo ti mangpasingked “Iti linteg ken pammanecnec, no saanda nga agsao cas maitutop iti daytoy a sao, agsipud ta awanen iti lawag cadacuada” (Isaias 8:20). Babaen ti masansan a panagadal cadagitoy, mabalintayo nga idulin iti panunottayo ti kakaisuna a gameng a mamagbalin cadatayo a mangpasingked: "Adda a nakasurat" Ngem maysa a ballaag: gapu iti irarang-ay ti teknolohia kumarkaro a gagangay a makita a binaybay-anen dagiti mamati ti panagbasada cadagiti gagangay a papel a Biblia. Iti maysa a bangir, nalaclaca a kanayon nga awitentayo dagiti kompleto a libraria, leksion, pagcantaan, kdpy. cadagiti electronico nga alikamentayo. Ngem iti sabali a bangir, iti kabassitan a pagilasinan ti mensahe a makadanon cadatayo wenno bassit a canito ti pannakasinga, baybay-antayo ti panagadal ket alisto nga agbaliw ti panunottayo iti dadduma a banag a masansan nga awan pakainaiganna iti dayta a canito. Buyogen ti dackel a nam-ay ken babaen iti daytoy a pamay-an, namin-adu a nabalinan ni Satanas nga isina dagiti mamati manipud iti panagadal iti kinapudno.

Binallaagan ni Jesus dagiti adalanNa: “Ket macangngegcayto cadagiti gubgubat, ken damdamag ti gubgubat; kitaenyo ta dicay aglagaw; ta masapul a maramid dagitoy; ngem saan pay nga isu ti panungpalan. Ta tumacderto ti nacion a bumusor iti sabali a nacion, ti pagarian a bumusor iti sabali a pagarian ket addanto bisbisin ken ginggined iti nagduduma a disso". (Mateo 24:6, 7). Cadagiti nabiit pay a tawtawen nasaksiantayo ti ririboc a pagbibiagan dagiti nacion. Bayat a ti tunggal maysa iti agdama, agsapsapul iti talna, bimtac dagiti dadackel a gubat a nakatayan ti rinibu iti intero a lubong. Ti pannakapadisi dagiti rinibu a nagkamang gapu cadagiti gubat ken napoliticaan a kinaawan ti kinatalged iti adu a pagilian ti nangiturong cadacuada iti nagduduma a direksion, a nangpataud cadagiti pudno a nataoan a krisis nga isu ti nagrairaan iti sakit ken bisin. Iti lacsid dagitoy a nakabutbuteng a paspasamac, dagiti minilmilion a badyet dagiti dadackel a pannacabalin ket naitudingda a gumatang cadagiti armas ken bala tapno maitultuloy dagiti gubat.

Iti sabali bangir, bayat nga iti sabali a pagilian adda ti nawadwad a taraon ket adu a tattao ti agsasakit gapu cadagiti nakaad-adu a panganan (fast food) wenno tsitsiria (junk food) a konsumoda, ken inaldaw a rinibu a tonelada a taraon ti agtungpal iti basura, adda met dadduma a lugar a rinibu ti matay gapu iti bisin. Narigat nga awaten dayta iti maika-21 a siglo, buyogen dagiti amin nga irarang-ay ti teknolohia ken ti kinanam-ay ken kinapaspas ti pannakaibiahe dagiti banbanag. Adda dagiti luglugar a matay dagiti tattao gapu cadagiti saksakit gapu iti saan a pannakainum iti danum wenno gapu iti kinakapoy gapu ta awan iti aniaman a makan. Dagiti natural a didigra a napasamac iti nabiit pay a dekada ket karaman met cadagiti pagilasinan a dinakamat ni Jesus. Bayat a ti tikag ikisapda ti biag iti dadduma a rehion ti planeta, dagiti layus a patauden ti nakaro ken abnormal a tudo wenno bagyo a mangibati iti pannakadadael ken rinibu a biktima iti panaglabasda. Cadagiti kallabes a tawen, napasamac dagiti naranggas a ginggined iti nadumaduma a lugar ken saan laeng nga immadu ti bilegda, no di pay ket iti adu a bilang dagiti biktima nga imbatida.

“Kasano kasansan a mangngegtayo dagiti ginggined ken bagyo, ti pannakadadael gapu iti apuy ken layus, nga addaan iti dackel a pannakapucaw iti biag ken sanicua! Agparang a dagitoy a didigra ket agbaliwbaliw a panagbettac dagiti saan nga organisado, agbaliwbaliw a puersa ti nakaparsuaan, nga interamente a di makontrol ti tao; ngem cadagitoy amin, mabalin a mabasa ti panggep ti Dios. Karaman dagitoy dagiti ahensia a pangriingNa cadagiti lallaki ken babbai iti pannakarikna iti peggadda." – DA, pp. 457, 458. Dagiti sientista ken pilosopo nga agsapsapul cadagiti panangilawlawag ken pamay-an a manglapped cadagitoy a pasamac inpasingkedda nga amin ket produkto ti panagbalbaliw ti klima ken daytoy ti makagapu iti nakaparsuaan nga agtignay iti casta. Maminsan manen, dagiti nataoan a teoria iyadayoda dagiti lapayag dagiti tattao manipud iti pudno a rason dagitoy a paspasamac. Pudno nga agsagsagaba ti nakaparsuaan ken mabalbaliwan gapu cadagiti dakes nga aramid ti sangataoan, ngem nasken a ditay ikankano ta dagitoy met ti pagilasinan a dinakamat ni Jesus. Saantay met coma a di ikankano dagiti pagbanagan a sagabaen dagidiay nangdadael iti daga. "Ket nakapungtot dagitipagpagarian, ket dimtengen ti pungtotmo, ken ti aldaw dagiti natay maipaay iti pannacaocom, ken ti pannacaited iti gonggona cadagiti adipenmo a mammadto ken cadagiti sasanto, ken cadagiti agbuteng iti naganmo, basbassit ken dadackel, ken ti panangdadael dagiti mangrebbec iti daga" (Apocalipsis 11:18).Maikisap ti naindaclan nga aramid ti panamarsua, ket madusa dagiti responsable iti pannakadadaelna.

Dagitoy kadi a pasamac dagiti pagilasinan nga impacdaar ni Jesus cadagiti adalanNa nga agservi a bagnus tapno maammoan no kasano a mailasin ti panawen? Wen, isuda. Cas sinaludsod dagiti adalan, kaanonto ti panungpalan ti panawen? Saantayo a makaikeddeng iti petsa, mabalintayo laeng nga ipatarus dagiti pagilasinan ken maawatan nga awanen ti adu a tiempo a nabati para iti lubongtayo ken cadagiti agnanaed ditoy. "Ngem ti maipapan iti dayta nga aldaw ken horas, awan ti macaammo no caanonto uray pay dagiti angel ti langit, uray pay met toy Anac, no di laeng ni Ama" (Mateo 24:36).

Intudo ni Jesus a ti tiempo ti panungpalan ket umaspingto iti tiempo sacbay ti layus. "Ket cas cadagiti aldaw ni Noe castanto ti yaay toy Anac ti tao. Ta cas cadagiti aldaw a casangoanan ti layus, addada a mangmangan ken umin-inum, mangas-asawa ken makias-asawa agingga iti aldaw ti iseserrec ni Noe iti daong, ket dida naawatan agingga iti yaay ti layus, ket inyayusna ida amin, castanto ti yaay toy Anac ti tao" (Mateo 24:37-39).

Saan nga ilegal a banag ti pannangan, pana-ginum, wenno panagasawa. Ti namagbalin cadacua-da a makarimon iti Dios isu ti panaglablabes ti panangtaming ti tao cadacuada. Dagiti cadawyan a sakit itatta ti kangrunaan a makagapu iti dakes nga ugali iti pannangan wenno panaginum, ken panagusar ken panangabuso cadagiti banbanag a makadangran iti salun-at. Ti napaut a pannakaisarang cadagiti makasabidong a banag cas cadagidiay malang-ab cadagiti dadackel a ciudad wenno panagusar iti tabaco ken droga ket saan laeng a pakaigapuan ti adu a sakit, no di pay ket dagiti genetiko a panagbalbaliw a mangtignay iti nakaro a sakit wenno ‘autoimmune’ a sakit. Ti estoria ti napasamac idiay Sodoma ken Gomora, casta met ti kapadasan a nagbiagan dagiti tattao ti Israel idiay Sittim iti sango ti naikari a daga, ket ballag a naisurat tapno maisuro cadatayo a ti kinaderrep ken ti saan a makontrol a tarigagay ket mabalin a mangiturong cadagiti tattao a makaaramid cadagiti makarimon ken nakababain nga aramid iti sangoanan ti Dios a mabalin a mapanunottayo. “Iti amin a panawen adda dagiti nakawara a dadael ti kababalin a naipit cadagiti bato ti naderrep a pakalugodan. Bayat nga umas-asidegtayo iti panagserra ti panawen, bayat nga agtactacder dagiti tattao ti Dios cadagiti beddeng ti nailangitan a Canaan, ni Satanas, cas idi un-unana, dobliennanto ti peksana a manglapped cadacuada a sumrec iti nasayaat a daga. Ikabilna dagiti silona para iti tunggal cararua. Saan met a dagiti ignorante ken di nakultura a saan a kasapulan a mabantayan; isaganananto dagiti sulisogna para cadagidiay adda iti cangatoan a saad, iti kasasantoan nga opisina; no maiturongna ida a mangrugit cadagiti cararuada, mabalinna babaen cadacuada a dadaelen ti adu. Ket ipacatna ti isu met laeng a wagas ita a cas iti intrabahona tallo ribun a tawen ti napalabas. Babaen cadagiti nainlubongan a panaggayyem, babaen cadagiti panggargari ti kinapintas, babaen ti panagsapul iti ragsac, panagpiesta, wenno ti copa ti arac, isut’ sulisogenna ida a mangsalungasing iti maikapito a bilin.” – Prophets and Kings,277.

“Gundaway ti tunggal Cristiano saan laeng a kumita no di ket padarasen ti yaay ni Apotayo Jesu-Cristo” (2 Pedro 3:12). No amin a mangibagbaga iti naganNa ket agbunga iti dayagNa, anian a nagpaspas a maimula ti bukel ti evangelio iti intero a lubong. Alisto a maluom ti maudi a dackel a panagapit ket umayton ni Cristo tapno urnongenNa dagiti napateg a bukbukel." – Chrisat’s Object Lessons, p. 69.

Pribilehiotayo ti mangisao iti bendito a namnama nga isu ti panagsubli ni Jesu-Cristo. Pribilehitayo met ti mangaramid iti isu met la a trabaho ti reporma nga inaramid ni Juan Bautista a nangisagana iti dalan para iti umuna a yaay ti Apo. “Ti naindaclan a soheto ti reporma ket makibor ken maririboc ti panunot ti publiko. Ti panagteppel iti amin a banag ket maikonectar iti mensahe, tapno tallikudan ti ili ti Dios ti panagdidiosenda, ti kinabuklisda ken ti kinabarayoboyda iti panagcaw-cawes ken dadduma pay a banag." – Testimonies for the Church, vol. 3, p. 62.

Itan ti tiempo nga agaramid iti panagbalbaliw iti biagtayo, inton a ti panagtulnogtayo cadagiti bilin ti Dios ipalgacna a pudno nga ay-ayatentayo Isuna. Awanen ti tiempo a pukawen. Masapul a desidido nga iserratayo dagiti ruangan iti amin a saan a mangibagi iti kababalin dagiti tattao nga agsagsagana a maiyalis cadagiti nailangitan a pagtaengan. Rumbeng nga ipakita dagiti aramidtayo a "ti panagsasaritatayo ket adda idiay langit; nga isu ti pangkitaantayo ti Mangisalacan, ni Apo Jesu-Cristo" (Filipos 3:20).

"Saan a namayamay ti Apo a maipapan iti karina, cas iti panangibilang dagiti dadduma iti kinabayag; no di ket agur-uray a siaanus gapu cadatayo a dina cayat a mapucaw ti uray siasino, no di ket agturongda coma amin iti panagbabawi" (2 Pedro 3:9). Ti kakaisuna a panggep ti probasion a sagsagrapentayo ita ket tapno usarentayo daytoy para iti pannakakonsagrar ken panagsaganatayo para iti naindaclan nga aldaw ti yaay ni Cristo. Tunggal aldaw a lumabas ket maysa nga aldaw ti maikissay iti panagbilang agingga iti ngudo. No saan pay nga agsubli ni Jesus ket gapu ta ipapaayannatayo iti panawen tapno mabalintayo amin ti agpasar iti naan-anay a panagbabawi ken mapadasan ti nauneg, pudno a pannakabalbaliw ti biagtayo.

Naaramid ti pannakaispaltayo babaen ti napateg a dara ni Cristo, ti Cordero nga awan mantsana ken awan mulitna (1 Pedro 1:18, 19) tapno makadanon cadagiti mansion a sadiay "ti mata ket saan a nakakita, wenno saan a mangngeg ti lapayag, saan met a simrec iti puso ti tao," dagiti banbanag nga insagana ti Dios para cadagidiay agayat Kencuana" (1 Corinto 2:9). Saan coma a dagiti makaawis nga ididiaya daytoy a lubong, dagiti piestana ken tradisionna, dagiti saan a nasisita a moda wenno arkos, saan a makapasalun-at a taraon wenno inumen wenno ti panagayat iti kuarta ken naindagaan a sanicua ti mangisina cadatayo iti napateg a mensahe ti yaay ti Apo ket itan ti tiempo tapno agsagana!

Ti laeng parabur ti Dios ti makatulong cadatayo nga agsagana para iti yaayNa. Ti laeng trabaho ti Espiritu Santo ti makacombinsir cadatayo iti awis nga agbabawi ken agbalbaliw. Ti coma inaldaw a cararagtayo ket “umay coma ti pagariam.” Sapay coma ta ti bendito a namnama ket casla aluten a mangsilnag iti panagdaliasattayo iti daytoy nasipnget a lubong a napno unay iti kinadakes ken panag-sagaba. Ti panggeptayo coma ket ti agtultuloy nga agturong iti gakat, iti gunggona ti katan-ocan nga awag (Filipos 3:14) a mangiyanninaw ken Jesus iti inaldaw ken iti tunggal aramid. Sapay coma ta ti nadalus ken saan a natulawan a relihion (Santiago 1:27) ti agbalin a resulta ni Cristo cadatayo.

“No ti cababalin ni Cristo ket naan-anay a mapaadda iti iliNa, iti casta umayton tapno alaenNa ida cas cucuaNa.” – Christ’s Object Lessons, p. 69. Maranatha, umay ti Apo! IdeklaraNa: Sigurado nga umayac a dagus. Amen. Umayca coman, Apo Jesus" (Apocalipsis 22:20). Amen.