Ti pudno a panagbabawi iturongna ti maysa a tao a mangbigbig iti basolna ket iconfesarna daytoy. “Dagiti ehemplo iti sao ti Dios maipapan iti pudno a panagbabawi ken panagpakumbaba ipanayagna ti espiritu ti panagconfesar nga awan iti pambar ti basol wenno panangpadas a mangpalinteg iti bagi; Saan nga inkagumaan ni Pablo nga inabbongan ti bagina; no di ket pininturaanna ti basolna iti kasipngetan a maris, saanna a pinadas a pabassiten ti basolna.” – Steps to Chris, p. 41.

Insurat ni apostol Juan, “No cunaentayo nga awan ti basoltayo, allilawentayo ti bagitayo met laeng, ket ti pudno awan cadatayo. No ipudnotayo dagiti basbasoltayo, isu ti mapagtalcan ken nalinteg a mamacawan cadagiti basbasoltayo ken mangdalus cadatayo iti amin a kinakillo” (1 Juan 1:8, 9). Nacascasdaaw daytoy a kari; no ipudnotayo dagiti basbasoltayo, mapacawantayo ken madalusan.

Calpasan nga agbabawitayo ken ipudnotayo dagiti basbasoltayo naawaistayo nga agbalbaliw. Ti pannakabalbaliw ket naan-anay 180 a panagbaw-ing iti biagtayo, alaen ti kasupadi a turong. AwisenNatayo ti Apo nga umadayo iti lubong ket mapan Kencuana a siaannugot, saan a babaen iti panagpilit:

“Uray pay ita, cuna ni Jehova, agsublicayo caniac, iti amin a pusoyo, ken buyogen ti panagayunar, ken panagsangit, ken panagpanes: ket pigisenyo ti pusoyo, a saan a dagiti cawesyo, ket agsublicay ken Jehova a Diosyo; ta isu managparabur ken manangngaasi, natanang nga agunget, ket aglablabes ti kinamanangngaasi, ket isu ibabawina ti dakes.” (Joel 2:12, 13).

“Maysa a panagbalbaliw ti makita iti kababalin, iti ug-ugali, ken panggep.” – Ibid., p. 57.

Daytoy ket saan laeng a bassit a pannaka-pasayaat iti naespirituan a biagtayo no di ket naan-anay a pannakabalbaliw.

“Awan ti pudno nga avidencia ti pudno a panagbabawi malacsid no itrabahona ti pannaka-reporma. No isublina ti kari, itedna manen ti tinacawna, ipudnona dagiti basbasolna ket ayaten ti Dios ken ti padana a tattao, ti managbasol mabalin a sigurado a nalasatna ni patay ket agbiag.” – Ibid., p. 59.

Cas makitatayo pay iti daytoy Lawas ti Cararag, dagiti laeng basol a naiconfesar ken nailasid ti mapunas wenno makansela iti libro ti biag. Ti pannakapunas dagiti basbasol masapul a mapasamac sacbay nga awatentayo ti “bang-ar” – ti “maudi a tudo.”

“Ti naindaclan a trabaho ti evangelio ket saan nga agserra iti nababbaba a pannakaipanayag ti pannacabalin ti Dios ngem iti nangmarca iti pannakailucatna. Dagiti padto a naipatungpal iti pannakaiparocpoc ti umuna a tudo iti pannakalucat ti evangelio, ket matungpalto manen iti maudi a tudo iti panagserrana. Adtoy dagiti ‘tiempo ti bang-ar’ a kitkitaen ni apostol Pedro idi imbagana, ‘Agbaba-wicayo ngarud ket agsublicay iti Dios tapno mapunas dagiti basbasolyo [iti Mangus-usisa a Pangocoman], iti casta umayto dagiti aldaw ti bang-ar aggapu iti sangoanan ti Apo; ket ibaonna ni Jesus.’” – The Great Controversy, pp. 611, 612. [1888 edition].

No ti nasapa a tudo nagtinnag iti aldaw ti Pentecostes caadduan cadagiti adalan ti nagu-ummong iti maysa a lugar iti akinngato a kuwarto. Ania ti ar-aramidenda iti sangapulo nga aldaw? Ti Biblia ibana cadatayo:

“Amin dagitoy nagmaymaysada a nagtuloy iti panagcarcararag argaman cadaiti babbai, ken ni Maria nga ina ni Jesus, ken cadagiti cacabsatna a lallaki” (Aramid 1:14).

“Dagitoy al-aldaw ti panagsagana ket al-aldaw ti nauneg a panangsukisoc iti puso. Naricna dagiti adalan ti naespirituan a kasapulanda ket impuccawda iti Apo para iti nasantoan a bang-ar a mangitutop cadacuada para iti trabaho a mangisalacan iti cararua. Saanda a nagkiddaw iti bendicion para cadagiti bagbagida. Napadagsenanda iti annong a mangisalacan cadagiti cararua.” – The Acts of the Apostles, p. 37.

Natungpal daytoy iti Aramid 2:1-4.

“Ti kari ti Espiritu Santo ket saan a limitado iti aniaman a tawen wenno iti aniaman a puli. Impacdaar ni Cristo a ti nadiosan nga impluencia ti EspirituNa ket adda coma cadagiti pasurotNa agingga iti kanibusanan. Manipud iti Aldaw ti Pentecostes agingga iti agdama a tiempo, ti Mangliwliwa naipatulod cadagiti amin a nangisuco a naan-anay cadagiti bagbagida iti Apo ken iti servicioNa.” – Ibid., p. 49.

Iti lacsid ti kinapudno a ti Espiritu Santo naited cadatayo ita iti sigurado a rucod, a mangisuro cadatayo ken mangibagnus cadatayo iti amin a kinapudno, ti kari ti maudi a tudo ket kasapulan para iti pannakaileppas ti trabaho ti Dios, para iti pannakaiserra ti pannakaipacdaar ti agnanayon nga evangelio. Ket daytoy a kari maipatungpalto:

“Maaramidto iti calpasanna, nga ibucbocconto ti Espirituc iti amin a lasag; ket dagiti annacyo a lallaki ken babbai agipadtodanto, dagiti lallacayyo agtag-taginepdanto cadagiti tagtagainep, dagiti agtutuboyo a lallaki macakitadanto cadagiti sirsirmata: Ken casta met dagiti ad-adipen a lallaki ken babbai cadagita nga al-aldaw ibucbocconto ti Espirituc” (Joel 2:28, 29).

No basaentayo ti sao “Calpasanna” iti libro ni Joel maawatantayo a cadagiti maudi nga al-aldaw maysa a trabaho ti masapul a maisayangcat sacbay a maited cadatayo ti Espiritu Santo a buyogen ti dackel a rucod. Iti napalabas a versiculo ti Joel 2, inaramid ti propeta a nalawag ti trabaho a masapul a maaramid sacbay ti maudi a tudo:

“Tiponenyo dagiti tattao, pasantoenyo ti gimongda, tiptiponenyo dagiti lallacay, urnongnenyo dagiti ub-ubbing, ken dagiti agsuso; rumuar coma ti novio iti siledna, ken iti novia iti sagumbina. Dagiti papadi, nga agannong ken ni Jehova agsangitda coma iti nagbaetan ti duag ken altar, ket cunaenda coma, Ilacsidmo ti ilim, O Jehova, ket dica coma yawat ti patawidam iti pannacaibabain, tapno dagiti nas-nacion agturayda coma cadacuada: ania ti gapu a cunaenda coma cadagiti il-ili, Sadino ti yan ti Dios? Idin ni Jehova naimon gapu iti dagana, ket kinaasianna ti ilina” (Joel 2:16-18).

Awan ti umawat iti “bang-ar” wenno “maudi a tudo” no dagiti basbasolna ket saan a napunas wenno naiccat. Ngem, nakalkaldaang nga ibaga, nga adu ti mangnamnama nga umawat iti dayta naindaclan a bendicion iti managbasol a kasasaadda, a saan a nagbabawi ken nabalbaliwan, mangnamnama nga iti tiempo ti maudi a tudo marepormadanto. Ti caso dagiti cacasta ket awanan namnama, cas mabasatayo iti sumagnad a sarita:

“Nakitac nga adu ti nangbaybay-a iti panagsagana a kasapulan unay ken kumitkita iti panawen ti ‘bang-ar’ ken ti ‘maudi a tudo’ a mangitutop cadacuada nga agtacder iti aldaw ni Jehova ken agbiag iti imatangNa. O, mano ti nakitac iti panawen ti ririboc nga awanan iti salinong! Naliwayanda ti kasapulan a panagsagana; gapuna a saanda a maawat ti bang-ar a masapul nga adda iti amin a mangitutop cadacuada nga agbiag iti imatang ti santo a Dios. . . . Nakitac nga awan ti makaibingay iti ‘bang-ar’ malacsid no mapagballigianda ti tunggal pakaricutan, kinatangsit, kinamanagimbubucod ken tunggal biddut a sao ken tignay.” – Early Writings, p. 71.

“Dagidiay mangitantan iti panagsagana para iti aldaw ti Dios saandanto a magun-od daytoy iti panawen ti ririboc wenno iti aniaman a sumaruno a tiempo. Ti caso ti amin a casta ket awanan namnama.” – The Great Controversy, p. 620.

Inaldaw-aldaw a sapulentayo ti panangilaw-lawag ti Espiritu ti Dios, tapno aramidenna ti trabahona iti cararua ken kababalin. O, mano a tiempo ti nasayang iti panangipaay iti imatang cadagiti burburitog a banbanag. Agbabawi ken agbalbaliw, tapno dagiti basbasolyo ket mapunasda iti panawen ti bang-ar a sumangbay nga aggapu iti sangoanan ni Jehova.” – Ye Shall Receive Power, p. 319.

“Ita masapul a madalusan ti vasiham tapno nakasagana para iti nainlangitan a linnaaw, nakasagana para iti arbis ti maudi a tudo; ta umay ti maudi a tudo, ket ti bendicion ti Dios punoenna ti tunggal cararua a nadalusan manipud iti tunggal rugit. Trabahotayo ita ti mangisuco iti cararuatayo ken Cristo, tapno maitutoptayo para iti tiempo ti bang-ar manipud iti presencia ti Apo – maitutop para iti bautismo ti Espiritu Santo.” – The Review and Herald, March 22, 1892.

“Sacbay ti kaudian a panagbisita dagiti ocom ti Dios iti rabaw ti daga addanto cadagiti ili ti Dios ti maysa a pannakapabiag ti kadaanan a kinadios a saan pay a nasacsian sipud di tiempo dagiti apostol. Ti Espiritu ken pannacabalin ti Dios ket maiparocpocto cadagiti annacNa.” – The Great Controversy, p. 464.

“Bayat ti yaasideg ti bagi ni Cristo iti panawen ti maudi a susicda, ‘ti panawen ti ririboc ni Jacob,’ dumackelda ken Cristo ket makipasetda a silalawa iti EspirituNa. Iti panagbalin ti mensahe ti maikatlo nga angel a natbag a timec, ken bayat a ti naindaclan a pannacabalin ken dayag tamingenna ti pangserra a trabahao, ti namatalec nga ili ti Dios makipaset iti dayta a dayag. Ti mudi a tudo ti mangpaungar ken mangpapigsa cadacuada a lumasat iti panawen ti ririboc. Dagiti rupada agraniag iti dayag dayta a lawag a nangtaming iti maikatlo nga angel.” – The Review and Herald, May27, 1862.

“Agragsaccayo ngarud dacayo nga annac ti Sion, ket agrag-ocayo iti Apo a Diosyo; ta isu itedna cadacayo ti nasapa a tudo a tumutop ket patinnagenna cadacayo ti tudo, ti nasapa ken maladaw a tudo, cas idi damo” (Joel 2:23).

“Ket maaramidto cadagiti maud-udi nga aldaw, cuna ti Dios, ibuyatconto ti Espirituc iti amin a lasag, ket dagiti annacyo a lallaki ken babbai agipadto-danto, ket dagiti babbaroyo macakitandanto cadagiti parparmata, ket dagiti lallakayyo agtagtagainepdanto ti tagtagainep: Wen, ken cadagiti adipenco a lallaki ken babbai cadagita nga aldaw ibuyatconto ti Espirituc, ket agipadtodanto” (Aramid 2:17, 18).

“Iti panangrugi ti panawen ti ririboc, mapnotayo iti Espiritu Santo bayat ti papantayo panangipacdaar a naan-anay iti Aldaw a Panaginana.” – Early Writing, p. 33.

“‘Iti panangrugi dayta panawen ti ririboc,’ a nadacamat ditoy saanna nga itudo ti tiempo dagiti saplit no mangrugin a maiparocpoc, no di ket ti ababa a panawen kasacbayan la unay ti pannaka-iparocpocda, bayat nga adda ni Cristo iti santuario. Iti dayta a tiempo, bayat nga agserserra ti trabaho ti pannakaisalacan, umayto dagiti ririboc iti rabaw ti daga, ket agpungtotto dagiti nacion, ngem mapasar-dengdanto tapno saan a malapdan ti trabaho ti maikatlo nga angel. Iti dayta a tiempo ti ‘maudi a tudo,’ wenno bang-ar manipud iti presencia ti Apo, umayto a mangted iti pannacabalin iti napigssa a timec ti maikatlo nga angel, ket maisagana dagiti sasanto nga agtacder iti panawen a maiparocpoc ti pito a maudi a saplit.” – Ibid.,pp. 85, 86.

“Ti ili ti Dios naipatungpaldan ti trabahoda. Naawatda ti ‘maudi a tudo,’ ‘ti bang-ar nga agtaud iti sangoanan ti Apo,’ ket nakasaganadan para iti dayta narigat nga oras iti sangoda. Agdardaras dagiti angel a mapan ken umay sadi langit. Maysa nga angel ti agsubsublin manipud iti daga a mangiwaragawag a nalpasen ti trabahona; ti kaudian a suot ket naisangbayen iti lubong, ket amin a nangpanecnec iti bagida a napudnoda cadagiti nadiosan a pagala-gadan, naawatdan ti ‘selio ti sibibiag a Dios.’ Ket isardengen ni Jesus ti panangibabaetNa iti santuario idiay ngato.” – The Great Controversy, p. 613.

Bayat iti panangadaltayo iti Nasantoan a Surat a naglaon cadagiti nacascasdaaw a karkari ti Dios iti panangisagotNa cadatayo ti Espiritu Santo iti kinaan-anayna, rumbeng a maawatantayo nga iti tiempo ti nasapa a tudo ti pannacabalin ti Espiritu Santo ket naited “cadagidi nagtutunos a nagcacadua iti maysa a lugar.” Iti tiempo ti maudi a tudo ti kapadasan ti ili ti Dios ket maipadanto. Ti versiculo iti Biblia iti Zacarias cunana:

“Dumawatcayo ken Jehova iti tudo iti panawen ti maud-udi a tudo; ken ni Jehova met laeng a mangaramid cadagiti kimat; ket isu itdennanto cadacuada dagiti nadegga a tudo,” (Zacarias 10:1).

Adun a daras a nabasatayo daytoy a versiculo ti Biblia, ken nangisaad iti napigsa a panangiyunay-unay cadagiti sasao: “Kiddawenyo iti Apo ti tudo iti panawen ti maud-udi a tudo,” ket lipaten ti maudi a paset ti versiculo a mangibaga tapno ti Apo ipaayNa dagiti arbis “iti root idiay away iti tumungal maysa.” Dagitoy maudi a sasao ipaawatna a tunggal maysa nga adda iti talon (ti iglesia), nga iti dayta a tiempo masapul a napasudi nga iglesia, awatenna ti maudi a tudo. Dagidiay a nagliway a nangaramid iti panag-sagana para iti bendicion ti maudi a tudo saanto a masaracan nga adda cadacuada. Maickatdanto manipud iti natda nga ili ti Dios babaen iti nabileg a pannakayakayac. Ti sao ti inspirasion inaramidna a nakalawlawag:

“Yakyakayaken ti Dios ti iliNa. Maaddaan Isuna iti nadalus ken santo nga iglesia. Saantayo a Mabasa ti puso ti tao. Ngem nangipaay ti Apo iti wagas a mamagtalinaed iti iglesia a nadalus.” – Testimonies for the Church, vol. 1, p. 99.

“Sumagmamano ti nayakayac a naickat ket nabati iti dalan. Dagiti naliway ken di mangikan-kano, a saan a nakitipon cadagidiay nangipateg iti balligi ken pannakaisalacan a makaanay tapno sipipingetda nga agkidddaw ken umasog para iti daytoy, saanda a nagun-od daytoy ket nabatida iti sipnget, ti lugarda ket insegida nga innala ti sabali a mangpetpetpet iti kinapudno ken tumipon iti ranggo.” – Early Writings 271.

“Ta nagparang ti parabur ti Dios, a mangyeg ti pannacaisalacan cadagiti isu-amin a tattao, nga isursuronatayo a no pagtalawantayo ti saan a kinasingpet ken dagiti tarigagay a nailubongan, agbiagtay coma a sipaparbeng ken sililinteg ken sisisingpet, itoy lubong nga agdama; nga ur-urayen daydiay inanama a nagasat ken ti panagparang a sidadayag ti dackel a Dios ken Mangisalacan cadatayo a ni Jesu-Cristo” (Tito 2:11-13).

“No ti kababalin ti Mangisalacan ket naan-anay a napaadda iti iliNa, ket umayton a mangtonton iti cucuaNa. Pribilehio ti tunggal Cristiano, saan laeng a kumita, no di ket padarasen, ti yaay ti Apotayo.” – Maranatha, p. 112.

“Ket agparangton ti pagilasinan ti Anac ti tao iti langit; ket agdung-awto ti amin a tribu ti daga, ket makitadanto ti Anac ti tao nga umay iti rabaw dagiti ulep ti langit, nga adda pannacabalin ken dackel a gloriana. Ket ibaonnanto dagiti angelna a buyugan ti napigsa nga uni ti trumpeta, ket urnongendanto dagiti pinilina, cadagiti uppat nga angin manipud iti maysa nga ungto ti langit agingga iti bangir” (Mateo 24:30, 31).

“Ngem intono ti Anac ti tao umayto argaman iti dayagNa, ken amin dagiti angel maicuyogto Kencuana, isu ti panagtugawnanto iti trono ti gloriaNa. Ket iti sangoananNa, maurnongto dagiti isuamin a nacion ket paglalasinennanto dagiti maysa ken maysa cadagiti tao, a cas iti pastor ilasinna dagiti carnero cadagiti calding. Ket isaadnanto dagiti carnero iti macanawanna ket dagiti calding iti macatigidna.” (Mateo 25:31-34).

Bayat ti panangbasatayo ti maipapan iti kapadasan dagiti nasapa nga adalan iti rugrugi ti Nacristianoan a dispensasion idi inawatda ti umuna a tudo, makitatayo a dagidiay nga adda iti akinngato a kuarto immawatda a nagcacadua iti bautismo ti Espiritu Santo. Dagiti sabali a miembro ti iglesia immawatda a naud-udi, indibidual.

Mapasamac cadi met dayta iti tiempotayo? Ti maudi a tudo a naisasaon, ket incararagtayo maipapan daytoy a masansan, cas maysa a pasamac a mapasamacto iti masacbayan. Kaanonto a matungpal? Basol kadi ti Apo iti pannakaitantan iti panangawat iti daytoy naindaclan a bendicion? Ibaga cadatayo ti Biblia: “No ngarud no dacayo, idinto a dakescayo, ammoyo ti mangted cadagiti nasayaat a sagsagut cadagiti annacyo, dinto aya nangnangrona ni Amayo a nailangitan a mangtedto ti Espiritu Santo cadagiti agdawat kencuana?” (Lucas 11:13).

“Iti sumagmamano a tiempo ti makalawas, dagiti mangibagi iti natda nga iglesia ti Dios aguummongda nga agmaymaysa. Maiparocpoc kadi ti Espiritu SantoNa cadagiti delegado iti 2025 General Conference Session? Maawatto ngatan ti nacas-casdaaw a kari ti maudi a tudo? Patgen a cacabsat, agsaganatayo para iti dayta naindaclan a bendicion. Tulongan ti Apo ti amin nga addaan iti daytoy a tarigagay a mabautizaran iti Espiritu SantoNa. Balacadannatayo ti Espiritu ti Padto:

“Banbantayan dagiti angel ti Dios ti panna-kasucog ti cababalin ken timtimbangenda ti pateg moral. Ti probasyon ket ngannganin agpatinggan ket saanca a nakasagana. O, ti coma sao ni ballaag ma-uram coma cadagiti cararuayo! Agsagana! Agsa-gana!” – Testimonies for the Church, vol. 2, p. 401.

“Cas maysa cadagiti padayo nga adipen, tarigagayac ti agkiddaw iti tunggal maysa a mapan cas delegado iti 2025 General Conference session: Pangngaasiyo, ta mapancayo iti Conferencia nga awanan, nawaya cadagiti immuna a kapanunotan, agaramid iti naan-anay a panagsagana, ket makicappia iti Dios ken iti tao, addaan iti awanan tulaw a konsiencia, ken nakasagana a mabautizaran babaen iti Espiritu Santo. Sino ti makaammo a ti nabayagen a namnamaen a kari ket matungpal. Ket amintayo, cacabsat, a saan a delegado, iconfesartayo dagiti basol ken bidduttayo iti Dios ken iti maysa ken maysa, ket agkiddaw iti pammakawan tapno dagiti basol ket mapunas ket agcararag a sipapasnec para iti balligi ti conferencia, a bisitaen coma ti Apo dagiti adipenNa iti arbis ti naindaclan a bendicion.

Ilacsid coma dagiti Cristiano dagiti suppiatda, ket itedda ti bagida iti Dios para iti pannakaisalacan ti napucaw. Kiddawenda coma a sipapammati ti bendicion, ket umayto. Ti pannakaiparpcpoc ti Espiritu cadagiti al-aldaw ti apostolico isu ti ‘umuna a tudo,’ ket nadaeg ti resultana. Ngem ti ‘maudi a tudo’ nakarkaronto a nabusbuslon.” – God’s Amazing Grace, p. 205.

“Ita, itedmo ta bagim iti Dios tapno maungcawanca ita bagim, naungcawan iti apal, imon, dakes a panagsasao, gura, amin a banag a mangibabain iti Dios. Ita kasapulan a dalusam ti vasiham tapno maisagana para iti nainlangitan a linnaaw, nakasagana para iti arbis ti maudi a tao; ta ti maudi a tudo umayton, ken ti bendicion ti Dios punoenna ti tunggal cararua a nadalusan iti tunggal pannakatulaw. Trabahotayo ita ti mangisuco iti cararuatayo ken Cristo, tapno maitutoptayo para iti tiempo ti bang-ar nga aggapu iti sangoanan ti Apo – maitutup para iti bautismo ti Espiritu Santo.

Amen.