Ti umuna a salsodsod a kasapulan a maayos ket no ania ti pudno a panagbabawi? Maicadua, ania ti mabalin a pagbabawian ti tao a mangsalsalimetmet iti linteg ti Dios pakairamanan ti Aldaw a Panaginana ken agbibiagen nga awanan tulaw, no moral nga ugali ti pakasecnan.

Pammati iti Dios ken ti bungana a pana-ngibabawi iti basol ket natural ken awtomatico a resulta ti pannakisasao iti Dios. Ti pannakaipanayag ti kinaimbag ken kinalinteg ti Dios, no magun-odan laeng babaen iti aktibo a pannakaisilpo Kencuna, ania pay ngarud ti pagbabawian dagiti tattao (Roma 2:4). Iti ruar daytoy a pannakisao, awan ti pudno a panagbabawi. No ad-adda a makisasao ti cararua iti Dios, ad-adda met a maiyas-asideg Kencuana, napigpigsa ti panangkaconvictar iti basol ken mas napaspasnec ti panagbabawi.

“No as-asideg a mapantayo ken Jesus, ad-adda a nalawlawag a mailasintayo ti kinadalus ti kababalinNa, nalawlawag a makitatayo ti nakaro unay kinamanagbasol ti basol, ket basbassit met ti pannakaricnatayo nga itag-ay ti bagitayo. Addanto ti agtultuloy a panangsurot ti cararua iti Dios, agtultuloy, napasnec, makaburac iti puso a panangiconfesar iti basol ken panangipacumbaba iti puso iti sangoNa. Iti tunggal addang iti Nacris tianoan a kapadasantayo ti panagbabawitayo ket umun-uneg.” The Acts of the Apostles, p. 561.

Ken ni Enoc naibaga a, “no nasingsinged ti pannakikonekta iti Dios, naun-uneg met ti pannakaricna iti bucodna a kinakapuy ken kinaimperpekto.” – Ptriarchs and Prophets, p. 85.

Ti panagbabawi ket saan a mabalin nga artipisial a maaramid. Saan a mekanikal nga imbentuen; saan a mapataud dayta a cas iti dadduma a kapritso ti nataoan nga emosion. Ti Espiritu Santo a talaga ti mangsapsaplit cadagiti kuerdas ti puso ti tao, a mangrunaw ken mangpasuco iti dayta iti sidong ti napigsa a mangkombintar a pannacabalin. Ket timmaud ti pudno a panagbabawi. Ti ladingit gapu iti basol ken panagbabawi ket kadawyan ken awtomatico a nataoan a sungbat iti trabaho ti Espiritu a kankanayon a mangmalmaldit iti panunot iti kinapintas ti kababalin ti Dios ken Cristo Jesus. No ti namati ket kanayon a kumita ken ni Jesus ken ilucatna ti pusona Kencuana cas gayyem iti nasantoan a pannakicadua, amin a kinalinteg iti bagi ken ipagarup a kinaimbag ket mauksob ken naibascag a kinalamolamo ti cararua. Kalpasanna, ti cararuana ket natural nga agcurno gapu iti panagbabawi, a panagpakumbaba ken panagladingit.

“Maysa a raya ti dayag ti Dios, maysa a rimat ti kinadalus ni Cristo, sarsarutenna ti cararua, aramidenna ti tunggal batic ti pannakarugit a sisasaem a naiduma, ken ibutactacna ti kinaalas ken depekto ti nataoan a kababalin. Iparangna dagiti saan a nasantoan a tarigagay, ti kinaawan kinamatalec ti puso, ti kinarugit dagiti bibig. Dagiti tignay ti managbasol a kinagulib a mangaramid iti linteg ti Dios nga awan maayna, maibutactac iti imatangna, ket ti espirituna masaplit ken nagsagaba iti sidong ti agsuksukimat nga impluensia ti Espiritu ti Dios. Kagurana ti bagina bayat a matmatanna ti nadalus, awan mantsana a kababalin ni Cristo." – Steps to Christ, p. 29.

Idi naimutectecan ni propeta Isaias ti dayag ti Dios iti uneg ti templo, isu ket nasaplit ken naabungotan iti pannakaricna iti bucodna a moral a kinakapuy ken kinaimperpeco ti kababalin. Ti naupay nga ikkis ti mammadto ket, ‘Asiac pay! ta naikkatac; gapu ta maysaac a tao a narugit ti bibigna, agnanaedac iti tengnga ti ili a narugit ti bibigna: ta dagiti matac nakitada ti Ari, ti Apo dagiti buybuyot” (Isaias 6:5). Sacbay a naaddaan iti daytoy makabalbaliw-biag a personal a pannakilangenna iti Dios iti santuario, natignay a mangtubngar cadagiti basol ti sabsabali. Babaen cadagiti sumaganad a nainget a sasao, intudona dagiti basol dagiti dadduma "Asi pay ti nadangkes! nasakitto kencuana: ta maitedto kencuana ti gunggona ti imana." (Isaias 3:11). “Asi pay dagiti mangawag iti dakes a naimbag, ken ti naimbag dakes’ a mangikabil iti sipnget cas lawag, ket lawag iti sipnget; a nangikabil iti napait para iti nasam-it ken nasam-it iti napait! Asi pay dagiti masirib cadagiti bucodda a mata, ken nasirib iti imatangda! Asi pay dagiti maingel nga uminum iti arac, ken dagiti tattao a nabileg a mangilaoc iti naingel nga inumen” (Isaias 5:20-22).

Bayat a natignay ti propeta a mangcondenar iti kinadangkes nga agsacsacnap iti aglawlawna iti regtana para iti Dios, saan a nasisita a maconvictar iti bucodna a kinamanagbasol iti dayta a tucad ti naespirituan a pannagna. Agingga laeng dayta pannakisarac iti Dios idiay templo a naawatan ti propeta ti maysa a banag maipapan iti bucodna a kinamanagbasol iti biag a naiduma unay iti dayag ti Dios, a silalawag unay a naimaldit iti panunot ken pusona. Cas resulta dayta ti di malipatan a panagsasango, ti "Asikayo" ket nagbalin nga "Asiac pay. . . ."

Binabalaw ni Isaias ti basol ti sabali; ngem ita makitana ti bagina a naibascag iti isu met laeng a pannakacondenar nga impacdaarna cadacuada. Napnec isuna idi iti nalamiis, awan biagna a seremonia a pagdayawna iti Dios. Saanna nga ammo daytoy agingga nga inted ti Apo kencuana ti sirmata. Nagbassit itan ti panagkitana iti sirib ken talentona bayat ti panangkitana iti kinasagrado ken kinadaeg ti santuario. Kasano ti saanna a pannakaikari! Kasano a saan a maitutop para iti sagrado a servicio! Ti buyana iti bagina mabalin a maipeksa iti pagsasao ni apostol Pablo, ‘O dacsanggasatac a tao, Siasino ti mangispal caniac iti daytoy a bagi a pakaigapuan ti ipapatayco?’” – The SDA Bible commentary, vol. 4, p. 1139.

Ti natda nga iglesia ti Dios ita, bayat a ti panggep ti katan-ocan a panangipateg ti Dios, ket casla bulsec iti pudno a naespirituan a kasasaadna, cas ken ni mammadto Isaias, sacbay ti personal a pannakisangona iti Dios idiay templo. Ti nangato a kasasaadna cas pagidulinan cadagiti sagrado a kinapudno ken ti awan pakababalawanna a kababalinna, daksanggasat, a nangpataud kencuana iti di matarigagayan nga epekto ti panangpanunot nga isu ket adda iti nasaysayaat a kasasaad ngem iti talaga a kasasaadna. Ti pattapattana iti bukodna a naespirituan a kasasaad ket naiduma unay manipud iti Matalec ken Pudno a Saksi, a mangibaga, "Saanmo nga ammo a dacsanggasat ken kakaasica, napanglaw, bulsec ken lamolamoca” (Apocalipsis 3:17). Sipupudno a saanna nga ammo ti pudno a casasaadna, sitatalecna nga impuccaw, “Nabac-nangac ken Narang-ayac ket adda amin a masapulco” (Apoclaipsis 3:17). Agingga nga agkullayaw ti ili ti Dios iti daytoy panangidirdir-i, panangkablaaw iti bucod a tabas, a naallilaw gapu iti nakadacdackel nga impagarup a kinaimbag, ti Espiritu Santo saan a makacombictar iti basol. Awan ti pudno a maka-burac-puso a panagbabawi ken panangiconfesar iti basol ken awan ti pudno a pannakisasao iti Dios malacsid no daytoy makadadael a kasasaad ti panunot ket mailacsid a silalawag ken mabaybay-an.

Dagiti Escribas ken Fariseos bayat ti tiempo ni Jesus intangsitda dagiti bagbagida iti bucodda a pinaadda a kinalinteg iti bagida. Inyawis ni Juan Bautista “Agbabawicayo, ta ti pagarian ti langit asidegen” (Mateo 3:2), ngem awan impresionna cadacuada. Ti awag nga agbabawi cadacuada ket makarimon. Nabulsecanda cadagiti rikna ti naingato a naespirituan a kinatan-oc gapu iti bileg ti pannakainaigda ken ni Abraham ken dagiti adu a repormada a naipamaysa cadagiti aramid, ti nainget a pormalismoda, naricnada nga awan ti panag-kasapulanda iti Mangisalacan, saan a kasapulan nga ipakumbaba ti bagbagida ken ipudno dagiti basolda, ken sigurado a saanda a kasapulan ti panagbabawi. Inladawan ni Jesus dagitoy a naallilaw iti bagida nga agibunbunannag iti relihion idi panawenNa a cas ". . . . napapudaw a tantanem a napintas ti buyada iti ruar ngem iti uneg napnoda iti tultulang ken agruprupsa a bangkay dagiti natay” (Mateo 23:27). Dagitoy ti nangriro iti akinruar nga itutunos cadagiti pagannurotan ken paglintegan buyogen ti kinalinteg a nagubbog a kadawyan manipud iti uneg ti puso. Awan ti ammoda iti kinaemma ken kinapakumbaba ti puso a magun-odan laeng iti pagadalan ni Cristo, masursuro laeng babaen iti agtultuloy a pannakisao Kencuana.

Ti awag ket masaracan iti mensahe para iti iglesia Laodicea, “Agregtacayo ngarud ket agbabawi” (Apocalipsis 3:19), saan a nalatac bayat ti panagtacderna, nupay casta para iti tunggal miembro ti iglesia ita no alaen a serioso. Agbibiagtayon iti panawen ti Laodicea. Daytoy awag nga agbabawi isu ngarud ti agdama a pagrebbengan. Ti di panangipangag iti daytoy pannakarejectar ket agresulta iti kategorikal a pannakaitupra manipud iti ngiwat ni Cristo, maysa nga aramid ti naan-anay a panangilacsid. Ti panangibabain iti bagi, panang-tallicod iti bagi, ken panangisuco iti bagi a cas iti napadasan ni propeta Isaias iti templo bayat ti panangkitana iti dayag ti Dios, ket makitanto iti biag dagidiay nangipangag iti awag nga agbabawi. Awan no di dagidiay a, babaen iti pammati, nakisango iti Dios iti uneg ti santuario cas ti inaramid ni Isaias, maaddaan iti gundaway a mangammo iti banag ti kinaimbag ti Dios a mangitunda cadacuada nga agbabawi (Roma 2:4).

“Ti sirmata a naited ken Isaias irepresentarna ti kasasaad ti ili ti Dios cadagiti maudi nga al-aldaw. Napagasatanda a kumita babaen iti pammati ti trabaho a mapaspasamac iti nailangitan a santuario. ‘Ket naluctan ti templo ti Dios idiay langit, ket nakita iti templona ti lacasa ti tulag.’ Bayat ti panangkitada babaen iti pammati iti santo dagiti sasanto, ken makitada ti aramid ni Cristo iti nailangitan a santuario, madlawda a tattaoda nga addaan iti narugit a bibig – maysa nga ili a dagiti bibigda masansan nga agsasao iti kinaubbaw, a dagiti talentoda ket saan a nasantificar ken naipacat iti dayag ti Dios. Nasayaat unay no maupayda bayat ti panangidumada iti bucodda a pagkapuyan ken saan a pannakaikari iti kinadalus ken kinaayat ti nadayag a cababalin ni Cristo. Ngem no isuda, cas ken Isaias, awatenda ti impresion nga in-gakat ti Apo a maaramid iti puso, no ipakumbabada dagiti cararuada iti sangoanan ti Dios, adda namnama para cadacuada. Ti bullalayaw ti kari ket adda iti ngato ti trono, ket ti trabaho a naaramid para ken Isaias maaramidto kencuana. Sungbatanto ti Dios dagiti dawat nga aggapu iti nagbabawi a puso.” – Ibid.

Ti sirmata ni Isaias maipapan iti Dios iti templo ket maysa a kita ti kapadasan ti ili ti Dios cadagiti maudi nga al-aldaw. Babaen iti pammati, maaddaan-danto iti pribilehio a sumurot ken Jesus iti santo dagiti sasanto. Bayat ti pannakikomunikarda Kencuana ken panangutobda iti pangserra a trabahoNa iti santuario, maiturongda a mangtarus iti maysa a banag maipapan iti naindaclan nga ayatNa iti pannakapunas dagiti basbasolda iti agnanayon manipud iti lagip ken manipud cadagiti libro ti rekord; ad-adda a mailasindanto ti saclaw ti kinarugit ti pusoda ken kinaalas dagiti ugalida a naiduma unay iti kinadalus ni Cristo. Cas resultana, ti panag-babawida ket nauneg unay. Agsennaay ken agickis ken agsangitdanto iti nagbaetan ti beranda ken ti altar; parigatendanto dagiti cararuada ken agpakaasida a sipapasnec para iti kinadalus ti puso.

Masapul nga agbalin nga ad-adda a nasaririt ti amin no maipapan iti trabaho ti panangabbong, a mapaspasamac iti santuario idiay ngato. Inton makita ken maawatan daytoy naindaclan a kinapudno, dagiti mangtengtengngel iti dayta ket agtrabahoda a maitunos ken Cristo tapno maisagana ti maysa nga ili nga agtacder iti naindaclan nga aldaw ti Dios, ket agballigi dagiti panagreggetda. Babaen ti panagadal, panagut-utob, ken panagcararag maitan-octo ti ili ti Dios iti ngatoen dagiti gagangay, naindagaan a pampanunot ken rikna, ket maitunosda ken Cristo ken ti naindaclan a trabaho a mangdalus cadagiti basbasol dagiti tattao iti santuario iti ngato. Maikuyogto ti pammatida Kencuana iti santuario, ket dagiti agdaydayaw ditoy daga ket siaannad a marepaso iti biagda ken idiligda dagiti kababalinda iti naindaclan a pagibasaran iti kinalinteg. Makitadanto dagiti bucodda a depecto." – Testimonies for the Church, vol. 5, p. 575.

Pudno nga awan ti ideya ti agbabbabawi a mamati no kasano kasacnap ti kinamanagbasol ti biagna. Saanna a madlaw babaen ti panunotna ti kinadangkes ti basol dagiti salungasing ken basolna. Ngarud, iti aniaman nga aldaw, ti panagbabawina ket pulos a saan nga umdas. Saanna ammo no ania ti pagbabawianna! Saanna a maamiris nga ad-adu nga amang ti utangna iti linteg ti Dios ngem iti pagbabawian ken iconfesarna iti inaldaw. Dagiti libro ti rekord iti santuario ket naglaon iti ad-adu nga amang a basol ngem ti gagangay a pagbabawian ken iconfesarna iti inaldaw.

"Ti aramid ti tunggal tao ket lumabas a marepaso iti sangoanan ti Dios ket nairehistro para iti kinamatalec wenno saan a kinamatalec. Iti kasupadi ti tunggal nagan cadagiti libro ti langit ket maisuratda a buyogen ti nakaam-amac a kinaeksakto ti tunggal saan nga umiso a sao, tunggal naimbucodan nga aramid, tunggal di natungpal a pagrebbengan, ken tunggal nalimed a basol, nga addaan iti nasigo a panagpammarang. Dagiti ballaag wenno panang-tubngar nga impatulod ti langit a nabaybay-an, nasayang a canito, saan a napasayaat a gundaway, ti impluensia a naipaay para iti naimbag wenno dakes, kabulon dagiti nadanonna a resulta, amin ket pinagsasaruno ti agisursurat nga angel." – The Great Controversy, p. 482.

Uray dagiti basol a saan pay nga aktual a naaramid ket nairekordda cadagiti libro ti langit, a mangpanecnec maibusor cadagiti tattao iti pangocoman.

"Ti linteg ti Dios ket danonenna ti rikna ken motibo, casta met dagiti makinruar nga aramid. Ipalgacna dagiti palimed ti puso, a mangsilsilnag iti lawag cadagiti bambanag sacbay a naitabon iti sipnget. Ammo ti Dios ti tunggal kapanunotan, tunggal panggep, tunggal plano, tunggal motibo. Dagiti libro ti langit ilistana dagiti basbasol a naaramid no adda ti gundaway. Isangbay ti Dios ti tunggal aramid iti pangocoman, buyogen ti tunggal sikreto a banag." – The Signs of the Times, July 31, 1901.

Kinaagpaysona, no ad-adda a maibutactac ken maiyeg iti lawag ti kinamanagbasol ti maysa, ad-adda a naun-uneg ti panagbabawina. Daksanggasat ta ti pannakaawat ti maysa iti kinamanagbasolna iti biag ket mabalin a nakaro a maballicog ken nalidem cas resulta dagiti makapasayaat a reporma a naiyam-ammo iti biag iti pannakacomberte. Ti pannaka-iyammo ti positibo a pannakabalbaliw iti taraon, ti cawes, ti disposision ken ti tigtignay ket masansan nga iturongna ti adu a mangipagarup (sibibiddut) nga ad-adda a nagbalinda a nalinteg ket ngarud, bassit a bassit a managbasol. Daytoy ket panangallilaw iti bagi iti kasayaatan a kasasaadna; isu ti mismo a kaipapanan ti Laodicean a kinaletlet a kunana, "Nabacnangac ken Narang-ayac ket awan ti pakasapulac.” Saan a kasapulan a saoen a nalaclaca nga amang ti matnag iti daytoy a silo ngem iti maamiris ti adu a tattao. Kinapudnona, ti kasasaad ti adu a tattao iti iglesia, nupay mabalin a saan a mailasin ken bigbigen. Daytoy ti mangilawlawag no apay a maipapan iti Laodicea, impukkaw ni Jesus, "Saanmo nga ammo. . . ." Amin a naibaga, daytoy nga ugali ket nakalkaldaang ken apectaranna unay ti rucod ti maricna a panagbabawi.

Addaan ti Dios iti maysa nga ili cadagiti maud-udi nga al-aldaw a sidedecket a maisilpo iti AnacNa iti conteksto ti kaudian a ministrasionNa iti santo dagiti sasanto. Maiturongto dagitoy a mangtarus a naan-anay iti saklaw ti kinamanagbasol ti biagda uray agingga iti punto ti kinaawan namnama. Nalawag a mailasindanto dayta a maisupadi cadagiti awan kaaspingna a kinangayed ni Cristo. Idauloan ngarud ida ti Espiritu Santo a mangibelleng iti pampanunot ti Laodicea a nasacnap unay cadagiti iglesia cadagitoy nga aldaw ken lumasatda iti naespirituan a pannakadalus a mailasin babaen ti nauneg a panagsukisoc iti cararua ken nauneg a panagbabawi. Daytoy a kapadasan ket umaspingto iti napasaran ni Isaias, malacsid no ad-adda a nainget ken ad-adda a mataginayon. Daytoy a padas, a naawagan iti "panangparigat iti cararua" (Levitico 16:29, 23:27-32) ket isu ti mangisagana iti natda nga iglesia para iti maudi a panangabbong ken pannakadalus.

"Ti sirmata ni Zacarias maipapan ken Josue ken ti Angel maiyaplikar a buyogen ti karkarna a puersa iti padas dagiti tattao ti Dios cadagiti pangserra nga eksena ti naindaclan nga aldaw ti panangabbong. . . ."

Cas iti panagpakaasi ni Josue iti sango ti Angel, casta met ti natda nga iglesia, buyogen ti pannakaburac ti puso ken di agkupas a pammati, ket agpakaasi iti pammakawan ken pannakaispal babaen ken Jesus, ti Mangibabaetda. Naan-anay a sipapanunotda iti kinamanagbasol ti biagda, makitada ti kinakapuyda ken saanda a pannakairi; ket nakasaganadan a madismaya." – Prophets and Kings,588.

Maysa a trabaho ti nauneg a panangamiris iti bagi ken panagbabawi ti nakiddaw para iti daytoy a tiempo. (Joel 2:13). Saan nga umdas ti gagangay a panangtungpal cadagiti nalamiis, awan espirituna, pormal a ritual ken seremonia iti simbaan tapno mapasamac daytoy. Saan met a ti kaugalian a panangasaba cadagiti awan biagna, teoretikal a sermon wenno ti panangidaton cadagiti napusiaw, mekanikal a cararag iti simbaan ken iti pagtaengan ti mangyeg iti daytoy a kapadasan. Ti laeng practikal a relihion a mailasin babaen iti saan nga agsarday a panangsapul iti Dios iti inaldaw, oras a pannakilangen ken panagbalin a pannakaikappeng Kencuana, ti makagunggona.

Yantangay ta agbibiagtayon iti antitipical nga aldaw ti panangabbong, saan a negosio a cas iti gagangay iti simbaan. Ti panagsagaba ti cararua isu ti bilin ni Cristo iti natda nga iglesia. Dandanin aramiden ni Jesus ti maudi a panangabbongNa; DandaniNan ited iti bilin, "Uksobem dagiti narugit a pagan-anay ket . . . cawesankanto iti nadalus a pagan-anay" (Zacarias 3:1-5). Iti mabiit, maitunos iti pangserra a ministrasionNa iti nailangitan a santuario cas Nangato a Padi, dalusan ni Jesus dagiti tattaoNa manipud iti amin a kinadakes ken basol babaen ti panangipaayNa cadacuada iti naan-anay a kinalintegNa. Dagidiay nairuam a mangdung-aw iti naespirituan a panagbaba ken panagladingit gapu iti kinapanglaw ti cararuada, awatendanto dayta, idinto a dagidiay nagbalin a saan a naannad ken saan a masecnan ket maisinadanto iti iliNa.

Maysacanto kadi cadagidiay nagasat nga umawat iti pagimbagan ti maudi a panangabbongNa ket maibilang iti 144,000? Mataginayon kadi ti naganmo iti libro ti biag ti Cordero? Madalusancayo ​?​?kadi a naan-anay ken permanente manipud iti amin a kinakillo ken maikarikayo nga agtaeng iti kagimongan dagiti awan basolna nga angel? Ibilangnatayo coma amin ti Apo a maikari. Agregtaca ngarud ket agbabawica.

Bayat a parigaten ti ili ti Dios dagiti cararuada iti sangoananNa, nga agpakpakaasida iti kinadalus ti puso, naited ti bilin, ‘Ikkatem dagiti narugit a pagan-anay,’ ket naisao dagiti makaparegta a sasao, ‘Adtoy, pinalabasco kenca ti kinamanagbasolmo, ket cawesancanto iti nadalus a pagan-anay” (Zacarias 3:4). Ti awan mulitna a bado ti kinalinteg ni Cristo ket naikabil cadagiti nasuboc, nasulisog, napudno nga annac ti Dios. Dagiti maum-umsi a natda nacawesan iti nadayag a cawes, a pulos a di matulawan gapu cadagiti kinarugit ti lubong. Nataginayon ti naganda iti libro ti biag ti Cordero, a nailista cadagiti matalec iti amin a panawen. Nasarangetda dagiti kinasikap ti manangallilaw; saanda a naisubli manipud iti kinapudnoda gapu iti panagngaretnget ti dragon. Ita, agnanayon a natalgeddan manipud cadagiti gakat ti manulisog. Mayalis dagiti basbasolda iti nagtaudan ti basol. Maysa a ‘nadalus a mitra’ ti naikabil cadagiti uloda." – Ibid.