Domingo
Setiembre 27
1. TI PANNAKAIPARANG TI AYAT
a. Ania ti kaanduran unay a kababalin ti Namarsuatayo? 1 Juan 4:16.
“Ti Dios ket ayat’, naisurat iti tunggal agukrad a busel, iti tunggal korola ti sabong, ken tunggal bulong ti ruot. . . . Amin a banbanag iti nakaparsuaan agsacsi iti naayat, naamaan a saluad ti Diostayo ken iti tarigagayNa a mangparagsac kadagiti annacNa. Dagiti ipawil ken bilbilinNa ket saan a nairanta a mangiparang iti turayNa, ngem kadagiti amin nga aramidenNa, sipapanunot Isuna iti pagimbagan dagiti annacNa.” – PP, p. 600.
b. Kasano ti naan-nay unay a panangiparangNa iti ayatNa? Juan 3:16; Roma 5:6-8.
“No ad-adda ti panangadaltayo iti nadiosan a kababalin iti lawag ti cruz, ad-adda a makitatayo ti asi, ayat ken pammakawan a naikaysa iti kinalinteg ken husticia, ken nalawlawag a mailasintayo dagiti saan a mabiliang a pammanecnec ti ayat nga awan patinggana ken asi a nalablabes ngem iti naasi nga ina iti nasubeg nga anacna.” – SC, p. 15.
Lunes
Setiembre 28
2. NAISALACAN MANIPUD BASOL
a. Ania ti naindaclan a misyon ti impatungpal ni Jesus babaen iti sacrificioNa? Mateo 1:21.
“Mabalin nga agtalinaed ni Jesus iti sibay ti AmaNa. MapagtalinaedNa ti dayag ti langit ken ti panagtamed dagiti angeles, ngem piniliNa ti nangisubli iti setro kadagiti ima ni Amana, ket bimmaba manipud trono ti universo tapno maisangbayna ti lawag kadagiti nasipngetan ken biag kadagti mapukpukaw.” – DA, pp. 22, 23.
“Ti misyon ni Cristo maipatungpal laeng babaen iti panagsagaba. Iti sangoNa ket biag da ladingit, rigat ken susic ken nakababain nga ipapatay. Kasapulan nga awitenNa dagiti basbasol ti sibubukel a lubong. AnduranNa ti pannakaisinaNa iti ayat ni AmaNa.” – Ibid, p. 129.
b. Ania ti pagayatanNa para iti tunggal tao? 2 Pedro 3:9; 1 Timoteo 2:4.
“Natratar ni Cristo kas kaikariantayo, tapno matratartayo kas iti kaikarianNa. Nadusa para kadagiti basbasoltayo nupay awan ti pannakipasetNa, tapno mapalintegtayo babaen iti kinalintegNa, nupay awan iti pannakipasettayo. SinagabaNa ni patay a dusatayo, tapno maawattayo ti biag nga adda Kencuana.” – Ibid, p. 25.
k. Kasano a maawattayo ti beneficio ti ipapatay ni Cristo para kadagiti basbasoltayo? Aramid 16:31; 1 Juan 1:9.
“Dagiti kondisyon iti pannakagun-od iti asi ti Dios ket simple ken nalinteg ken nainkalintegan. Saan a gutoguten ti Dios kadatayo nga agaramidtayo iti narigat a banag tapno magun-odan ti pannakapakawan ti basol. Saantayo nga agaramid iti atiddog ken makabannog a panagdalyasat, wenno agaramid iti naut-ot a panetensia, tapno anamongan ti Dios ti langit ti cararuatayo wenno tapno maikkat ti salungasingtayo; ngem isuna a mangiconfesar ken mangilacsid iti basolna makagun-od iti asi.” – SC, p. 37.
“Ni Cristo ti pagtaudan ti tunggal nalinteg a rikna. IsuNa laeng ti makaimula iti puso iti gura maibusor ti basol. Tunggal tarigagay para iti kinapudno ken kinadalus, tunggal pannakabigbig iti bukod a kinamanagbasol, ket pammanecnec a ti espirituNa ti agtigtignay iti pusotayo.” – Ibid., p. 26.
Martes
Setiembre 29
3. NAISALACAN MANIPUD SAIRO ITI UNEG
a. Ti pannakaisalacan irammanna saan laeng a pannakapakawan, ngem ania pay? Tito 2:11-14; Galacia 2:20.
“Imposible para kadatayo; iti bukodtayo a bagi, ti makalibas manipud abot ni basol a limnedantayo. Dagiti pusotayo ket dakesda, ket saantayo a mabaliwan ida. . . . Edukasyon, kultura, ti pannakawatwat iti pagayatan, nataoan a peksa, aminda addaan iti maitutop a tay-ak, ngem ditoy awananda iti bileg. Mabalin a makapaaddada iti akinruar a nalinteg nga ugali, ngem saanda a mabaliwan ti puso; saanda a madalusan ti ubbog ti biag. Kasapulan nga adda bileg nga agtrabtrabaho iti uneg, maysa a baro a biag manipud ngato, sacbay a ti tao mabaliwan manipud managbasol agbalin a nasantoan. Dayta a bileg isu ni Cristo. Ti paraborNa laeng ti makapabiag iti awanan biag a kararua, ken mangguyogoy itoy nga agturong iti Dios ken iti kinasanto.” – SC, p. 18.
b. Ania ti aramiden ti bileg ti Dios iti uneg ti naconvertir a Cristiano? Filipos 2:13; Hebreo 13:20, 21.
“Ti linteg isu ti mangipeksa iti kapanunotan ti Dios; no awaten ken Cristo, agbalin a kapannunotantayo. Itag-aynatayo iti ngato ti bileg ti kadawyan a tarigagay ken pagduyosan, iti ngatoen dagiti sulisog a mangitunda iti basol.” – DA, p. 308.
“Bayat ti pannakipasettayo iti nadiosan a galad, dagiti natawid ken nasursuro a panagduyos nga agaramid iti biddut ket maikkat iti kababalin, ket agbalintayo a nabiag a bileg para iti imbag. Kankanayon nga agsursuro manipud iti nadiosan a Manursuro, inaldaw a makipaset iti galadNa, makitinnulong iti Dios a mangparmec kadagiti sulisog ni Satanas.” – 7 BC, p. 943.
k. Ania ti rumbeng a kankanayon a kararagtayo? Salmo 139:23, 24.
“Awan ti tao a makaungkaw iti bukodna a bagi. Mabalintayo laeng ti umanamong ken Cristo a mangipatungpal iti trabaho. Iti kasta ti pagsasao ti kararua ket, Apo, alaem ti pusoc, ta saanko a maited. Kukuam daytoy. Pagtalinaedem a nadalus ta saanko a mapagtalinaed a nadalus para Kenca. Isalacannac iti lacsid ti kinasiac, kinakapoyko, saan a maipada ken Cristo a kinataoc. Sukogennac, tabasennac, itag-aynac iti nangato ken nadalus a law-ang, nga ayan ti nabacnang nga agus ti ayatMo tapno agayos iti kararuac.” – COL, p. 159.
Mierkules
Setiembre 30
4. NAESPIRITUAN A DANGADANG
a. Ania ti makin-uneg a gubat a kasapulan nga indaldaw a gubaten? Efeso 6:11.
“Ti dangadang maibusor iti bagi ti kaindaclan a gubat a pakigubatan.” – SC, p. 43.
“Ti cruz agtacder a sapata nga awan ti mapukaw, nga abunaw a tulong ti maipaay para iti tunggal kararua.” – 1SM, p. 96.
b. Anianto ti kaudian nga addang iti pannakaisalacan ti nalinteg? Hebreo 9:28; 1 Corinto 15:51-54.
“Nupay [dagiti matmaturog ken Jesus] mabalin a nadadael ti langada, nagsakit wenno napaalas ditoy mortal a biag, ngem iti napagungar ken naidayag a bagida, ti pakailasinan ti kinataoda ket naan-anay ti pannakapreservarna, ket mabigbigtayo iti rupa a nagraniag iti lawag nga agsilsilnag manipud iti rupa ni Jesus, dagiti rupa dagiti patpatgentayo.” – 3 SP, p. 219.
“Dagiti sibibiag a nalinteg mabaliwanda iti maymaysa a canito, iti apagdaricmat’ (1 Corinto 15:52). Iti timec ti Dios maigloriada; ita naaramidda a di agrupsa ket kadua dagiti nagungar a sasantos agpangatoda a sumabat iti Diosda iti tangatang.” – GC, p. 645.
k. Kaano ti panagpatingga ti dangadang? 2 timoteo 4:7, 8.
“Ti kaasitgan iti [trono ni Cristo iti Baro a Jerusalem] ket dagiti tattao a sigud idi a napasnec iti pakaigapuan ni Satanas, ngem kaslada la aluten a naikkat iti pagpuoran, sinurotda ti Mannubbot a buyogan ti nauneg ken nasneban a debosyon. Ti sumaruno ket dagiti nangan-anay iti Nacristianoan a kababalin iti baet ti kinaulbod ken kinagulib, dagiti nangidayaw iti linteg ni Jehova idi ipacdaar dagiti Cristiano nga awan maayna ken dagiti milyon, iti amin a panawen, napapatayda gapu iti pammatida. Ket iti labes isu dagiti ‘naindaclan nga umariwecwec, nga awan ti tao a makabilang, naggapuda kadagiti isu-amin a pagarian, ken tribu, ken il-ili ken pagsasao, . . . iti sangoaan ti trono, ken iti sangoanan daydi Cordero, a nagcawesda cadagiti pagananay a puraw, ket adda palpalma cadagiti im-imada’ (Apocalipsis 7:9). Nagpatinggan ti dangadangda, nagun-oddan ti balligi. Nakipagratayda iti lumba ket nagun-odda ti gun-guna. Ti palma kadagiti imada ket tanda ti balligi, ti puraw a pagan-anay tanda ti awan tulaw a kinalinteg ni Cristo a kukuada itan.” – Ibid., p. 665.
Hueves
Oktobre 1
5. TI IMA NGA AGTOCTOC
a. Ania nga awis ti indanon ni Jesus iti tunggal kararua ita? Juan 7:37, 38; Apocalipsis 22:17.
“Ti isu met la a nadiosan a panunot nga agtrabtrabaho kadagiti banbanag ti nakaparsuaan ti agsasao iti puso dagiti tattao ken mangparpar-nuay iti saan a maipeksa a panagtarigagay iti banag nga awan kadacuada. Dagati banbanag iti lubong saanna a mapennec ti tarigagayda. Agpacpakaasi ti Espiritu ti Dios kadacuada a sapulenda dagiti banbanag nga isu laeng ti makaited iti cappia ken inana – ti parabor ni Cristo, ti rag-o ti kinasanto. Babaen kadagiti inpluensia a makita ken saan a makita, ti mannubbottayo ket kankanayon nga agtrabtrabaho tapno maguyogoy dagiti panpanunot dagiti tattao manipud iti saan a makapnec a ragragsac ni basol ket maiturong kadagiti awan patinggana a bendisyon a mabalinda a tagikuaen Kencuana. Kadagitoy a kararua, a napaay nga uminum manipud iti naburac a tangke daytoy lubong, ti nadiosan a mensahe ket naiturong, [Apocalaipsis 22:17].
“Sica a sipupuso nga agtarigagay iti banag a naim-imbag ngem iti maited daytoy a lubong, bigbigen daytoy a tarigagay kas timec ti Dios ita kararuam.” – SC, p. 28.
b. Ania ti laglagipentayo iti ima nga agtoctoctoc iti ruangan ti pusotayo? Apocalipsis 3:20; Zacarias 13:6.
“Agummongtayo iti lawlaw ti cruz. Ni Cristo ken Isuna a Nailanza ti tema ti panagut-utobtayo, panagsasao ken pakaragsacan a riknatayo. Pagtalinaeden iti panpanunottayo ti tunggal bendisyon a naawattayo iti Dios, ket inton maamiristayo ti naindaclan nga ayatNa, siaannugottayo nga italec ti amin a banag iti ima a nailanza iti cruz para cadatayo.” – Ibid., pp. 103, 104.
Viernes
Oktobre 2
PERSONAL A PANGREPASO A SALSALUDSOD
1. Kasano nga imparang ti Dios ti ayatNa kenca?
2. Ania ti kaipapanan ti ipapatay ni Cristo para iti tunggal tao?
3. Kasano a ti pannakaisalacan labsanna ti pannakapakawan dagiti napalabas a basbasol?
4. Ania ti kaudian nga addang ti pannakaan-anay ti pannakaisalacan?
5. Ania ti mamagbalin ita nga aldaw a kaimbagan nga aldaw nga isusungbat iti panagtoctoc ni Jesus iti ruangan ta pusom?