---

1. NAGTAUDAN NI PATAY KEN TI UMUNA A NAINDACLAN NGA ULBOD

a. Iti ania a naikadua ti umuna a pannakadamat ti patay iti Biblia? Genesis 2:17. Ania a kinaulbod ti imbaga ti uleg iti panagsar-sarita a napasamac iti daytoy a kayo? Genesis 3:1-4.

“Ti laeng parsua a nangikari kenni Adan iti biag iti panagsukir ket ti naindaclan a manangallilaw. Ket ti pacdaar ti uleg kenni Eva idiay Eden – ‘Saancanto a matay’ (Genesis 3:4) – ti umuna a sermon a naicasaba iti kinaimortalidad ti kararua. Ngem daytoy a pacdaar, agtalinaed laeng iti turay ni Satanas, nga agallangogan kadagiti pulpito dagiti Cristiano ken awaten met ti kaadduan a sangkataoan kas ti insegida a panangawat dagiti immuna a nagannactayo. Ti nadiosan a sentencia, ‘Ti cararua nga agbasol, matayto’ (Ezequiel 18:20), naipaawat nga: Ti cararua a nagbasol, saan a matay, no di ket agbiag nga agnanayon. Saantayo a masdaaw iti karkarna nga essem a nangipaay kadagiti tattao iti lakada a namati kadagiti sasao ni Satanas ket saandan a pinati dagiti sasao ti Dios.” – GC, p. 533.

b. No maipasango iti sulisog a mangan manipud iti daytoy a kayo, ania ti inaramid ti umuna a paris? Genesis 3:6. Ania ti simmangbay kas resulta daytoy a basol? Roma 5:12; 6:23.

“Nalawag iti amin a ti supapac ti basol ket saan a natan-oc a panagwaywayas ken biag nga agnanayon, no di ket pannakaadipen, pannakadadael ken ipapatay.” – Ibid., p. 668.

---

2. TI GALAD NI PATAY

a. Kasano a pinagtipon ti Dios ti bagi ken anges tapno mangted biag iti umuna a tao? Genesis 2:7. Ania ti mapasamac no matay ti cararua? Salmo 146:4.

b. Ania a kontrol ti adda iti tao mainaig iti patay, ken ania a kasasaad ti sumrecan ti tao no matmatayen? Salmo 6:5; 89:48; 115:17; Ecclesiastes 8:8; 9:5.

“Iti pundasyon ti biddut ti kadawyan a di ipapatay ti adda iti doctrina nga adda puot iti ipapatay – doctrina kas ti agnanayon a tormento, maisupadi kadagiti panursuro ti Nasantoan a Surat, iti dicta ti rason ken iti riknatayo iti sangkataoan. Maitutop iti nalatac a patpatien, dagiti nasubbot sadi langit ket ammoda amin a mapaspasamac iti daga kangrunaanna iti biag dagiti gagayyem a nabatida. Ngem kasano a pagtaudan ti ragsac kadagiti natay ti mangammo kadagiti ririboc dagiti sibibiag, tapno maimatangan dagiti basbasol a naaramid dagiti ipatpategda?, ken ti mangkita kadacuada a mangan-andor iti amin a ladingit, uppapay ken sanaang ti biag? Kasano kabuslon ti ragsac ti langit ti mabalin a sagrapen dagiti tattao a mangur-uray kadagiti gagayyemda nga adda iti daga? Kasano a makapagura ti patpatien nga apaman a panawan ti anges ti bagi, ti cararua ti saan a nagbabawi maipatulodda iti apuy idiay impierno! Iti ania a kauneg ti tuoc a nakaiyabotan dagiti tattao a makakita kadagiti gagayyemda a mapan iti tanem a di nakasagana, a sumrec iti nagnanayon a leddaang ken basol! Adu ti maabog nga agbalin nga aguuyong gapu iti daytoy a kapanunotan.” – GC, p. 545.

k. Ania ti ibaga ni Jesus maipapan ken patay? Mateo 9:18, 19, 23, 24; Juan 11:11-14.

“Iparang ni Cristo ti patay kas pannaturog kadagiti mamati nga annacNa. Ti biagda ket nakalemmeng ken Cristo iti Dios, ket agingga iti maudi a trumpeta a maturog dagiti natay Kencuana.” – DA, p. 527

d. Kasano nga impaawat ni apostol Pedro a ti nalinteg a tao saan nga insegida a mapan sadi langit no matay isuna? Aramid 2:29, 34.

---

3. TI PANAGULBOD TI ULEG NAISAO MANEN

a. Kasano a naballaagan dagiti Israelitas maibusor iti custombre dagiti bag-en maipapan iti maipagarup a pannakisao iti natay? Levitico 19:28; Deuteronomio 14:1 .

“Nganngani amin a porma ti kinabaglan ken gamgamud idi ugma ket naibasar iti panamati iti pannakisao iti natay. Dagiti mangisansanay iti aramid ti baglan tontonenda a makisasaoda kadagiti simmina nga espiritu, ken magun-odanda kadacuada ti pannakaammo iti masacbayan a paspasamac. . . .

“Isu met la a panamati iti pannakisao iti natay ti nangporma iti pundasyon ti panganito dagiti bag-en. Dagiti didiosen dagiti bag-en ket patien a dagiti napasanto nga espiritu dagiti simmina a banuar. Gapuna a ti relihion dagiti bag-en ket panagdayaw kadagiti natay. . . .

“Ti panangaramid a santo iti natay ket addaan iti nalatac a lugar iti nganngani amin a Sistema ti kinabag-en kas ti maipagarup a pannakisao iti natay. Dagiti didiosen ket patien nga isaoda ti pagayatanda kadagiti tattao, ken kasta met a no kunsoltaen, mangtedda iti balakad. Iti kastoy a galad dagiti nalatac nga oraculo ti Grecia ken Roma.” – PP, p. 684.

b. Kasano a naiturong ni Ari Saul a mangsapul iti balakad ni Satanas iti panglimlimo ti maipagarup nga espiritu ti natay a propeta? 1 Samuel 28:7-14.

k. Ania ti rumbeng a pagpanpanunotan ti tunggal pudno nga agdaydayaw iti sibibiag a Dios? Isaias 8:19, 20.

“No dagiti tattao siaannugot nga umawat iti kinapudno a silalawag a nailanad iti Nasantoan a Surat maipapan iti galad ti tao ken ti kasasaad ti natay, makitada iti tontontonen ken pannakaiparangarang ti espiritua-lismo ti panagtrabaho ni Satanas a sibibileg ken pagilasinan ken inuulbod a kinadatdatlag, ngem imbes nga isuko ti nawaya a maitunos iti linalasag a puso ken ilacsid dagiti basbasol nga inay-ayatda, ikidem ti umariwecwec dagiti matada iti lawag ket magnada a diretso, iti lacsid dagiti ballaag, bayat nga ilaga ni Satanas dagiti palab-ogna kadacuada, agbalinda a naanupanna. ‘agsipud ta dida inawat ti ayat ti kinapudno, a maipaay coma a pacaisalacananda. Ket gapu itoy ti Dios ipaw-itNa kadacuada ti kinabileg ti allilaw tapno patienda ti tiri’ (2 Tesalonica 2:10, 11).” – GC, p. 559.

---

4. NAPAGBALLIGIAN NI CRISTO NI PATAY

a. Sino ti mangkontrol iti biag ken patay? Salmo 68:20; Apocalipsis 1:18. Nupay iggemNa dagiti tulbec ni patay, ania ti inaramid ni Jesus? Hebreo 2:9; Aramid 2:24.

“Ken Cristo ket biag, orihinal, saan a binulod, awan nagtaudanna. ‘Ti agicut iti Anac, adda biagna’(1 Juan 5:12). Ti kinadios ni Cristo ti talged dagiti mamati iti biag nga agnanayon. ‘Isu a mamati Caniac,’ kinuna ni Jesus, ‘uray no matay, agbiagto pay. Ket siasinoman nga agbiag ken mamati caniac, saanto a matay a pulos. Patiem daytoy?’(Juan 11:25, 26). Ditoy kumitkita ni Jesus iti maikadua a yaayNa. Iti kasta ti nalinteg a matay agungarto a di agrupsa ket ti sibibiag a nalinteg maiyalisto sadi langit a saannan a makita ni patay. . . . Babaen iti saoNa ken dagiti araramidNa impacdaarNa ti Bagina a Namunganay iti panagungar. Isuna a matayton iti cruz nagtacder kadagiti tulbec ni patay, pinarmecna ni tanem ken pasingkedanNa ti kalintegan ken pannakabalinNa a mangted iti biag nga agnanayon.” – DA, p. 530.

b. Ania ti inaramid ni Jesus kenni patay? 2 Timoteo 1:10; Hebreo 2:14, 15.

“Ti saludsod, “No ti tao matay, agbiagto kadi manen?” nasungbata-nen. Babaen iti panangawit iti dusa ni basol, babaen iti pannakaitanem-Na, pinaranyag ni Cristo ti tanem dagiti amin a natay a sipapammati. Ti Dios iti nataoan a porma insangbayNa ti biag ken immortalidad iti lawag babaen iti evangelio. Iti ipapatay, nagun-od ni Cristo ti biag nga agnanayon para kadagiti amin a mamati Kencuana. Iti ipapatay, kinondenarNa ti namunganay iti basol ken panagsukir tapno sagabaenna ti dusa ni basol – agnanayon a patay.” – 6 T, pp. 230, 231.

k. Maisupadi iti dusa ni patay, ania ti sagot ti Dios? Roma 6:23; Juan 3:16.

“Iti mamati, ni Cristo ti panagungar ken ti biag. Iti Mannubbottayo maisubli ti biag a napukaw gapu iti basol; ta adda biag Kencuana a mangpabiag iti siasinoman a pagayatanNa.” – DA, pp. 786, 787.

“Amin a mamati a naglasat iti kadawyan nga ipapatay, maaddaan, babaen iti pannangan ken yiinum iti dara ti Anac ti Dios, biag nga agnanayon, nga isu ti biag ni Jesu-Cristo. Iti ipapatay, inaramid ni Jesus nga imposible para kadagiti mamati Kencuana ti matay nga agnanayon.” – 7 BC, p. 926.

---

5. PATAY NADADAEL

a. Ania ti mapasamac kalpasan ti umuna ken maikadua a panagungar? Apocalipsis 20:4-15.

“Iti panangserra ti sangaribu a tawtawen, ni Cristo. . . . ibilinNa a bumangon dagiti natay a nadangkes tapno awatenda ti dusada. . . . Anian a pannakaiduma kadagiti nabangon iti umuna a panagungar! Dagiti nalinteg nacawwesan iti immortal a kinaagtutubo ken pintas. Dagiti nadangkes awitda ti tanda ti sakit ken ipapatay.” – GC, p. 662.

b. Ania ti pagtungpalan dagiti amin a nadangkes? Mateo 13:40-42. Imbes nga agnanayon a dusa, ania ti naipaay kadacuada? Malakias 4:1-3.

“Sumagmamano kadagiti nadangkes ti madadael iti apagkanito, idinto a ti dadduma agsagaba iti adu nga alaldaw. Amin ket madusa ‘maitutop iti aramidda’ (Salmo 28:4). . . . Ni [Satanas] naaramid nga agsagaba saan laeng nga iti bukodna a panagsukir, no di ket kadagiti amin a basol a ginubuayna nga aramiden ti ili ti Dios. Ti dusana ket adayo a nadagdagsen ngem kadagiti inallilawna. Kalpasan a mapukaw amin a natnag gapu iti panangallilawna, sibibiagto pay laeng nga agsagsagaba. Iti mangdalus nga apoy ti mangdadael iti ramot, ken sanga – ni Satanas ti ramut, dagiti pasurotna dagiti sangsanga. Nabisita ti naan-anay a pannusa ti linteg; naipaay ti dawat ti justicia; ket ti langit ken daga, ipacdaarda ti kinalinteg ni Jehova.” – Ibid., p. 673.

k. Ania ti mapasamac iti patay a mismo? 1 Corinto 15:26; Apocalipsis 21:4.

---

PERSONAL A PANGREPASO A SALSALUDSOD

1. Kasano a naiyammo ni patay ditoy lubong?

2. Ania a kasasaad ti sumrekan ti tao kalpasan ti ipapatay?

3. Kasano a ti umuna a panagulbod ti uleg malaglagip iti unos ti pakasaritaan?

4. Ania ti inaramid ni Cristo iti lunod ni patay?

5. Kasano ti pannakaammotayo a dagiti nadangkes saan a mabati a mapooran iti agnanayon?