Domingo
Deciembre 13
1. ISESERREC ITI PAGARIAN TI GLORIA
a. Sadino ti yan dagiti namatalec kalpasan ti maikadua a yaay ni Cristo? 1 Tesalonica 4:15-17.
“Sumrectayo amin nga agkukuyog iti ulep ket pito nga aldaw nga agpangatotayo nga agturong iti baybay a sarming, idi isangbay ni Jesus dagiti korona, bukodNa a makannawan nga ima ti mangisaad kadagitoy iti ulotayo. IkkanNatayo kadagiti balitoc nga arpa ken palma ti ballaigi. . . . Amin ket mapnec a naan-anay iti koronada. Ket nacawwesanda amin iti nadaeg a puraw a pagan-anay manipud abaga agingga iti saka.” – EW, pp. 16, 17.
b. Ania ti nangted iti karbengan kadagiti sasantos a sumrec iti Baro a Jerusalem? Salmo 87:3-6; Galacia 4:26; Apocalipsis 22:14; Isaias 26:1, 2.
“Adda dagiti angeles iti aglawlawtayo bayat ti panagmartsatayo iti baybay a sarming agingga iti ruangan ti ciudad, ingato ni Jesus ti nabileg, nadaeg a takkiagNa, iniggamanna ti naperlas a ruangan, ket nagpallayog kadagiti agsilsilap a bisagrada, ket kinunaNa cadatayo, ‘Inugasanyo dagiti cawwesyo iti darac, nagtacder a sititibker para iti kinapudnoc, sumreckayo.’ Nagmartsatayo amin a simrec ket narikna nga addaantayo iti naan-anay a kalintegan iti ciudad.” – Ibid., p. 17.
Lunes
Deciembre 14
2. TI MILENIUM
a. Kasano kabayag ti busbosen dagiti sasantos idiay langit? Apocalipsis 20:4. Ania ti aramidentayo bayat daytoy a tiempo? 1 Corinto 6:2; Mateo 19:28.
“Bayat ti sangaribo a tawtawen iti nagbaetan ti umuna ken maikadua a panagungar maaramid ti pannacaocom dagiti nadangkes. . . . Maikaysa ken Cristo [dagiti nalinteg] usigenda dagiti nadangkes, icompara dagiti ar-aramidda iti pagallagadan a libro, ti Biblia, ket ikeddeng ti tunggal caso maitutop iti ar-aramidda iti bagida. Marukod ngarud ti andoran dagiti nadangkes maitutop iti ar-aramidda; ket naisurat maibusor iti nagnaganda iti libro ni patay.” – GC, pp. 660, 661.
b. Sadino ti ayan ni Satanas bayat ti milenium? Apocalipsis 20:1-3. Iti ania a kasasaad ti daga bayat daytoy a tiempo? Jeremias 4:23-27.
“Ditoy [rabaw ti daga] isu ti pagtaengan ni Satanas kaduana dagiti dakes nga angelesna iti sangaribu a tawtawen. Agyan laeng ditoy daga, awan ti dalanna a mapan kadagiti sabali a lubong a mangsulisog ken mangsairo kadagiti saan a natnag. Iti daytoy a buya a naibalud isuna; awanen ti nabati a pangipakatanna iti bilegna. Naan-anay a naisina manipud iti aramidna a mangallilaw ken mangdadael nga iti adu a siglo isu laeng ti pakaragsakanna. . . .
“Iti innem a ribu a tawtawen, ti trabaho ni Satanas nga agrebelde ti ‘namagpigerger iti daga.’ Inaramidna ti daga a langalang ken nadadael dagiti ciudad.’ Ket ‘saanna a linuktan ti balay dagiti balud.’ Iti innem a ribu a tawtawen ti pakaibaludanna ti immawat iti ili ti Dios tapno baludenna coma ida iti agnanayon, ngem dinadael ni Cristo dagiti kawar ket winayawayaanNa dagiti balud.
“Uray dagiti nadangkes naisaadda iti labes ti bileg ni Satanas, ket isuna laeng ken dagiti dakes nga angelesna ti nabati a mangamiris iti epektoti lunod nga insangbay ni basol. . . .
“Iti sangaribu a tawtawen nga agalla-alla ni Satanas iti langalang a daga tapno imatanganna ti resulta ti panagrebeldena iti linteg ti Dios. Bayat daytoy a tiempo ti panagsagabana nakaro. Sipud di pannakatnagna ti biagna nga awan sardayna nga agtrabaho ket napukaw; ket ita naawanan iti bileg ket nabati a mangut-utob iti paset nga inakemna sipud di damo a panagsukirna maibusor iti gobierno ti langit, ket kumita nga agpigpigerger ken agbutbuteng iti nakaam-amac a masacbayan inton sagabaenna ti amin a dakes nga inaramidna ken madusa para kadagiti basbasol a ginubuayna a maaramid.” – Ibid., pp. 659, 660.
Martes
Deciembre 15
3. MAIYALIS DAGITI HEDKUARTER
a. Ania ti maaramid iti panagpatingga ti panangocom sadi langit? Apocalipsis 21:2, 3.
“Kadua ni Jesus a pangulotayo bumabatayo iti daga manipud ciudad, iti toctoc ti dackel ken nabileg a bantay, saanna a maawit ni Jesus ket nagudua ken napaadda ti nagdackel a tanap. Timmangadkami ket nakitami ti naindaclan a ciudad nga addaan iti sangapulo ket dua a pundasyon, ken sangapulo ket dua a ruangan, tallo ti kada sikigan ken adda angel ti kada ruangan. Impukawtayo amin, ‘Ti ciudad, ti naindaclan a ciudad, bumabbaban, bumabbaban manipud iti Dios rimuar sadi langit,’ ket bimmaba ken nagsimpa iti lugar a nagtacderanmi.” – EW, pp. 17, 18.
b. Sadino ti pakasarakan ti Baro a Jerusalem? Zacarias 14:4.
“Kas ti lugar a nagpangatoanNa, pinili ni Jesus ti disso a masansan a pasantoen ti presenciaNa bayat ti pannakipagnaedNa kadagiti tattao. Saan a Bantay Sion, ti ciudad ni David, saan a Bantay Moria, ti ayan ti templo, isu a pakapadayawanna. Sadiay naumsi ken nalais ni Cristo. Sadiay a dagiti pallong ti kaasi, agsubsubli iti napigpigsa nga atab ni ayat, a nangparukma kadagiti puso a kas katangken ti bato. Manipud sadiay, no mabannog ken madagdagsenan, mapan ni Jesus iti Bantay Olivo tapno makainana. Ti nasantoan a Shekina, iti yaadayona manipud umuna a templo, nagtacder iti akindaya a bantay, a kasla agkedked a mangilacsid iti napili a ciudad; nagtacder ngarud ni Cristo idiay Olivo a sumsumga ti pusona a mangbuybuya iti Jerusalem. Dagiti kaykayo ken tantanap ti bantay ket naiconsagrarda babaen ti karkararag ken luluaNa. Dagiti sang-atna iyallangoganna ti pukkaw dagiti umariwecwec a nangipacdaar Kencuana nga ari. Iti bacrasna a sumalugan nasarakanna ti pagtaengana a kadua ni Lazarus ti Betani. Iti sakaanan ti Hardin ti Getsemani ti nagkararagan ken nagpasanaanganNa a maymaysa. Manipud iti daytoy a bantay nagpangato Isuna sadi langit. Kadagiti toctocna ti pangidissoanNa iti sakaNa inton umay manen. Saan a kas tao ni ladingit, no di ket nagloriaan ken naballigi nga ari, agtacder idiay Olivo, bayat ti panaglaoc ti Haleluia dagiti Hebreo ken ti Hosana dagiti Gentil, ken dagiti boses dagiti nasubbot kas maysa a maingel a buyot a mangidirdir-i, Coronaan Isuna a Dios ti amin!” – DA, pp. 829, 830.
Mierkules
Deciembre 16
4. TI BARO A DAGA
a. Inton awanen dagiti nadangkes, ania ti mapasamac iti daga? Apocalipsis 21:1; Salmo 102: 25, 26.
b. Ania ti aramiden dagiti nasubbot iti baro a daga? Isaias 32:18; 65:21, 22.
“Ket rugiantayon a kitaen dagiti nadadaeg a banbanag iti ruar ti ciudad. Sadiay nakitac dagiti kadaegan a balbalay, nga addaan langa a pirac, nga addaan uppat nga adigi a naisaad nga addaan perlas a kadaegan nga imutectecan. Pagnaedan dagitoy dagiti sasantos. Tunggal maysa kadagitoy addaan iti nabalitocan nga estante. Nakitac nga adu kadagiti sasantos ti sumrec kadagiti balbalay, ikkatenda dagiti agilgilap a koronada ket ikabilda kadagiti estante, sada rumuar kadagiti kataltalonan iti asideg dagiti balbalay, ta adda aramidenda iti daga; saan a kas ti aramiden iti daga ditoy, saan, saan. Maysa a nagloriaan a lawag ti nagsilnag iti amin kadagiti uloda, ket agtultuloyda nga agpukpukkaw ken agidatdaton iti pammadayaw iti Dios.” – Ew, p. 18.
“Iti daga a naaramid a baro, dagiti nasubbot sumrecda kadagiti trabaho ken ragragsac a mangisangbay iti ragsac kada Adan ken Eva idi punganay. Ti biag ti Eden ti pagbiagan, biag iti hardin ken kataltalonan.” – PK, pp.730, 731.
k. Kasano nga iladawan ti Biblia ti aglawlaw ti baro a daga? Isaias 11:6-9; 65:25.
“Nakitac ti sabali a talon a napno iti amin a kita ti sabong, ket bayat ti panangpurosko kadacuada, inyikkisco, ‘Pulos a saanda malaylay.’ Sumaruno nakitac ti talon ti nagdadackel a ruot, kadaegan nga imatangan; nabiag a berde ken iyanninawna ti pirac ken balitoc, bayat ti panagkawayna a sitatangig iti gloria ni Ari Jesus. Sa simreckami iti talon a napno iti amin a kita ti ayup – leon, cordero, leopardo ken lobo, nagkakaduada a situtunos unay. Nagnakami iti nagbabaetanda, ket simmurotda a sitatalna. Sa simreckami iti kabakiran, saan a kas iti nasipnget a kabakiran ditoy, saan, saan; no di ketdi nalawag, ket intero a nadayag; dagiti sangsanga dagiti kaykayo agpallapallayogda ket ipukkawtayo, ‘sitatalgedtayo nga agnaed iti let-ang ken maturog iti kabakiran.” – EW, p. 18.
“Dagiti panpanunot dagiti ubbing rumbeng a mapnoda kadagiti estoria ti biag ti Apo, ket mapabileg dagiti imahinasyonda a mangiladawan iti dayag ti lubong a sumangbay.” – CG, p. 488.
Hueves
Deciembre 17
5. PANANGTAWID ITI DAGA
a. Ania ti naipadto kadagiti tattao, nupay nailacsidda iti agdama a lubong, tawidenda ti sumaruno? Salmo 37:8-11.
“Dagiti naemma ‘tawidenda ti daga’ (Mateo 5:5). Gapu iti tarigagay a maitag-ay ti bagi a simrec ti basol iti lubong, ket napukaw dagiti immuna a dadackeltayo ti panangiturayda iti napintas a daga, isu a pagarianda. Babaen iti panangilacsid iti bagi a sinubbot ni Cristo dayta a napukaw. Ket kinunaNa a makapagballigitayo kas ti inaramidNa. Apocalipsis 3:21. Babaen iti panagpakumbaba ken panangisuko iti bagi nga agbalintayo a makipagtawid Kencuana . . . .
“Ti daga a naikari iti naemma saan a kas iti daytoy, nasipngetan iti anniniwan ni patay ken lunod. . . .
“Awanto ti pannakauppapay, awan ti ladingit, awan ti basol, awanto ti makapagkuna, agsakitnac; awan ti ponpon, awan ti lumlumdaang, awan ti matay, awan ti agsisina, awan ti masactan; no di ni Jesus ti adda sadiay, adda cappia sadiay.” – MB, p. 17.
b. Anianto ti kababalin dagiti agnaed iti baro a daga? 2 Pedro 3:13.
“Ti saka dagiti nadangkes pulos a dida rugitan ti napabaro a daga. Bumaba ti apoy manipud ti Dios aggapu iti langit a mangibus kadacuada – manguram kadacuada manipud ramut ingga iti sanga. Ni Satanas ti ramut ket dagiti annacna dagiti sangsanga.” – EW, p. 52.
“Ti isu met la nga apoy a naggapu iti Dios a nangibus kadagiti nadangkes ti mangdalus iti sibubukel a daga. Dagiti dadael, rusanger a banbantay malunagda iti nakaro a pudot, kasta met ti law-angna, ket matalipopos amin a pungdol. Ket mailukatton cadatayo ti tawidentayo, nadaeg ken napintas, ket tawidentayo ti sibubukel a daga a naaramid a baro.” – Ibid., p. 54.
Viernes
Deciembre 18
PERSONAL A PANGREPASO A SALSALUDSOD
1. Iti ania a kasasaad a maibilang ti tao a makipagili iti Baro a Jerusalem?
2. Ania ti mapasamac bayat ti Milenium sadi langit ken iti daga?
3. Apay a pinili ti Dios ti daga para iti baro a pagyanan ti hedkuarterNa?
4. Iladawan ti daga a naaramid a baro?
5. Ania a kita dagiti tattao ti mangtawid iti baro a daga?