Domingo
Noviembre 15
1. TUNGGAL MAYSA KASAPULAN A MAKAAMMO
a. Ania ti napateg a pakumit ti inted ni Jesus kadagiti disipulosNa? Aramid 1:8.
“Sacbay ti panagpangatoNa sadi langit, inted ni Cristo ti pakumitNa kadagiti disipulosNa. ImbagaNa kadacuada nga isuda ti mangipatungpal iti pakumit nga impaimaNa iti lubong dagiti gameng ti biag nga agnanayon. . .
“Saanda nga urayen dagiti tattao nga umasideg kadacuada; isuda ti mapan kadagiti tattao nga awitda ti mensahe.”– AA, pp. 27, 28.
b. Ania ti kasapulan a mapasamac sacbay ti panagpatingga ti lubong? Mateo 24:14.
“Pribilihio ti tunggal Cristiano ti saan laeng a kumita no di ket padarasen ti yaay ni Apo Jesu-Cristo (2 Pedro 3:12). No amin coma a mangibunbunannag iti naganNa ket agbungbunga iti dayagNa, nagbiit coman a namulaan ti bukel ti evangelio ti sibubukel a lubong. Apagbiit ti pannakaluom ti maudi ken naindaclan a panagapit, ket umayton ni Cristo a mangummong kadagiti napateg a bukel.”– COL, p. 69.
Lunes
Noviembre 16
2. DAGITI PADTO TI PANNAKADADAEL
a. Apay a naitantan ti yaay ni Jesus, ken ania ti nakadulin para ditoy daga, kas ammotayo? 2 Pedro 3:7-10.
b. Iladawan dagiti padto ti pannakadadael iti nadrama nga alimpatoc ti pakasaritaan daytoy daga? Isaias 13:6-9; 34:1-5; Apocalipsis 6:14-17; 11:18.
“Palubosan ti Dios dagiti nadangkes nga agrang-ay ken mangipalgac iti busorda Kencuana, ta inton mapunnoda ti rukod ti kinadakesda makitanto ti amin ti justicia ken asiNa iti sapasap a pannakadadaelda. Ti aldaw ti panagibalesNa mapadaras, inton amin nga agsalungasing iti lintegNa ken mangidadanes iti iliNa awatenda ti nalinteg a supapac ti ar-aramidda; inton madusa ti tunggal tignay ti kinaulpit wenno kinainhusticia kadagiti namatalec a tattao ti Dios a kasla naaramid kenni Cristo a mismo.” – GC, p. 48.
k. Kasano a maiyaray daytoy iti Layus idi alaldaw ni Noe? Genesis 6:13, 17; 7:23; Mateo 24:37-41.
“Ipacdaar ti Biblia a kadagiti maudi nga alaldaw maguguranto dagiti tattao kadagiti nainlubongan a panggep, iti ragragsac ken panagsapul iti kuwarta. Mabulsekanda kadagiti agnanayon a kinapudno. . .
“Agagawa dagiti tattao a mangkamat kadagiti pakaganansian ken iti naimbukodan a pakalugodan a kasla awan ti Dios, awan ti langit ken awan ti kalpasan ditoy a biag. Idi aldaw ni Noe, ti ballaag naipatulod a mangkigtot kadagiti tattao iti kinadangkesda ket awisen ida nga agbabawi. Ngarud ti mensahe ti mabiiten a yaay ni Cristo nairanta a mangiriing kadacuada a mangpanunot kadagiti agnanayon a kinapudno, tapno ipangagda ti awis ti Dios .” – COL, p. 228.
“Sacbay ti layus imbaon ti Dios ni Noe a nangballaag iti lubong, tapno maiturong dagiti tattao nga agbabawi, iti kasta malibasanda ti pannakadadael. Bayat ti yaasideg ti maikadua a panagparang ni Cristo, ibaon ti Apo dagiti adipenNa a mangballaag iti lubong tapno makasaganada para iti dayta naindaclan a pasamac. Umariwecwec ti agbibiag a mangsalsalungasing iti linteg ti Dios, ket ita iti asiNa aw-awaganNa ida a mangtungpal kadagiti sagrado a linlinteg. Amin a mangilacsid kadagiti basbasolda babaen iti panagbabawi ken pammati ken Cristo maipaay ti pammakawan.” – PP, p. 102.
Martes
Noviembre 17
3. TI PITO A MAUDI A SAPLIT
a. Kasano nga iladawan ti Apocalipsis ti aktual a pannakaipatungpal dagiti ocom ti Dios iti rabaw ti daga? Apocalipsis 15:7; 16:1-21.
“Nakitac a nakaam-amac ken nakabutbuteng ti unget ti [Dios], a no mabalinNa nga iyunnat ti imaNa, wenno ingato daytoy iti unget, dagiti agnaed ti lubong makapadas iti saanda pay a napadasan idi, wenno agsagabada iti saan a maagasan a sakit ken makapagura a saplit a sumangbay kadacuada, ket saanda a maagasan no di ket madadaelda babaen kadacuada. . . . Ket naamirisko, a pulos a saan pay idi, ti kinapateg ti naannad a panangsukisok iti Sao ti Dios, tapno maammoan no kasano a malibasan dagiti saplit nga impacdaar ti Sao a sumangbay kadagiti saan a nadiosan.” – EW, pp. 64, 65.
“Ti bukodtayo nga aramid ti mangikeddeng no awatentayo ti sello ti sibibiag a Dios wenno matay babaen iti mangdadael nga igam. Addan ti sumagmamano a tedted ti pungtot ti Dios a natinnag iti daga; ngem inton maiparocpoc ti maudi a pito a saplit nga awanan aniaman a lalaocna iti copa ti pungtotna, ket agnanayonto a naladaw ti agbabawi ken mangbiroc iti pagkamangan. Awan ti mangabbong a dara a mangugas kadagiti mantsa ti basol.” – 5 T p. 212.
b. Iladawan ti buya inton malpas ti pannakadadael dagiti dadduma a sibibiag. Apocalipsis 19:17-19.
“Ti imatangko ket naiturong manen iti daga. . . . Kalpasan ti pannakaisalacan dagiti sansantos babaen iti timec ti Dios, dagiti umariwecwec a nadangkes imbaw-ingda ti gurada iti maysa ken maysa. Ti daga kasla nalayus iti dara ket agkaraiwara dagiti bangkay.
“Ti daga kasla langalang. Dagiti ciudad ken purpurok, narbada babaen iti gin-gined, nagabsogabsuonda. Dagiti banbantay naikkatda kadagiti lugarda, nangibatida iti nalalawa a kueba. Rusanger a batbato ti impusuak dagiti baybay wenno inruar ti daga a mismo ti agkaraiwara iti rabaw. Dadackel a kaykayo ti naparutparot a naiwara iti ngatoen ti daga.” – EW, pp 289, 290.
k. Iti panagleppas ti pannakadadael ti daga, ania ti maudi a pasamac? Malakias 4:1-3; 2 Pedro 3:10.
Mierkules
Noviembre 18
4. TI NAGKATLO A MENSAHE
a. Kasano a ti pannakaocom ken pannakatnag ti naespirituan a Babilonia ket inladawan dagiti umuna ken maikadua nga angel ti Apocalipsis 14? Apocalipisis 14:6-8.
“Iti padto, daytoy ballaag ti ocom a kakuyog dagiti mensahena, ket sarunoen ti yaay ti Anac ti tao kadagiti ulep ti langit. Ti pannakaipacdaar ti pannacaocom ket pannakaiwaragawag nga asidegen ti maikadua a yaay ni Cristo. Daytoy a pacdaar maawagan ti agnanayon nga evangelio. Gapuna a ti pannakaicasaba ti maikadua a yaay ni Cristo, ti pannakaiwa-ragawag ti kinaasidegna, ket naipakita a nasisita a paset ti mensahe ti evangelio.” – COL, pp. 227, 228.
b. Kasano nga iparang ti maikatlo nga angel ti maudi a ballaag sacbay ti maikapito a maudi a saplit? Apocalipsis 14:9-12.
“Ti kaamacan a pamutbuteng a naiturong kadagiti mortal isu ti naipalaon iti mensahe ti maikatlo nga angel. Ta nakana a basol ti mangpababa iti pungtot ti Dios nga awan laocna nga asi. Saan coma a mabati dagiti tattao iti kasipngetan mainaig iti daytoy napateg a banag; ballaag maibusor iti basol isu coma ti maited iti lubong sacbay ti ibibisita dagiti ocom ti Dios, tapno maammoan ti amin no apay a madusada ket maaddaan iti gundaway a manglibas kadacuada.” – GC, pp. 449, 450.
k. Sino ti ibagi dagitoy nga “angeles” (mensahero) a “mangicasaba” iti agananayon nga evangelio kadagiti tattao iti daga? Marcos 16:15.
“Dagiti tallo nga angeles ti Apocalipsis 14 ibagi dagiti tattao nga umawat iti lawag dagiti mensahe ti Dios ket kas ahenteNa mapanda irakurac ti ballaag iti amin a paset ti daga. Ipacdaar ni Cristo kadagiti pasurotNa: ‘Dacayo ti silaw ti lubong’ (Mateo 5:14). Iti tunggal kararua nga umawat ken Jesus ti cruz ti Calvario agsao: “Imatanganyo ti pateg ti kararua: “Mapancayo iti amin a lubong ket icasabayo ti evangelio iti amin a parsua” (Marcos 16:15). Awan ti mapalubosan a manglapped iti daytoy a trabaho. Napateg unay daytoy a trabaho para iti daytoy a tiempo; adayo ti madanonna kas ti kinaagnanayon. Ti ayat nga impaduyacyac ni Jesus para kadagiti kararua dagiti tattao iti sacrificio nga inaramidNa para iti pannakasubbotda isu ti mangtignay iti amin a pasurotNa.” – 5 T, pp. 455, 456.
Hueves
Noviembre 19
5. TI KAUDIAN NGA AWIS
a. Kasacbayan unay dagiti saplit, ania ti naisangsangayan nga awis ti maulit kadagiti namatalec ti Dios a saan pay a naikaysa iti matda nga iglesia? Apocalipsis 18:1-5.
“Kalacsidan ti naespirituan a kinasipnget ken di pannakaitunos iti Dios nga adda kadagiti iglesia nga isu ti mangbukel iti Babilonia, ti naindaclan a bagi dagiti pudno a pasurot ni Cristo ket masarakan pay laeng iti nagbabaetanda. . . .
“Itudo ti Apocalipsis 18 ti tiempo nga, kas bunga ti panangumsi iti nagkatlo a ballaag ti Apocalipsis 14:6-12, naan-anayen ti pannakadanon ti iglesia ti kasasaad nga impadto ti maikadua nga angel, ket ti ili ti Dios nga adda pay laeng iti Babilonia maayaban a sumina kencuana. Daytoy a mensahe ti maudi a maipaay iti lubong; ket isu ti mangipatungpal iti trabahona. No dagiti ‘di mamati iti pudno, pagraywanda ti kinakillo’ (2 Tesalonica 2:12), mabatinto nga umawat iti napigsa nga allilaw tapno patienna ti ulbod, iti kasta ti lawag ti kinapudno agranyag kadagiti amin nga addaan iti puso a madadaan nga umawat iti daytoy, ket amin nga annac ti Dios nga adda pay iti Babilonia ipangagda ti awis.” – GC, p. 390.
b. Tapno ti daga “malawagan iti dayagNa,” ania a kababalin ti kasapulan nga iparang ti angel (mensahero)? Isaias 52:7, 8; Mateo 5:16; Colosas 1:27.
k. Ania a plano ti tignay ti iparang ti apostol kadatayo iti buya dagitoy a kinapudno? 1 Tesalonica 5:4-6.
Viernes
Noviembre 20
PERSONAL A PANGREPASO A SALSALUDSOD
1. Ania ti naganat a pagrebbengan ti impaima ti Dios kadatayo?
2. Kasano a ti kasasaad ken destinasyon ti daga ita maiyaray kadagidi tiempo ni Noe?
3. Iladawan no kasano nga isangbay ti Dios daytoy agdama a daga iti kanibusanan?
4. Ania a ballaag ti maipaay sacbay ti naan-anay a pannakadadael ti daga?
5. Kasano a masiguradotayo nga addatayo iti sibay ti Dios kadagiti tiempo ti masacbayan?