Domingo
Noviembre 1
1. LAGLAGIPEN?
a. Ania nga ekspresyon iti Exodo 20:8 ti mangipakita a ti Aldaw a Panaginana ket nasalsalimetmetanen sacbay nga insao ken insurat ti Dios ti Sangapulo a Bilin idiay Sinai?
“Ti Aldaw a Panaginana ket saan a naiyammo kas maysa a baro nga institusyon ngem naipasdec idi panagparsua. Laglagipen daytoy ken salimetmetan kas pakalaglagipan iti trabaho ti Namarsua.” – PP, p. 307.
b. Ania ti inaramid ti Dios iti maikapito nga aldaw ti panagparsua? Genesis 2:1, 2. Ania ti naisangsangayan iti daytoy nga aldaw? Genesis 2:3.
“Kas ti Aldaw a Panaginana, ti lawas ket napataud idi panagparsua, ken naipreserbar ken naisangbay kadatayo babaen iti pakasaritaan ti Biblia. Ti Dios a mismo ti nangrukod ti umuna a lawas kas pagtuladan kadagiti sumarsaruno a lawas agingga ti panagserra ti tiempo. Kas tunggal sabali, nabukel daytoy iti pito a literal nga alaldaw. Innem nga aldaw ti naipaay iti trabaho a panagparsua; iti maikapito nga aldaw naginana ti Dios, ket binendisyonanna daytoy nga aldaw ken inlatangNa kas maysa nga aldaw ti panaginana para iti tao.” – Ibid., p. 111.
“Agsipud ta naginana Isuna iti Aldaw a Panaginana, ‘Binendisyonan ti Dios ti maikapito nga aldaw ket sinantificarNa’ (Genesis 2:3), - inlasinNa para iti nasantoan nga usar. IntedNa daytoy ken Adan kas aldaw a panaginana. Pakalaglagipan iti trabaho ti panagparsua, ket ngarud tanda ti bileg ti Dios ken ti ayatNa.” – DA, p. 281.
Lunes
Noviembre 2
2. MAYSA A PAKALAGLAGIPAN TI PANAGPARSUA
a. Ania ti ipalagip kadatayo ti Aldaw a Panaginana (Sabbat)? Exodo 20:11; Salmo 111:4.
“Maitudo ti Dios kas Nangaramid kadagiti langit ken daga, [ti Aldaw a Panaginana] ilasinna ti pudno a Dios kadagiti amin a palso a didiosen. Amin a mangsalimetmet iti maikapito nga aldaw ipaawatna babaen iti daytoy nga aramid nga agdaydayawda ken Jehova. Ngarud ti Aldaw a Panaginana ti tanda ti kinapudno ti tao iti Dios agingga nga adda ti aniaman iti daga a pagservian Isuna.” – PP, p. 307.
“Panggep ti Dios a ti Aldaw a Panaginana ti mangiturong kadagiti panpanunot dagiti tattao a mangutob kadagiti pinarsuaNa. Agsao ti nakaparsuaan kadagiti panunot ken riknada, ipacpacdaarda nga adda ti sibibiag a Dios, ti Namarsua, ti Kangatoan nga Agturay iti amin. . . . Ti imnas a nangkawwes iti daga ket tanda ti ayat ti Dios. Maimutectekantayo kadagiti awan patinggana a turturod, kadagiti dadackel a kaykayo, kadagiti agukrad a busel ken dagiti narasi a sabong. Aminda isaoda kadatayo ti maipapan iti Dios. Ti Aldaw a Panagianana, agnanayon nga itudona ti Dios a nangaramid kadacuada amin, ibilinna kadagiti tattao ti naindaclan a libro ti nakaparsuaan ket masurotan kadacuada ti kinasirib, ti bileg ken ayat ti Namarsua.” – Ibid., p. 48.
b. No Inaramid ti Dios ti amin a banbanag, ania a saad ti pakailugarantayo? Salmo 100:3; Efeso 2:10
k. Sino ti Namarsua nga agtagikua iti Aldaw a Panaginana? Juan 1:3; Marcos 2:27, 28.
“Agsipud ta ti Aldaw a Panaginana naaramid para iti tao, isu ti aldaw ti Apo. Kukua ni Cristo. Ta “isuamin napaadda gapu Kencuana; ta no Isu awan, awan ti napaadda kadagiti adda’ (Juan 1:3). Yantangay ta inaramidNa amin a banbanag, inaramidNa ti Aldaw a Panaginana. Babaen Kencuana naisina daytoy kas pakalaglagipan ti panagparsua. Itudona Isuna kas Namarsua ken Mangpasanto. Ipacdaarna nga Isuna ti namarsua iti amin a banbanag iti langit ken daga, babaen Kencuana amin a banbanag agkaykaysada, Isu ti ulo ti iglesia ken babaen iti bilegNa maitunostayo iti Dios.” – DA, p. 288.
“Ti maikapat a bilin laeng ti maymaysa kadagiti sangapulo ti pakasarakan iti nagan ken titulo ti nangted iti linteg. Isu laeng ti mangipakita iti addaan iti turay a nangted iti linteg. Ngarud adda kencuana ti selyo ti Dios, nailanad iti lintegNa kas pammanecnec ti kinapudno ken kinabilegNa.” – PP, p. 307.
Martes
Noviembre 3
3. MAYSA A TANDA TI PANNAKAPASANTO
a. Ania ti nainayon a panggep ti ipaay ti Aldaw a Panaginana kalpasan a simrec ti basol iti lubong? Ezequiel 20:12.
“Ti Aldaw a Panaginana ket maysa a tanda ti bileg ni Cristo a mangpasanto kadatayo. Ket maipaay iti amin a pasantoen ni Cristo. Kas tanda ti mangpasanto a bilegNa, naipaay ti Aldaw a Panaginana iti amin, a babaen ken Cristo agbalin a paset ti Israel ti Dios.” – DA, p. 288.
b. Iti ania a ti Aldaw a Panaginana maysa a naisangsangayan a pammalagip kadagiti annac ti Israel? Deuteronomio 5:15.
k. Kasano a dagiti tema a “gura” maibusor iti basol ken pannaka-wayawaya manipud itoy naiyanninaw iti kaipapanan ti Aldaw a Panaginana? Genesis 3:15; Exodo 31:13.
“Trabaho ti pannakaconvertir ken pannakapasanto ti mangicappia kadagiti tattao iti Dios babaen iti panangikaysa kadacuada kadagiti prinsipio ti lintegNa. . . . ‘Ti nakem a linalasag maibusor iti Dios; ta saan a paiturayan iti linteg ti Dios, ket dina met cabaelan a pulos’ (Roma 8:7). Ngem ‘Kasta la unay ti panagayat ti Dios iti lubong, ta intedNa ti AnacNa a bugbugtong,’ tapno ti tao maicappia iti Dios. Babaen iti kaikarian ni Cristo maisubli ti tao a maitunos iti Namarsuana. Ti pusona kasapulan a mapabaro babaen iti nadiosan a parabor; kasapulan a maaddaan iti baro a biag. Daytoy a pannakabalbaliw ket baro a pannakaiyanac, no awan daytoy kuna ni Jesus, ‘saanna a makita ti pagarian ti Dios.’” – GC, p. 467.
“Naipaay ti Aldaw a Panaginana iti lubong kas tanda ti Dios a Namarsua kasta met a tandaNa a Mangpasanto. Ti bileg a nangparsua iti amin a banbanag isu met la ti bileg a mangiparsua manen iti kararua kas kaaspingNa. Kadagiti mangsalimetmet iti Aldaw a Panaginana kas nasatoan nga aldaw isu ti tanda ti pannakapasanto. Ti pudno a pannakapasanto ket pannakitunos iti Dios, pannakikaysa kencuana iti kababalin. Maawat babaen iti panagtulnog kadagiti prinsipio nga isu ti nakailanadan ti kababalinNa. Ti Aldaw a Panaginana ti tanda ti panagtulnog. Isuna a sipupuso a mangtungpal iti maikapat a bilin, tungpalenna met ti sibubukel a linteg. Mapasanto isuna babaen iti panagtulnog.” – 6T, p. 350.
“Amin a mangipateg iti Apo kas pasetda itoy a biag agpaiturayanda Kencuana ken awatenda ti tanda, ti marka ti Dios a mangipakita kadacuada a naisangsangayan a kukuaNa. Ti kinalinteg ni Cristo ti umun-una kadacuada ket ti dayag ti Dios ti magun-gunada. Salacniban ti Apo tu tunggal tao a mangawit iti tandaNa.” – 7 BC, p 969.
Mierkules
Noviembre 4
4. KAPADASAN TI PUDNO A PANANGSALIMETMET ITI SABBAT
a. Ania ti iraman ti pudno a panangsalimetmet iti Sabbat kadagitoy kaudian nga al-aldaw ti pakasaritaan ti daga? Mateo 11:28-30; Efeso 4:22-24.
“Kasapulan ti tunggal maysa ti maaddaan iti personal a kapadasan iti pananggun-od iti pannakaammo iti pagayatan ti Dios. Indibidual a denggen Isuna nga agsasao iti puso. No tunggal sabali a timec mapaulimec ket iti kinaulimec aguray Kencuana, ti kinaulimec ti kararua ti mamagbalin a nalawlawag ti timec ti Dios. IbilinNa kadatayo, ‘Agtalnacayo ket ammoenyo a Siac ti Dios’ (Salmo 46:10). Ditoy laeng a masarakan ti pudno a panaginana. . . Iti baet ti aggan-ganat a taripnong ken pinget ti aktibidadaes ti biag, ti kararua a napabang-ar mapalicmutan iti law-ang ti lawag ken kappia.” – DA, p. 363.
b. Ania ti resulta ti proceso a pannakapabaro? 2 Corinto 5:17
k. Tapno sipupudno a masalimetmetan a nasantoan ti Aldaw a Panaginana, iti ania ti rumbeng a naespirituan a kasasaadtayo? Levitico 20:26; Efeso 1:3, 4.
d. Ania ti sipapasnec a sapulentayo para iti inaldaw? Salmo 51:10.
“Ti kaunaan a panangidanon iti puso iti Dios ket ammoNa. Kaanoman a maidaton ti kararag, nupay agsarsarimadeng, kaanoman nga agarubos ti lua, nupay nalimed, kaanoman nga impateg ti napudno a panagtarigagay a mangammo iti Dios, nupay nakapoy, ngem ti Espiritu ti Dios rumkuas a mangsabat itoy.” – COL, p. 206.
“Iconsagrarmo ta bagim iti Dios iti bigat; aramidem daytoy a kaunaan a trabahom. Ti ikararagmo, ‘Alaennac O Apo a naan-anay a Kukuam. Idatonco amin a planok ita Sakaanam. Usarennac ita iti serviciom. AgtaengKa kaniac, ket amin coma a trabahoc maiyaramidda Kenca.’ Inaldaw coma daytoy a banag. Kada bigat iconsagrarmo ta bagim iti Dios para iti dayta nga aldaw. Isukom ti amin a planom Kencuana, no maipatungpalda wenno maisukoda kas maitutop iti providenciaNa. Ngarud iti inaldaw-aldaw ipapaaymo ta bagim kadagiti ima ti Dios, iti kasta ta biagmo ad-adda a maisuksukog iti biag ni Cristo.” – SC, p. 70.
Hueves
Noviembre 5
5. MAYSA A RAGSAC KEN RAG-O
a. No maawattayo ti tulag ti Aldaw a Panaginana, ken aramidenna ti nairanta a trabahona kadatayo, ania ti pagbalinanna? Isaias 58:13, 14. Ania ti kaipapanan dagiti sao “Nasantoan nga aldawKo”? Mateo 12:8.
b. Ania a bendisyon ti isangbay ti Aldaw a Panaginana iti amin a sipupudno nga umawat itoy? Mateo 11:28.
“Kadagiti amin nga umawat iti Aldaw a Panaginana kas tanda ti bileg ni Cristo a nagparsua ken nangsubbot, maysa daytoy a ragsac. Makitkita ni Cristo itoy, agrasacda Kencuana.” – DA, p. 289.
“Amin a langit naiparang kaniac a mangkitkita ken mangbanbanatay kadacuada a mangbigbig kadagiti tontononen ti maikapat a bilin ken mangsalsalimetmet iti Aldaw a Panaginana. Marmarkaan dagiti angeles ti interesda ditoy ken ti nangato a panangibilangda iti daytoy nadiosan nga institustyon. Dagiti mangpasanto iti Dios nga Apo kadagiti puspusoda babaen iti nainget a panagdebosyon, ken mangikagumaan a mangpasayaat kadagiti sagrado nga oras iti panangsalimetmet iti Aldaw a Panaginana iti kaimbagan nga abilidadda, ken ti mangdayaw iti Dios babaen iti panagragsac iti Aldaw a Panaginana – dagitoy ti ipaayan dagiti angeles iti bendisyon ti lawag, salun-at ken naisangsangayan a pigsa ti maipaay kadacuada.” – 2 T, pp. 704, 705.
k. No masarakantayo a namatalec, anian ti ar-aramidentayo iti tunggal Sabbat iti pagarian iti daga a napabaro? Isaias 66:23.
Viernes
Noviembre 6
PERSONAL A PANGREPASO A SALSALUDSOD
1. Ilawlawag dagiti rason no apay a kinuna ti Dios “laglagipen.”
2. Ania dagiti banbanag nga ipalagip ti Aldaw a Panaginana kadatayo?
3. Ania ti sabali a kaipapanan ti Aldaw a Panaginana iti Nacristianoan a kapadasan?
4. Mano ti sipupudno a nakapadas iti Aldaw a Panaginana?
5. Kasano a magun-gunaanca kadagiti bendisyon ti aldaw ti Apo?