Domingo
Deciembre 20
1. ITI ESPIRITU KEN ITI KINAPUDNO
a. Ania ti ipacdaar ni Jesus mainaig iti pagarianNa iti daytoy agdama a lubong? Lucas 17:20, 21; Juan 4:20-24.
“Saan a babaen iti panangsapul iti nasantoan a bantay wenno iti sagrado a templo a naisangbay dagiti tattao a makisao iti langit. Ti relihion saan coma a maipamaysa kadagiti akinruar a porma ken seremonia. Ti relihion a nagtaud iti Dios isu laeng ti relihion a mangitunda iti Dios. Tapno pudno a parservian Isuna kasapulan a maiyanactayo iti nadiosan nga Espiritu. Daytoy ti mangpatarnaw iti puso ken mangpabaro iti panunot, mangipaay cadatayo iti baro a kapasidad a mangammo ken mangayat iti Dios. Ipaayannatayo iti naannugot a panagtulnog kadagiti amin a gutogutenNa.” – DA. p. 189.
b. Sinno ti pakaitedan ti pagarian? Lucas 23:32; Mateo 5:3; 7:21.
“Uray sadinoman a pangdanonan iti Dios, adda a maipaduyacyac sadiay ti panagtrabaho ti Espiritu. Ket ipalgac ti Dios ti Bagina iti dayta a cararua. Para iti kasta nga agdaydayaw ti sapsapulenNa. Aguray a mangawat kadacuada ket aramidenNa ida nga annacNa a lallaki ken babbai.” – Ibid.
Lunes
Deciembre 21
1. TI AWAN SARDAY A NAMNAMA
a. Ania ti namnamatayo kas mamati ken Cristo? Tito 2:13.
b. Anianto ti maited kadagidiay a sumrec iti langit? 2 Timoteo 4:8. Kasano a pabilgennatayo daytoy nga agtibker? Apocalipsis 3:11.
“Iti agballigi a naikari ti corona a di agkupas ti dayagna ken biag a karukod ti biag ti Dios. ‘Kencuana nga agballigi,’ impacdaar ni Cristo ‘pacanecto iti kayo ti biag, nga adda iti Paraiso ti Dios.’ ‘Saan a makita ti mata, ket saan a nangngeg ti lapayag; ket saan a simrec iti puso ti tao, dagiti banbanag nga insagana ti Dios cadagiti agayat Kencuana’ (Apocalipsis 2:7; 1 Corinto 2:9). Ikagumaantayo a gun-oden ti iseserrec iti pagarian ti Apotayo. Siaaneptayo a mangadal iti Evangelio nga immayan ni Cristo tapno iparang ken Juan iti isla ti Patmos – ti Evangelio a naawagan. ‘Ti Paltiing ni Jesu-Cristo nga inted ti Dios, tapno ipacaammona cadagiti ad-adipenna dagiti banbanag, isuda a maaramidto iti mabiit.’ Laglagipentayo a kankanayon a ‘Nagasat ti bumasa ken dagiti agdengngeg cadagiti sasao ti padto, ket salimetmetanda dagiti banbanag a naisurat kencuana, ta ti panawen asidegen’ (Apoclipsis 1:1, 3).” – ST, Feb. 4, 1903.
k. Nupay kasla agparang nga agballigi ti diablo, ania a talged ti adda cadatayo? Roma 8:28; 2 Corinto 13:8.
“Kadagiti sinigsiglo ti pannakaidadanes, susic ken sipnget, pinagtalinaed ti Dios ti iglesiaNa. Awan maysa nga ulep ti natnag kencuana a saanNa nga insagana; awan ti mangsuppiat a puwersa ti timmanor a mangsupring iti trabahoNa a saanNa a nakita nga immuna. Amin maaramidda kas impadtoNa. SaanNa a pinanawan ti iglesia a mailacsid, no di ket masurotan kadagiti pacdaar ti padto no ania ti mapasamac ken no ania ti impaltiing ti EspirituNa kadagiti propeta a mangipadto no anianto ti sumangbay. Amin a panggepNa matungpalda. Ti lintegNa naisilpo iti tronoNa ket awan ti bileg ti diablo ti makadadael iti dayta. Ti kinalinteg ket pinabileg ken binantayan ti Dios; ket pagballigiannanto amin a suppiat.” – AA, pp. 11, 12.
Martes
Deciembre 22
3. PADARASEN TI PAGARIAN
a. Ania ti ikararagtayo maipapan iti pagarian ti Dios? Mateo 6:10. Kasano a daytoy a kararag inpluensiaanna dagiti prayoridad-tayo? Versiculo 33.
“Patgec a kakabsat a lallaki ken babbai, dagiti bilbilin coma ti Dios ken ti pammanecnec ni Jesu-Cristo coma ti agtultuloy nga adda iti panunotyo ket palubosan ida a manparucma kadagiti nainlubongan a kapanpanunotan ken pakaseknan. No agiddaca ken no bumangonca, isuda coma ti ut-utobenyo. Agbiag ken agtignay a naan-anay mainaig iti yaay ti Anac ti tao. Ti panagsello a tiempo ket ababa ket mabiiten a malpas. Itan ti tiempo, kabayatan a tengtenglen dagiti uppat nga angel dagiti uppat nga angin tapno maaramid a sigurado ti pannacaayab ken pannakapilitayo.” – EW, p. 58.
b. Ania a paset ti adda cadatayo iti kinaasideg ti yaay ni Cristo? Mateo 24:14; 2 Pedro 3:12.
“Gundaway ti tunggal Cristiano ti saan laeng a kumita no di ket padarasen ti yaay ti Apotayo a Jesu-Cristo (2 Pedro 3:12). No coma ta dagiti amin nga agibunbunannag iti naganNa agbungada iti dayagNa, nagbiit coma ti lubong a mamulaan iti bukel ti evangelio. Sibibiit a maluom ti maudi a naindaclan a maani, ket umayton ni Cristo a mangummong iti napateg a bukel.” – COL, p. 69.
“Kadagiti pagarian ti lubong, ti saad ket panangpadackel iti bagi. . . . Inpluensia, kinabacnang, adal, adu unay a wagas a pangtengngel iti kaadduan para iti usar dagiti pangpangulo. . . .
“Ipaspasdec ni Cristo ti pagarian nga addaan naiduma a prinsipio. AwaganNa dagiti tattao, saan nga agturay, no di ket agservi, ti napigsa awitenna ti kinalupoy dagiti nakapsot. Bileg, saad, talento, adal, isaadda ti agtagikua iti babaen ti nain-indaclan nga obligasyon nga agservi iti padana a tao. . . .
“Idi naikadua kadagiti disipulosNa, ni Cristo iti tunggal kapanunotan ket paraaywan, agawit iti dadagsen. Nakipaset iti kinapanglaw, ipakatNa ti panangilacsid iti bagiNa para kadacuada, mapan Isuna iti sangoananda tapno palucnengenNa dagiti narikut a disso, ket iti mabiit ileppasNa ti trabahoNa iti daga babaen iti panangipaayNa iti biagNa. Ti prinsipio nga inakem ni Cristo ti mangtignay kadagiti miembro ti iglesia nga isu ti Bagina. . . Iti pagarian ni Cristo dagidiay a kaindaclan a simmurot iti ehemploNa ti nangipaayanNa iti akem kas pastor ti arbanNa.” – DA, p. 550.
Mierkules
Deciembre 23
4. DAGITI PALAGIP
a. Ania ti ceremonia a mangipalagip cadatayo iti umay a pagarian? Lucas 22:14-20; 1 Corinto 11:26.
“Ti ordinasa ti Pangrabii ti Apo ket naipaay a mangipalagip iti naindaclan a pannakawayawaya a naisangbay kas resulta ti pannakatay ni Cristo. Agingga iti yaayNa iti maikadua a gundaway a sibibileg ken sidadayag, daytoy nga ordinansa agtultuloy a maselebraran. Isu ti wagas tapno ti naindaclan a trabahoNa para cadatayo ket agtalinaed a presko iti panunottayo.” – DA, pp. 652, 653.
“Babaen kadagitoy nga [ordinansa], insaadNa a mismo, a masabat ni Cristo ti iliNa ket mapapigsada babaen iti presenciaNa.” – Ibid., p. 656.
b. Nupay maipasangotayo iti panagsagaba ken pannakaidadanes, ania ti pagtalineden iti panunottayo? Mateo 5:10; 2 Corinto 4:16-18.
“Adu kadagiti panagsagabayo ti nangbisita kadacayo, iti sirib ti Dios, tapno maisangbaycayo a naas-asideg iti trono ti parabor. Palucnengen ken pasukoenNa dagiti annacNa babaen iti ladingit ken suot. Daytoy a lubong ti pagpandayan ti Dios, pangtabasanNa cadatayo para kadagiti corte ti langit. UsarenNa ti mangpalanas a kutsilyo kadagiti agpigpigerger a pusotayo agingga a maikkat ti kinakersang ken kibbakol agingga a maitutoptayo iti umiso a saadtayo iti nainlangitan a patacder. Babaen iti dackel a rigat ken tuoc a mapalinis ken mapapigsa ti Cristiano, ket masukog ti kababalin a maisurot iti modelo nga inted ni Cristo. Ti inpluensia ti pudno, nasanto a biag saan a marukod. Dumanon iti labes ti circulo ti pagtaengan ken gagayyem, mangisacsacnap iti lawag a mangitunda kadagiti kararua ken Cristo.” – 4 T, p. 143.
“Ti naranyag ken naragsac a paset ti relihiontayo ket iparang dagiti amin a tattao nga inaldaw a nakaconsagrar iti Dios. Saantayo nga ibabain ti Dios babaen iti naladingit a pannakilangen kadagiti suot nga agparang a nakaro unay. Amin a suot a maawat kas mangisuro ti manggubuay iti rag-o. Ti sibubukel a narelihionan a biag ket mangitag-ay, mangitandodo, mangitan-oc, nangpabanglo kadagiti naimbag a sasao ken ar-aramid. Ti kabusor maragsakan no dagiti kararua ket agladingit, mauppapay, agledleddaang ken agas-asug; kayatna a maaramid ti kasta nga impresyon a mangapectar iti pammatitayo. Ngem panggep ti Dios a ti panunot saan a bumaba iti kasta a rukod. TarigagayNa a tunggal cararua agballigi iti panangsalimetmetna iti bileg ti Mannubbot.” – Ibid., pp. 365, 366.
Hueves
Deciembre 24
5. PAGARIAN NGA AWAN PATINGGANA
a. Iti buya ti panangiyunay-unay dagiti apostol, ania ti aramidentayo manipud ita agpasango? 1 Juan 2:28; Juan 3:2, 3; 2 Pedro 1:10, 11.
b. Kasano ti panangbosbostayo iti kinaagnanayon iti awan patinggana a pagarian? Apocalipsis 5:13.
“Ket dagiti tawtawen ti kinaagnanayon, bayat ti panagtulidda, isangbayna ti nabacbacnang ken nadadaeg pay a pannakaipalgac ti Dios ken ni Cristo. Bayat ti idudur-as ti pannakaammo, kasta met a dumackel ti ayat, panagraem ken ragsac. No dagiti tattao ad-adda nga agsursuro iti Dios, nain-indaclan met ti panangdayawda iti kababalinNa. Bayat ti panangilukat ni Jesus iti sangoda dagiti kinabacnang ti pannakasubbot ken dagiti nakakaskasdaaw a nagun-odan iti naindaclan a susic kenni Satanas, ti puso dagiti nasubbot ad-adda nga agrag-o iti napasnec a debosyon ket iti nasneban a ragsac pagunienda dagiti balitoc nga arpa ket dagiti rinibribo a ribu-ribo a boses agkaykaysada a mangiyallangogan iti kankanta ti pagdaydayaw. . . .
“Nagpatinggan ti naindaclan a susic. Awanen ti basol ken dagiti managbasol. Nadalusen ti intero nga universo. Maysa a pulso ti tunos ken ragsac ti agbitec iti naglawa a pinarsua. Manipud Kencuana a nangparsua iti amin, agayos ti biag ken lawag ken ragsac, iti amin a pagturayan ti awan patinggana a law-ang. Manipud iti kabassitan a banag (atomo) agingga iti kadackelan a lubong, amin a banbanag, nabiag ken saan a nabiag, iti saan a nalangeban a pintas ken naan-anay a ragsac, ipacdaarna a ti Dios ket ayat.” – GC, p. 678.
Viernes
Deciembre 25
PERSONAL A PANGREPASO A BASBASAEN
1. Kasano a maisigurotayo ti lugartayo iti naespirituan a pagarian ti Dios?
2. Ania dagiti karkari ti mangpabileg kadatayo iti baet ti dangadang ti imbag ken dakes?
3. Ania ti maaramidmo tapno mapadaras ti yaay ni Jesus?
4. Ilawlawag ti sumagmamano a banbanag a makatulong kadatayo a pagtalinaeden iti buya ti kinaagnanayon?
5. Ania dagiti planom para iti kinaagnanayon?