Domingo
Noviembre 29
1. “UMAYACTO MANEN”
a. Ania ti inkari ni Jesus, sacbay ti ipapatayNa? Juan 14:1-3. Iti ania a wagas ti panagpangatoNa, ken kasano a maipada iti panagsubliNa? Aramid 1:9-11.
“Ti kari ti maikadua a yaay ni Cristo ti kankanayon a napagtalinaed a presko iti panpanunot dagiti disipulosNa. Ti isu met la a Jesus a nakitada a nagpangato sadi langit, ti umay manen, tapno icuyogNa kencuana dagiti nangipaay ti bagbagina iti servicioNa ditoy daga. Isu met la a timec a nagkuna kadacuada, ‘adtoy, addaac cadacayo nga agnanayon agingga iti panungpalan ti lubong’ (Mateo 28:20), ti mangipasangbay kadacuada iti presenciaNa iti nainlangitan a pagarian.” – AA, p. 33.
b. Nupay napno ti lubong kadagiti mangnguyaw, ania ti namnama dagiti Cristiano? 2 Pedro 3:3, 4; Tito 2:13.
“Napaganetget ni Pedro a nangbalabala kadagiti kasasaad nga adda iti lubong sacbay unay ti maikadua a yaay ni Cristo. . . . Bayat ti yaasideg ti panungpalan dagiti amin a naindagaan a banbanag, addanto namatalec a tattao a makailasin dagiti tanda ti tiempo. Idinto a dackel a bilang dagiti agkunkuna a mamati ti mangilacsid iti pammatida babaen kadagiti ar-aramidda, addanto matda a makaandor ingga kanibusanan.” – Ibid., pp. 535, 536.
Lunes
Noviembre 30
2. DAYDAYYEG DAGITI LANGLANGIT
a. Iladawan ti wagas ti yaay ni Jesus. Apocalipsis 1:7; Lucas 21:26.
“Iti mabiit agparangton idiay daya ti maysa a bassit a nangisit nga ulep, agarup kagudua ti rukod ti ima ti tao. Isu ti ulep a nangpalawlaw iti Mannubbot a kasla iti adayo a panes iti kasipngetan. Ti ili ti Dios ammoda daytoy a tanda ti Anac ti tao. Iti solemne nga ulimec mingminganda daytoy bayat ti yaasidegna iti daga, lumawlawag ken ad-adda a nagloriaan, agingga a maysa a naindaclan a puraw nga ulep, ti batayna maysa a dayag ti mangtalipopos nga apuy ket iti ngatona bullalayaw ti tulag. Nakalugan ni Jesus kas maingel a mangparmec. . . Buyogan dagiti nainlangitan a kankanta dagiti nasantoan nga angeles, nakadacdackel, saan a mabilang a bunggoy, ti kimmuyog kencuana iti dalanNa. Ti tangatang kasla napno kadagiti naranyag a porma – ‘linacsa a lacsa ken rinibo a ribo’ (Apocalipsis 5:11). Awan ti nataoan a pluma ti makailadawan iti buya; awan ti panunot ti mortal ti makaanay a manginaw iti kinangayedna. . . . Bayat ti yaasideg pay ti sibibiag nga ulep, tunggal mata imutectekanna ti Prinsepe ti biag. Awan ti korona a siit a mangdadael iti sagrado nga ulo; no di ket korona ni dayag ti adda iti nasantoan a mugingNa. Ti langaNa daeranna ti nakapurar a raniag ti nagmatoon nga init.” – GC, pp. 640, 641.
“Nagpatingga dagiti mangumumsi nga angaw. Napaulimec dagiti naulbod a bibig. Dagiti agtutupa nga igam, ariwawa ti gubat, ‘naigaman iti pannacariribuc, ken dagiti cawcawes a nayagsep iti dara’ (Isaias 9:5), nagtalnada, Awanen ti mangngegan no di ti timec ti kararag ken uni ti sangsangit ken un-unnoy. Bumtac ti ikkis manipud kadagiti bibig nga agum-umsi: ‘Dimtengen ti dackel nga aldaw ti pungtotNa, ket siasinonto ti macabalin nga agtacder?’ (Apocalipsis 6:17), Ikararag dagiti nadangkes a maikalida iti siroc dagiti batbato ti bantay ngem ti mangkita iti rupaNa, Isu nga inumsi ken rinejectarda.” – Ibid., p. 642.
b. Kasano a ti sirmata ni Juan iti Apocalipsis 6:12-17 pasingkedanna ti sabali a padto ti Daan a Testamento? Isaias 2:10, 11, 19; 34:4, 8; Joel 3:14-16.
“Saan a napalubosan ni Satanas a mangtulad iti wagas ti yaay ni Cristo. Binallaagan ti Mannubbot ti iliNa maipapan iti allilaw iti daytoy a punto ken silalawag nga impacaunana ti wagas ti maikadua a yaayNa. . . . Ti yaayNa awanto pulos ti pannakatuladna. Sapasap a maammoan – masacsian ti sibubukel a lubong.” – Ibid., p. 625.
Martes
Deciembre 1
3. TI UMUNA A PANAGUNGAR
a. Iti baet ti pannakadayyeg ti langit ken daga, ania ti aramiden ni Jesus? 1 Tesalonica 4:16, 17; Juan 5:25; 1 Corinto 15:51-53.
“Iti baet ti pannakadaydayyeg ti daga, ti panaggilap ti kimat ken danadorodor ti gurruod, awagan ti timec ti Anac ti Dios dagiti matmaturog a sasantos. Kumita kadagiti tanem dagiti nalinteg, sa ingatona dagiti imaNa sadi langit, ipukkawNa: ‘Agriing, agriing, agriing, sica a matmaturog, ket bumangonca! Iti intero a kaatiddag ken kaunggan ti daga dagiti natay mangngegda dayta a timec, ket agbiagda. Ket ti sibubukel a daga agaryangga iti danapec ti nakadacdackel unay nga armada ti tunggal nacion, pagsasao ken tattao. Manipud dagiti pagbaludan dagiti natay, rumuarda a nakawwesan iti immortal a dayag, iyik-ikkisda: ‘O patay, adino ti paniludmo? O tanem, adino ti yanna ti panagballigim?’ (1 Corinto 15:55). Ket dagiti sibibiag a nalinteg ken dagiti nagungar a sasantos agkaykaysa ti timecda iti atiddog, naragsac a dir-i ni balligi.” – GC, p. 644.
b. Ania ti mapasamac kadacuada a natay iti namatalec nga inanama iti yaay ni Cristo? Juan 11:25, 26; 1 Tesalonica 4:13, 14.
“Rumuarda amin kadagiti tanemda kas ti katayagda idi simrecda iti tanem. . . . Bumangonda amin iti kinasadiwa ken kinapigsa ti agtutubo. Idi punganay, naparsua ti tao a kaasping ti Dios, saan laeng iti kababalin, ngem iti porma ken itsura. Ti basol dinadaelna ken nganganina pinukaw ti nadiosan nga asping; ngem immay ni Cristo a mangisubli iti dayta napukaw. Sukatanna daytoy managbasol a bagitayo ket tabasenNa ida kas ti nagloriaan a bagiNa. Ti mortal, agrupsa a porma, awanan iti talna, rinugitan ti basol iti naminsan, agbalin a perpecto, napintas ken immortal. Amin a mulitna ken kinaalasna mabatida iti tanem. Maisublida iti kayo ti biag iti nabayag a napukaw nga Eden, dagiti nasubbot ‘dumackelda’ (Malakias 4:2), iti naan-anay a katayag ti puli iti sigud a dayagna. Ti maudi a tanda ti lunod ni basol ket maikkatto ket dagiti namatalec ken Cristo agparangda iti ‘parabor ti Apo a Diostayo’ (Salmo 90:17), iti panunot ken kararua ken bagi iyanninawda ti naan-anay a ladawan ti Apoda. . . .
“Ummongen dagiti angeles dagiti piniliNa manipud kadagiti uppat nga angin, manipud iti maysa nga ungto ti langit agingga iti sabali’ (Mateo 24:31). Dagiti babassit nga ubbing awiten dagiti nasantoan nga angeles nga ipan kadagiti innada. Dagiti aggagayyem a pinagsina ni patay agkitadan ket didanton agsina ket buyogan dagiti kankanta ni ragsac agpangatoda iti ciudad ti Dios.” – Ibid., pp. 644, 645.
Mierkules
Deciembre 2
4. MAALA WENNO MABATI?
a. Iti ania a panawen iti pakasaritaan ti Biblia nga icompara ni Jesus ti maikadua a yaayNa? Mateo 24:37; Lucas 17:28
“Inako dagiti tattao kadagiti bagbagida ti responsibilidad a mangibangon iti pagibasaran a mitunos iti bukodda a kapanunotan, ken saan a naidayaw ti linteg ni Jehova. Daytoy ti rason no apay nga adda nakaro unay ken nasacnap a kinadangkes. Daytoy ti gapuna nga agbalbalin ti alaldawtayo kas kadagidi alaldaw ni Noe ken Lot.” – RH, May 2, 1893.
b. Ania ti resulta dagiti ocom ti Dios kadagitoy nga okasyon? Genesis 7:21-23; 19:24, 25.
k. Iti isu met la a wagas, ania ti mapasamac iti yaay ni Cristo? Lucas 17:34-37.
“Inton a ti panagrasason ti filosopia maikkatna ti buteng kadagiti ocom ti Dios, inton a dagiti narelihionan a manursuro itudoda dagiti nabayag a panawen ti cappia ken rang-ay ken no ti lubong maigubet kadagiti negosio ken ragragsac, panagmula ken panagibangon, panagramrambac ken panagkakatawa, ilacsidda dagiti ballaag ti Dios ken umsienda dagiti mensaheroNa – sumangbayton kadacuada ti pannakadadael a saanda a mapacpakadaan ket saanda a malibasan.” – PP, p. 104.
d. Ilawlawag no sino dagiti “maala” iti maikadua a yaay ni Cristo. Mateo 24:40-42; Malakias 3:17.
“Ti tiempo ti ocom isu ti kasolemnean a panawen, inton ummongen ti Apo ti kukuaNa maipud kadagiti zizania. Maisina dagiti nagbalin a miembro iti isu met a pamilia. Maisaad ti marka kadagiti nalinteg. . . Dagiti nagtulnog kadagiti bilbilin ti Dios makitipon iti bunggoy dagiti sasantos iti lawag; sumrecda kadagiti ruangan nga agturong iti ciudad ket addaanda iti karbengan iti kayo ti biag. Ti maysa a maala, ti naganna agtalinaed iti libro ti biag, idinto a dagiti nakalangenna maaddaan iti marka ti agnanayon a pannakaisina iti Dios.” – TM, pp. 234, 235.
Hueves
Deciembre 3
5. NAKASAGANAKA KADI?
a. Ania ti mapasamac kadagiti nadangkes a sibibiag inton umay ni Cristo? 2 Tesalonica 1:7-9; 2:8; Salmo 97:3.
b. Ania ti pagbanagan dagiti nadangkes para kadagiti “aguila” a dinakamat ni Jesus iti Lucas 17:37? Apocalipsis 19:17, 18; Ezequiel 39:17-20.
k. Iti pannakaammo no ania ti masacbayan, ania ti pangiturongan iti imatangtayo? 2 Pedro 3:11; Salmo 24:3, 4. Judas 23, 24.
“Umayen ni Jesus, ngem saan a kas di umuna a yaayNa, maysa a tagibi iti Betlehem; saan a kas ti panagluganNa a simrec iti Jerusalem, idi a dagiti disipulos indaydayawda ti Dios iti napigsa a timec ket inyikkisda, ‘Hosana’; no di ket iti gloria ti Ama ken kuyogen dagiti amin a bunggoy dagiti angeles a mangeskort Kencuana iti dalanNa nga agpadaga. Amin a langit maungkawan kadagiti angeles, kabayatan a dagiti agur-uray a sasantos kumitkitada Kencuana, mingmingminganda ti langit, kas cadagidi tattao ti Galilea idi nagpangato Isuna manipud Bantay Olivo. Dagiti laeng sasanto, dagiti naan-anay a simmurot iti napakumbaba a Modelo, siraragsacda unay a mangidir-i bayat ti panangimutectecda Kencuana, “Adtoy daytoy ti Diostayo; Isu ti inur-uraytayo ken isalacannatayto (Isaias 25:9).” – EW, p. 110.
Viernes
Deciembre 4
PERSONAL A PANGREPASO A SALSALUDSOD
1. Ania a talged ti inted ni Jesus iti panagsubliNa?
2. Kasano a mailasinmo dagiti palso a panangtonton mainaig iti galad ti maikadua a yaay ni Cristo manipud iti kinapudno nga insuroNa?
3. Iladawan ti urnos dagiti paspasamac manipud ti tiempo a panag-parang ni Jesus kadagiti ulep agingga iti tiempo a makitipon Kencuana dagiti sasantos iti panagsubliNa sadi langit?
4. Kayatmo kadi ti “maala” wenno “mabati” inton agsubli ni Jesus?
5. Kasano a masiguradom a maysaca kadagiti agur-uray ken Cristo?