1. NGIKADILU MULELELA WA MUNTU Dia kumudilu 29/03

a. M’mushindu kayi udi diyi dia Nzambi diunvuija ngikadilu wa mu nyuma wa muntu udi kayi mukudimuna mutshima ? Efeso 2: 1-3; Kolosai 2: 13 “Tudi balamuna kudi Nzambi kudi ngikadilu wa ku bufuki”. – The Faith I Live By, p. 87 b. Ngikadilu wa bantu bonso udi munyi ? Lomo 3 : 10 – 18 “Kuikala kuyi ngasa wa Nyuma wa Nzambi, m’bualu bubi butambe ; kadi ngikadilu mubi mutambe bua kuikala kakuyi malu a Nyuma ne a Kilisto, ne nunku tujinga kudibingisha nkayetu bua kuambila aba badi batudimuisha ne katuena dijinga ne kutshina kuabo ne luse. Ngikadilu wa kutshina udi bukole bua kudishima kua mu menji a bantu ! M’bufofo kayi ! Bua kubala munya ne m’midima ne midima ne m’munya !”. – Testimonies, vol. 4, p. 88“Tudi ne tshia kudimanya, dimanya dia biheta bia mu kunyingalaja kua mutshima bua bubi, ku mpala tudi mua kukeba kufuidibua kua luse ne ditalala. Anu ewu udi mudimanye nkayandi bu muena bubi, ke udi Kilisto usungila. Tudi ne tshia kumanya ngikadilu wetu mulelela, tshianana katuena mua kuya kunvua dijinga dietu dia dikuatshisha dia Kilisto. Tudi ne tshia kunvua njiwu itudi nayi, tshianana katuena mua kuya kunyemena ku tshisokomenu. Tudi ne tshia kunvua busami bua mputa yetu, tshianana katuena tuya kujinga londahu”. – The Signs of The Times, 09 Avril 1902

---

2. DIJINGA DIA MUENA BUBI Dibidi 30/03

a. M’bualu bulelela kayi bua mushinga budi bua kulama mu menji, budi mu lusumuinu lua Mufalase ne Musangishi wa milambu? Luka 18: 10 -14; Misambu 51: 17 “Musangishi wa milambu wakaya mu ntempelo popamue ne batendeledi bakuabo. Kadi wakimana ha bule nabu bu muntu udi kayi mukumbane bua kudisangisha nabu mu kutendelela kuabo. Kuimana ha bule. Mesu adni kâyi matangila mu diulu. Kadi wakakuma tshiadi tshiandi mu kanyinganyinga kakole ne kutshina. Wakunvua ne wakenzela Nzambi bibi, ne wakadi muena bubi ne muatuke. Kakadi mua kutekemena luse kudi bakadi bamunyunguluke, bualu bakadi bamutangila ne dihetu. Wakadi mumanye ne kakadi ne malu mempe akadi kumufikisha ha buihi ne Nzambi, ne kuela lubila lua kuhanga ditekemena wamba ne : ‘Nzambi, ndi muntu mubi, unfue luse’ (Luka 18 : 13). Kakadifuanyikija ne bakuabo”. – Christ’s Object Lessons, p. 151“Hadi muntu mubi mutuishibue bua ngikadilu wandi mutekete, ne uheta dijinga dia Musungidi, udi mua kusemena ne ditabuja ne ditekemena kudi ‘Muana wa mukoko wa Nzambi, Udi ujimija bubi bua ba ha buloba’ (Yone 1 : 29). Kilisto neaye kuitabuja musuka udi ulua kudiye mu kunyingalala kulelela bua bubi”. – This Day with God, p. 370 b. Bua tshinyi tudi dijinga ne bukole budi kabuyi buetu bua kutuvuija bakane ku mpala kua Nzambi ? Yeshaya 64: 6; Yobo 14: 4 “Bidi bualu bukole kutudi, bua tuetu nkayetu kunyema buteyi bua bubi, mutudi bakuatshibue Mitshima yetu idi ya bubi, ne katuena mua kuyishintulula. Udi mua kuhatula tshintu tshiakane ku tshintu tshidi katshiyi tshiakane nganyi ? Nansha muntu. ‘Menji mateka ku malu a mubidi adi ne Nzambi lukuna: Kaena manze kudihuekesha muinshi mua mikenji ya Nzambi; Kaena ne bukole bua kuenza nunku’ (Yobo 14: 4; Lomo 8: 7). Nkoleshelu, dimanya dia malu, kudienzeja kua disua, kudienzeja kua muntu, bionso bidi tshiabi tshituha, kadi aha kabiena ne bukole nansha. Bidi mua kuhatula hatoke diakanangana dia mu nsombelu. Kadi kabiena mua kushintulula mutshima nansha; kabiena mua kulengeja mushimi wa moyo. Bidi ne tshia kuikala bukole budi bukuata mudimu wa munda, moyo muhia-muhia udi ufuma mu diulu, ku mpala kua bantu udi mua kushintuludibua ku bubi ne kufika ku tshijila Bukole ebu budi buikale Kilisto. Ngasa wandi nkayandi ng’udi mua kufila moyo kudi makole a musuka adi kâyi nawu, ne kuâkoka kudi Nzambi, kuâfikisha ku tshijila”. – Steps to Christ, p. 18“Luhandu ludi mu Yezu Kilisto, bualu bua Yeye nkayandi ng’udi buakane buetu. Nunku muntu yonso udi mua kulekela kuditangila nkayandi bua malu (midimu) mempe. Tudi ne bua kukeba mu Kilisto Yezu bionso bitudi nabi dijinga, ne kukuata nandi mudimu hohamue, netuikale bakumbane mu Yeye”. – Manuscript Releases, vol. 10, p. 11

---

3. KUNYINGALALA BUA BUBI Disatu 31/03

a. M’mushindu kayi udi muntu ukema hadi mukuabo ujandula ne ngikadilu wandi kena mukumbane ? Lomo 7: 24; Misambu 51: 1 – 3. Dinyingalala dilelela bua bubi didi ne malu kayi ? 2 Kolinto 7 : 10 “Kunyingalala bua bubi, kudi kukudimuna kua mutshima, ne kulekela bubi. Katuena mua kubenga kulekela bubi, anu tuetu bamone ngikadilu wa tshibawu tshia bubi ; tô ne hatudi tubumbusha mu mutshima, tshianana, kakuakuikala kushintuluka kulelela mu moyo”. – Speps to Christ, p. 23“Kunyingalala bua bubi n’dimue dia mu mamuma a diambedi a ngasa udi usungila. Kunyingalala bua bubi, kudi kukudimuna kua mutshima ne kulekela bubi. Katuena mua kulekela ne kubenga bubi, anu tuetu bamone ngikadilu wa tshibawu wabo ; tô ne hatudi tubumbusha mu mutshima. Kabiyi nanku, kakuakuikala kushintuluka kulelela mu moyo. Kunyingalala bua bubi, ke njila anu wa kulonda mudi dilengejibua dileja tshinfuanyi tshia Kilisto mu bantu bandi bahikudibue”. – The Signs of The Times, 28 Juin 1905 b. Hatudi tutonda bubi buetu ne tubulekela n’tshinyi tshidi ne tshia kuindila ne ditekemena ? 1 Yone 1 : 9 ; Lomo 10 : 9 “Mishindu ya kuheta luse lua Nzambi idi mihehele ne mikumbanyine. Mukelenge kena utulomba bua tuetu kuenza bumue bualu budi buikale bukole bua tuetu kufuidibua luse bua bubi. Kabiena bikengela bua tuetu kushala musangu mule ne kuenza luendu ludi lutonda anyi kuenza didikengesha dikole bua bubi, bua kufila misuka yetu kudi Nzambi wa mu diulu anyi bua kufuta dibanza bua kushiha kuetu kua mikenji ; kadi ewu udi utonda ne ulekela bubi buandi, neafuidibue luse. Etshi ke mulayi wa mushinga mukole, mufidibue kudi muntu mukuluke, bua kumukankamika bua kutekemena mu Nzambi wa dinanga ne kukeba moyo wa tshiendelele mu bukelenge buandi”. – Testimonies, vol. 5, p. 635“Kilisto wakatulongoluela malu onso bua tuetu kuikala bakole. Wakatuhesha Nyuma wandi Luimpe, mudimu wandi ngua Yeye kutuvuluija milayi yonso yakafila Kilisto, ne nunku tudi tuheta ditalala ne luidi luimpe lua difuidibua dia luse. Bu bituikala tulama mesu etu batangija kudi Musungidi ne kueyemena ku bukole buandi, netûjibue ne luidi lua dikubibua ; bualu bua buakane bua Kilisto nebulue buakane buetu”. – My Life Today, p. 45“Binuikala nudi bitabuje mulayi – nuitabuje ne nuakufuidibua luse ne kulengejibua – Nzambi udi ukumbaja bualu (Tshienzedi) ; nudi bavuijibue bakane bu muakahesha Kilisto muntu mutekete bukole bua kuenda hakitabuja muntu ewu, yeye wakondahibua”. – Steps to Christ, p. 51

---

4. DIKUDIMUNA DIA MUTSHIMA Dinayi 01/04

a. N’dibikila kayi dimpe didi dienzela muntu yonso udi unvua dijinga dia luhandu luandi ? Yeshaya 1 : 18 ; 55 : 6, 7 “Mu miaba ya mu diulu Musungidi wetu udi musombe wenzela buloba dibikila dimpe dia ngasa, wamba ne, luayi, nuenu badi bahungile, nuenu bahele, nuenu badi ne nzala, badi ne majitu a bubi, nuenu misuka idi isama, luayi”. – The Signs of The Times, 05 Août 1875“Hadi muana bubi utuishibua bua bubi, udi kabidi mukokibue kudi dinanga ne tshijila bia Kilisto ; bualu Yezu wakumukoka kudiye … kunyingalala bua bubi kudi kuledibua mu mutshima kutangila dinanga dia Kilisto, wakafila moyo wandi bua kusungila muena bubi. N'dinanga dia Nzambi didi ditekesha mitshima idi mihahe (mukole)”. - The Review and Herald, 03 Septembre 1901“Kilisto udi habuihi bua kutuvuija badikadile ku bubi, kadi kena wenzeja disua dia muntu nansha; ne bu bikala kushiha kua mikenji kudi kutungunuka, disua dia muntu nkayandi didi mene mene didilekelela ku bubi, ne katuena ne dijinga dia kuikala badikadile, bituikala katuyi tuitabuja ngasa wandi, yeye n'tshinyi tshidiye mua kuenza ?”; - Steps to Christ, p. 34 b. Njiwu kayi idiku mu kujanguluka bua kuya kuetu kudi Mukelenge ? Ebelu 3: 15; Amose 8: 11, 12; Luka 13: 25 – 27 “Tshiakuikala aha hadi hikala moyo wa tshituha ne udi mene kawuyi mumanyike; kadi kudi njiwu mikole – ke njiwu ya kunvua kukumbane nansha – mu kujanguluka bua kudifila ku kusengelela kua Nyuma Muimpe wa Nzambi, mu kusungula bua kuikala ne moyo mu bubi; bualu bua kujanguluka eku m'bubi bulelela. bubi nansha bobo bamba ne m'bukese budi amu ne tshiakubadibua ne m'bubi, n'kudifila amu ku njiwu ya dijimina dia tshiendelele. Ntshinyi tshitudi katuyi mua kutshimuna tshidi tshiya kututshimuna ne tshikuata mudimu bua dibutuka dietu”. - Ibid, pp. 32, 33“Muntu udi umona njiwu yandi. Udi umona ne udi dijinga ne kushintuluka dia mutshima. Udi unyungishibua, kutshina kuandi kudi kujudibua; Nyuma wa Nzambi udi ukuata mudimu mu yeye (muntu), ne ne kutshina, ne kuzakala udi ukuata mudimu bua bualu buandi nkayandi, ukeba bua kuheta bilema bia ngikadilu ne kumona ne ntshinyi tshidiye natshi dijinga tshidi tshikengela bua dishintuluka mu moyo wandi. Mutshima wandi udi mudihuekeshe. Mu kutonda kua bubi ne kunyingalala bua bubi, udi uleja bulelela dijinga diandi dia kuenzulula (kuibakulula). Udi utonda mibi yandi kudi Nzambi, ne bu bikalaye wakenzela muntu bibi, atonde bubi ebu kudi muntu wakenzelaye nunku. Hadi Nzambi ukuata mudimu, muena bubi muinshi mua buenzeji bua Nyuma Muimpe udi ukuata biandi mudimu udi Nzambi ukuata mu menji ne mu mutshima. Udi ukuata mudimu mu diunvuangana ne nyuma wa mudimu, ne dikudimuna diandi dia mutshima didi dilelela”. - The Review and Herald, 07 juillet 1904

---

5. KULEDIBUA TSHIA KABIDI Ditanu 02/04

a. Unvuija muyuki wa Yezu ne Nikodemo. Yone 3: 1 – 8. N'tshinyi tshiakadi tshiheta tshia muyuki ewu ? “Nikodemo wakaheta dilesona [ne wakadi ne bua kutangila ne kuikala ne moyo], ne kuenda nadi. Wakakeba mifundu mu njila muhia-muhia, ke m'bua kukokangana ha mayisha, kadi mu mushindu wa kuheta moyo bua musuka. Wakabanga kumona bukelenge bua mu diulu ne kudifila nkayandi ku bulombodi bua Nyuma Muimpe”. - The Desire of Ages, p; 175 b. N'diunvuija kayi dilelela dia “kuledibua tshiakabidi” kua mayi ne kua nyuma , Yone 1: 12, 13; 2 Kolinto 5: 17; 2 Petelo 1: 3, 4. “Aba badi balue bifukibua bihia-bihia mu Kilisto Yezu ne baleje hatoke mamuma a Nyuma adi 'dinanga, disanka, ditalala, lutulu, luse, buimpe, bunanukidi bua lulamatu, kudihuekesha, kudikanda' (Ganatia 5: 22, 23). Kakuakuikala bilulu bile buabo nkayambo bilondeshile kusamina kuabo kua mutshima, kadi ku ditabuja dia Muana wa Nzambi, nebaye kulonda mu makasa andi, kuleja ngikadilu wandi hatoke, ne kudilengeja, bu mudiye yeye muine muakane.Malu akadibo bakine, katataka badi bânanga, ne malu akadibo bananga bakuâkina katataka. Budisu ne kuditekemena biakuvuijibua lutulu ne kudihuekesha mu mutshima”. - Steps to Christ, p. 58“Aba badi basue kumona ne kuhitshisha bualu buabo bua mudimu wa kukudimuna kua mutshima ne baye kuleja hatoke mamuma a Nyuma mu moyo wabo. Oh, aba badi ne moyo mukese wa malu a nyuma, ne bamone ne moyo wa tshiendelele udi uheshibua anu kudi aba badi balue babanyanganyi ba ngikadilu wa bunzambi ne banyema dinyanguka didi dikale mu buloba mu nkuka!”. - Testimonies, vol. 9, p. 155

Makonka a kuambulula dilesona Disambombo 03/04

a. Malu a nkindi adi anu umbusha “malu mempe” kutudi, bua tshinyi nkindi idi ne tshilema ? b. Mu lusumuinu, bua tshinyi musangishi wa mulambu wakabingishibua ha muaba wa Mufalase , c. N'tshinyi tshidi tshileja dinyingalala dilelela bua bubi ? d. Dikudimuna dilelela dia mutshima n'tshinyi ? e. N'dishintuluka kayi didi dimueneshibua mu aba badi baledibua tshiakabidi ?