1. MU EDENE Dia kumudilu 07/06

a. Nkoleshelu mulelela udi unvuija tshinyi ? Misambu 111: 10; Nsumuinu 9: 10 “Nkoleshelu mulelela udi kulongolola kua makole a ngelelu wa menji, a mu nsombelu, ne a bukole bua mubidi bua kuenza mudimu onso, udi muanyisha anyi udi kawuyi muimpe, kuibidija tshilelela tshionso ne tshienzedi tshia mutshima, menji, ne tshia musuka bua mudimu wa Nzambi”. - Selected Messages, bk. 3, p. 228“Tshiena bualu tshilelela tshia nkoleshelu tshidi kuhingajilula kua tshinfuanyi tshia Nzambi mu musuka”. - Patriarchs and Prophets, p. 595 b. Nyungulukilu kayi wakadi mulongoluela Adama ne Eva bua nkoleshelu wabo ? Genese 2: 8, 15 “M'bualu bua nkoleshelu bua kujadikibua ku tshibangidilu tshia buloba bu tshilejelu tshia muntu mu bikondo bionso bia kunyima”. - Child Guidance, p. 294“Mu tshifufu ne Tatu, diambedi ne buloba kuikalaku, biakalejibua ne Mukelenge Nzambi wakateka mu budimi bua Adama ne Eva mu Edene, kubahesha mudimu wa kulama mitshi ya mamuma ne kuihilila bikunyibua bikunyibua biakadimu. Mudimu wakadi ne dikuatshisha wakadi dikubibua diabo, ne wakadi utungunuka nunku mu bihungu bionso bia bantu tô ne ku nshikidilu kua muyuki wa buloba. Kuikala ne nkoleshelu muimpe, n'kusangisha hamue dimanya dia malu ne mudimu wa kuenza udi umueneka”. - The Signs of The Times, 13 Août 1896

---

2. TULASA TUA BAPROFETE Dibidi 08/06

a. Bua kuhingajilula bulongolodi buimpe bua nkoleshelu, n'tshinyi tshiakalongolodibua bua “Bana balume ba baprofete” mu Isalele ? 1 Samuele 7: 15, 16; 2 Bakelenge 2: 2-5, 15 “Bilongedi bisatu bia tulasa etu tua baprofete, biakadi, tshimue mu Gilegala, tshinga mu Betele, ne tshikuabo mu >Yeleko, bidi biamba nunku. Kumpala kua Eliya kuangatshibua mu diulu, yeye ne Elisha bakahitshila miaba eyi ya nkoleshelu”. - Prophets and Kings, pp. 224, 225“Mu 'tulasa etu tua baprofete' nsonga milume yakadi ilongeshibua kudi aba bakadi kabayi anu badibueja mu malu malelela a Nzambi, kadi bakadi nkayabo bimane mu bobumue ne Nzambi ne bakaheta kuha kua habuaku kua nyuma wandi”. - The Signs of The Times, 20 Juillet 1882 b. Tela biena bualu binene biakadi biyila mu tulasa tua baprofete. Misambu 86: 11; Yone 17: 3 “Tshiena bualu tshinene tshia mu biena bualu bia kulonga mu tulasa etu tua baprofete tshiakadi mikenji ya Nzambi, ne mayisha bihesha Mose, muyuki wa kale wa tshijila, misambu ya tshijila, ne tusala. Mu tulasa etu tua mu tshikondo tshia kale, tshiena bualu tshinene tshia kulonga kuyila disua dia Nzambi, ne mudimu wa Nzambi kudiye. Mu muyuki mulame wa tshijila wa kale mudi muleja njila ya Yehowa”. - Christian Education, p. 62“Nudi nuela menji ne mikanda ya kuyila mu tulasa etu tua baprofete yakadi yabuena idibo balongesha mu tulasa tonso tukuabo etu anyi ? Tô, nansha! Bakadi bayishibua tshinyi ? Bua kuikala ne dimanya dia Yezu Kilisto”. - Spalding and Magan Collection, p. 357“Mu kalasa ne mu diku mayisha a bungi akadi enzeka anu mukana, kakuyi kufunda. Kadi nsonga yakadi iyila mua kubala mifundu ya mu tshiena Ebelu, ne bivungu bia mikanda bia dihungila dikulu-kulu biakadi bibuludibua bua kuyila kuabo . malu malelela manene akadi alejibua bua mudimu wakadi wenzeka mu tshitendelelu, ne ditabuja diakadi dikuata tshiena bualu tshinene tshia mu malu onso akadi enzeka mu tshitendelelu – Muana wa mukoko wa Nzambi, udi umbusha mibi ya ba ha buloba. Nyuma wa kudifila wakadiku, ke anu bua se balongi bakadi bayishibua mudimu wa mitendelelu, kadi bakayishibua mushindu kayi wa kutendelela, mushindu kayi wa kusemena ha buihi ne Mufuki wabo, mushindu kayi wa kunvua ne kutumikila mayisha a Nyuma wandi. Ngelelu wa menji muvuijibue wa tshijila wakadi umueneka hatoke mu tshibutshilu tshia bintu mu nzubu wa Nzambi, bihia-bihia ne bia kale, ne nyuma wa Nzambi wakadi umueneka mu tshiprofete ne mu misambu ya tshijila”. - Education, p. 47

---

3. MUDIMU WA BIANZA Disatu 09/06

a. M'muaba kayi wakaheta Yezu nkoleshelu wandi ? Matayo 13: 54-56 “Yezu muana mukese, kayila mu tulasa tua mu nsunagoga nansha. Mamu wandi wakadi muyishi wandi wa kumudilu mu bantu. Mukana muandi, ne ku mikanda ivunga ya ba profete, wakayila malu a mu diulu. Meyi onso akambilaye yeye nkayandi Mose bua Isalele, wakayila katataka ku a makasa mamu wandi. Bu muakadiye wenda ulua tshitenda ne nsonga, kakabuela mu tulasa tua bayishi banene. Kakajinga nkoleshelu wa kuheta ku mishimi mikuabo; bualu Nzambi wakadi Muyishi wandi .“Mu moyo wandi ha buloba, Yezu wakadi mukuatshi wa mudimu bikole. Wakadi ne malu a bungi akadiye kayi witabuja; ne wakadi ne kudienzeja kua bungi. Kunyima kua yeye mu buele mu mudimu wandi, wakadi wamba ne, 'Bûndi n'abo mbua kuenza malu a wakuntuma hatshidi munya; butuku bulualua budi muntu kayi mumanye mua kuenza mudimu' (Yone 9: 4). Yezu kakadi uhanga, uya ku luseke ne bujitu buandi ne mudimu, bu mudibo benza kudi ba bungi badi bamba ne m'bamulondi bandi. Bualu badi bakeba bua kuehela bulongame buandi, ke nanku ba bungi badi batekete ne kabayi bakumbane”. - The Desire of Ages, pp. 70–73 b. M'muaba kayi utudi tusangana bintu bidi bikumbane bua nkoleshelu mulelela ha kumbusha Mukanda wa Nzambi ? 2 Tesalonike 3: 8-10 “Mukanda wa kuyisha nawu udi mukumbanyine ntema ya bungi. Tulasa tudi ne tshiakuashibua, ne ngelelu wa menji wa ha mûlu, ne nsombelu muimpe, bidi ne tshia kulongolola makole mimpe bua kudiunda kua kuibidija kua mubidi ne kua kukuata kua mudimu. Mayisha a ha malu a madimi adi ne tshia kufidibua, neakuandamuna kua bintu bidi bikengela kuhana – bua luhetu lua diku, mayisha a kulamba ka kudia bua bukole bua mubidi, mushindu wa kutela kua bilamba, bidi bia bukalanga, kondaha kua masama, ne malu a buena â. Madimi, matanda, ne nzubu ya biondahelu bidi ne tshia kulongolodibua, ne mudimu mu bituha bishilangane udi ne tshia kuenjibua ku bulombodi bua bayishi badi bamanyi.“Mudimu udi ne tshia kufidibua mu bituha biawu bionso. Hadi muntu yonso dijinga ne amue mamanya a midimu avuijibua mukumbane mu malu makese. Nsonga yonso mu kuhatuka mu kalasa, udi ne tshia kuikala muhete dimanya dia kuenza imue midimu, anyi kuyenza mudibi bikengela, ahu udi mua kuheta tshia kudia”. - Education, p. 218

---

4. MUKANDA WA NZAMBI MU NKOLESHELU Dinayi 10/06

a. N'kuyila kayi kua tshisumi kua Mukanda wa Nzambi kudi kukumbanyina bua bualu buetu ? Misambu 119: 98-101; Nsumuinu 2: 1-5 “Ku mutu kua mikanda yonso mikuabo, diyi dia Nzambi didi ne tshia kuikala kuyila kuetu, mukanda munene, wa ntaku wa nkoleshelu yonso; ne bana betu badi ne bua kuheta nkoleshelu mu malu malelela adi asanganyibua mu Mukanda wa Nzambi, adi kâyi alonda bikadilu bia kale”. - Testomonies, vol. 6, pp. 131, 132“Mukanda wa Nzambi udi uyisha disua dionso dia Nzambi bua bana balume ne bakaji ba Adama. Mukanda wa Nzambi udi ulombola moyo, utuyisha bua ngikadilu utudi ne bua kulongolola bua moyo utshilualua, udi kawuyi ufua”. - Fundamentals of Christian, pp. 320, 391 b. Bu mutudi tudifila bua kuyila ne kuheta nkoleshelu, n'tshinyi tshidi ne tshia kuikala malu etu a kuteka mu mulongo wa kumpala ? Yeshaya 55: 2, 3; Misambu 25: 4, 5 “Lelu nsonga milume ne mikaji idi ihitshisha bidimu bia bungi mu kukeba bua kumanya nkoleshelu udi wa mitshi ne nsona, bua koshibua mu dibutuka dinene dia ku nshikidilu. Babungi m'bahitshisha matuku a moyo wabo mu kuyila kua mikanda, bua kuhita nkoleshelu waya kufua nabo. Nkoleshelu wa nunku Nzambi kena umubala ne mushinga nansha. eku n'kuheta kua menji a kuyila kua bafundi bashilangane, badi kabayi ne butoke ne mushinga wa diyi dia Nzambi. Bayidi ba bungi bakashiya kalasa kajikija kabayi bakumbane bua kuakidila diyi dia Nzambi, ne kabayi ne kanemu kakadibo naku kumpala kua bobo kubuela mu kalasa, ditabuja diabo kujimina mu kudienzeja bua kusunguluka mu mayila mashilangane. Kabakabala Mukanda wa Nzambi bu bualu mu nkoleshelu wabo, kadi mikanda misangisha ne dihanga lulamatu ne kutampakaja kua mayisha adi kâyi unvuika biakatekibua kumpala kuabo”. - Ibid, pp. 446, 447“Bantu kabena dijinga kumbusha bilele ne mayisha bua kuvuija mifundu idi yunvuika. Bidi mu kutshinkidila ne diba didi dikenka mu diulu munda-munya, bajinga butoke bukese budi bukenkesha bua buloba budiunda mu butumbi buabo”. - Ibid, p. 391“Mukanda wa Nzambi kawena mua kutuadibua mu tulasa tuetu bua kuikala musomba munkatshi mua badi kabayi bena lulamatu. Mukanda wa Nzambi udi ne tshia kuikala ntaku ne tshiena bualu tshia nkoleshelu. M'bulelela bua se tudi bamanye bia bungi diyi dia Nzambi udi ne moyo, kutamba mutuakadi badimanya mu bikondo bia kushala, kadi kutshidi bia bungi bia tuetu kuyila. Didi ne tshia kuangatshibua bu diyi dia Nzambi udi ne moyo, ne kudibala ne mushinga bu dia kumpala, ne bu dia nshikidilu, ne dimpe kutamba bintu bionso. Nunku netumone kudiunda kulelela kua mu nyuma”. - Ibid, p. 474

---

1. NKOLESHELU BUA TSHIENDELELE Ditanu 11/06

a. M'mushindu kayi udi meyi a Nyuma amba bua Mifundu ya tshijila ? 2 Timote 3: 15, 16 “Mu bikondo bionso bia tshiendelele, mifundu neyiye kukenka munya mutambe, bu mudi mabue a mushinga mukole; kadi katuena mua kunvua tshituha malu â malelela nansha. Bulelela buimpe bua mushinga bua Mukanda wa Nzambi butudi bitabuja budi ne tshia kukuata mudimu munene bua bualu buetu, ne tuetu kunvua bikole bitambe malu â tshidi tshitamba kubueja malu â mu menji a bantu bakuabo”. - The Review and Herald, 10 Avril 1888 b. N'tshinyi tshikala biena bualu bia kuyila mu Bukalenge bua Nzambi, ne nganyi waya kuyisha bahikudibue ? Matayo 23: 10; Efeso 6: 9; 1 Kolinto 2: 9 “Mu Yelushalema Muhia-muhia, menji adi kâyi afua neabandile disanka dia malu a kukema a bukole bua bufuki, malu masokoka a dinanga dia buhikudi. Tshituha tshionso tshia mubidi ne tshiya kudiunda, bukole bonso bua kuenza bualu ne budiunde. Diheta dia dimanya kadiena diya kuhungija menji, anyi makole ajika. Mudimu munene udi ne tshiakuya kuenjibua, kufika ku bihatshila bia ha mûlu, kulumba kua malu kua ha mûlu ne kumueneka, ne bijuke kûlu malu mahia-mahia a kutshimuna, malu mahia-mahia a kunvua biena bualu bihia-bihia bia kukoka nabi makole a menji, a musuka, ne mubidi”. - The Great Controversy, p. 677“Tshiena bualu tshia buhikudi tshidi bualu budi banjelo bajinga bua kubutangila; ne buikale dimanya dia malu ne musambu wabahikudibue katshia ku bikondo bia kale bia tshiendelele. Kabiena bikumbane bua menji adi ne nktema ne bua kuyila mpidieu anyi ? Katuena ne tshia kuya kutumbisha Nzambi ne mutshima, musuka ne diyi 'bua bienzedi biandi bia kukema bidiye wenzla bana ba bantu' anyi ? (Misambu 107: 8)”. - Testimonies, vol. 5, p. 318

Makonka a kuambulula dilesona Disambombo 12/06

a. M'bualu kayi bua mushinga bua nkoleshelu wa buena Kilisto budi misangu ya bungi bulengulula lelu ? b. Bua tshinyi kuakadi 'Tulasa tua baprofete' ne totu kukuma dikasa dimpe mu mudimu watu ? c. M'mushindu kayi utudi mua kubuela mu njila wakakoleshibua Yezu ? d. M'mu luidi kayi mudi Misangu ya bungi Mukanda wa Nzambi mujimine mu bilongedi bia bungi bia bena Kilisto ? e. M'mudimu kayi udi nawu nkoleshelu mu tshiendelele ?