1. TSHIHATSHILA TSHIA TSHITENDELELU Dia kumudilu 10/05

a. M'muaba kayi ha buloba wakalaya Nzambi bua kusomba munkatshi mua bantu bandi ? Ekesode 25: 8; 2 Kulondolola 6: 1, 2; Yeshaya 66: 1. “Tshikondo tshiakadi Mose wasa tshitendelelu muaba wa kusomba bua Nzambi, wakalombodibua bua kuenza bintu bionso bilondeshela luidi lumuleja ku mukuna . nunku kudi Isalele, wakadiye ujinga bua kuenza muaba wandi wa kusomba, wakaleja hatoke menji andi a butumbi a ngikadilu. Luidi luakalejibua kudibo ku mukuna tshikondo tshiakafidibua mikenji ku Sinayi”. - The Desire of Ages, pp. 208, 209“Bonso badi banange kukukuila Nzambi ne kubala ne mushinga dibenesha dia dikalangana diandi dia tshijila, nebaye kuleja hatoke nyuma wa momumue wa kudifila mu kulongolola kua nzubu muaba udiye mua kusambakena ye nabo”. - Patriarchs and Prophets, p. 344“Mu nzubu mudi Yezu ne bua kusambakena ne bantu bandi udi ne tshia kuikala mulongolola bimpe ne udi ne milowo (ukoka). Nansha bu bikala bena kuitabuja bakese mu muaba ewu, wikala mulongolola bimpe nansha yeye muikale nzubu mukese wa buhuekele, ne mu kumufila kudi Nzambi, m'bimpe kubikila Yezu bua kulua kunudi bu muenyi wenu”. - Testimonies, vol. 5, p. 269 b. N'tshinyi tshiakadi tshihatshila tshia Nzambi mu kusomba ne bantu bandi ? Ekesode 29: 45; Yeshaya 57: 15 “Ku bikondo bia tshiendelele, tshiakadi tshihatshila tshia Nzambi, bua tshifukibue tshionso tshidi ne moyo kutuadija ku Muselafima wa butoke ne wa tshijila tô ne kudi muntu bua kuikala ntempelo muaba wa kusomba wa Mufuki”. - The Desire of Ages, p. 161

---

2. TSHITENDELELU TSHIA HA BULOBA Dibidi 11/05

a. Tshikondo tshiakaheta Mose bukokeshi bua kuibaka tshitendelelu, n'tshifundu kayi tshiakalejibua kudiye ? Ekesode 25: 9, 40; Ebelu 8: 5. Tshionso tshiakadi ne tshinfuanyi kayi ? Ebelu 8: 1, 2 “Lukonku ludi ne, tshitendelelu n'tshinyi ? diandamuna didi ditoke mu mifundu. Muaku, 'Tshitendelelu', m'bu mudiwu muamba mu Mukanda wa Nzambi, udi utuma diambedi ku ntenta wa kusambakena muibaka kudi Mose, bu tshinfuanyikiji tshia bintu bia mu diulu, ne tshibidi, ku 'ntenta mulelela' wa mu diulu, udi tshitendelelu tshia ha buloba tshidikija. Ku lufu lua Kilisto midimu ya mu tshitendelelu tshia ha buloba yakafika ku ndekelu wayi. 'Tshitendelelu tshilelela' tshia mu diulu tshidi tshitendelelu tshia tshihungidi tshihia-tshihia”. - The Faith I Live By, p. 202 b. M'mushindu kayi wakadi tshitendelelu tshitahulula, ne m'midimu kayi yakadi yenzekamu ku dituku ne dituku ? Yehezekele 45: 4; Ebelu 9: 2 – 5 “Tshitendelelu tshiakadi tshitahulula mu bituha bibidi bitahulula ne tshilulu tshikudika tshimpe kumona, tshikudika ku makuinji a ngolo; tshilulu tshikudika tshia mushindu wa momumue tshiakadi tshikanga tshibueledi tshia muaba wa ku mpala .“Dia muamua dia tshilulu tshikudika, ke muakadi muaba mutambe tshijila, muaba wakadi nsangilu wa mudimu wa dilengejibua ne buakuidi, ke muaba wakadi mushete wa tshihungidi, mushete wa mitshi ya acacia, mubuikila munda ne hambelu ne ngolo, ne muikale ne tshibuikidiji tshia ngolo ha mutu. Wakadi muenza bua kutekelamu mabue a mikenji dikumi. Ke bobo kûbikila ne mushete wa tshihungidi tshia Nzambi, anyi mushete wa tshihungidi, bualu mikenji dikumi idi ntaku wa tshihungidi tshidi hankatshi ha Nzambi ne Isalele.“Tshibuikiji tshia tshijila tshia mushete, tshiakadi tshibikidibua ne tshishikaminu tshia luse .“Ha mutu ha tshishikaminu tshia luse, hakadi Shekina dimueneshibua dia hatoke dia dikalanganaku dia Nzambi; ne hankatshi ha bakeluba, Nzambi wakadi umanyisha disua diandi”. - Patriarchs and Prophets, pp. 347–349

---

3. MULAMBU WA BUBI Disatu 12/05

a. M'bualu kayi buakalongolodibua bua bantu babi bakadi bashiha mikenji mu dihanga ? Bua Muakuidi: Lewitiki 4: 2 – 6; Bua Nsangilu: Lewitiki 4: 13 – 15; Bua Mukokeshi: Lewitiki 4: 22 – 24; Muntu yonso: Lewitiki 4: 27 – 29 “Ku dituku, ku dituku, muena bubi wakadi unyingalala bua bubi, wakadi utuala mulambu wandi ku tshibi tshia ntenta wa kusambakena, ne wakadi uteka bianza ha mutu ha tshimuna tshia kushiha, utonda bubi buandi mu mushindu wakuleja ne bubi buandi wakadi ubuela mu mulambu wa kufila wakadi kawuyi mumanye bubi. Nunku hashishe nyama wakadi ushihibua.'Kakuyi dihuekesha dia mashi, 'mudi mupostolo wamba, kakuena dibuikidila dia bubi'. Mashi adi moyo wa tshintu' (Lewitiki 17: 11).Mukenji mushiha wa Nzambi wakadi ulomba moyo wa mushihi wawu. Mashi akadi aleja moyo wa muenji wa bubi, bua dihila dionso mulambu wa nyama wakadi udiambula ne muakuidi wakadi wangata mashi a tshimuna atshi uya nawu mu muaba wa tshijila ne wuamiamina ku mpala kua tshilulu tshikudika, kunyima kuatshi kuakadi mushete wakadi mikenji yakadi muenji wa bubi mushihe. Mu kuenza bualu ebu nunku, bubi buakadi mu mashi, bubueja mu tshinfuanyi mu tshitendelelu. Mu bituha bikuabo mashi kabakadi baya nawu mu muaba wa tshijila; kadi munyinyi bakadi bawudia kudi muakuidi, bu muakambila Mose bana balume ba Alona ne, 'n'tshintu tshia tshijila, tshiakanuha Yehowa bua kumusha n'atshi bubi bua bantu' (Lewitiki 10: 17). Malu â onso akadi mafuanangane akadi aleja kutuala kua bubi bua muntu udi unyingalala bua bubi mu tshitendelelu.“Mudimu ewu wakadi wenzeka ku dituku ne dituku, mu tshidimu tshijima. Bubi bua Isalele buakadi nunku bubueja mu tshitendelelu, ne mudimu wa ha buawu wakadi ukengedibua bua kubumbusha mu tshitendelelu. Nzambi wakadi muamba bua kulengeja tshituha tshionso tshia tshijila tshia mu tshitendelelu”. - The Great Controversy, pp. 418–419 b. N'tshikondo kayi tshiakatekibua bualu bua kufila kua milambu ya mashi, ne m'buatshinyi ? Genese 4: 3-5; Galatia 3: 19 “Tshikondo tshiakakuluka muntu mu kushiha kua mikenji, mikenji kayakashintuluka nansha, kadi mushindu wa kulongolola malu wakajadikibua bua kuhingaja muntu ku ditumikila. Musungidi wakalayidibua, ne milambu ya kufila yakalejibua yamba bua lufu lua Kilisto, bu mushihi wa mikenji, nanku kakuakadi mua kuikala lufu, ne dijinga dia Musungidi; bu tshiheta, kakuakadi mua kuikala dijinga dia milambu ya kufila”. - Patriarchs and Prophets, p. 363

---

4. MUAKUDI WA MATUKU ONSO (MUKESE) Dinayi 13/05

a. M'banganyi bakadi babikidibua kudi Nzambi bua kukuata mudimu bu Bakuidi ba mu Tshitendelelu ? Ekesode 28: 1; 29: 4. N'diyi kayi dia hatoke diakafidibua kudibo ? Lewitiki 10: 9-11 “Bakuidi bakadi bosha musenga wa kamonya ku mpala kua Mukelenge bakadi balomba bua kukuata mudimu ne kahia kakadi Nzambi utemesha, kakadi katema munya ne butuku, kakayi kajima. Nzambi wakafila malu akulonda munvuija, mushindu kayi udi kukuata mudimu mu bituha bionso bu mudi mudimu wandi ukengela kuwenza, ne bintu biakadi bua kumukukuila biakadi ne tshia kuikala bia tshijila bu mudi ngikadilu wandi wa tshijila. Ne yonso wakadi uya ku luseke lua malu akadiye uleja bua kuâlonda akadi bua mudimu wandi wa tshijila wakadi unyokibua ne lufu”. - Temperance, p. 43“Muambuluisha kudi bana bandi balume Alona wakadi ufila milambu yakadi Nzambi ulomba, ne wakadi ujula bianza biandi bua kusankisha (kubenesha) bantu. Bionso biakadi bienjibua ku muakadi Nzambi wamba, ne wakadi witabuja mulambu, ne uleja hatoke butumbi buandi mu mushindu wakadi umueneka; kahia kakadi kafuma kudi Mukelenge bua kosha mulambu ha tshioshelu”. - Patriarchs and Prophets, p. 359 b. M'mushindu kayi wakadi muakuidi ufila milambu misangu yonso ? Ekesode 29: 39. N'tshinyi tshidi bualu ebu mua kuleja mu matuku etu ? Misambu 55: 17 “Bu muakadi muakuidi ubuela mu muaba wa tshijila dinda ne dilolo, mu tshikondo tshia musenga wa kamonya, mulambu wa ku dituku wakadi ha buihi bua kufidibua ha tshioshelu mu luhangu (muaba wa tshinsangansanga). Etshi tshiakadi tshikondo tshia ntema ya bungi kudi batendeledi bakadi badisangisha mu ntenta wa kusambakena. Ku mpala kua kubuela kuine, ku dikalanganaku dia Nzambi mu kuhitshila mu mudimu wa muakuidi, bakadi bakeba kuditangilula mu mitshima ne kutonda kua bubi. Bakadi badisanga mu bobumue ne mutendelelu wa bahuwa, ne mpala yabo mitangija ku muaba wa tshijila. Nunku kulomba kuabo kuakadi kubanda ne muîshi wa kamonya, ne ditabuja mu malu mempe a Musungidi mulaya, mu kuleyibua kua mulambu wa kulengejibua. Meba a mulambu wa dinda ne dilolo akadi mabala bu meba a tshijila, ne bakadi bâtangila bu tshikondo tshia kutendelela mu tshisamba tshia bena Yuda. Ne mu bikondo bia ku nshikidilu, tshikondo tshiakatangalaka bena Yuda kuya mu buhika mu maloba a kule, bakashala bamanya diba dia kutendelela, mpala yabo mitangija ku Yelushalema ne bakadi balambula majinga abo kudi Nzambi wa Isalele. Mu tshilele etshi, bena Kilisto badi ne tshilejelu tshia kutendelela kua dinda ne dilolo. Nzambi udi uhisha kufila kua hatuhu kua milambu kakuyi nyuma wa kutendelela. Udi utangila ne disanka dinene kudi aba badi bamunange, badi badihuekesha dinda ne dilolo bua kukeba difuidibua dia luse bua bubi buenza ne kuleja malomba abo ne dijinga dia kuheta masanka”. - Ibid, pp. 353, 354

---

5. MUAKUIDI MUNENE Ditanu 14/05

a. Nganyi wakasungudibua kudi Nzambi bua kuikala muakuidi munene mu tshitendelelu tshia mu tshihela ? Ekesode 29: 5 – 7. N'tshinyi tshiakadi mudimu wa muakuidi munene ? Ebelu 9: 25 “Amu musangu umue ku tshidimu, muakuidi munene wakadi ubuela mu muaba mutambe tshijila, kunyima kua kudilongolola kua ntema ya bungi. Disu dia muntu udi ufua kadiakadi mua kutangila muaba mutambe tshijila amu muakuidi munene nkayandi, bualu wakadi muaba wa ha buawu wa kuikala wa butumbi bua Nzambi buakadi bumueneka. Muakuidi munene misangu yonso wakadi ubuela ne kuzakala,, hakadi banu bashiale bindile kuhingana (kuhatuka) kuandi ne dihuwa dia hatoke”. - The Spirit of Prophecy, vol. 1, pp. 274, 275 b. Tshikondo tshiakadi Muakuidi munene ukuata mudimu mu muaba mutambe tshijila mu dituku dia kulengejibua, bantu bakadi benza tshinyi ? Lewitiki 23: 27-32. N'tshikondo kayi tshiakatuadija dituku dia kulengejibua mu diulu ? Danyele 8: 14; Yeshaya 22: 12-14, 20-22 (kutangila Buakabuluibua 3: 7, 8). “Mu tshidimu tshia 1844, Muakuidi wetu munene wa kabuela mu muaba mutambe tshijila wa tshitendelelu tshia mu diulu, bua kubangisha mudimu wa tshilumbu tshia ditangilula . tshikondo tshiakadi mudimu wa dilengeja wenzeka kudi muakuidi munene mu muaba mutambe tshijila wa tshitendelelu tshia ha buloba, bantu bakadi balombibue bua kunyingalaja misuka yabo ku mpala kua Nzambi, ne kutonda bubi buabo, nunku bakadi balengejibua ku bubi buakadi bumbusha. Kakuena muntu mulombibue bikese kutudi mu dituku edi dia kulengejibua, tshikondo tshidi Kilisto mu tshitendelelu tshia mu diulu ulomba bua bantu bandi, ne ku nshikidilu, dihangadika didi kadiyi kushiha, didi diangatshibue ha bualu bonso ?”. - Selected Messages, bk 1, p. 125

Makonka a kuambulula dilesona Disambombo 15/05

a. M'masanka kayi adi afuma ku dikala ne tshitendelelu tshia kukukuila Nzambi ? b. Mose wakamona tshinfuanyi tshia ngikadilu wa Nzambi (Mikenji dikumi) ne tshinfuanyi tshia muaba wandi wa kuikala. M'mushindu kayi udibio bionso bibidi bilamakaja ? c. M'mushindu kayi wakadi malu a kufila kua milambu enzeka mu Isalele wa kale, ne m'mushindu kayi udiwu enzeka lelu ? d. M'bualu kayi budi bumueneka hatudi tulengulula kutendelela kua dinda ne dilolo ? e. Bua tshinyi bidi ne mushinga bua kunvua Dituku dia kulengejibua ?