1. DILENGEJIBUA BUA BUBI Dia kumudilu 17/05

a. M'bualu kayi bua ngasa buakenjibua bua kulengeja bubi bua Adama ? Genese 3: 15, 21 “Tshikondo tshiakabuela Adama mu buteyi bua N'satana ne kuenza bualu buakadi Nzambi mumukandika ne kayi kubuenza, Kilisto, Muana wa Nzambi, wakimana hankatshi ha badi ne moyo ne bafue wamba ne 'tshibawu (dinyoka) tshikale kûndi. Ndi nya kuangata muaba wa muntu'. Mpesha diteta dikuabo. Kushiha kua mikenji kuakateka buloba bujima muinshi mua tshibawu tshia lufu. Kadi mu diulu diyi diakunvuika ne 'nakusangana tshia kumuhikula n'atshi' (Yobo 33: 24). Yeye wakadi kayi mumanye bubi, wakavuijibua bubi bua muntu mukuluke'”. - The Signs of The Times, 27 Juin 1900 b. M'bualu kayi buakajadika Nzambi, ne m'mushindu kayi wakakuluka Adama tshikondo tshiakufila kuandi mulambu wa ku mudilu bua bubi buandi ? “Bu muakadi Adama ushiha mulambu wakadi kawuyi mumanye bualu, wakadi uzakala ne wela menji ne bubi buandi buakadi ne bua kuhuekesha mashi a Muana wa mukoko wa Nzambi udi kawuyi tshilema. Bualu ebu buakamuhesha luidi lukole lua bunene bua kushiha kuandi kua mikenji, kunvua kakuyi kukeba tshintu kadi lufu lua muana munangibue wa Nzambi wakadi ne bua kufuta tshibawu”. - Patriarchs and Prophets, p. 68

---

2. MUDIMU WA KU DITUKU Dibidi 18/05

a. M'mudimu kayi wa ku dituku wakadi nawu bakuidi bonso bakuabo mu tshitendelelu ? Nomba 28: 4; Ebelu 10: 11 “Mudimu wa mu tshitendelelu tshia ha buloba wakadi mu bituha bibidi; bakuidi bakadi bakuata mudimu ku dituku mu muaba wa tshijila, ne musangu umue ku tshidimu muakuidi munene wakadi ukuata mudimu wa ha buawu wa dilengejibua mu muaba mutambe tshijila wa mu tshitendelelu, bua kutshilengeja. Ku dituku ne ku dituku muntu muena bubi wakadi ulua ne mulambu wandi ku tshibi tshia ntenta wa kusambakena, ne uteka tshianza tshiandi ha mutu ha tshimuna tshiakushiha, utonda mibi yandi mu tshinfuanyi tshia kuyibueja mu nyama wa kulambula wakadi kayi mumanye bualu. Nyama wakadi ushihibua”. - The Great Controversy, p. 418“Dinda dionso ne dilolo muana wa mukoko wa tshidimu tshimue wakadi woshibua ha tshioshelu, ne minyinyi yandi yakadi bua kulambula, nunku biakadi bileja kudifila kua ku dituku kua tshisamba tshia Yehowa, ne dikokela diabo ha mashi adi alengeja a Kilisto. Nzambi wakaleja hatoke bua se mulambu wakadibo balue nawu bua mudimu wa mu tshitendelelu wakadi ne bua kuikala 'kawuyi tshilema' (Ekesede 12: 5). Bakuidi bakadi bakenketa nyama yonso yakadibo balua nayi bu milambu ne bakadi babenga nyama yonso wakadi musangana ne tshilema”. - Patriarchs and Prophets, p. 352 b. Ku mpala kua bakuidi kubuela mu tshitendelelu, m'bualu kayi buakadibo bambila bua kuenza ? Ekesode 30: 18-21; 40: 30-32 “Hankatshi ha tshioshelu ne tshibi tshia ntenta wa kusambakena hakadi dilonga dia mayi a kowa, diakadi kabidi dia tshiamu tshia mitaku, dienza ne muenu yakadi milambu mifila kudi bakaji ba mu Isalele ya budisuile. Ku dilonga dia mayi bakuidi bakadi bowesha bianza ne makasa abo, hakadibo ne bua kubuela miaba ya tshijila anyi kusemena ha buihi ne tshioshelu bua kufila milambu ya kôsha kudi Mukelenge”. Ibid, pp. 347, 348“Nunku bakuidi kabakadi babuele mu tshitendelelu ne bisabata ku makasa nansha. Tutuha tua luhuishi tuakadi tubakuate tuakadi tunyanga muaba wa tshijila. Bakadi bakohola bisabata biabo mu luhangu (mu tshinsangansanga) ku mpala kua kubuela mu tshitendelelu ne kôwesha kabidi makasa ne bianza biabo, ku mpala kua kukuata mudimu mu tshitendelelu anyi ku tshioshelu tshia milambu ya kôsha. Nunku bakayila dilesona dia se manyanu onso akadi ne bua kumbushibua kudi aba bakadi ne bua kusemena ha buihi ne dikalanganaku dia Nzambi”. - Ibid, p. 350

---

3. MUABA MUTAMBE TSHIJILA Disatu 19/05

a. N'tshinyi tshiakadi tshitahulula bibambalu bibidi, ne n'tshintu kayi tshiakadi tshiteka mu muaba mutambe tshijila ? Ekesode 26: 31-34; Ebelu 9: 3-5 “Tshilulu tshikudika tshimpe be, tshiakadi tshienza tshisasa tshia mûlu, bu mudi mpala ya banjelo, tshikala mu lubule, ne tshikunzubile, ne tshikunze kunzùù, bisangisha ku buimpe kumona ku mesu. Ne diamuamua dia tshilulu tshikudika muakadi Shekina wa tshijila kulejibua kua hatoke kua butumbi bua Nzambi, buakadi amu muakuidi munene wimana ku mpala kuabo ne ushala ne moyo”. - The Great Controversy, p. 414“Bintu bionso bia mu tshibambalu etshi tshia ku mpala biakadi bia ngolo muimpe mutambe, ne biakadi bileja tshinfuanyi tshia ewu wakadi ubuela muaba ewu. Tshilulu tshikudika tshiakadi tshitahulula bibambalu ebi bibidi biakadi bia butumbi. Tshiakadi ne mekala mashilangane, ne bintu bishilangane, tshiela bikuha bimpe be kumona, ne bimueneka bia ngolo, biakadi bileja banjelo”. - Spiritual Gifts, vol. 1, p. 159 b. M'mushindu kayi wakadi Nzambi uleja dikalanganaku diandi hatoke munkatshi mua bana ba Isalele, nangananga mu tshitendelelu ? Ekesode 40: 34, 35; Lewitiki 16: 2 “Diamuamua dia tshilulu tshikudika, mu tshibambalu tshibidi muakadi muteka mushete wa bujadiki, ne tshilulu tshimpe tshiakadi tshikudika ku mpala kua mushete wa tshijila. Tshilulu etshi tshikudika katshiakadi tshifika mûlu mua ntenta wa kusambakena nansha. Butumbi bua Nzambi buakadi ha mutu ha tshibuikidiji tshia mushete tshia luse, buakadi bumueneka mu bibambalu bionso, kadi butambe kushadila mu tshibambalu tshia kumpala. Kumpala kua Mushete, wakadi mutahulula kudi tshilulu tshikudika, kuakadi tshioshelu tshia ngolo tshia musenga wa manananshi. Kahia ka ku tshioshelu etshi kakadi katemesha kudi Mukelenge nkayandi, ne wakadi udishibua ne muhuya wa kamonya ka tshijila, biakadiye usanka nabi, wakadi wûla tente mu tshitendelelu ne muhuya munya ne butuku. Muhuya wa muishi wa kamonya wakadi uya tô ne mu ntanta yakadi minyunguluke ntenta wa kusambakena. Tshikondo tshiakadi muakuidi ulambula musenga wa kamonya kumpala kua Mukelenge, wakadi mutangile ha tshibuikidiji tshia Mushete tshia luse. Nansha nanku, kakadi mua kulumona, ne kumanya muaba wakadilu; ne bu muakadi muishi wa kamonya ubanda bu mudi ditutu, butumbi bua Nzambi buakadi buhueka ha tshibuikidiji tshia Mushete tshia luse, ne buakadi bûle mu muaba mutambe tshijila ne buakadi bumueneka mu muaba wa tshijila; ne butumbi misangu yonso buakadi bûle mu bibambalu bionso ne muakuidi kakadi ukumbana bua kukuata mudimu ne wakadi wenzejibua bua kuimana ku tshibi tshia ntenta wa kusambakena”. - The Spirit of Prophecy, vol. 1, pp. 273, 274“Ha mutu ha Mushete, hakadi tshibuikidiji tshia tshijila, tshiakadi muaba wa luse, tshintu tshimpe kutamba tshienza, ha mutu hatshi hakadi himane bakeluba babidi, ewu ku luseke ewu ku lukuabo ne bionso biakadi bienza ne ngolo mutambe bukole. Mu tshibambalu etshi ke muakadi dikalanganaku dia Nzambi dilejibue hatoke mu ditutu dia butumbi hankatshi ha bakeluba”. - The Great Controversy, p. 412

---

4. MUDIMU WA MUAKUIDI MUNENE Dinayi 20/05

a. M'bualu kayi buakadi buenzeka mu dituku dia dikumi dia ngondo wa muanda mutekete ? Lewitiki 16: 29-31; Nomba 29: 7 “Musangu umue ku tshidimu, mu dituku dinene dia kulengejibua, muakuidi wakadi ubuela mu muaba mutambe tshijila bua kulengeja tshitendelelu. Mudimu wakadi wenjibua ku mu tshidimu, udi mukumbaja musangu umue ku kukuata eku kua mudimu”; - The Great Controversy, p. 419“Mu dituku dia dikumi dia ngondo wa muanda mutekete, muakuidi munene wakadi ubuela mu tshibambalu anyi mu muaba mutambe tshijila, muakadiye mukandika bua kubuela diba dikuabo dionso, bua kayi kufua. Kulengeja kua tshitendelelu kuakadi kuenjibua musangu umue ku tshidimu”.- The Spirit of Prophecy, Vol.4, p.264“ Mu tshikondo tshia Mose, bualu bua kulengeja kua tshitendelelu anyi dituku dinene dia kulengejibua diakadi dienzeka mu dituku dia dikumi dia ngondo wa muanda mutekete wa bena Yuda ( Lewitiki 16: 29 – 34), tshikondo tshiakadi muakuidi munene, ukuata mudimu bua dilengejibua dia Iselele mujima, ne bubi buabo buakadi nunku bumbusha mu tshitendelelu, wakadi upatuka ne ubenesha bantu”.- The Great Controversy, p.400b Kumpala kua kubuela mu muaba mutambe tshijila, n'tshinyi tshiakadi tshiambila muakuidi muene bua kuenza? Lewitiki 16 : 2 – 6, 16“Kumpala kua tshibuikidiji tshia luse Nzambi wakadi uyukila ne muakuidi munene. bu bikala muakuidi wakushala tshikondo tshile bitahuluke ne meba atuye wenza mu muaba mutambe tshijila, bantu bakadi misangu ya bungi bakuatshika bowa, batshina bua bubi buabo anyi bua bumue bubi bua muakuidi, butumbi bua Mukelenge bua kumushiha. Kadi hakadi mutoyi wa ngonga unvuika, ngonga yakadi ku bilulu biandi, bantu bakadi ne ditalala dinene (basanka). Muakuidi wakadi uhatuka ne ubenesha (usankisha) bantu”. - The Spirit of Prophecy, vol. 1, p. 275“Mu muaba mutambe tshijila, 'NDI MUNDI' wakawuteka muaba wandi wa kuikala, ne kakuena muntu wakadi muanyishila bua kubuela mu, kayi mubikila kudi Nzambi. Muamua, ha mutu ha tshibuikidiji tshia luse, hakadi habuikidija kudi mahuahua a bakeluba, muaba wakadi butumbi buandi busomba – Shekina, ha tshiadi tshia muakuidi munene, hakadi mabue a mushinga mukole tshimanyinu tshia kashidi, mamanyibue akadi luhangu lua tshijila lua tshitendelelu, meyi a hatoke a Yehowa kudi bantu bandi. Diha dia kukema, dia kudi Umue wa tshijila, Mufuki wa diulu ne buloba, kuakalejaye nunku butumbi buandi, ne disua diandi kudi bana ba bantu!”. - The Review and Herald, 2 Mars 1886

---

5. MBUJI IBIDI Ditanu 21/05

a. Mbuji ibidi yakadi yangatshibua mu dituku dia dilengejibua yakadi yunvuija tshinyi ? Ne n'tshinyi tshiakadibo benza ne mbuji wakadi usungudibua bua kuikala mulambu wa kufila bua bubi ? Lewitiki 16: 7, 8, 16 “Mu dituku dia dilengejibua bana ba mbuji babidi bakadi batuadibue ku tshibi tshia ntenta wa kusambakena ne n'shobo yakadi yedibua bua kumbusha umue, 'biakuata nshobo umue, n'ngua Yehowa, ne biakuata nshobo mukuabo, n'ngua Azazele' (Lewitiki 16: 8). Mbuji wakadi nshobo ikuata ne n'ngua Yehowa, wakadi ushihibua bu mulambu bua bubi bua bantu”. - The Great Controversy, p. 419 b. N'tshinyi tshiakadi tshifikila mbuji wa Azazele wakadi ulekedibua ne moyo ? Lewitiki 16: 20-22. Mbuji eyi yonso ibidi yakadi ileja tshinyi ? “Mudimu wa Kilisto wa kuhikula kua bantu ne kulengeja buloba ku bubi newujike mu kumbusha kua bubi mu tshitendelelu tshia ha buloba, ne kuhuila Nsatana bubi ebu bonso, yeye waya kuambula tshibawu tshia ndekelu”. - Patriarchs and Prophets, p. 358“Tshikondo tshiakadi mudimu mu muaba mutambe tshijila ujika, ne bubi bua Isalele bumbusha mu tshitendelelu kudi mashi a mulambu wa bubi, nunku mbuji wa Azazele wakadi ulejibua bua ne moyo kumpala kua Mukelenge .Mu mushindu wa momumue, tshikondo tshidi mudimu wa kulengeja tshitendelelu tshia mu diulu mukumbane, ne kumpala kua Nzambi ne kua banjelo ba mu diulu ne kua musumba wa bahikudibue, bubi bua bantu nebutekibue ha mutu ha Nsatana; ne ne bamua biandi neatumibue mu buloba bua nkayandi, mudi kamuyi bantu, mu tshihela tshiume”. - The Great Controversy, p. 658

Makonka a kuambulula dilesona Disambombo 22/05

a. Unvuija kulengejibua mu mundidimbi ne mu bulelela. b. Tela amue malu adi aleja tshijila tshia mudimu wa mu tshitendelelu. c. Tshinyi tshiakadi mu tshibambalu tshibidi tshia tshitendelelu muaba mutambe tshijila ? d. N'tshinyi tshidi tshileja hatoke luse lunene lua Nzambi mu mudimu wa tshitendelelu ? e. Mbuji ibidi yakadi ileja tshinyi ?