Pauna a Sarita

Iti rukod a dipay naimatangan idi, ti pamilia ket mararaut. Masansan ti suppiat, di agkatunosan nga agassawa, pannakaliput iti kari ti kallaysa, nasaem a panagsisina, diborsio ken panagasawa manen, napaspas ti yaadu dagiti nabaybay-an wenno naabandona nga ubbing iti aglawlawtayo. Ti pannakaduprak ti pagtaengan ti maysa kadagiti kadagsenan a problema a sangsangoen dagiti tattao iti adu a pagpagilian ita. Nakaledleddaang a kinapudno a ti galad ti Nacristianoan a pagtaengan ket agbalbalinen a “mapukpukaw a kita” iti maikaduapulo ket maysa a siglo. Maysa kadagiti nakaam-amak a tanda ti pannakadadael iti pagtaengan, diborsio a buyogan dagiti nakabutbuteng a banagna isu ti rumbeng a maiyuna iti listaan.

Ti laeng evangelio ti Apotayo a Jesu Cristo ti maisalakan ti pagtaengan. Gapu iti daytoy, nangted ti Dios kadagiti panursuro iti Biblia a, no suroten, saan laeng a mangpasingked iti naragsak a pamilia no di ketdi agserbi a mangpasubli kadagiti saan nga agtutunos a puso ken nagrakrak a pagtaengan.

Daytoy a kuwarter, babaen iti titulo Ti Nacristianoan a Pagtaengan, adalentayo a nalaing ti kaadduan daytoy a bilin tapno makaibangon kadagiti naballaigi a Nacristianoan a pampamilia. Adu a balbalakad ti naurnong manipud kadagiti sinurat ni Ellen G. White. Naasawaanka man wenno saan, nagannac wenno anac, dagitoy naitiempo a pammagbaga ket addaan kadagiti leksion para iti tunggal maysa. Kararagmi a dagiti pagtaengan ket agbalin a bassit a langit iti rabaw ti daga. Ngem gutogutenna daytoy ti panangisuko iti bukodtayo a nataoan a sirib ken nainlubongan a wagas ket suroten ti sirib ken wagas ti Dios.

No mapasayaat ti disiplina, urnos ken kinadalus, kasta met iti tunos, kappia ken ayat, no dagiti kankanta ken karkarag agpangato iti binigat ken rinabii manipud kadagiti naconvertir ken managyaman a puso a naummong iti aglawlaw iti altar ti pamilia, no tunggal miembro ti pamilia pagbiaganda dagiti panursuro ti Sao ti Dios, ngarud ti presencia ni Cristo ken dagiti nasantoan nga angeles ket marikna iti pagtaengan. Dagiti kakasta a pagtaengan ti agbalin a makapabang-ar a lugar para kadagiti nabannog nga agdaldalyasat, pagsanayan a pagadalan para kadagiti agtutubo ken nabunga a tay-ak ti misyonero a pakanamnamaan ti tunggal nagannac iti nabunga nga apit manipud iti napudno a panagtrabahoda.

Dagiti bendisyon coma ti Dios ti maipaay kadagiti nagannac ken annac, manursuso ken estudiante, bayat iti panagadalda kadagitoy a leksion!

SABADO, ABRIL 6, 2013

Umuna a Pangsabado a Daton para iti

Iglesia idiay Pune, India

Maysa a nalawa a democrasia a pagilian ti India nga addaan iti 1.2 bilion a tattao nga addaan kadagiti agduduma a relihion kas Hinduismo, Islam, Budismo, Sikismo, Zoroastrianismo, Jainismo ken Cristianismo.

Babaen iti dimmanon a mensahe ti Repormasyon iti India agarup kagudua a siglo ti napalabas, nagpannuray ti naan-anay a pannakasukogna sacbay a nakaipaay kadagiti umuna a bungana iti akin-amianan ken amianan a daya a paset ti India iti nasapa a walopulo. Sipud iti dayta a tiempo, ti Agdama a Kinapudno ket nagtutuloy a mangdanon iti tunggal suli ti pagilian.

Saan a kas iti adda iti lubong, adu a karit, rikrikot ken pannakaidadanes ti sangoen iti nakain-inaka a rukod iti daytoy naidumduma a paset. No lagipen ti kapadasan dagidi nagkauna nga Adventista, maiyallangogantayo dagitoy makapaganetget a balikas: “Adu a tawtawen a dagiti payonir ti trabahotayo ket nakigubalda iti bisin, kasta unay a rigat tapno maisaadda ti agdama a kinapudno iti nagundaway a disso. Addaan laeng iti bassit nga alikamen, nagtrabahoda a di agressat, ket binendisyonan ti Dios ti napakumbaba a peksada…Ita, no ibilin ti Dios nga ipacdaartayo ti mensahe iti maminsan pay a sibibileg….saantayo kadi a sumungbat kas maysa a tao ket aramiden ti bilinNa? Saantayo kadi nga iplano nga ipatulod dagiti mensaherotayo kadagitoy a tay-ak ken suportarantayo ida a sibubuslon?... Bayat iti panangaramidtayo iti daytoy, masarakantayo a sumrec ti pamataudan kadagiti kamaligtayo, ket maaddaantayo kadagiti pundo tapno maidanon pay iti nalawlawa ken ad-adayo pay ti pakadanonan ti trabaho.”- 9T 98-101.

Ti Pune ket maysa a nakalawlawa a ciudad iti estado ti Maharashtra agarup sangagasut a milya manipud Mumbai – ti kalawaan a ciudad ti India. Nalatak idi ti Pune a maysa nga ili sipud 847 A.D. Ita, daytoy nadur-as a ciudad ket nalatak kas centro ti pagadalan, ken kadagiti nagduduma nga aktibidades ken agduduma a relihion. Hinduismo ti nangnangruna a relihion, ket iti dagup ti 1.1bilyon a bilang ti tao, basbassit ngem 2% dagiti Cristiano.

Panawenen ti pannakaipasdec iti Pune ti capilia a mangdayaw iti pudno ken sibibiag a Dios, ngem agbalin laeng daytoy babaen iti nabuslon a tulong dagiti kakabsat iti intero a lubong. Yun-unamin ti agyaman kadagiti napapateg ken nabuslon a tulongyo.

Dagiti kakabsatyo manipud Pune

Ti Departamento ti Eskuwela Sabatina ti Komperensya Heneral