Domingo
Abril 21
1. LALAKI KEN BABAI
a. Apay a pinarsua ti Dios ti tao – ken kasano a daytoy a panggep ket maiyanninaw iti pannakaiparsua da Adan ken Eva? Isaias 43:7; Genesis 1:27.
“Dagiti tattao ket maysa a baro ken naidumduma a kita. Naaramidda a ‘kaladawan ti Dios,’ ket panggep ti Namarsua nga agpaaduda iti rabaw ti daga.” – RH, Feb. 11, 1902.
b. Ania ti dackel a kaipapanan ti kinapudno nga inramid ti Namarsua ida a lalaki ken babai? Genesis 2:18; 1:28; 3:20.
“Saan a panggep ti Dios nga agbiag ti tao nga agmaymaysa. Kinunana: ‘Ke ni Jehova Dios kinunana, saan a nasayaat nga agmaymaysa ti tao; yaramidacto ti catulonganna a maitutop kencuana’ (Genesis 2:18).” – AH, p. 25.
“Saan a naaramid ti tao nga agmaymaysa; kasapulanna ti makikadua… Ti Dios a mismo ti nangted iti kadua ni Adan. ImpaayanNa iti ‘katulonganna’– katulongan a maitutop kencuana, a makikaysa kencuana iti ayat ken simpatia.” – PP, p. 46.
“Ni Cristo intedNa ni Eva kenni Adan kas maysa a katakunaynay…. Naituding a dagiti lallaki ken babbai ket agtiponda babaen iti nasantoan a kallaysa, a mangpatanor kadagiti pamilia a dagiti kamengna, nabalangatan iti dayaw, isunto ti mabigbig a miembro ti pamilia idiay ngato.” – AH, p. 159.
Lunes
Abril 22
2. MAYSA A PRIBILIHIO KEN PAGREBBENGAN
a. Maibasar iti pakasaritaan, kasanu nga inutob dagiti tattao ti Dios ti pribilihio a maaddaan iti annac? Genesis 30:1, 2; Salmo 127:3.
“Naaddaan dagiti annac iti biag ken kinatao manipud kadagiti dadackelda, ngem babaen daytoy ti mangparsua a bileg ti Dios tapno dagiti annac ket maaddaan iti biag, ta ti Dios ti mangmangted iti biag. Laglagipen coma a saan a trataren dagiti annac a kunam no bukodda a kukua. Dagiti annac ket pagtawiden ti Dios ket ti plano ti Pannakasubbot iramanna ti pannaka-isalacanda kasta met kadatayo. Naitalekda kadagiti nagannac tapno maisangbayda iti panangtaraken ken balakad ti Dios, tapno agbalinda a maibilang a mangaramid iti trabahoda ita ken iti kinaagnanayon.” – AH, p. 280.
b. Ania ti pagpatinggaan ti pagrebbengan ti naganac para iti naespirituan a pannakapadackel dagiti annacda? Isaias 8:18; Hebreo 2:13.
“Maysa met idi ni Cristo a bassit nga ubing. Gapu kencuana dayawen dagiti annac. Kitaen ida kas sagrado a talek, saan a palpalugodan, panuynuyan, ken ipangpangruna, no di ketdi suroan nga agbiag a nadalus ken natan-ok. Kukua ida ti Dios; ay-ayatenNa ida, ket awisennacayo a makitinnulong Kencuana a tumulong kadacuada a mangsukog iti perpecto a kababalin….
“Saanna nga umsien, baybay-an wenno panawan dagiti annac ti arban. Saanna nga ibilin kadatayo nga agpatuloytayo ket panawan ida…. Magutogut dagiti nagannac iti Nagan ti Dios iturong ida iti nakipet a dana.” – Ibid.
“Ti kapatgan a tiempotayo para iti bukodtayo a lasag ken dara. Pulos coma a dinakay mangngeg ti anacyo a mangibaga ‘Awan ti maaramidac kenca.’ Agingga nga addaantayo iti dana nga agturong iti trono ti Dios, datayo kas nagannac rumbeng a mabain a mangisao it kasta a sao. Agkiddaw ken Jesus, ket tulongannakayo a mangisangbay kadagiti annacyo Kencuana ket iyadayo ida manipud iti bileg ti kabusor.” – RH, Jul. 16, 1895.
k. Anianto ti gun-guna dagiti napudno nga agay-aywan iti pagtaengan? 1 Pedro 5:4.
“No sarakem ti Dios a sikakappia, pakanem ti arbanNa ita iti naespirituan a taraon; ta tunggal anac addaan ti gundaway a manggun-od iti agnanayon a biag. Dagiti ubbing ken agtutubo napateg a gameng ti Dios.” – AH, p. 280.
Martes
Abril 23
3. KONSIDERASYON PARA KADAGITI ANNAC
a. Idi insangbay dagiti inna dagiti ubbingda tapno bendisyonan ni Jesus, ania ti pinadas nga aramiden dagiti disipulos? Mateo 19:13-15.
“Kadagidi alaldaw ni Cristo, inyasideg dagiti inna dagiti ubbingda Kencuana, tapno ipatayNa ti imaNa kadacuada a mangbendisyon. Babaen iti daytoy a tignay impakitada ti pammatida ken Jesus ken ti nakana a gagar ti pusoda para iti agdama ken masacbayan a pagsayaatan dagiti ubbing a naitalek kadacuada. Ngem saan a makita dagiti disipulos ti panagkasapulan inatipada ti Apo a mangtaming kadagiti ubbing, ket bayat ti panangpapanawda kadagiti inna, tinubngar ni Jesus ida ket imbilinNa kadagiti tattao a wayaanda dagiti namatalek nga inna a kadua dagiti babassit nga ubbingda. KinunaNa, ‘Bay-anyo dagiti ubbing a babassit nga umay caniac, ket dikay pawilan ida, ta dagiti cacastoy cucuada ti pagarian ti langit’ (Mateo 19:14).” – AH, p. 273.
b. Kasanoti panangibilang ti Dios kadagiti ub-ubbing? Mateo 18:1-4, 6.
k. Ania ti maysa kadagiti rason no apay a rumbeng a saantayo a baybay- an dagiti annactayo? Mateo 18:10.
“Dagiti annac ket naitalec kadagiti nagannac kas maysa a napateg a talec, nga iti maysa nga aldaw gutoguten ti Dios kadagiti imada. Kasapulan nga ipaayan ida iti ad-adu a tiempo iti panagsanayda, ad-adu nga annad ken ad-adu a kararag. Ad-adda a kasapulanda ti umno a kita ti panursuro.” – AH, p. 161.
“No tarigagayantayo dagiti annactayo a mangayat ken mangdayaw iti Dios, kasapulan a saoentayo ti kinaimbagNa, ti kinatan-okNa ken ti pannakabalinNa, kas naiparang kadagiti ar-aramid ti panagparsua ken iti sagrado a balikas. No tarigagayantayo ida a mangayat ken mangtulad iti kababalin ni Cristo, kasapulan nga ibaga kadacuada ti sacrificio nga inaramidNa para iti pannakasubbottayo, ti kinapakumbaba ken panangilacsidNa iti bagina, ti awan kapadana nga ayat ken simpatia, a naiparang iti biagNa iti rabaw ti daga ken ibaga kadacuada a datoy a pagpatulad ti surotentayo….
“Laglagipen a dagiti annacyo a lallaki ken babbai ket ub-ubbing a miembro ti pamilia ti Dios. IntalekNa ida a salluadanyo, sanayen ken suroan para iti langit. Agsungbatkayo Kencuano no ania a wagas ti panangakemmo iti sagrado a takemmo.” – RH, June 13, 1882.
Mierkules
Abril 24
4. PANAGTUTUNOS ITI PAMILIA
a. Akin aglawlaw ti pagpusiposan ti amin a banbanag iti pagtaengan? Apay? Proverbio 31:10-13, 25, 28. Apay nga ipagarupmo a ti panagtutunos, kinaurnos, kinadalimanek ken disiplina iti pagtaengan ket nasisita para iti sapasap a pagimbagan ti pamilia?
“Inna, aramidenyo dagiti babagiyo a makaay-ayo inggat kabaelanyo; saan a babaen iti panagpapintas no di ket babaen iti panagbado kadagiti nadalus, maibagay a kawwes. Iti kasta maitedyo kadagiti annacyo ti agtultuloy a leksion ti kinalinis ken kinadalus. Ti panagayat ken panagraem dagiti annacna ti rumbeng nga ipaayan ti ina iti kaangatoan a pateg. Tunggal banag iti kinataona mangisuro iti kinadalus ken kinaurnos ken rumbeng a maiyammo kadagiti panpanunotda ti kinatarnaw. Adda kapanunotan ti pannakaitutop, kapanunotan ti pannakaibagay dagiti banbanag, kadagiti panpanunot uray kadagiti ub-ubbing nga annac; ken kasanu ti pannakasursuroda a mangipateg iti kinadalus ken kinasanto no dagiti matada ket kankanayon met a makakita kadagiti nadulpet a kawwes ken nawara a kuwarto? Kasano a dagiti nainlangitan a sangaili a ti pagtaenganda ket nadalus ken nasantoan, ket maawis iti kasta a pagtaengan?
“Urnos ken kinadalus isu ti linteg ti langit; ket tapno maisangbay a maitunos iti nadiosan nga urnos, pagrebbengantayo ti agbalin a nadalus ken naraman” – AH, p. 254.
b. Ania ti rumbeng a saoen ti ama iti asawa ken annnacna kas ulo ti pagtaengan? Apay? Salmo 103:13.
“Ti asawa a lalaki ken ama isu ti ulo ti pagtaengan. Sapulen ni baketna Kencuana ti ayat ken simpatia, ken tulong para iti panangsanay kadagiti annacda; ket umno daytoy. Dagiti annac ket kucuada a dua, ket agpadada nga interesado para iti pagsayaatanda. Sapulen dagiti annac iti ama ti suporta ken pannakaibagnus; kasapulan nga addaan isuna iti umno a kapanunotan iti biag, iti inpluensia ken iti pannakilangen a rumbeng a manglawlaw iti pamiliana; kangrunaan ti amin, kasapulan a makontrol isuna babaen iti ayat ken panagbuteng iti Dios ket babaen iti panursuro ti saoNa, mabalinna nga ibagnus dagiti sacsaka dagiti annacna iti umno a dana…
“Ti ama rumbeng nga ipatungpalna iti pamiliana ti naing-inget a galad – pigsa, integridad, kinapudno, kinaanus, panagraem, kinagaget ken kinaserbi. Ket aniaman a gutogutenna kadagiti annacna rumbeng met nga isanayna a mismo, ipakpakita dagitoy a galad iti bukodna a kinatao.” – MH, pp. 390, 391.
Hueves
Abril 25
5. TUNGGAL NACRISTIANOAN A PAGTAENGAN MAYSA A BETHEL
a. Isalaysay ti kapadasan ni Jacob idiay Bethel. Genesis 28:16-19. Kasano ti panangipagarupmo a dagiti nacristianoan a nagannac mapagbalinda dagiti pagtaenganda a Bethel (balay ti Dios)?
“Dagiti pagtaengantayo agbalin coma a Bethel, dagiti pusotayo ti altar. Sadinoman a ti ayat ti Dios ket impateg iti kararua, adda talna, addanto lawag ken rag-o. Iruar ti sao ti Dios iti sangoanan ti pamiliayo a siaayat ket saludsoden, ‘Ania ti inasao ti Dios?’” – AH, p. 19.
b. Ilawlawag ti pannakasukog ti kababalin ti ubing mainaig kadagiti inpluensia ti pagtaengan ken ti kasasaad ti kagimongan. Galacia 6:7-9.
“No dagiti agtutubo ket naadalan ken no dagiti kababalinda nasukog iti kinaubbingda kadagiti agkakaimbag nga ug-ugali, control iti bagi ken nateppel, kasta met ti inpluensiada iti kagimongan. No mabatida a di malawagan ken makontrol, agbanagto a, naturongda, awanan panagteppel iti raman ken rikna, kastanto met ti masacbayan nga inpluensiada a mangsukog iti kagimongan. Ti bunggoy nga adda ita kadagiti ubbing, dagiti kababalin a pinormada ita, ken dagiti principio nga inawatda ita isuda ti mangipakita iti kasasaad ti kagimongan kadagiti sumangbay a tawtawen.” – Ibid., p. 15
Viernes
Abril 26
PERSONAL A PANGREPASO A SALSALUDSOD
1. Idi panagparsua, ania a pammanecnec ti mangipakita a naaramid ni Adan a mannakikadua a tao?
2. Iti banag a panaganac, ania ti mangipakita a naawatan ni Jacob a ti Dios ti addaan iti kontrol kadagiti paspasamak?
3. Ania dagiti leksion a maadaltayo manipud iti panangtaming ni Jesus kadagiti ub-ubbing?
4. Ania dagiti akmen dagiti nagannac iti panagtinulongda iti maysa ken maysa?
5. Iti ania a wagas a ti inpluencia ti pagtaengan apektaranna dagiti annac ken kagimongan a pagbibiaganda?