Domingo
Hunio 16
1. EHEMPLO NI CRISTO
a. Kasano a masabat ti Dios ti kaindaclan a kasapulan ti sangkataoan? Roma 5:6-10; Juan 3:16. Kasano ti panangituladtayo kadagiti bagbagitayo iti nadiosan a Pagtuladan? 1 Pedro 2:21-23.
“Saantayo nga ilacsid ti pannakitaripnongtayo. Saantayo nga isina dagiti bagbagitayo manipud iti dadduma. Tapno madanon ti amin a klase, kasapulan a danonentayo ida iti ayanda…. Saan laeng a manipud iti pulpito a matignay dagiti puso ti tattao babaen iti nadiosan a kinapudno. Adda pay sabali a tay-ak ti trabaho, mabalin a nanumnumo, ngem mainanama. Masarakan daytoy iti pagtaengan dagiti nababa ken kadagiti mansion dagiti natan-oc; iti hospital ken kadagiti um-ummong para iti inosente a pagraragsakan.” – DA, p. 152.
“Suroten ni Cristo a manggayyem kadagiti agkasapulan unay ken awanan gayyem. Suroten Isuna a nanglipat iti bagina, aglablabonan kadagiti ar-aramid a nangilacsid ken nangisacrificio iti Bagina tapno agaramid iti imbag iti sabali.” – 2 T, p. 178.
b. Kasano a ti tignaytayo makatulong a mangparukma kadagiti adda iti lubong? Hebreo 5:2; 1 Corinto 13:4-8. Iti ania a kalawa a ti dakes a bunggoy inpluensiaanna ti destinasyon? 1 Corinto 15:33.
“Kadawyan ti mangsapul iti kadua. Tunggal maysa agsapul kadagiti kadkadua wenno aramiden ida. Ket kasmaitutop iti pigsa ti panaggayyem, isu met ti rukod ti inpluensia a maipaay ti maysa a gayyem iti gayyemna para iti imbag wenno para iti dakes.” – Ibid., vol. 4, p. 587.
Lunes
Hunio 17
2. ITI LUBONG NGEM AWAN ITI LUBONG
a. Kasano ti pannakaammotayo a saan a panggep ti Dios a maisina dagiti Cristiano iti naespirituan a bunggoy? Juan 17:15-17; Proverbio 18:24. Kasanu a malibasan dagiti Cristiano ti nalatac a tulaw ti pannakikadua iti basol ken managbasol? Hebreo 12:2 (umuna a paset).
“Awan coma a maporma ti saan a napasanto a galut iti nagbaetan ti annac ti Dios ken kadagiti gagayyem ti lubong. Awan coma ti kallaysa a maarmid iti nagbaetan dagiti mamati ken saan a mamati. – RH, July 31, 1894.
Ti relihion ti mangdiktar ken mangibagnus kenca iti amin nga aramidem ken isu ti naan-anay a mangkontrol iti riknayo. No isukoyo dagiti bagbagiyo a naan-anay kadagiti ima ni Cristo, pagbalinen ti bilegNa a pigsayo, ngarud ti sirmatayo agbalin a nalawag a mangilasin iti kalidad ti kababalin tapno saancayo a maallilaw kadagiti langa ket makaaramid iti naindaclan a biddut iti pannakigayyemyo. Ti bileg moralyo natadem ken masiglat coma tapno maandoranyo ti nakana a suot ket saan a matulawan. Ti integridad ti kararuayo natibker tapno saannakayo a makir-in ti kinaubbaw, pammarang wenno ar-artiok.” – 3 T, p. 47.
b. Ania ti ipaawat ni Cristo babaen ti “lubong”? 1 Juan 5:19; 4:4-6. Apay a ti pannakaisina idiayana ti saan a makapnek a solusyon iti pannakaakar iti basol?
“Saan nga ipaawat ti Dios a siasinoman kadatayo agbalin nga ermitanyo wenno mongha ket sumina iti lubong tapno isangratna ti bagina kadagiti aramid nga agdaydayaw. Ti biag rumbeng a kas ti biag ni Cristo – iti nagbaetan ti bantay ken kadagiti umariwekwek. Isuna nga awan ti aramidenna no di laeng agkararag iti mabiit agsardengton nga agkararag, wenno dagiti kararagna ket agbalin a gagangay nga aramid. No iyadayo dagiti tattao ti bagbagida iti pannakikadua, adayo manipud iti tay-ak ti Nacristianoan a pagrebbengan ken panangawit iti cruz; no agsardeng nga agtrabaho a sipapasnec para iti Apo, sino ti agtrabaho a sipapasnec para kadacuada, napukawda ti anag ti kararag ket awananda iti mangpapigsa nga agdebosyon. Ti kararagda agbalin a personal ken managimbubukod.” – SC, p. 101.
Martes
Hunio 18
3. DAGITI GAGAYYEM KEN KINAMANNAKIGAYYEM
a. Dakamaten ti ehemplo ti saan nga agkupas a panaggayyem kas naisurat iti Biblia. 1 Samuel 18:1-3. Ania ti gagangay nga interes a pakaibatayan ti pudno a pannakigayyem?
“Pasantaken ti kinaayat ken kinamannakigayyem iti inaldaw a biagmo. Ipakita ti pudno a panagdayaw ken Nacristianoan a panagraem. Ti puso a talaga nga agayat ken Jesus ayatenna isuda a nakatayanNa. Kas kapudno ti panangiturong ti dagum iti murdong, kasta met iti pudno a pasurot ni Cristo, buyogan ti espiritu ti napasnec a panagtrabaho, ikagumaan ti pannakaisalacan ti kararua a nangipaayan ni Cristo iti biagNa.” – 3T, p. 466.
“Ipapan a kaduatayo ti maysa a gayyem, ket makasaraktayo iti am-ammo iti dalan ket iturong ti imatangtayo iti baro a nasarakan nga am-ammo, a saanen nga ikankano ti kaadda ti gayyemtayo, ania ti mapanunot dagiti tattao maipapan iti kinapudnotayo iti gayyemtayo, iti rukod ti respetotayo kencuana? Ket kastoy ti panangtratar tayo ken Jesus. Malipatantayo a kaduatayo Isuna. Iti pannakisasaotayo pulos a saantayo a dakamaten ti naganNa wenno iraman ti panursuroNa kadagiti sasaotayo. Saoentayo dagiti nainlubongan a banbanag ti negosio ket sadino ti saan a pakasugatan ti kararua, sadino ti kangrunaan a saan a pakaibabainan ni Jesus, ngem ibabaintayo Isuna no saantayo a dakamaten iti intayo pannakisao kadagiti gagayyem ken kakaduatayo. Isuna ti kaimbagan a gayyem, ket ikagumaan ti mangsapul iti gundaway nga isao ti maipapan Kencuana.” – ST, Jan. 9, 1893.
b. Kasano nga impakita ni Ruth a ti pannakigaayyemna ken Naomi ket addaan iti naispirituan a pakaibatayan? Ruth 1:16-18. Apay a saan a mabalinan ti Cristiano a pagtalinaeden nga awanan peggad ti nadekket a pannnakigayyemna iti saan a mamati? Amos 3:3. Kasano ti panagsao ni Cristo iti panagpiliNa iti gagayyem? Juan 15:14-16.
“Iti panangporma iti pannakigayyem, naindaklan nga annad ti kasapulan nga ipakat di la ketdi ta matulag ti pannakisinninged iti maysa a ti ehemplona ket saan a natalged a tuladen; ta ti bunga ti kasta a pannakisinninged isu ti pannakaiyadayo manipud iti Dios, manipud iti panagdebosyon ken iti panagayat iti kinapudno. Pudno unay a napeggad para kenca ti makisinninged kadagiti gagayyem nga awanan narelihionan a kapadasan… No … ipategmo ti pannakaisalacan ta kararuam, saanmo a pilien kas nasinged a gayyem dagiti saan a mamagtalinaed iti serioso a panangibilang kadagiti narelihionan a banbanag.” – 3T, p. 42.
Mierkules
Hunio 19
4. DAGITI CRISTIANO KEN DAGITI KABAGIANDA
a. Ipakita ti ehemplo a timmabuno da Jesus ken dagiti DisipulosNa iti panagtitipon ti pamilia. Juan 2:1, 2, 11.
“Adda idi boda iti Cana ti Galilea. Dagiti masecnan ket kabagian da Jose ken Maria. Ammo ni Jesus daytoy a panagtitipon ti pamiliaket adu kadagiti mabigbigbig a tattao ti tumabuno, ket kaduaNa dagiti barobaro a disipulosNa, nagturongda idiay Cana. Apaman a naamoan nga umay ni Jesus iti dayta a lugar, naisangsangayan nga awis ti naipatulod Kencuana ken kadagiti gagayyemNa. Daytoy ti rinantaNa, gapuna a pinaraboranNa ti rambac iti presenciaNa.” – 5 BC, p. 1132.
b. Kasano ti panagannadtayo iti pannakikaduatayo kadagiti nainlubongan a kakabagian? 1 Corinto 15:33
“Saantayo a maservian ti Dios ken ti lubong iti isu met la a tiempo. Saantayo nga isentro dagiti riknatayo kadagiti nainlubongan a kakabagian nga awanan tarigagay a mangammo iti kinapudno. Mabalin nga ikagumaantayo iti amin a wagas, a pagraniagen ti lawagtayo kabayatan a makikaduatayo kadacuada; ngem dagiti sasaotayo, panaglanglangatayo, kannawidantayo, ken ar-aramidtayo, iti aniaman a kapanunotan, saan a mosukog babaen kadagiti kapanunotan ken kannawidanda. Ipakitatayo ti kinapudno kadagiti amin a pannakisaotayo kadacuada. No saantayo a maaramid daytoy, no nabatbattaway ti pannakikadua kadacuada, naim-imbag met para iti espiritualidadtayo. No isaadtayo dagiti bagbagitayo kadagiti kakaddua nga addaan iti inpluensia a mamagduyos kadatayo a manglipat kadagiti nangato a tontontonen ti Dios kadatayo, awisentayo ti sulisog ket agbalintayo a nakapuy a mangsarked kadacuada. Maisangbaytayo a makipaset iti espiritu ken ipateg dagiti kapanunotan dagiti gagayyemtayo ket isaadtayo dagiti sagrado ken banbanag ti kinaagnanayon a nababbaba ngem kadagiti kapanunotan dagiti gagayyemtayo. Iti mabiit, malevadoraantayo kas ti panggep ti kabusor ti amin a kinalinteg a pagbanagantayo.” – 5T, p. 543.
“Saantayo nga itag-ay ti pagrukodantayo a nangatngato bassit ngem iti pagrukodan ti lubong, no diket pagbalinen ti pagdumaan a nakalawlawag unay. Ti rason no apay a bassit unay ti inpluensiatayo kadagiti saan a mamati a kakabagian ken gagayyemtayo, gapu ta bassit ti makita a pakaidumaan ti ar-aramidtayo kadagiti ar-aramid ti lubong.” – 6T, pp. 146, 147.
“Adu dagiti annac ti naan-anay a nadadael babaen iti pannakibiang dagiti kakabagian ken gagayyem iti panangimatonda iti pagtaengan. Inna, pulos a saan a pulobosan dagiti kakabsat wenno inna a makibiang iti nasayaat a panangiturongyo kadagiti annacyo.” – CG, p. 288.
Hueves
Hunio 20
5. PANAGWATWAT KEN PANAGALIWAKSAY
a. Ania nga ehemplo ni Cristo ti mangipakita a dagiti Nacristianoan a trabahador kasapulanda ti inana ken panagaliwaksay? Marcos 6:30-32. Apay a ti panagwatwat iti layang nga angin ket makapagin-awa?
“PapigsaenNatayo ti Dios a mangut-utob kadagiti trabahoNa iti kadawyan a lubong. TarigagayNa nga ibaw-ingtayo dagiti panunottayo manipud iti panagadal kadagiti artipisyal ket iturongnatayo iti natural.” – SDG, p. 110.
“Ti panagwatwat iti layang nga angin ket makapasayaat iti salun-at kadagiti addaan trabaho iti uneg ken agop-opisina. Amin a makabael, kasapulan a mariknada a pagrebbenganda nga aramiden daytoy. Awan ti mapukaw, no di ket dackel ti magun-guna. Makasublida kadagiti trabahoda nga addaan iti baro a biag ken baro a tured a mangsango kadagiti trabahoda a sigaganetget ken nasaysayaat ti pannnakaisaganada a manglaban iti sakit.” – 1 T, p. 515.
b. Iti ania a panggep ti pulos a saantayo a lipatan iti tay-ak ti pana-galiwaksay? Filipos 4:8. Iti ania a pagpatinggaan ti pananglikliktayo kas Cristiano kadagiti pagduaduaan a pagliwliwaan?
“Saan a tarigagayan ti pudno a Cristiano ti sumrek iti aniaman a lugar ti pagliwliwaan wenno sumrec iti aniaman a pagaliwaksayan a saanna a makiddaw ti bendisyon ti Dios. Saan a makita isuna kadagiti pagsinean, bilyaran wenno pagbobolingan.” – MYP, p. 398.
“Iti tunggal taripnong a pagraragsakan a pakataraknan ti kinatangsit ken pakapalugodan iti raman, sadinoman a pakaiturongan ti maysa a manglipat iti Dios ken kadagiti banbanag ti kinaagnanayon, adda sadiay ni Satanas a mangigalgalut iti kawarna iti kararua.” – AH, p. 515.
Viernes
Hunio 21
PERSONAL A PANGREPASO A SALSALUDSOD
1. Kasano ti panangiparang ti Dios iti prinsipio ni ayat?
2. Babaen iti ikikita ken Jesus, kasano a masalacnibantayo manipud iti lubong?
3. No porpormaen ti pannakigayyem, kasano ti kinaannadtayo? Apay?
4. No tumabunotayo kadagiti taripnong ti pamilia, kasano a magun-gunaantayo dagiti tumabuno?
5. Ania dagiti pagduaduaan a lugar ti pagliwliwaan a rumbeng a liklikantayo ken apay? Dakamaten dagiti sumagmamano nga aktibidad a saan a makagun-guna kadatayo ken kadagiti pamiliatayo.