Domingo
Hunio 23
1. DAGITI RIRIBOK A DI KASAPULAN A NAPARNUAY
a. Ania dagiti nainsiriban a sasao a mangipalagip kadatayo iti panangliklik iti panagsusungbat iti pagtaengan? Proverbio 17:1; 21:9.
“Iti sumagmamano a pamilia, ti espiritu ti panagsusuppiat ken diskusyon ti mangdadael iti tunos; tunggal linabag ti sarita ket allawatenda nga amirisen, ket pattapataaend ti naan-anay a pannakaator ti tunggal sao. Lapdanna ti wayawaya a makikadua no dagiti saan nga importante a pagbiddutan ket mabantayan ken maiparang gapu man laeng iti pannakabigbig. Kakabsat a lallaki ken babbai no maminsan addaanda ti saan a mapupuotan nga ugali nga agiinnangaw, kagudua napasnec, kagudua pagkakatawaan. Kaadduanna makapasakit iti dadduma, padasenda ti aniaman a pagduaduaan a panagliwliwa.” – HR, Feb. 1, 1874.
b. Ilawlawag no kasano, iti maysa nga okasyon, nagbuteng ni Pedro idiay baybay. Mateo 14:26-31. Kasano a masansan nga agtignaytayo kas ken Pedro no adda iti maipada a kasasaad?
“No sumangbay ti riribok kadatayo, kasano kasansan a kasla tayo kenni Pedro! Kumitatayo kadagiti dalluyon, imbes a pagtalinaeden a nakaturong dagiti matatayo iti Mannubbot. Maikaglis dagiti addangtayo, ket dagiti natangig a danum sallukodanna ti kararuatayo.” – DA 382.
Lunes
Hunio 24
2. TULONG ITI PANAWEN TI PANAGKASAPULAN
a. Ania a kasasaad ti mangikeddeng, iti naindaclan a rukod, no makitatayo met laeng ti managtulong nga ima ti Dios gapu kadatayo wenno saan? Marcos 9:23; Mateo 8:26 (umuna a paset).
“Amin a banbanag ket mabalin kencuana a mamati; ket aniaman a banag a tarigagayantayo no agkakaragtayo, no patientayo a maawaatayo ida, matagikuatayo ida. Daytoy a pammati sarotenna ti kasipngetan nga ulep ket isangbayna dagiti raya ti lawag ken namnama ti agladladingit, maup-uppapay a kararua. Ti kinaawan daytoy a pammati ken talek a maisangbay ti riribok, makauppapay a buteng ken pagpagarup a kinadakes. Agaramid ti Dios kadagiti naindaclan a banbanag para iti iliNa no ipaayda ti naan-anay a talekda Kencuana.” – 2T, p. 140.
b. Ania a pasamac ti mangsinga iti pannakisaotayo iti Dios iti kasta saanNa nga ipangag dagiti kararagtayo? Salmo 66:18; Isaias 59:1, 2.
k. Kasano kasansan a mapantayo iti riribok a saan a kasapulan? Santiago 3:1-6. Ilawawag no kasano a maliklikan ti kaadduan a ririboktayo?
“Ti makasair a rikna ken makasugat a babalaw saanna a matignay ti tao wenno magun-od ti simpatiada….
“Ti kadackelan a bingay ti pakasingaan ti biag, ti inaldaw a makadadael nga alluadna, ladladingitna, ung-ungetna, isu ti bunga ti saan a nakontrol a rikna. Ti tunos ti pagtaengan ket masansan a madadael babaen iti nadarasodos a sao ken nagubsang a panagsasao. Naim-imbag pay no saandan a naisao. Ti maysa a makaay-ayo nga isem, maysa a natanang ken manganamong a sao a maibalikas iti naemma nga espiritu, bileg daytoy a mangpabang-ar, mangliwliwa ken mangbendisyon. Ti turay iti bagi isu ti kasayaatan a turay iti lubong. Babaen iti panangikabil iti arkos ni kinaemma ken naulimek nga espiritu, maispal ti siam a pulo ket siam manipud iti sangagasut a riribok a mamagpait iti biag. Adu ti mangekskyus iti nadarasodos a sasaoda, ti naunget a rikriknada babaen iti panangibagada: ‘arisagidnac ngamin, nalakaak a makaunget.’ Pulos a di makaagas daytoy kadagiti sugat a pinataud ti nadarasodos, makapasakit a sasao.” – Ibid., vol. 4, p. 348.
Martes
Hunio 25
3. TULONG ITI PANAWEN TI PANAGKASAPULAN (maituloy)
a. Ania ti kankanayon a laglagipen dagiti naunget a nagannac iti panawen ti parikot ken krisis? Salmo 28:1, 2; 27: 14.
“Ited dagiti naunget ken naringgor nga amma ken inna kadagiti annacda dagiti leksion nga iti sumagmamano a panawen ti biagda itedda amin a lubong, no kukuada, tapno malipatanda. Rumbeng a makita dagiti annac iti biag dagiti nagannacda ti kinatibker a maiyanatup iti pammatida. Babaen iti pannakiturong iti natibker a biag, panangwatwat iti kinaparbeng, mabalin dagiti nagannac a sukogen ti kababalin dagiti annacda.” – CG, p. 482.
“ Áddatayo iti lubong ni panagsagaba. Parikut, suot ken ladingit ti agur-uray kadatayo iti amin a dana nga agturong sadi langit. Ngem adu dagiti mangaramid a doble kadagiti dadagsen ti biag babaen iti agtultuloy a panangantisipar iti riribok. No makasaracda iti rigat wenno uppapay ipagarupda a madadaelen ti amin, a ti biagda isu ti karigatan unay, a sigurado a makurangandanto. Iti kasta isangbayda ti kinaay-ay kadagiti bagbagida, ket ipaayda ti sipnget iti amin a manglawlaw kadacuada. Agbalin ti biag a dadagsen kadacuada. Ngem saan coma a kasta. Pataudenna ti napinget a peksa a mangbalbaliw iti panagpanpanunotda. Ngem maaramid ti panagbalbaliw. Ti ragsacda iti daytoy a biag ken iti umay a biag agsanggir iti panangisimpada kadagiti kapanpanunotanda kadagiti nararagsac a banbanag. Saanda coma a kitaen dagiti nasipnget a ladawan, a partuat laeng ti imahinasyonda ket kumitada kadagiti pagsayaatan nga inwara ti Dios iti dalanda, ken iti labes daytoy iti saan a makita ken kinaagnanayon.” – MH, pp. 247, 248.
b. Ania ti inkari ti Dios nga aramiden para kadagiti natulnog nga annacNa no agdawatda Kencuana iti tulong? Salmo 34:17; 145:19; 1 Pedro 5:7.
“Iti dalan nga agturong iti Ciudad ti Dios awan ti parparikut a saan a mapagballaigian dagiti agtalek Kencuana. Awanto ti peggad a saanda a malasat. Awan ti ladingit, awan ti leddaang, awan ti nataoan a pagkapsutan, a saanNa nga ipaayan iti remedio.
“Awan iti mangbaybay-a iti bagbagida iti pannakauppapay ken pannakapaay. Umay ni Satanas kadacayoa kaduana ti nadawel a singasing, ‘Awanen ti namnama ta kasoyo. Awan ti pannakasubbotmo.” Ngem adda namnama para kenca kenni Cristo. Saan nga imbilin ti Dios kadatayo nga agballaigitayo iti bukodtayo a pigsa. Kiniddawnatayo nga umasideg iti sibayNa. Aniaman a pakarikutan a mangimameg iti kararua ken bagi, aguray Isuna a mangwayawaya kadatayo.” Ibid., p. 249.
Mierkules
Hunio 26
4. PANNAKAPNEC ITI PAGTAENGAN
a. Ania nga ehemplo ni Cristo, no nasurot, serraanna ti ruangan maibusor iti umariwekwek a riribok iti pagtaengan? Mateo 20:25-28.
“Tapno agbalin a naragsak, ikagumaantayo a gun-oden dayta kababalin nga imparang ni Cristo. Ti maysa a nalawag a naidumduma ken Cristo isu ti panangilacsidNa iti bagina ken ti kinamanagipaayNa. Saan nga immay tapno sapulenNa ti bukodna. Napan a nagar-aramid iti imbag ket daytoy ti taraon ken inumenna. Mabalintayo, babaen iti panangsurot iti ehemplo ti Mannubbot, maaddaantayo iti nasanto a pannakisao Kencuana; ket babaen iti inaldaw a panangikagumaan a panangtulad iti kababalinNa ken panangsurot iti pagpatuladNa, agbalintayo a bendisyon iti lubong ket magun-odtayo ti pannakapnec ditoy ken iti kinaagnanayon kalpasan itoy a biag.” – 4T, p. 227.
b. Ania ti aramiden ti pannakapnec iti uneg ti pagtaengan ken kasano a mapasantac daytoy? 1 Timoteo 6:6-8; Salmo 37:16.
“Adu unay a pakasecnan ken pakadagsenan ti naisangbay kadagiti pamiliatayo ket bassit unay ti naipateg a kadawyan a kinasimple ken talna ken ragsac. Bassit coma ti panangigaga no ania ti mabalin nga ibaga ti akinruar a lubong ket ad-adu ti ipaay a panangtaming kadagiti kameng ti pamilia.” – MLT, p. 169.
“Napakumbaba man ti pagtaengan wenno nadaeg, ti pananakaisaadna nangina wenno nalaka, awanto ti ragsak iti uneg ti didingna malacsid no ti espiritu dagiti agtaeng ket maitunos iti nadiosan a pagayaan. Pannakapnec ti rumbeng a mangituray iti uneg ti sangakabbalayan.” – AH, p. 154.
k. Ania a kari ti mangipakita iti kinapateg ti kinamatalec iti uneg ti kabukbukodan a pagtaengan? Salmo 101:2. Ilawlawag no apay a ti pannakapnec isu ti tulbec ti naragsak a biag ti pagtaengan?
“Iti pagtaengan a nagballaigian ti pudno a panagdayaw, kasla sabtennaka iti mismo a ruangan. Iti iseserrek, marikna ti naayat a pannakapasangbay. Awan ti bastos a mata a mangamiris iti kawwesmo. Awan ti naunget a boses idiay ngato. Awan ti nasidunget nga ubbing a maibaon manipud kuwarto. Awan ti naturay a bilin a mangibaon a mangabbong kadagiti nabaybay-an a trabaho dagiti parabalay wenno adipen. Naragsak a law-ang ti nangpanapan iti pagtaengan – nalawag, ken saan a mailadawan.” – HR, Feb. 1, 1874.
Hueves
Hunio 27
5. MAKAAGAS KADAGITI PUSO KEN PAGTAENGAN
a. Ania ti impaay ti Dios para iti tunggal pakasapulan? Oseas 6:1, 2; Malakias 4:2.
“Laglagipen coma ti tunggal nasuot ken nasulisog nga adda Natan-oc ti langit a nasulisog iti amin a punto kas pannakasulisog dagiti kamkameng ti nataoan a pamilia, ket ammoNa no kasano a tulongan dagiti rarauten ti bileg ti kasipngetan.” – SMC, p. 292.
“Iti tunggal suot, no sapulentayo Isuna, ikkannatayo ni Cristo iti tulong. Malukatan dagiti matatayo tapno mailasin dagiti makaagas a karkari a nairekord iti saoNa. Isuronatayo ti Nasantoan nga Espiritu no kasano nga ibagay ti tunggal bendisyon nga isu ti mangagas iti leddaang. Iti tunggal pait a maikabil kadagiti bibigtayo, makasaraktayo iti makaagas.” – MH, p. 248.
b. Ania ti kasapulan a mapadasantayo sacbay a tulongannatayo ti Dios a makalusot kadagiti riribok ken agasanNa dagiti sacsakittayo? Isaias 27:5; Aramid 5:31; Salmo 103:3.
“Saan a palubosan ti masacbayan, kadagiti narigat a problema, kadagiti saan a nalawag nga inanama, a mangpakapoy iti pusotayo, agpigerger dagiti tumengtayo, malpay kadagiti imatayo. [Isaias 27:5 naadaw]. Dagiti mangisuko iti biagda iti bagnusNa ken iti servicioNa dinto pulos maikabil iti saad nga awan ti inaramidNa a sagana. Aniaman ti kasasaadtayo, no itrabahotayo ti saoNa, addaantayo iti Bagnus a mangiturong iti dalantayo; aniaman ti pakariribukantayo, addaantayo iti sigurado a Mangbalakad; aniaman ti ladingit, leddaang wenno lidaytayo, addaantayo ti mannakipagrikna a Gayyem.” – Ibid., pp. 248, 249.
Viernes
Hunio 28
PERSONAL A PANGREPASO A BASBASAEN
1. Ania ti resulta ti saan a nakontrol a rikna?
2. Kasano a dagiti adu a dadagsen ti biag nadoble ti dagsenna para kadagiti bagbagida?
3. Ania ti pudno a pagtaudan ti pakariribokan, panagsagaba ken bunteng?
4. Isao ti maysa nga ugali ni Jesus a rumbeng a sukogentayo tapno maliklikan ti saan a kasapulan a riribok.
5. Sangngoen dagiti peggad ti masacbayan, ania ti mautangtayo kadagiti bagbagitayo ken kadagiti pamiliatayo?