Domingo
Mayo 12
1. PRESENCIA NI CRISTO ITI PAGTAENGAN
a. Kasano a maibunannag ti presencia ni Cristo iti pagtaengan? Salmo 16:11; Galacia 5:22, 23. Ania ti kangrunaan iti pagtaengan a pangayatan dagiti annac kadagiti nagannacda ken iti Dios?
“Ti pagtaengan a napapintas babaen iti ayat, kinamanangngaasi ken kinaamo ket maysa a lugar a pagaayat dagiti angeles a sarungkaran ken isu ti pakaigloriaan ti Dios. Ti inpluensia ti naan-anay ti pannakabantayna a Nacristianoan a pamilia kadagiti tawtawen ti kinaubing ken kinaagtutubo isu ti kasiguradoan a salacnib maibusor kadagiti pangdadael ti lubong. Iti aglawlaw ti kasta a pagtaengan masursuro dagiti annac ti mangipateg kadagiti naindagaan a nagannacda ken ti nainlangitan nga Ama.” – AH, p. 19.
b. Iti ania ti pagpatinggaan ti inaldaw a pannakapasanto nga agbalin nga instrumento iti pannakasukog ti Nacristianoan a kababalin iti pagtaengan? 2 Tesalonica 2:13 (maudi a paset); Juan 16:13 (umuna a paset).
“Kasapulan dagiti iglesia ti malawagan mainaig iti practikal a relihion iti pagtaengan. Paulit-ulit ti kinanasken a pagbiagan ti nalinteg a biag, ti maaddaan iti napasanto a puso, mangipalgac iti dumacdackel a pannakaitunos iti ladawan ni Cristo, kasapulan a maiparang kadagiti tattao. Maamirisda kadi a ti trabaho ti pannakapasanto ket trabaho agingga nga adda biag?” – RH, May 24, 1892.
Lunes
Mayo 13
2. DAGITI UMISO AYO
a. Ania dagiti dua a pagpeggadan a kasapulan a maliklikan iti tunggal Nacristianoan a pagtaengan? Isaias 3:16; Proverbio 23:21 (maudi a paset).
“Kabayatan a bantayantayo ti awan kapapay-anna a panagarkos ken panagpabuya, saantayo met a liwayan ken baybay-an ti maipapan ti akinruar a langatayo. Amin a maipapan iti kinatao ken pagtaengantayo ket nadalus ken makaay-ayo coma. Maisuro coma kadagiti agtutubo ti kinapateg ti panangiparang iti langa a di madillaw, langa a mangidayaw iti Dios ken kinapudno……
“Saan a may-ayo iti Dios iti nagulo, naliway ken nakurang nga annad iti sinoman. Dagitoy a pagkurangan ket nakaro a dakes ket agduyos a mangpusot iti ayat ti asawa a lalaki kenni baketna no ti asawa a lalaki ket naayat iti naurnos, disiplinado nga ubbing ken nadalimanek a balay. Ti asawa a babai ken ina saanna a maaramid ti pagtaenganna a makaay-ayo ken naragsak malacsid no addaan isuna iti ayat iti urnos, mapagtalinaed ti dignidadna ken addaan iti naimbag a panangiwanwan; ngarud amin nga agkurang kadagitoy a punto rumbeng nga insegida a mangrugidan a suroan dagiti bagbagida iti daytoy a banag ket pasayaatenda dagiti banbanag a pagkuranganda unay.” – AH, pp. 22, 23.
b. Ania a sulisog ti malapdan ti pudno a pannakaisuro iti pagtaengan? Efeso 4:17.
“Ad-adda a makaay-yo dagiti ub-ubbing a kadawyan ken gagangay. Saan a nasayaat nga ipaayan dagiti ubbing iti naisalsalumina nga asikaso ket uliten dagiti nasayaat a sasaoda iti sangoananda. Saan coma a mapabileg ti kinaubbaw babaen iti panangdayaw iti itsurada, sasaoda ken tigtignayda. Saanda coma met a makawwesan kadagiti agkakangina wenno iti pammarang a wagas. Pabilgenna daytoy ti kinatangsitda ken riingenna ti apal iti puso dagiti kakaduana. Isuro kadagiti ubbing a ti pudno a panagpapintas ket saan nga akinruar….
“Kasapulan a masuroan dagiti babassit nga ubbing iti pang-ubing a kinasimple. Rumbeng a masuroanda a makontento iti bassit ken makatulong a pagrebbengan ken dagiti ragragsak ken kapkapadasan a kadawyan iti tawenda.” – CPTS, pp. 141, 142.
“Kasano met kadacayo amma ken inna? Umin-inum kayo kadi kadagiti banbanag iti daytoy a biag ket liplipaten dagiti agnanayon nga interes dagiti annacyo? Wenno umas-asidegkayo iti trono ti parabor, agpacpakaasi ken agun-unnoy iti Dios para iti asi ken bendisyon para iti pagtaenganyo?” – RH, Dec. 21, 1886.
Martes
Mayo 14
3. TI KINAPATEG DAGITI PAGANNUROTAN
a. Ania ti mapaadda kas maysa a kangrunaan a paset iti tunggal disiplinado a Nacristianoan a pagtaengan? Proverio 6:20-23.
“Tunggal Nacristianoan a pagtaengan addaan kadagiti pagannurotan, kadagiti sasao ken panagtigtignayda iti maysa ken maysa, ipaay kadagiti ubbing ti napateg ken nabiag nga ehemplo iti aniaman a tarigagayyo a pagbalinanda. Kinadalus iti panagsasao ken pudno a Nacristianoan a panagraem ti naynay a maisanay. Suroan dagiti ubbing ken agtutubo a mangrespeto kadagiti bagbagida, agbalin a napudno iti Dios, napudno iti prinsipio; suroan ida a mangrespeto ken mangtungpal iti linteg ti Dios.” – AH, p. 16.
“Kasapulan nga addaan ti ina iti kinatibker ken pangeddeng. Kasapulan a kas katibker ti bato ket saan a sumiasi manipud iti linteg. Dagiti linteg ken pagannurotanNa kasapulan a maipatungpal iti amin a tiempo iti babaen ti amin a parikut, ket maaramidna daytoy a buyogan ti amin a kinaamo ken kinaemma.” – RH, Dec. 21. 1886.
b. Ania nga inpluencia ti maipaay iti nasayaat ti urnosna ken disiplinado a pamilia iti lubong nga aglawlawda? 1 Timoteo 3:4, 5; Genesis 18:18, 19.
“Ti maysa a nasayaat ti urnosna ken disiplinado a pamilia ad-adu ti maibagana maipapan ti kinaCristiano ngem kadagiti amin a sermon a maikasaba. Ited ti kasta a pamilia ti pammanecnek a nagballaigi dagiti nagannac a nangsurot kadagiti bilbilin ti Dios, ken kasta met a dagiti annacda aserbida Kencuana iti iglesia. Dumackel ti inpluensiada; ta bayat ti panangibingayda, umawatda manen iti ibingayda. Makasarac ti ama ken ina iti katulongan kadagiti annacda, a mangted iti sabali iti sursuro a naawatda iti pagtaengan. Dagiti kaarrubada ket natulongan, ta gapu itoy napabacnangda para ita ken para iti kinaagnanayon. Ti sibubukel a pamilia ket agtrabahoda iti servicio ti Apo; ket babaen iti nadiosan nga ehemploda’ mapabileg ti sabali nga agbalin a matalek ken napudno iti Dios iti pannakilangenda iti arbanNa, ti napintas nga arbanNa.” – Ibid., June 6, 1899.
“Tunggal lalaki ken tunggal babai ken tunggal anac kasapulan a napasnec. Awanen ti tiempo a maupapay ita; ta ti diablo ket imammamegnatayo a nakarkaro ngem idi, ket saantayo a kabaelan a mapukaw ti tacdertayo babaen iti panagsubli. Iti nagan ni Jesu-Cristo iti Nazaret, kasapulan nga agmaymaysatayo para iti kinapudno, ket ikagumaantayo a saan a maagaw dagiti annactayo maipud kadagiti takkiagtayo, ket mairuar kadagiti pagtaengantayo, ket maiyabogda kadagiti buyot ti kabusor. Saantayo a kabaelan daytoy. Kasapulan nga agtrabahotayo para iti Dios ken kasapulan nga agtrabahotayo para iti langit a buyogan ti amin a bileg ken pammati nga adda kadatayo.” – Ibid., Dec. 21, 1886.
Mierkules
Mayo 15
4. LANGIT DITOY DAGA
a. Masasan a maibilang dagiti annac a “mangsingsinga iti talna” ti pagtaengan. Ania ti mabalin nga aramiden dagiti nagannac a mangpasayaat iti daytoy a situwasyon? Salmo 128:1, 3, 6; Proverbio 31:27, 28.
“Ti pagtaengan kasapulan a maaramid iti amin a kas ti ipaawat ti balikas. Bassit daytoy a langit ditoy daga, maysa a lugar a pakapasantakan iti ayat imbes a lapdan daytoy.” – 3T, p. 539.
‘”Iti nakalawlawa a panirigan parnuayen dagiti nagannac ti lawlaw ti sibubukel a pagtaengan….Ti trabaho ti pannakabalbaliw kasapulan a maaramid itan. Ti inaldaw a biagtayo ikeddengna ti pagtungpalantayo.” – AH, p. 16.
“Nagdawatka kadagiti annacmo nga umasidegda ken Cristo, sakanto mapan iti lugar nga awan ti mata a makakita, ken awan ti lapayag a makangngeg ket iburaymo dagiti dawdawatmo iti sangoanan ti Dios para kadacuada? Apay nga addaancayo iti pagtaenganyo kadagiti saan a naiconsagrar nga annac? – Agsipud ta awan ti kaipapananna dagiti tontontonen ti Dios. Agsipud ta awan ti kaipapananna a ginatang ida ni Cristo, ket annacNa ida.” – RH, Dec. 21, 1886.
b. Ania a kapadasan ti agbalin a panggep ti tunggal kameng ti pamila? Filipos 2:1-5. Kasano nga aramiden dagiti nagannac a makaay-ayo a lugar ti pagtaengan?
“Idinto a nagkaadu dagiti agkakadagsen a pagrebbengan nga annongen dagiti nagannac a siaannad a mangsaluad iti masacbayan a ragsak ken interes dagiti annacda, pagrebbenganda met ti mamagbalin iti pagtaengan a makaay-ayo unay. Adayo a nain-indaclan daytoy a banag ngem iti maaddaan kadagiti sanikua ken kuarta. Ti pataengan saan coma a makurangan iti ganaygay. Kasapulan a ti rikna iti pagtaengan mapagtalinaed a nabiag kadagiti puso dagiti annac, tapno taliawenda ti pagtaengan ti kinaubingda a kas lugar ti talna ken ragsak a sumaruno iti langit. Ket bayat iti panagtawenda, isuda met ti mangikagumaan nga agbalin a liwliwa ken bendisyon dagiti nagannacda.” – Ibid., Feb. 2, 1886.
“Ti pagtaengan coma ti lugar iti lubong a pakaay-ayoan unay dagiti annac, ket ti presencia coma ti ina ti kaindaclan a pakaguyoguyan. Addaan dagiti ubbing iti sensitibo ken naayat a galad. Nalakada a may-ayo ken nalakada met a mapaldaang. Babaen iti naamo a disiplina, iti naayat a sao ken tignay, maisinggalut dagiti inna dagiti anacda iti pusoda.” – MH, p. 388.
Hueves
Mayo 16
5. NABISA A PAGSURSUROAN ITI PATAENGAN
a. Ania ti masursurotayo manipud iti ababa a rekord ti kinaubing ni Cristo? Lucas 2:40, 52.
“Adda napateg a leksion a sursuroen para kadagiti nagannac ken annac iti kinaulimec ti Nasantoan a Surat maipapan iti kinaubing ken kinaagtutubo ni Cristo. Isuna ti ehemplotayo iti amin a banag. Iti bassit nga imatang a naipaay ti kinaubing ken kinaagtutuboNa ket ehemplo para kadagiti nagannac kasta met kadagiti annac, a no ad-adda a naulimek ken saan nga ikaskaso a lumabas ti panawen ti kinaubing ken kinaagtutubo, ken no ad-adda a kadawyan ken nawaya manipud iti saan a nakaisigudan a kinagagar, ad-adda a nataltalged para kadagiti ubing, ken ad-adda a naim-imbag para iti pannakasukog iti nadalus a kababalin, kadawyan a kinasimple ken pudno a pateg ti dayaw.” – MLT, p. 299.
“No ad-adda a natalna ken kadawyan ti biag ti ubing –no ad-adda a nawaya manipud iti saan a nakaisigudan a kinagagar ken no ad-adda a maitunos iti nakaparsuaan – ad-adda met a nasaysayaat ti bagi, simbeng ti panunot ken naespirituan a pigsana.” – CG, p. 139.
b. Kasano nga isuro ni Cristo, babaen iti linteg ken ehemplo, dagiti Cristiano no kanayonda nga agkararag? Mateo 14:23; Lucas 6:12; 18:1.
“Maaddan iti lugar para iti nalimed a panagkararag. Pinili ni Jesus dagiti lugar para iti pannakisaoNa iti Dios, kasta tayo coma met. Masansan nga aginana ket mapantayo iti sumagmamano a disso, nupay nanumo, lugar a mabalintayo ti agmaymaysa a kadua ti Dios.” – MB, p. 84.
Viernes
Mayo 17
PERSONAL A PANGREPASO A SALSALUDSOD
1. Ania a kapadasan ti inaldaw a makita kadacuada a mangi-kagkagumaan a mangtulad iti biag ni Cristo iti uneg ti pagtaengan?
2. Ania dagiti sumagmamano a rason a mangpasayaat iti kasasaad ti pagtaengan?
3. Apay a dagiti pagannurotan ket kasapulan kadagiti amin a kameng ti pamilia?
4. Bayat ti idadanon dagiti ubbing iti panagtawen, kasano ti panangtaliawda iti Nacristianoan a pagtaengan a dimmackelanda?
5. Kasano a masiguro dagiti nagannac a ti aglawlaw ti pagtaenganda ket addaan iti naespirituan a talged para kadagiti annacda?