Domingo
Mayo 26
1. BUYA A MAKAAY-AYO ITI DIOS KEN KADAGITI ANGELES
a. Kasano a maipatungpal ti pamilia dagiti pagrebbenganna? I Corinto 14:40.
“Ti naurnos a pamilia ket makaay-ayo iti imatang ti Dios ken kadagiti agserserbi nga angeles. Kasapulan a sursuroem ti mamagbalin iti pagtaengan a naurnos, nagin-awa, ken makaay-ayo. Samo papintasen ti pagtaengan iti makaay-ayo a dayaw (dignidad), ket ti espiritu awaten dagiti annac; iti kasta ti kinaurnos, kinapasnec ken panagtulnog ket madadaan a magun-odyo nga agpadpada.” – 2T, p. 259.
“Dagiti amma ken inna a mamagbalin iti Dios nga umuna iti sangkabalayan, mangisursuro kadagiti annacda a ti panagbuteng iti Dios isu ti pangrugian ti sirib, idayag ti Dios iti sangoanan dagiti angeles ken iti sangoanan dagiti tattao babaen iti panangiparang iti lubong ti naurnos unay ken disiplinado a pamilia, pamilia nga agayat ken agtulnog iti Dios imbes nga agsukir a mangbusor Kencuana. Saan a gan-gannaet ni Cristo iti pagtaenganda; ti naganNa isu ti nagan ti sangkabalayan, rinaem ken indayag. Pakaragsakan dagiti angeles ti pagtaengan a pagturayan ti Dios ket nasuroan a mangraem iti relihion, iti Biblia ken iti Namarsuada.” – AH, p. 322.
“Ti gunglo ti pamilia kasapulan a naimbag ti pannakaurnosna. Agpada nga utoben ti ama ken ina dagiti pagrebbenganda, ket buyogan iti nadalus a pannakaawat aramidenda ti trabahoda. Awan coma ti panagsusuppiat. Ti ama ken ina pulos coma a saanda a dillawen ti panggep ken pangusig ti maysa ken maysa iti sangoanan dagiti annacda.”- Ibid., p. 314.
Lunes
Mayo 27
2. TI AMA ITI GUNGLO TI PAMILIA
a. Ania a kita dagiti inpluensia ti rumbeng a manglikmut kadagiti ubbing ken agtutubo kadagiti pagtaengantayo? Roma 12:10; Efeso 5:2. Ilawlawag ti papel ti ama iti daytoy a banag?
“Sapulen dagiti annac iti ama ti suporta ken pannakaibagnus; kasapulan nga addaan isuna iti umno a kapanunotan iti biag ken iti inpluensia ken pannakilangen a rumbeng a manglawlaw iti pamiliana; kangrunaan ti amin, kasapulan a makontrol isuna babaen iti ayat ken panagbuteng iti Dios ket babaen iti panursuro ti saoNa, mabalinna nga ibagnus dagiti sacsaka dagiti annacna iti umno a dana.” – AH, p. 211.
b. Ania ti mamagbael iti ama a mamagbalin iti pamiliana a naragsac, natalna a lugar? Filipos 2:5. Ilawlawag no kasano nga aramiden ti namatalec nga ulo ti sangabalayan dagiti pagrebbenganna iti pamiliana?
“Rumbeng nga aramiden ti ama ti pasetna a mamagbalin iti pagtaenganna a naragsac. Aniaman dagiti pakaseknanna ken pakakumikomanna iti negosio, saanda coma a mapalubosan a manglangeb iti pamiliana; sumrek isuna iti pataenganna a buyogan ti isem ken sasao a makaparagsac.” – Ibid., pp. 211, 212.
“Agtacder ti ama iti ulo ti pamiliana, saan a kas ubing-ubing, awanan disiplina a lalaki, no di ket kas malalaki nga addaan iti malalaki a kababalin, a dagiti rikriknana ket kabaelanna a kontrolen. Gun-odenna ti adalna iti umiso a naimbag a kababalin. Dagiti tigtignayna iti pagtaenganna ket naiturong ken napawilan babaen iti nadalus a prinsipio ti sao ti Dios.” – Ibid., p. 213.
k. Ania a tigtigany iti paset ti asawa a lalaki ken ama ti makatulong iti ballaigi ti sangabalayan? 1 Corinto 11:1.
“Ti asawa a lalaki ken ama isu ti ulo ti pagtaengan. Sapulen ni baketna Kencuana ti ayat ken simpatia, ken tulong para iti pannakasanay dagiti annacda….No ania ti inpluensiana iti pagtaengan – maikeddeng babaen iti
pannakaammona iti maymaysa a pudno a Dios ken Jesu Cristo nga imbaonNa.” – Ibid., pp. 211, 213.
“Insaad ti Dios ti asawa a lalaki kas ulo ti asawa a babai tapno agbalin a salacnibna; isuna ti patapat ti pamilia, mangpatapat a mamagkaykaysa kadagiti kamengna.” – Ibid., p. 215.
Martes
Mayo 28
3. TI INA ITI GUNGLO TI PAMILIA
a. Iti ania a kapanunotan a dagiti pagrebbengan ti ina ket ad-adda a sagrado ngem iti pagrebbengan ti ama? Mangted iti ehemplo. Oc-ocom 13:9-12.
“Kasapulan ti lubong dagiti inna, inna a saan laeng nga iti nagan no di ket iti tunggal kaipapanan ti sao. Mabalintayo a sitatalgedtayo nga ibaga a dagiti naidumduma a pagrebbengan ti babai ket nasagsagrado, nasansanto ngem kadagiti lallaki, Maamiris coma ti babai ti kinasagrado ti trabahona ket iti pigsa ken buteng iti Dios awatenna ti misyon ti biagna.” – AH, p. 231.
b. Kadagiti ania a wagas a ni Anna, ina ni Samuel, agservi kas makapabileg nga ehemplo para kadagiti inna ita? 1 Samuel 1:11.
“Anian a gun-guna ti adda ken Anna! Ken anian a makapabileg a kinamatalek ti ehemplona! Adu dagiti gundaway a di mapattapatta ti pategna, interes a kasta unay ti gatadna, ti naitalek iti tunggal ina.... Gundaway ti tunggal ina ti mangbendisyon iti lubong babaen iti inpluenciana, ket iti panangaramidna iti daytoy, isangbayna ti ragsac iti bukodna a puso.” – PP, 572.
k. Apay kadi a, sumaruno iti Dios, ti bileg ti ina para iti imbag isu ti kapigsaan a bendisyon iti pamilia ken iti kagimongan? Iti ania a patingga a ti ina ken ti anacna ket narappetda iti naum-umbi a bedbed? Mangted iti ehemplo. 2 Timoteo 1:5.
“Ti ina ti ahente ti Dios a mamagbalin iti pamiliana a Cristiano. Iparangarangna ti relihionna a naibasar iti Biblia, mangipakpakita no kasano a a mangkontrol ti inpluensiana iti inaldaw a pagrebbengan ken pagragsakan, mangisursuro kadagiti annacna a babaen laeng iti parabor a maisalacanda, babaen iti pammati, nga isu ti sagut ti Dios.” – AH, p. 235.
“Inna agriingkayo iti kinapudno a ti inpluensia ken ehemployo ti mangapektar iti kababalin ken destinasyon dagiti annacyo; ket iti buya ti pagrebbenganyo, sukogen ti balanse a panunot, ken nadalus a kababalin, a mangiyan-anninaw laeng iti pudno, naimbag ken napintas.
“Ti naasi a Mannubbotmo ket banbantayannaka a buyogen ti ayat ken simpatia, sisasagana a dumngeg kadagiti kararagmo, ken mangipaay iti tulong a kasapulam. Ammona ti dadagsen ti puso ti tunggal ina ket Isuna ti kaimbagan a gayyem iti tunggal emerhencia.” – RC, p. 170.
Mierkules
Mayo 29
4. DAGITI SABALI PAY NGA INPLUENSIA (PACTORA)
a. Ania ti kangrunaan kadagiti pagrebbengan dagiti nagannactayo? Marcos 13:33; Genesis 12:8; 13:18.
“Inkararagan ni Cristto dagiti disipulosNa, saan a tapno maikkatda iti lubong, no di ket tapno maiyadayoda iti dakes – tapno masalacnibanda a sumuko kadagiti agtutupatop a sulisog a masabsabatda. Daytoy ti kararag a rumbeng nga ikararag ti tunggal ama ken ina. Ngem makaanay kadin ti panagdawatda iti Dios ti para kadagiti annacda, ket panawanda idan a mangaramid iti kaykayatda? Rumbeng kadi a palugodanda ti ramanda agingga nga isun ti mangituray, sadanto inanamaen a mapawilanda dagiti annacda? – Saan; panagteppel ken panagtengngel iti bagi rumbeng a maisuro manipud iti indayon nga agpangato.” – CE, p. 166.
b. Kasano a mapagbalin dagiti nagannac ti pagtaenganda a “balay a pagkararagan”? Isaias 56:7; 1 Cronicas 16:40. Ilawlawag dagiti pagimbagan ti regular a panagkararag ti pamilia ita.
“No adda man ti kanito a ti tunggal balay ket balay ti kararag, isu itan.
Dagiti amma ken inna kasapulan a masansanda nga itag-ay dagiti puspuoda iti Dios iti napakumbaba a panagdawdawat para kadagiti bagbagida ken kadagiti annacda.” – Ibid., p. 221.
k. Ania pay ti laglagipen nga aramiden dagiti nagannac para kadagiti annacda? Malakias 3:16 (umuna a paset). Ania a ballaag ti ipangagtayo?
“Kabsat L (lalaki),… saan a nainsiriban ken natanang ti panagsaom iti asawa ken annacmo. Pasantakem ti kinaimbag ken kinaamo. Awanan dagiti annacmo iti kasayaatan nga inpluencia ken ehemplo iti sangoananda. Saan nga isuda ti mangkontrol kenca, no di ketdi sika ti mangkontrol kadacuada, saan a ginugubsang, saan kinukuspag, ngem ketdi buyogan iti natalna ken natibker a panggep.
“Kabsat L (babai), naindackal a dangadang ti sangoem tapno agballaigi. Pinalubosam ti bagi a mangtagikua iti ballaigi. Ti nasukir a pagayatam isu ti kaindaclan a kabusormo. Addaanca iti saan a maparukma a rikna ken saanmo a matengngel ta dilam. Ti nakurang a panangkontrol iti bagi ti dackel a mangdangran ita bagim ken iti pamiliam. Adda pagyanan ti ragsac, ulimec ken talna iti pagnaedanyo ngem apagbiit la a kanito. No masuppiat ti pagayatam nalakaka nga agpungtot sakanton agsao ken agtignay a kunam la no nasanibanka ti demonio. Pumanaw dagiti angeles manipud iti buya ti riri a pagsisinnukatan dagiti naunget a sasao.” – 2T, pp. 78, 79.
Hueves
Mayo 30
5. DAGITI NAISANGSANGAYAN A SURSURO
a. Ania a leksion ti naumbi a panangsaluad iti asawa a babai ken annac ti sursuroen ti Nacristianoan nga ama manipud iti ehemplo ni Jacob? Genesis 33:13, 14.
“Ti kadawyan nga ama sayangenna ti adu a nabalitokan a gundaway a mangguyogoy ken makisinninged kadagiti annacna. Iti panagawidna manipud iti negosiona, masarakanna coma a makaparagsac a gundaway ti mangbosbos iti sumagmano a panawenna kadagiti annacna.
“Mawayaan coma dagiti amma manipud kadagiti palso a dignidadda, ilacsidda dagiti bagbagida kadagiti sumagmamano a pangpennecda iti bagbagida kadagiti paglinglingayan, tapno makikadua kadagiti annacda, makipagrikna kadacuada kadagiti babassit a parikotda, isinggalut ida kadagiti puspusoda babaen iti napigsa a reppet ni ayat, ket ipasdec ti kasta nga inpluencia iti lumawmawa a panpanunotda tapno dagiti balakadda maibilang a sagrado.” – AH, p. 220.
b. Ania a kari ti mabalin a tontonen ti namatalec a nagannac iti panangisuroda kadagiti annacda? Isaias 49:25 (maudi a paset).
“Ti ama, kas padi ti sangabalayan, idatonna iti altar ti Dios kadagiti pangbigat ken pangrabii a sacrificio, kabayatan a ti asawa a babai ken annac makikaysada nga agkararag ken agdaydayaw. Iti kasta a sangabalayan, ti pagaayat ni Jesus a paggianan.” – CE, p. 221.
“Agtacder dagiti nagannac iti saad ti Dios kadagiti annacda, ket agsungbatdanto, no nagbalinda a napudno kadagiti sumagmamano a naitalek iti salluadda.” – RH, Marzo 28, 1893.
“Ti kalawa ti inpluensia ti ina ket mabalin a nanumo; ngem daytoy, naikaysa iti inpluensia ti ama, ket agtaeng kas ti kinaagnanayon.” – AH, p. 240.
Viernes
Mayo 31
PERSONAL A PANGREPASO A SALSALUDSOD
1. Kasano nga aramiden dagiti nagannac ti pagtaenganda a makaay-ayo a lugar para iti Dios ken kadagiti angeles?
2. Ilawlawag dagiti pagdudumaan iti kababalin ti asawa a lalaki ken ama ken iti asawa a babai ken ina.
3. Kasano a nasagsagrado dagiti naidumduma a pagrebbengan ti babai ngem kadagiti pagrebbengan ti lalaki?
4. Ania ti kangrunaan a pactora a mangisigurado iti presencia ni Jesus iti pagtaengan?
5. Dakamaten ti sumagmamano a dadagsen a mabalin nga ibingay dagiti nagannac iti sibubukel a pagtaengan.