Domingo
Mayo 19
1. PANAGSANAY PARA ITI SERVICIO
a. Ania a plano ken panggep ti adda ken Cristo para iti tunggal kararua a mapan Kencuana? Juan 17:18; Mateo 20:27, 28; 10:16.
“Daytoy panggep [ nga agserbi iti Dios ken iti pada a tao] kasapulan nga agnanayon nga adda iti imatang dagiti Nacristianoan a nagannac ken manursuro. Saantayo nga ammo no ania a linya ti serbianto dagiti ananactayo. Mabalin nga isangratda ti biagda iti uneg ti pagtaengan; mabalin a sumrecda iti kadawyan a bokasyon wenno mapan kas manursuro iti evangelio iti sabali a daga; ngem aminda ket agpapada a naayaban nga agmisyonero para iti Dios, mangipaay iti asi iti lubong.
“Dagiti ub-ubing ken agtutubo…. Gun-odenda ti adal a makaatulong kadacuada nga agtacder iti sibay ni Cristo iti naayat a servicio….. Iti tunggal sikigan ti pangsilo ti lubong a mangsapul iti bagi ken panangpalugod iti bagi ti mangawis kadacuada nga umadayo manipud iti dana a nailatang para kadagiti sinubbot ti Apo. No ti biagda ket bendisyon wenno lunod agsanggir iti panagpilida. Aglablabonan iti pigsa, nagagar a mangsuot iti di pay napadas a kabaelan, kasapulan a makabirokda iti sumagmamano a ruaran para iti aglablabonan unay a biagda. Aktiboda para iti imbag wenno para iti dakes. Ti sao ti Dios saanna a pawilan ti tignay no di ket mangibagnus a sililinteg….
“Kadatayo kas nagannac ken kas Cristiano a naipabaklay ti mangipaay kadagiti annactayo ti umiso a turong. Siaannad, nainsiriban ken siaayatda coma a maibagnus iti dana ti kas ken Cristo a panagserbi…. Saan a tapno paservian no ket agservi’ isu ti naindaclan a leksion a sursuroentayo ken isuro.” – MH, pp. 395, 396.
Lunes
Mayo 20
2. TI PAGTAENGAN KAS ESKUWELA A PAGSURSUROAN
a. Ania a pagdumaan ti makita iti nagbaetan ti pagtaengan a nagsanayan ni Jesus ken kadagiti manursuro idi panawenNa? Lucas 2:40; Juan 7:15; Mateo 7:29. Ilawlawag ti kinapateg ti pagtaengan iti panagsanay para iti sevicio.
“Nagun-odan ni Jesus ti adalNa it pagtaengan. Ni nanangna ti umuna a maestrana. Manipud kadagiti bibigna, ken manipud kadagiti nalukot a libro dagiti propeta, nasursuroNa dagiti nainlangitan a banbanag…. Dagiti manursuro iti dayta a tiempo, inkagumaanda nga ibilin ti respeto babaen iti pabuya ken kinaparammag. Kadagitoy amin, iparang ni Jesus ti nakakadkadlaw a panagsupadi…. ‘Ket daydi ubing dimmackel ken pimmigsa, ken napno ti sirib; ket ti gracia ti Dios adda idi Kencuana’ (Lucas 2:40). Kasta a naisagana, napan Isuna iti misyonNa, iti tunggal kanito a maikadua kadagiti tattao ipaayanNa ida iti inpluensia a mangbendisyon, bileg a mangbalbaliw, kas iti saan pay pulos a nasacsian ti lubong.
“Ti pagtaengan ti umuna a pagadalan ti ubing, ket ditoy a maisaad ti pundasyon para iti sevicio ti biag. Dagiti prinsipiona ti maisuro saan laeng a teorya. Isuda ti mangsukog iti sibubukel a sursuro ti biag.” – MH, pp. 399, 400.
b. Ania a balakad ti adda iti nasirib a tao para iti tao a saanna a kayat ti agtrabaho? Proverbio 6:6-11. Kasano a ti kinamanagtulong ket maipakat iti biag ti pagtaengan?
“Nasapa koma ti pannakaisuro ti leksion ti kinamanagtulong iti ubing. Apaman a naan-anay ti pannakasukog ti pigsa ken bilegna a mangikalintegan, rumbeng a maipaayanen kadagiti pagrebbengan iti uneg ti pagtaengan. Rumbeng a mapapigsa isuna a mangpadas a tumulong iti ama ken inana, mapapigsa a mangilacsid ken mangkontrol iti bagina, ti mangiyun-una iti pakaragsakan ken pagimbagan ti sabali ngem iti bukodna, ti mangbantay kadagiti gundaway a mangparagsac ken tumulong kadagiti kakabsatna a lallaki ken babbai ken kaay-ayamna, ken ti mangipakita iti kinamanangngaasi kadagiti nataengan, masacsakit ken awanan gasat. No ad-adda a naan-anay ti pannakaigamer ti espiritu ti pudno a misyonero iti pagtaengan, ad-adda met a naan-anay ti pannakaisukogna iti biag dagiti annac. Masursuroda ti macasarac iti ragsac iti servicio ken sacrificio para iti pagimbagan ti sabali.” – Ibid., p. 401.
Martes
Mayo 21
3. TI LIBRO A PAKASURSUROAN ITI PAGTAENGAN
a. Ania ti naisangsangayan a bilin ti laglagipen dagiti nagannac iti panangisuroda kadagiti annacda? Roma 14:19; Filipos 2:15; Judas 3.
“Ipaay ti Biblia dagiti nalawag a bilbilin mainaig iti napateg a trabaho a mangisuro kadagiti annac [Deuteronomio 6:4-6, 7-9; 7:3, 4, 6-8 naadaw]… Dagitoy dagiti nalawag a bilbilin a dimmanon iti tiempotayo. Agsasao ti Dios kadatayo kadagitoy maudi nga al-aldaw, ket maawatanto Isuna ket tungpalen.” – 5T, p. 328.
“Dagiti nakakita iti kinapudno ken nakarikna iti kinapategna ken naaddaan iti kapadasan kadagiti banbanag ti Dios, isuda ti mangisuro iti naan-anay a doctrina kadagiti annacda. Rumbeng nga iyammoda kadacuada dagiti naindaclan nga adigi ti pammati, dagiti rason no apay a Sabatistatayo – apay a naawagantayo, kas kadagidi annac ti Israel, tapno agbalin a naidumduma nga ili, nasantoan a nascion, naisina ken naiduma manipud iti amin a kita ti tao iti rabaw ti daga. Dagitoy a banbanag ti kasapulan a mailawlawag kadagiti ubbing iti nalawag a pagsasao, nalaka a maawatan; ket bayat iti yaadu ti tawenda, dagiti leksion a maipaay kadacuada ket maitutop iti dumacdackel a kabaelanda, agingga a maisaad a silalawa ken siuuneg dagiti pundasyon ti kinapudno.” – Ibid., p. 330.
“Saan nga ibilin ti Dios kadagiti agtutubo a nakurang ti panagtarigagayda. Dagiti elemento ti kababalin a mamagbalin iti tao a pudno nga agballaigi ken maidaydayaw kadagiti tattao – ti saan a malapdan a tarigagay para iti sumagmamano a nain-indaclan nga imbag, ti saan a maparmec a pagayatan, ti saan a mabannog a kinaanus – saan coma a mauppapay. Babaen iti parabor ti Dios maiturongda coma iti pannakatun-oy kadagitoy a panggep a nangatngato ngem iti naimbukodan ken nainlubongan nga interes kas kadagiti langlangit a nangatngato ngem iti daga.” – MH, p. 396.
b. Ania ti kasapulan nga ‘inaldaw a pangbantay’ dagiti nagannac? Salmo 119: 105, 130.
“Ti sao ti Dios isu ti inaldaw a pangbantay daiti nagannac. Mangted iti sursuro tapno saan nga agbiddut dagiti nagannac iti panangisuroda kadagiti annacda; ngem saanna nga anamongan ti di panangikankano ken kinaliway. Ti linteg ti Dios ket mapagtalinaed kadagiti panpanaunot dagiti ubbing kas naindaclan a pakaibasaran ti kababalin. No bumangonda ken no agtugawda, no rumuarda, ken no sumrecda, daytoy a linteg ti maisuro kadacuada kas naindaclan a pagannurotan ti biag ket dagiti principiona ti maiyabel kadagiti amin a kapadasanda. Masuroanda nga agbalin a napudno, nateppel, nainut ken nagaget, ket ayaten ti Dios iti amin a puso. Daytoy ti mangpadackel kadacuada iti panangtaraken ken balakad ti Dios. Daytoy ti mangisaad kadagiti sakada iti dana ti pagrebbengan ken talged.” – 5T, p. 329.
Mierkules
Mayo 22
4. RESPETO PARA ITI TURAY
a. Ania ti gutoguten ti maikalima a bilin? Exodo 20:12. Ilawlawag ti bunga ti napudno a panangsanay kenni Isaac mainaig iti turay dagiti nagannac (Genesis 24:1-4, 67).
“Dagiti annac…. Kasapulan a masuroan, maadalan ken madisiplinaan agingga nga agbalinda a natulnog kadagiti dadackelda, mangipapaay iti respeto iti turay. Iti daytoy a wagas, ti respeto para iti nadiosan a turay ket maimula kadagiti pusoda, ket ti panursuro ti pamilia agbalin a kas mangisagana a panangsanay para iti pamilia sadi langit.” – CG, p. 224.
“Pulos coma a di mapukaw iti imatang dagiti nagannac ti bukodda a pagrebbengan para iti masacbayan a ragsac dagiti annacda. Ti panangraem ni Isaac iti pangeddeng ni amana isu ti bunga ti sursuro a naisuro kencuana a mangayat iti natulnog a biag. Ginutogut ni Abraham kadagiti annacna a raemenda ti turay dagiti dadackelda, ti inaldaw a biagna ti agsacsi a ti turay ket saan a managimbubukod wenno naturay a tengngel no di ket naibuangay iti ayat a sipapanunot iti pagimbagan ken pakaragsakanda.” –MYP, pp. 465, 466.
“’Rumbeng kadi a dagiti nagannac,’ saludsodem, ‘ti mangpili iti kadua a dida ibilang ti kapanunotan wenno rikna ti anacda a lalaki wenno babai?’ Isaadko ti saludsod kenca a kas rebbengna; Rumbeng kadi a pilien ti anac a lalaki wenno babai ti kaduada a saanda a pulos nga iyumang kadagiti nagannacda, no ti kasta nga addang ket kangrunaanna nga apektaran ti ragsac dagiti nagannac no addaanda iti aniaman a rikna para kadagiti annacda? Ket rumbeng kadi a dayta nga anac, iti lacsid ti balakad ken dawat ti dadackelna, ipilitna a suroten ti bukodna a dana? Silalawag a sungbatac; Saan; saan no di pulos a mangasawa. Lapdan ti maikalima a bilin ti kasta nga aramid.” – 5T, p. 108.
b. Kasano ti mabalin a panangiladawan iti kababalin ni Ismael? Genesis 16:12. Ilawlawag ti bunga ti panursuro ni Abraham kenni Ismael.
“Dagiti nasapa a panursuro ni Abraham ket saan nga awanan iti epekto kenni Ismael, ngem ti inpluensia dagiti assawana ti nangibanag iti pannaka-ibangon iti panagdidiosen iti pamiliana. Naisina manipud iti amana, ken nagbalin a dakes babaen iti riri ken susic iti pagtaengan nga awanan iti ayat ken panagbuteng iti Dios, naiduron ni Ismael a mangpili iti naatap, mangraraut a biag ti disierto, ‘ ti imana’ ‘maicaniwasto iti tumunggal tao, ket ti ima ti tumunggal tao maicaniwasto kencuana’ (Genesis 16:12). Kadagiti maudi nga alaldawna, nagbabawianna dagiti dakes nga ar-aramidna ket nagsubli iti Dios ni amana, ngem nagtalinaed ti selyo ti kababalin a naited iti kaputotanna. Ti nabileg a nascion a nagtaud kencuana ket nariri, awanan dios a tattao, kankanayon a mangsingsinga ken mangparigat iti kaputotan ni Isaac.” – PP, p. 174.
Hueves
Mayo 23
5. DAGITI KARKARI TI BENDISYON
a. Tapno mabalinan dagiti annnac ti manggun-od iti pannakaamo ti Dios, ania ti imyammo ni Jehova kadagiti nagannac? Deuteronomio 32:46; 11:18, 19, 21.
“Naibilangtayo iti Israel. Amin a sursuro a naited kadagidi Israelitas mainaig iti educasyon ken panangsanay kadagiti annacda, amin dagiti karkari ti bendisyon babaen iti panagtulnog ket para kadatayo.” – MH, p. 405.
“Kas ti panangsalacnib dagiti Israelitas kadagiti annacda iti uneg dagiti babbalayda kabayatan ti panawen ti peggad, pagtalinaedentayo dagiti annactayo a naisina ken naiduma iti lubong. Isurotayo ida a dagiti bilbilin ti Dios ipaawatna ti nakarkaro ngem iti maamiristayo. Dagiti mangsalimetmet kadacuada saanda a tuladen dagiti kannawidan dagii agsalsalungasing iti linteg ti Dios.” – CG, p. 304.
b. Kasano ti panagayat ti Dios kadagiti mangipaay iti bagbagida iti servicioNa? Mikias 5:7, 8; Juan 17:22, 23.
“Nakakaskasdaaw, nakakaskasdaaw dagiti balikas, nganngani iti labes ti petpet ni pammati! Ti Namarsua kadagiti amin a lubong ay-ayatenNa dagiti mangipaay iti bagida iti servicioNa, kas ti panangayatNa iti anacNa. Uray ditoy ket ita ti naparabor a pabor ket naisagut kadatayo iti daytoy makapasiddaaw a kalawa. IntedNa kadatayo ti Lawag ken Kinangayed ti langit, ket Kencuana, insagutNa ti amin a gameng ti langit… TarigagayanNa a sagrapentayo amin a banag a mangpatan-ok, mangpalawa ken mangitag-ay iti kababalintayo.” – MH, p. 405.
Viernes
Mayo 24
PERSONAL A PANGREPASO A SALSALUDSOD
1. Kasano kapateg ti mangipaay kadagiti annactayo ti umisu a pana-ngiturong iti dana ti Nacristianoan a panagservi?
2. Iti ania a kapanunotan ken apay a ti panangsanay iti misyonero ket mangrugi iti pagtaengan?
3. Ania dagiti sumagmamano a pundasyon ti Nacristianoan a panang-sanay iti ubing?
4. Sadino ti pakakitaanyo iti nalawag a pagdumaan da Isaac ken Ismael?
5. Kasano ti panangayat ti Dios a mangdanon kadagiti annac babaen kadagii nagannac?