Domingo
Abril 7
1. TI NAGTAUDAN TI KALLAYSA
a. Idi pinaadda ti Dios ti pasdec ti kallaysa, ania a linteg ti imbangonNa para kadagiti lallaki ken babbai? Genesis 2:24.
“Bayat a pinagtipon ti Namarsua dagiti ima ti nasantoan a pareha iti agkallaysa, kinunaNa, ti lalaki ‘panawannanto ti amana ken ti inana, ket tumiponto iti asawana, ket agbalindanto a maymaysa a lasag’(Genesis 2:24), ImpacdaarNa ti linteg ti kallaysa para kadagiti amin nga annac ni Adan agingga iti panagserra ti tiempo. Dayta impacdaar ti Ama a naimbag isu ti linteg nga addaan kangatoan a bendisyon ken pakasukogan para iti tao.” – MB, pp. 63, 64.
b. Para iti ania a rason a naipasdec ti kallaysa? Genesis 2:18; 1:26-28; 1 Corinto 7:2.
“Rinambakan ti Dios ti umuna a kallaysa. Ngarud ti naipasdec ket para iti nangirugi itoy – ti Namarsua iti universo. ‘Ti panagasawa nadayaw’ (Hebreo 13:4); maysa kadagiti kaunaan a sagut ti Dios iti tao; ket maysa kadagiti dua a naipasdec a, kalpasan ti Pannakatnag, intugot ni Adan iti labes dagiti ruangan ti Paraiso. No dagiti nadiosan a prinsipio ket nabigbig ken natungpal iti daytoy a banag, ti panagasawa ket maysa a bendisyon; bantayan ti kinadalus ken ragsak ti puli. Ipaayanna ti tao iti pannakikadua a kasapulan. Itag-ayna dagiti galad ti bagi, panunot ken moralidad.” – PP, p. 46.
Lunes
Abril 8
2. PANANGPILI ITI KADUA
a. Ania nga ehemplo ti inted ni Abraham iti panangpili iti asawa ni Isaac? Genesis 24:1-4, 67. Ilawlawag no kasano kalawa ti pakaidumaan dagiti agkunkuna a Cristiano manipud kenni Isaac iti daytoy a banag.
“Anian a pannakaisupadi ti dana ni Isaac kadagiti sursuroten dagiti agtutubo iti panawentayo, uray kadagiti agkunkuna a Cristiano! Masansan a marikna dagiti agtutubo a no maipapan iti panagayatda, ti laeng bagbagida ti rumbeng a maiyumang – banag a saanen a nakontrol uray ti Dios wenno nagannac. Nabayag sacbay a madanonda ti(husto a tawen) kinamalalaki ken kinababai – impagarupda a kabaelandan ti agpili, uray awan ti tulong dagiti nagannacda. Sumagmamano a tawen ti biagda a naasawaan ti nakaanay a mangipakita kadacuada iti biddutda, ngem masansan a naladaw unayen a lapdan ti nakaam-amak a banagna. Ta ti isu met laeng a nakurang a sirib ken control iti bagi a nangidiktar iti naganat a panagpili ti napalubosan a nangpakaro iti dakes, agingga a ti relasyon ti agassawa ket nagbalin a makadadael a sangol. Adu ti kasta a nangdadael iti ragsakda iti daytoy a biag ken ti namnamada iti biag a sumangbay.” – PP, p. 175.
b. Mangted iti sumagmamano a madi a panagpili, mainaig iti panangpili iti asawa. Lucas 17:32; Genesis 26:34, 35; 27:46; Job 2:9,10; Oc-ocom 14:1-3.
k. Aramaten ti kapadasan ni Lot kas ehemplo, ilawlawag ti mabalin a bunga ti biddut a panagpili iti asawa.
“Ti asawa ni Lot ket managimbubukod, saan a relihiosa a babai ket gapu iti inpluensiana simmina ti asawana kenni Abraham. Ngem para kencuana, saan coma a nagtalinaed ni Lot idiay Sodoma, napaidaman iti balakad ti nasirib, managbuteng iti a patriarca. Ti inpluensia ni baketna ken dagiti kabaddongalanna iti dayta nadangkes a ciudad, naiturong isuna a sumina iti Dios, no saan laeng a gapu kadagiti naannugot a sursuro a naawatna idi manipud ken Abraham. Ti kallaysa ni Lot ken ti panangpilina iti Sodoma a pagtaenganna isu ti kadena dagiti paspasamak a napno iti kinadakes ti lubong para kadagiti adu a kaputotan.” – Ibid., p. 174.
Martes
Abril 9
3. DAGITI NAPUDNO ITI KALLAYSA
a. Ania a pagbaliwan iti relasyon ti pamilia ti kasapulan a mapasamak tapno agbalin ti kallaysa a naballaigi? 1 Corinto 7:33, 34.
“Tunggal tulag ti kallaysa rumbeng a naannad ti pannnakautobna, ta ti kallaysa ket maysa nga addang para iti biag. Rumbeng unay a siaannad ti lalaki ken babai a mangutob no mabalinda ti agkinnammayet iti tunggal maysa iti unos ti panagduduma iti biag agingga a sibibiagda.” – AH, p. 340.
b. Ania a panagmaymaysa ti patauden ti kari ti Nacristianoan a kallaysa manipud iti lalaki kasta met iti babai? Marcos 10:8, 9; Hebeo 13:4 (umuna a paset).
“Inaramid ti Dios ti babai manipud iti lalaki, tapno agbalin a kadua ken katakunaynayna, makikaysa kenkuana, a mangpregta, mangpabileg ken mangbendisyon kencuana, ket isuna agbalin met a napigsa a katulongan ni baketna. Amin a sumrec iti pannakiasawa nga addaan nasantoan a panggep – ti asawa a lalaki gun-odenna ti nadalus nga ayat ti puso ti babai, ti asawa a babai met ti mangpalukneng ken mangpasayaat iti kababalin ni lakayna ket mangipaay daytoy iti kinaan-anay – matungpal ti panggep ti Dios para kadacuada.”- Ibid., p. 99.
“Iti panunot dagiti agtutubo ti kallaysa ket nakawwesan iti romansa, ket nagrigat nga isina manipud iti daytoy ti kasta a galad, nga isu ti pangabbong ti imahinasyon, ket imaldit iti isip dagiti kapanunotan maipapan kadagiti agkakadagsen a respsonsibilidad a nairaman iti kari ti kallaysa. Daytoy a kari ti namagsilpo kadagiti destinasyon dagiti dua a tattao babaen iti galut nga awan ti makapugsat no di laeng ti ima ni patay.” – Ibid., p. 340.
k. Kasano ti pannakaammotayo a ti pagayatan ti Dios a maadaan ti lalaki ti maymaysa laeng nga asawa, ket ti babai maaddaan laeng met ti maymaysa nga asawa a lalaki? Mateo 19;4-6. Sino ti kaunaan a naisurat iti Biblia nga adu ti asawana? Genesis 4:18, 19.
“Idi punganay inted ti Dios ken Adan ti maysa nga asawa, kasta a maipakita ti bilinNa. Pulos a diNa implano a ti lalaki maaddaan iti adu nga asawa. Ni Lamek ti kaunaan a simmina manipud iti nainsiriban nga urnos ti Dios. Naaddaan iti dua nga asawa, a nangpataud iti riri iti pamiliana.” – 3SG 99.
Mierkules
Abril10
4. DIBORSIO (PANAGSINA): SAAN A PLANO TI DIOS
a. Apay a ti diborsio ken pannakiasawa manen ket napalubosan iti paglintegan ni Moises? Mateo 19:7,8.
“Immay ni Jesus iti lubongtayo tapno maator dagiti biddut ken tapno maisubli ti ladawan ti Dios iti tao. Dagiti biddut a rikrikna mainaig iti kallaysa iti nakasarak iti lugar kadgiti panpanunot dagiti manursuro ti Israel.
Ar-aramidenda nga awanan bileg ti sagrado a pasdec ti kallaysa. Agbalbalinen ti tao a nasukir unay nga uaray awan kapapay-anna a pambar - sumina manipud iti asawa, wenno, no pilienna, isinana ni baketna manipud kadagiti annacda ket papanawenna isuna… Immay ni Cristo tapno aturenna dagitoy a kinadakes ket ti immuna a milagroNa ket napasamak iti okasyon ti boda. Kasta nga impacdaarNa iti lubong a no ti kallaysa ket pagtalinaeden a nadalus ken awanan mulit, maysa a sagrado a pasdec.” – AH, p 341.
b. Ania laeng ti rason a mabalin ti lalaki nga isinana ti asawana? Mateo 5:32; 19:9.
k. Iti ania a wagas nga ingetan ti Biblia dagiti karbengann ti naisina a tao? Marcos 10:11, 12; Lucas 16:18; Roma 7:1-3; 1 Corinto 7:10, 11, 39.
“Ita kas idi al-aldaw ni Cristo, ti kasasaad ti kagimongan iparangna ti naliday a komento maipapan iti nainlangitan a pannggep iti daytoy sagrado a relasyon. Ngem uray kadagiti nakasarak iti kinapait ken pannakauppapay iti dayta ninamnamada a mangted ti ragsak ken katakunaynay, idiaya ti Evangelio ni Cristo ti liwliwa. Ti kinaanus ken kinaamo nga ibingay ti EspirituNa ti mangpasam-it iti dayta napait. Ti puso a pagnaedan ni Cristo ket mapno unay, mapnec unay iti ayatNa a dinto maibus iti tarigagay a mangawis iti simpatia ken imatang iti bagina. Ket babaen iti panangisuko iti kararua iti Dios, maipatungpal ti siribNa ti aniaman a di maaramid ti nataoan a sirib. Babaen iti pannakaipalgac ti paraborNa, dagiti puso nga iti naminsan saan a mangikaskaso ken naisina – mabalinna manen ti makikaysa iti galut a natibtibker ken naam-amnut ngem kadagiti adda iti daga – ti nabalitokan a galut ni ayat a makaandor iti suot ti pannubok.” – MB, p. 65.
Hueves
Abril 11
5. MAYSA A NATIBKER A PANNAKIRELASYON
a. Ania a kababalin ti tunggal maysa iti agassawa ti kasapulan para iti pannakapatibker ti relasyon ti kallaysa? Efeso 5:21; 1 Pedro 5:5; 1 Corinto 12:25 (maudi a paset).
“Iti nagmaymaysa a biagyo ti panagayatyo ket para iti pakaragsakan ti tunggal maysa. Tunggal maysa ket agserbi para iti pakaragsakan ti asawana. Daytoy ti pagayatan ti Dios maipapan kenca. Ket kabayatan nga agtiponkayo kas maymaysa, awan coma ti siasinoman kadakayo a mangpukaw iti kinataona iti sabali….
“Aramiden ni Cristo nga umuna ken maudi ken kaimbagan iti amin a banag. Kankanayon nga imatangan Isuna, ket inaldaw coma nga umun-uneg ken pumigpigsa ti ayatmo para Kencuana bayat iti ilalasatda iti suot ti pannubok. Ket bayat a kumarkaro ti ayatyo Kencuana, ti ayatyo para iti maysa ken maysa ket umun-uneg ken tumibtibker.” – 7 T, pp. 45, 46.
b. Tapno makaaramid iti naballaigi a kallaysa, ania ti kasapulan?
“Ti parabor ni Cristo, ket daytoy laeng, ti makaaramid iti daytoy pasdec ti kallaysa kas plano ti Dios a rebbengna – maysa nga ahencia para ti pannakabendisyon ken pannakaitag-ay ti sangkataoan. Iti kasta dagiti pamilia iti daga, iti panagkaykaysa, ken talon, ken ayatda, maiparangda ti pamilia ti langit.” – MB, p. 65.
Viernes
Abril 12
PERSONAL A PANGREPASO A SALSALUDSOD
1. Ania dagiti dua a pasdec a nairugi idiay Paraiso?
2. Iti ania a kaadayo ti napanan ni Abraham tapno makaala iti umno a kadua para ken Isaac?
3. Ania a kababalin ti rumbeng nga ipaay ti asawa a lalaki ken asawa a babai para iti maysa ken maysa tapno maipatungpalda ti panggep ti Dios para kadacuada?
4. Kasanu nga apektaran ti evangelio ti naipasdec a kallaysa?
5. Kasanu ti rumbeng a panagtignay ti asawa a lalaki ken asawa a babai para iti maysa ken maysa tapno mapatalinaedda ti kinasanto ti relasyonda kas agassawa?