Domingo
Mayo 5
1. DAGITI IMPORTANTE A PRINSIPIO
a. Ania ti kangrunaan a prinsipio ti pudno a relihion iti pagtaengan? Salmo 111:10; Job 28:28.
“Dagiti amma ken inna a mamagbalin iti Dios nga umuna iti pagtaenganda, a mangisuro kadagiti annacda a ti panagbuteng iti Dios isu ti pangrugian ti kinasirib, maidayag ti Dios iti sangoanan dagiti angel ken iti sangoanan dagiti tattao babaen iti panangiparang iti lubong iti naurnos, disiplinado a pamilia, pamilia nga agayat ken agtulnog iti Dios imbes nga agsukirda Kencuana….Dagiti kakasta a pamilia ti makatonton iti kari: ‘ta dagidiay a mangdayaw kaniac, dayawecto’ (1 Samuel 2:30).” – 5T, p. 424.
b. Ania nga ayo, no malaokan iti panagbuteng iti Dios, mamagbalin iti relihion ni Cristo a makaay-ayo iti pagtaengan? Proverbio 15:13 (umua a paset)
“Ti pagtaengan coma ket lugar nga ayan ti ragsak, panagraem ken ayat. Daytoy ti mamagbalin a makaay-ayo kadagiti ubbing…Ti panangkontrol iti bagi iti paset dagiti amin a kameng ti pamilia ti mamagbalin iti pagtaengan a ngannganin paraiso. Aramiden dagiti kuwartoyo a nakaragragsac. Masarakan dagiti annac a ti pagtaengan isu ti pakaay-ayoan unay a lugar iti rabaw ti daga.” – CH, p. 100.
Lunes
Mayo 6
2. RELIHION TI PAGTAENGAN
a. Kasano ti panangituray ni Abraham iti bukodna a balay? Genesis 18:18, 19. Ania dagiti leksion a masursurotayo manipud iti ehemplona?
“No addaantyao iti naimbag a relihion iti pagtaengan, maaddaantayo iti kasayaatan a pagtitiponan a relihion. Tenglen ti sarikedked ti pagtaengan. Iconsagraryo ti pamiliayo iti Dios, ket agsao ken agtignaykayo iti pagtaengan kas maysa a Cristiano. Naasi, naibtor ken naanuskayo iti pataengan gapu ta dacayo iti manursuro.” – AH, p. 319.
“Ipakita iti biagyo a ni Jesus ti amin a banag kadacayo, ken kasta met nga ipakita a ti ayatNa ti namagbalin kadacayo a naanus, naayat, naibtor, ngem ketdi natibker a mangbilin kadagiti ananacyo a sumurot kadacayo kas ti inarmaid ni Abraham.” – Ibid., p.317.
b. Kasano ti panangpasingked ni apostol Pablo iti epecto dagiti inpluensa ti pagtaengan iti biagmo iti iglesia? 1 Timoteo 3:4, 5; 1 Tesalonica 2:10-13.
“Iti pagtaengan a maisaad ti pundasyon para iti panagrang-ay ti iglesia. Dagiti inpluensia a mangituray iti biag iti pagtaengan ket maitugotda iti biagda iti iglesia; ngarud dagiti pagrebbengan iti iglesia ket umuna a mangrugi iti pagtaengan.” – Ibid., p. 318.
k. Ania a tema ti mangsakop iti kangrunaan a lugar iti panangsanay kadagiti annac? 1 Corinto 2:2; Roma 16:25, 26.
“Ibaga kadagiti annac ti naindaclan a tay-ac ti misyonero ken isao kadacuada ti ayat ni Cristo; ket ti naidaclan a sacrificio a naaramid gapu ta ay-ayatenNatayo ken kayatNatayo a maaddaan iti pagtaengan a kadua Isuna iti pagarianNa. Immay ditoy lubong tapno bendisyonanNatayo iti nadiosan a presenciaNa, tapno maisangbay ti talna ken lawag ken ragsak; ngem saan nga inawat ti lubong Isuna ket pinatayna ti Princepe ti Biag. Ti ipapatayNa ti nangisangbay iti langit iti pakagaw-atan ti amin a mamati Kencuana. Aramiden daytoy nangayed a kinapudo a nalawag kadagiti annacyo; ket bayat a ti ubing pay a pusoda ket dumacdackel nga agayat iti Dios, bay-an ida a mangiparang iti bassit a datonda, tapno maakemda ti pasetda a mangipatulod iti napateg a lawag ti kinapudno iti sabali.” – Rh, Dec.11, 1888.
Martes
Mayo 7
3. PANANGISURO ITI RELIHION ITI PAGTAENGAN
a. Ania ti naindaclan a pagrebbengan ti adda kadatayo para kadagiti annactayo, ken kasano a bendisyonan ti Dios ti peksatayo? Proverbio 4:1-8.
“Pagrebbengan ti ama ken ina ti pannakamentenar ti relihion iti pagtaengan.” – AH, p. 321.
“Dagiti addaan iti saad ni talek iti pakaigapuan ti Dios an-anayenda ti biagda a maisurot iti nadiosan a kaasaping. Iti pagtaengan, iti iglesia, iti sangoanan ti lubong [dagiti manursuro, ministro ken dodoktor] ipalgacda ti bileg ti Nacristianoan a prinsipio a mangbaliw iti biag.” – CPTS, p. 397.
“Agaramid ti Dios iti naindaclan a banbanag para kadagiti manglukat iti pusoda iti saoNa, ket bay-an a mangtagikua iti templo ti kararua.” – Ibid., p. 396.
b. Ania ti ipatunggpal ti narelihionan a bilin iti pagtaengan para kadagiti annactayo? Proverbio 4:10-13. Ilawlawag no kasanokapateg ti panangisuro dagiti nagannac kadagiti annacda no kasano iti umasideg ken Jesus.
“No nagaget ken nasalukag iti panangisuro ken panangsanayda kadagiti annacda a dagiti matada nakaturong laeng iti dayag ti Dios, makitinnulongda iti Dios ket makitinnulong met ti Dios kadacuada iti pannakaisalacan dagiti kararua dagiti annac a nakatayan ni Cristo.
“Ti narelihionan a bilin ket dacdackel ti kaipapananna ngem ti ordinario a bilin. Ipaawatna a makipagkararagkayo kadgiti annnacyo, isursuro ida no kasano ti umasideg ken Jesus, ket ibaga Kencuana ti kayatda. Ipaawatna nga ipakitayo iti biagyo a ni Jesus ti amin a banag kadacayo, ken kasta met nga ipakita a ti ayatNa ti namagbalin kadacayo a naanus, naayat, naibtor, ngem ketdi natibker a mangbilin kadagiti ananacyo a sumurot kadacayo kas ti inarmaid ni Abraham.
“Iti panagtignaymo iti biagmo iti pagtaengan, naisuratka kadagiti libro ti langit. Isuna nga agtarigagay nga agbalin a santo sadi langit kasapulan nga agbalin pay nga umuna a santo iti bukodna a pamilia…. Nagannac, saan kadi a maysa laeng a panagibunannag ti relihionyo no di ketdi maysa a kinapudno.”– AH, p. 317.
“No awan dagiti kangrunaan a prinsipio ti pudno a relihion, no awan ti pannakaammo no kasano ti agserbi ken mangigloria iti Mannubbot, ti edukasyon ket ad-adda a makadangran ngem ti makapasayaat.” – CPTS, p. 412.
Mierkules
Mayo 8
4. PANNAKAAMMO ITI NASANTOAN A SURAT KASAPULAN
a. Kasano kasapa ti panangisangbaytayo iti lawag ti pannakaammo kadagiti annactayo? 2 Timoteo 3:15.
“Apaman a nalaingen dagiti ubbing nga umawat, rumbeng nga ibagan dagiti nagannac ti pakasaritaan ni Jesus tapno makainumda iti napateg a kinapudno maipapan iti Ubing diay Betlehem. Imaldit kadagiti panpanunot dagiti ubbing dagiti rikrikna ti nanumo a kinaimbag a maitutop iti tawen ken abilidadda.” – AH, p. 320.
b. Kasano ti rumbeng a kinagagettayo kas nagannac a mangisuro iti Nasantoan a Surat kadagiti annactayo? Isaias 34:16 (umuna a paset); Deuteronomio 6:6-9.
k. Iti ania ti pakabuklan ti relihion iti pamilia? Proverbio 22:6.
“Buklen ti relihion ti pamilia ti panangpadackel kadagiti annac iti panursuro ken balbalakad ti Dios. Tunggal maysa iti pamilia ket mataraonan kadagiti leksion ni Cristo, ket nainget coma ti pannakabantay ti interes ti tunggal kararua.” – Ibid., - p. 317.
“Ti relihion ti pamilia ket maysa a nakakaskasdaaw a bileg. Ti tignay ti asawa a lalaki iti baketna ken ti asawa a babai iti lakayna ket mabalin a mamagbalin iti biag ti pagtaengan a maysa a panagsagana para iti iseserrek iti pagtaengan idiay ngato.
“Dagiti puso a napno iti ayat ni Cristo pulos a didanto agiinnaddayo. Ti relihion ket ayat, ket ti maysa a nacristianoan a pagtaengan isu ti maysa a lugar a pagturayan ti ayat ket maipeksa daytoy kadagiti sao ken tignay ti sipapanunot a kinaimbag ken naamo a panagraem.” – Ibid., p. 94.
“Ti peksa a mamagbalin iti pagtaengan iti kas iti rebbengna –ket maysa a tanda iti pagtaengan idiay langit – mangisagana kadatayo iti nalawlawa a tay-ak. Ti adal a naawat, babaen iti panangipakita iti naayat a panangibilang iti tunggal maysa isu ti mamagbalin kadatayo a mangammo no kasano ti mangdanon kadagiti puso a kasapulan a masuroan kadagiti prinsipio ti pudno a relihion. Kasapulan ti iglesia ti amin a napasayaat a naespirituan a puwersa a mabalin a maton-oyan, tapno ti amin, ket naannad ti pannakabantayna. Ti kinapudno a nagbiagan iti pagtaengan aramidenna ti bagina a marikna kadagiti awan idumdumana a panagtrabaho iti sabali a disso. Isuna nga agbibiag a Cristiano iti pagtaengan agbalin a naranyag ken agsilsilnag a lawag iti sadinoman.” – Ibid., pp. 38, 39.
Hueves
Mayo 9
5. TI GAPU KEN BUNGA TI PANNAKIRELASYON
a. Kas mainaig iti pannakasanay ti anac, mangibaga iti ehemplo ti panagtinnulong dagiti agassawa. Oc-ocom 13;8-12. Ania ti rumbeng a masiguro kadagiti nagannac sacbay a mabalinanda nga isuro dagiti annacda? Deuteronomio 4:9.
“Ti ama ti pamilia saanna nga ipasulo iti ina ti amin nga annong a mangipaay iti naespirituan a sursuro. Dackel a trabaho ti aramiden dagiti amma ken inna. Ket agpadada a mangakem iti indibidual a pasetda iti panangisagana kadagiti annacda para iti naindaclan a panangamiris ti pangocoman.” – AH, p 321.
b. Ania nga inpluensia ti ipaay ti pudno a relihion ti pagtaengan iti kagimongan? Deuteronomio 4:5-8.
“No ti relihion ket inpluensiaanna ti kagimongan, kasapulan nga inpluensiaanna nga umuna ti pagtaengan. No dagiti annac ket nasuroan iti pagtaengan nga agayat ken agbuteng iti Dios, no rumuarda a mapan iti lubong, nakasaganada a mangisuro iti bukodda a pamilia para iti Dios, ket iti kasta dagiti prinsipio ti kinapudno ket mabalin nga imula iti kagimongan ket mangipaay iti agsasao nga inpluensia iti lubong. Ti relihion saan a maisina manipud iti edukasyon ti pagtaengan.” – Ibid., p. 318.
Viernes
Mayo 10
PERSONAL A PANGREPASO A SALSALUDSOD
1. Apay a ti kinaragsak rumbeng a maitipon iti panagbuteng iti Dios iti pagadalan iti pagtaengan?
2. No addaantayo iti nasayaat a relihion iti pagtaengan, ania ti mapaadda iti iglesia?
3. Ania ti aramiden ti Dios kadagiti nagannac a mangilukat iti pusoda iti saoNa iti panangisuroda kadagiti annacda?
4. Padackelentayo dagiti annactayo iti panursuro ken balakad ti Dios. Ania ti kaipapananna dayta?
5. Ania dagiti prinsipio nga isuro dagiti nagannac kadagiti annacda?