Domingo
Abril 14
1. DAGITI RAMEN TI BALLAIGI
a. Kasano a dagiti agassawa a lalaki ken babai ket agtinnulong a mangpasantac iti ayat, parabor ken iti pannakaammo iti Apotayo? Galacia 6:2.
“Ania ti ad-adda a makaay-ayo iti Dios ngem iti makakita kadagiti sumrek iti relasyon ti kallaysa nga agpada a mangikagumaan nga agadal ken Jesus tapno agbalinda nga ad-adda a mapno iti EspirituNa?” – AH, p. 114.
b. Ania pay ti sabali a ramen ti mainayon iti ballaigi ti relasyon ti kallaysa? Colosas 3:12-15.
“Awan ti sabali a nabileg a makadadael iti ragsac ken kinaserbi ti babai ken mamagbalin iti biag a nakaladladingit no di ti bukodna nga asawa; ket awan ti makaaramid iti mamin-gasut a kawadwad ti mangpalamiis kadagiti namnama ken panggep ti maysa a lalaki, mangparalisado iti pigsana ken mangdadael iti influencia ken panggepna no saan a ti bukodna nga asawa.” – Ibid., p. 43.
“Addaanka itan kadagiti pagrebbengan nga aramiden a saanmo nga ar-aramiden idi sacbay ti kallaysam. ‘Ikawwesmo ngarud… iti kinaimbag ti nakem, iti kinapa-cumbaba; iti kinaemma, ken iti nabayag a panagitured.’ ‘Magnakayo babaen iti ayat, kas met ni Cristo inay-ayatnatayo’ (Colosas 3:12; Efeso 5:2).” – 7T, p. 46.
Lunes
Abril 15
2. TI RELASYON TI ASAWA A LALAKI KEN ASAWA A BABAI
a. Ania dagiti bilbilin a mangtulong kadagiti kameng ti pamilia iti panaglilinnangenda iti uneg ken ruar ti pagtaengan? 1 Pedro 3:1-4. Ania ti panggep ti Dios iti Nacristianoan a pagtaengan?
“Kayat ti Dios a dagiti pamiliatayo ket tanda ti pamila idiay langit.” – AH, p. 17.
“Amin ket rumbeng a mangtaripato iti kinaanus babaen iti panangisanay iti anus. Babaen iti kinaasi ken kinaibtor, mapagtalinaed a nabara ti ayat iti puso ket masukog dagiti kababalin nga anamungan ti Langit.” – Ibid., p. 106.
b. Babaen iti ania a kondisyon nga agtalinaed ti tunos ti relasyon ti kallaysa? Galacia 5:13-16.
“Pagsaritaan coma a naimbag dagiti agassawa dagiti banbanag.Pabaroen dagiti nasapa a panggepda iti tunggal maysa, bigbigenyo dagiti biddutyo, ngem iti daytoy a trabaho – kasapulan ti annad a saan coma nga akuen ti asawa a lalaki ti mangikonpesar iti biddut ni baketna wenno ti asawa a babai iti asawana. Ikagumaan nga agbalinkayo kas iti kayatyo a pagblinan para iti maysa ken maysa, iti kasta ti galut ti panagasawa isu ti kalikaguman unay a singgalut.” – HP, p. 203.
k. Kasano ti panangtrato dagiti agassawa iti tunggal maysa? Efeso 5:22, 23, 25; Mateo 7:12.
“Kasapulan nga addaantayo iti Espiritu ti Dios, wenno pulos a saantayo a maaddan iti tunos iti pamilia. Ti asawa a babai, no addaan iti Espiritu ni Cristo, agbalin a naannad kadagiti balikasna; kontrolenna ti espirituna, paiturayan ngem saanna a marikna nga adipen isuna no di ket kadua ni lakayna. No ti asawa a lalaki ket adipen ti Dios, saan nga isu ti mangituray iti baketna; saan coma a naturay ken nainget. Saantayo a maipateg ti ayat iti pagtaengan no sobra ti alluad; ta ti pagtaengan, no agnaed ti Espiritu ti Apo sadiay, isu ket tipo ti langit…. No agbiddut ti maysa, ipakita met ti kaduana ti Nacristianoan a kinaanus ket saan a pumanaw a silalamiis.” – AH, p. 118.
“Iti aglawlaw ti tunggal pamilia adda sagrado a timbukel a saan coma a maputed. Iti uneg daytoy a timbukel awan ti sabali a tao ti addaan karbengan nga umuneg. Saan coma a palubosan ti asawa a lalaki wenno asawa a babai ti sabali a makibingay kadagiti palimed a para laeng kadacuada.” – MH, p. 361.
Martes
Abril 16
3. PAGBULIGAN NGA AYAT, RESPETO KEN DAYAW ITI KALLAYSA
a. Ania a kababalin ti rumbeng nga adda iti asawa a lalaki para iti asawana? Colosas 3:19.
“Saan a gakat ti Dios a ti asawa a lalaki ket addaan control, kas ulo iti balay, no isuna a mismo ket saan a paiturayan ken Cristo. Kasapulan nga adda isuna iti babaen ti turay ni Cristo tapno maiparangna ti ralasyon ni Cristo iti iglesia. No isuna ket nagubsang, nakuspag, natagari, natangig, nainget, ken naturay a tao, saanna coma nga iyebkas ti sao a ti asawa a lalaki isu ti ulo ti asawana, iti kasta kasapulan a sumuko isuna kencuana….
“Assawa a lallaki rumbeng nga adalen ti pagtuladan ket ikagumaan nga ammoen no ania ti kaipapanan ti tanda a naiparang iti Efeso, ti relasyon nga adda kenni Cristo iti iglesia. Ti asawa a lalaki isu ti kas Mangisalacan iti pamiliana.” – AH, p. 117.
“Kabsatko a lalaki, agbalinka coma a naasi, naanus, managitured. Laglagipem nga inawatnaka ni baketmo kas lakayna, saan a tapno iturayam, no di ket tapno agbalinca a katulonganna. Saanca koma a nainget ken naturay. Saanmo nga ipakat ti napigsa a pagayatam a mangpilit iti asawam a mangaramid iti kayatmo. Laglagipem nga addaan met isuna ti pagayatan ket kalikagumanna met ti kayatna a kas ti panagkalikagummo ti kayatmo…. Managpabus-oy ken naraemkayo coma. “Ngem ti sirib nga aggapu sadi ngato, umuna nadalus, sumaganad natalna, nalaing, nalaca a pagdawatan, napno iti asi ken cadagiti nasayaa a bungbunga’(Santiago 3:17).” – 7T, p. 48.
b. Ania ti isuro ti Nasantoan a Surat maipapan ti isusuko dagiti assawa a babbai kadagiti assawada? Colosas 3:18; 1 Pedro 3:4-6. Ania dagiti pangbalakad a balikas ti impilit nga inted ti mensahero ti Apo iti maysa nga asawa a babai?
“Masansan a madlawko iti sangoanan ti sabali ti wagas ti panagsasaom kenni Juan iti naturay a wagas, ti tono ti bosesmo kasla makaunget. Maria, nadlaw ti dadduma daytoy ket insaoda dayta kaniac. Sactanna ti inpluenciam.
“Datayo a babbai kasapulan a laglagipen nga insaadnatayo ti Dios a paiturayan iti asawa. Isu ti ulo, ket ti panggeddeng ken kapanunotan ken rason kasapulan a maitunos kencuana no mabalin. No saan, ti ipangpangruna ti Sao ti Dios ket naited iti asawa a lalaki a no saan a banag ti konsencia. Kasapulan a sumukotayo iti ulo.” – TSBAD, p. 28.
Mierkules
Abril 17
4. MAYSA A KAPANUNOTAN TI PATEG TI BAGI
a. Kasano kauneg ti ayat ti lalaki para iti asawana? Efeso 5:28.
“Raemen coma ti asawa a babai ti lakayna. Ayaten ken ipateg coma ti asawa a lalaki ti baketna; ket kas ti panangkaykaysa kadacuada ti kari ni kallaysa kas maymaysada, ngarud ti pammatida ken Cristo ti mangikaysa Kencuana.” – AH, p. 114.
“Adalen coma ti asawa a lalaki ken ama nga awaten dagiti sasao ni Cristo, saan nga iti bangbangir a wagas, a ti laeng isusuko ti asawa a babai iti lakayna, no di ket iti lawag ti cruz ti Calvario, adalenna ti bukodna a takem iti pamilia. ‘Lallaki, ayatenyo dagiti assawayo, a cas met iti panagayat ni Cristo iti iglesia, ket inyawatNa ti bagina gapu kenca; tapno pasantoenna, idinto nga inugasanNa iti panangbuggo ti danum gapu iti sao’ (Efeso 5:25,26). Inted ni Jesus ti Bagina a matay idiay cruz tapno madalusan ken maiyadayonatayo iti basol ken rugit babaen iti inpluensia ti Espiritu Santo.” – Ibid., pp. 117, 118.
b. Kasano a ti tunggal asawa ket padayawan ken pabilgenna ti estado ti kallaysada a naan-anay, sibabara, ken sipupudno? Efeso 5:33; 1 Pedro 3:1,7.
k. Kasano ti panagbalintayo a karagsakan kadagiti pampamilia? Colosas 3:16, 17; Salmo 128.
“Tunggal maysa agipaay coma iti ayat imbes nga ingetan daytoy. Pasantaken no ania ti katan-okan kadagiti bagbagiyo ket agblain a naalisto a mangbigbig kadagiti naimbag a kababalin nga adda iti tunggal maysa. Ti pannakarikna a bigbigbigendaca ket maysa a nakakaskasdaaw mangparegta ken mangpennec….
“ Awan coma kadagiti agassawa lalaki man wenno babai ti mangpadas a mangipakat iti naturay a pangkontrol iti sabali. Saan a padasen a piliten ti tunggal maysa a sumuko iti pagayatanyo. Saanmo a maaramid daytoy ket mapagtalinaed ti ayat ti tunggal maysa. Naasikayo coma, naanus ken naibtor, managpabus-oy ken naraem. Babaen iti parabor ti Dios, agballaigikayo a mangparagsak iti tunggal maysa, kas ti inkariyonga armidenyo idi nagkallaysakayo.” – MH, p. 361.
“Kayat ni Jesus ti mangkita kadagiti naragsak a kallaysa, naragsak a pagtaengan.” – AH, p. 99.
Hueves
Abril 18
5. KALLAYSA, INSTRUMENTO TI PANNAKAISALACAN
a. Ania a prinsipio ti addaan iti naisangsangayan a lugar iti Nacristianoan a pagtaengan? Mateo 5:14-16; Titus 2:1-4.
“Tunggal pamilia rumbeng a lugar ti ayat, lugar a pagnaedan dagiti angeles ti Dios, agtrabtrabaho a buyogan ti mangpalukneng, mangpasuko nga inpluencia kadagiti puso dagiti nagannac ken annac.
“Maaramid coma dagiti pagtaengantayo a Bethel, dagiti pusotayo ti altar. Sadinoman a ti ayat ti Dios ket naipateg iti kararua, adda talna, addanto lawag ken rag-o. Iruar ti sao ti Dios iti sangoanan ti pamiliayo a siaayat ket saludsoden, ‘Ania ti inasao ti Dios?’” – AH, p. 18, 19.
b. Kadagiti ania a wagas a ti kallaysa agbalin nga instrumento ti pannakaisalacan kadagiti saan a mamati? Tito 2:4-6; 1 Juan 3:18; 1 Corinto 7:16.
“Manipud iti utnggal Nacristianoan a pamilia agranyag coma ti nasantoan a lawag. Maipalgac ti ayat iti tunggal tignay. Rumuar kadagiti amin a pinaglilinnangen iti pagtaengan, mangipakpakita ti kinaasi, kinaamo ken saan a naimbukodan a kinaraem.” – PP, p. 144.
“Ti kasayaatan a suot ti kinacristiano iti maysa a pagtaengan isu ti kita ti kababalin nga itden ti inluensiana. Agsao ti tignay a napigpigsa ngem ti kapintasan a panangibunannag iti kinasanto.” – Ibid., p. 579.
Viernes
Abril 19
PERSONAL A PANGREPASO A SALSALUDSOD
1. Dagdagupen dagiti agpada a pagrebbengan dagiti agassawa?
2. Ania ti bilin ti Dios maipapan iti pinaglilinnangen iti uneg ken ruar ti pagtaengan? Kasano a mapagtalinaed ti tunos iti relasyon ti agassawa?
3. Ania dagiti kababalin, no iparangarang dagiti agassawa, isangbayna ti langit iti uneg ti pagtaengan?
4. Dakamaten ti sumagmamano a wagas a ti tunggal persona a nakikallaysa ket makaipaay iti maysa ken maysa iti kapanunotan a pateg ti bagi.
5. Kadagiti ania a wagas a ti kallaysa ket instrument ti pannakaisalacan?