Domingo
Marzo 31
1. MAYSA A NADIOSAN A PANNAKIRELASYON
a. Iladawan ti relasyon nga adda kenni Cristo iti Ama (a) sacbay nga immay Isuna ditoy lubong, ken (b) idi adda Isuna ditoy lubong. Juan 1:1, 14; Filipos 2:5-8; Juan 17:5.
“Ti maikasangapulo ket pito a kapitulo ti Juan silalawag a saoenna ti maipapan ti personalidad ti Dios ken ni Cristo, ken ti relasyonda iti tunggal maysa.” – 5 BC, p .1145.
“Ti Kangatoan iti universo saan a nagmaymaysa iti trabahoNa nga agaramid iti naimbag. Adda kaduaNa – katrabahoanNa a makaappreciar kadagiti panggepNa, ken mabalinNa a kabingay iti ragsakNa a mangted ragsak kadagiti naparsua. ‘Idi punganay adda ti Verbo, ket ti Verbo adda iti Dios, ket ti Verbo isu, Dios. Isu met laeng adda idi punganay iti Dios’ (Juan 1:1,2). Ni Cristo, ti Verbo, ti bugbugtong nga Anac ti Dios, ket naikadua iti agnanayon nga Ama – maymaysa iti galad, iti kababalin, iti panggep – isu laeng ti makabalin a makastrec kadagiti amin a balakad ken panggep ti Dios.” – PP, p. 34.
b. Kasanu a pinasingkedan ni Cristo ken ti Dios Ama ti kinauneg ti relasyonda? Juan 8:29; Mateo 17:5.
Lunes
Abril 1
7. TI PLANO TI NAMARSUA
a. Para iti ania a panggep nga imparsua ti Dios ti daga? Isaias 45:18. Kaano ken kasano a maipatungpal ti orihinal a panggep ti Dios? Salmo 37:29; 2 Pedro 3:13.
“Innala ti amin a langit ti nauneg ken naragsak nga interes iti pannakaiparsua ti lubong ken ti tao. Dagiti nataoan a parsua ket maysa a baro ken naidumduma nga urnos. Naaramidda a ‘kaldawan ti Dios, ket plano idi ti Dios nga agpaaduda iti rabaw ti daga.” – RH, Feb. 11, 1902.
b. Ania nga ayo ti innala ti Dios kadagiti simmungbat iti singasingNa? Salmo 145:18, 19; Isaias 49:14-16.
“No agpakaasitayo iti Dios a kaassianNatayo iti ladingittayo, ken ibagnosNatayo babaen iti Espiritu SantoNa, pulos a dinanto paglikodan ti kararagtayo. Posible pay kadagiti nagannac a panawan ti mabisbisin nga anacna ngem ti Dios a dinto pulos mangrejectar iti asug ti agkasapulan a puso ken gumawgawawa a puso.” – MB, p. 132.
k. Iladawan ti ayo a mapaadda iti puso dagiti sumungbat iti ayat ti Dios a naipalgac kenni Cristo. 1 Juan 4:19, 9-11.
“Naibangon ti relihion iti ayat ti Dios, nga isu ti mangiturong kadatayo nga agayat iti tunggal maysa. Napno daytoy iti panagyaman, kinapakumbaba, nabayag nga agitured. Manangilacsid iti bagi daytoy, managibtor ken nalaka a mamakawan. Isacrificiona ti sibubukel a biag ken idanonna ti influensiana kadagiti sabsabali.
“Dagiti agayat iti Dios dida pasangbayen da gura ken apal. No ti nainlangitan a prinsipio ti agnanayon nga ayat punoenna ti puso, agluppias a mapan iti sabali. Saan laeng a gapu a nakaawatda ti pabor kadacuada, no di ket gapu ta ti ayat isu ti prinsipio a mamagtignay ken mangpasayaat iti ugali, mangituray iti rikna ken mangtengngel kadagiti pagreggetan, mangpasuko iti gura ken mangitag-ay ken mangitan-ok kadigiti rikrikna. Daytoy nga ayat…. Ket kas kalawa ti lubong ken kas kangato ti langit, ket maitunos kadagiti agtrabtrabho nga angel. Daytoy ayat a naipateg iti kararua pasam-itenna ti intero a biag ket mangipaay iti mangpapino nga influensia kadagiti amin nga aglawlawna.” – 4T, p. 223, 224.
Martes
Abril 2
3. TI PANNAKIRELASYON TI DIOS ITI SANGKATAOAN
a. Kasano a nabendisyonantayo babaen iti pannakirelasyontayo iti Kinadios? Mateo 7:7-11. Ania a pammanecnec ti inted ti Dios kadatayo nga ay-ayatenNatayo ken maseknan iti pagimbagantayo? Jonas 4:2 (maudi a paset); Mikias 7:18.
“Pagaayat dagiti angeles ti agrukbab iti sangoanan ti Dios; pagaayatda ti adda iti asidegNa. Ibilangda a kaindaclan a ragsacda ti makisao Kencuana; ngem kadagiti annac ti daga, nga agkasapulan unay iti tulong a ti Dios laeng ti makaipaay. Kasla mapnecdan a magna nga awanan iti lawag ti EspirituNa, ti pannakikadua ti presenciaNa.” – SC, p. 94.
“In-galut ti Dios dagiti pusotayo Kencuana babaen kadagiti saan a mabilang a pagilasinan iti langit ken daga. Babaen kadagiti banbanag ti nakaparsuaan, ken ti kaunegan ken kaumbian a naindagaan a galut a maammoan dagiti natoan a puso.” – Ibid., p. 10.
b. Ania ti siaannugot nga aramiden ti Dios para kadagiti kameng ti nataoan a pamilia kalacsidan ti nadadael a kasasaadda? Mateo 6:25-30
“Iti sermon idiay Bantay, impasigurado ni Cristo kadagiti dicipulosNa dagiti agkakapateg a leksion mainaig ti kinapateg ti agtalek iti Dios. Nairanta dagitoy a leksion a mangpabileg kadagiti annac ti Dios iti amin a panawen, ket simmangbayda iti tiempotayo a napno kadagiti sursuro ken liwliwa. Intudo ti Mannubbot kadagiti pasurotNa dagiti billit iti angina a bayat ti panangikantada ti pagdaydayawda, awanan pannakadagsen kadagiti pagannongan a kapanpanunotan, ta ‘saanda nga agmula, saanda met nga agapit.’ Ngem ketdi ipaay ti naindaclan nga Ama ti kasapulanda. Sinaludsod ti Mannubbot, “Saan kadi a naimimbagcayo ngem kadacuada?’ (Mateo 6:26).” – Ibid., p. 123.
k. Sino ti tumulong kadagiti lallaki ken babbai iti pananggun-odda iti umno a pannakirelasyon? Galacia 5:22, 23; 2 Pedro 1:3-7.
“Dagiti agbalin a baro a parsua ken Cristo Jesus mangisangbayda kadagiti bungbunga ti Espiritu, ‘ayat, rag-o, talna, nabayag a panagitured, kinaanus, kinalaing, kinamanagtalek, kinaemma, panagteppel’ (Galacia 5:22, 23)”. – Ibid., p. 58.
Mierkules
Abril 3
4. IBAGA TI DIOS DAGITI KASAPULAN TI TAO
a. Ania dagiti rason a napan da Agar ken iti anacna a lalaki idiay disierto, ken iti ania a wagas nga impaay ti Dios dagiti kasapulanda Agar ken ti anacna a lalaki? Genessis 21:9-11, 17-20.
b. Mainaig iti personal a pannakirelasyon, ania a prinsipio ti naipakita iti pakasaritaan ti babai a natiliw iti pannakiabig? Juan 8:10, 11. Kasano a binigbig ni Jesus ti dignidad ti sangkataoan? Lucas 15:1, 2.
“Iti tignay ni Jesus a nangpakawan iti babai [naakusaran a nagsalungasing iti maikapito a bilin] ken nangpaganetget kencuana nga agbiag iti naim-imbag a biag, ti kababalin ni Jesus nagranniag ti pintas ti naan-anay a kinalinteg. SaanNa a sinapul ti mangcondena no di ket mangisalacan.” – DA, p. 462.
“Nagtugaw ni Jesus kas madaydayaw a sangaili iti lamisaan ti agsingsingir ti buis, babaen iti pannakipagrikna ken nalaing a pannakikaduaNa ti mangipakpakita a binigbigNa ti dignidad ti sangkataoan; ket tarigagay dagiti tattao ti agbalin a maikari iti talekNa. Kadagiti mawaw a pusoda a nagtinnag dagiti balikasNa a buyogan ti nasantoan, mangted-biag a bileg. Nariing dagiti baro a rikna, ket nalukatan ti posibilidad ti baro a biag kadagiti walang ti kagimongan.” – Ibid., p. 274.
k. Ania ti kari ti Dios iti tunggal maysa a naitalek iti salluadNa? Zacarias 2:8; Isaias 49:15, 16; Mateo 10:29, 30. No italektayo ti biagtayo iti Dios, kasano a masiguradotayo a salacnibannatayo dagiti nainlangitan nga ahencia? Juan 10:28, 29.
“Ti kararua a naisuko kenni Cristo agbalin a bukodNa a pagkamangan, a tengngelNa iti nagubat a lubong ket rantaNa nga awan ti turay a maam-ammo itoy no di ti bukodNa. Ti kararua a kasta a salsaluadan dagiti nainlangitan nga ahencia dinto maduprak kadagiti pangraut ni Satanas.” – Ibid., p. 324.
“Kabayatan nga itunda ni Cristo iti amin a lubong ti awisNa nga umasideg Kencuana tapno maisalacan, binilinNa dagiti angelesNa a mangipaay iti nadiosan a tulong iti tunggal kararua nga agbabbabawi a sumangbay Kencuana, ket personal nga umay Isuna babaen iti Espiritu Santona iti tengnga ti iglesia.” – TM, p. 15.
Hueves
Abril 4
5. TI PAGWADAN A PANNAKIRELASYON
a. Ania ti pagayatan ti Dios para kadatayo mainaig iti nainlangitan a pannakirelasyon? Juan 3:16, 17; 17:3, 22.
“Isuna a namarsua iti tao, naawatanNa ti pateg ti sangkataoan. ImpacdaarNa ti diablo a kabusor dagiti kalikagumanNa a bendisyonan ken isalacan. Iti tunggal tao, nakitaNa ti anac ti Dios, maysa a mabalin a maisubli iti gundaway iti nadiosan a pannakirelasyon.” – Ed., p. 79.
b. No mapadasantayo dagiti bendisyon ti pannakirelasyon iti Dios, ania ti iturongna nga aramidentayo? 1 Corinto 9:16; 2 Corinto 5:14, 15.
“No kayatmo ti agbalin a pasurot ti Mannubbot, kasapulan a pasayaatem ti pannakipagrikna ken simpatia…. No kumitkitaka ken Jesus, agsaksakdo manipud Kencuana iti pannakaammo, pigsa ken parabor, mabalinmo ti mangibingay iti liwliwa iti sabali , agsipud ta ti Mangliwliwa adda kenca.” – WM, p. 26.
“Ti ayat ni Cristo, naipalgac kadatayo, mamagbalin kadatayo a nakautang kadagiti amin a saan a makaammo Kencuana. InikkanNatayo ti Dios iti lawag, saan laeng a para iti bagitayo no di ket ibingay met kadacuada.” – SC, p. 81.
Viernes
Abril 5
PERSONAL A PANGREPASO A SALSALUDSOD
1. Kasano ti pannakaawattayo iti sumagmamano a punto iti relasyon ni Cristo ken iti Dios?
2. Ania a mensahe ti naiturong kadacuada a kadagiti alaldaw ti sipnget nariknada a saan a sipapanunot ti Dios kadacuada?
3. Ania a pammanecnec ti mangipakita a ti pannakirelasyontayo iti kinaDios ket napateg unay?
4. Isalaysay dagiti kapadasan da Agar ken ti babai a natiliw iti pannakiabig. Kasano nga impakita ti Dios iti gagarNa iti sangkataoan?
5. Ania ti sumagmamano kadagiti kababalin nga adda kadigiti pasurot ni Cristo tapno maiparangarangda ti kababalin ti langit kadagiti dadduma?