Domingo
Hunio 2
1. DAGITI HUSTO KEN MADI NGA AYO
a. Ania ti kasapulan dagiti nagannac a mamagtalinaed iti disiplina ti pamilia? Mateo 18:19. Mangted iti ehemplo no kasano a dagiti ayo iti pagtaengan ket maitugot iti biag iti iglesia.
“Ti ama isu ti mangreppet iti pamilia. Daytoy ti saadna, ket no Cristiano isuna, pagtalinaedenna ti turay ti pamilia. Mabigbigbig ti panangraem iti turayna… No agsupadi dagiti amma ken inna, ti maysa agtrabaho a maibusor iti asawana tapno makontra ti inpluensiana, adda ti pamilia iti nakakaskas-ang a kasasaad, ket saan a maawat ti ama wenno ti ina ti respeto ken talek a kasapulan iti panangimaton iti pamilia…. Agtunos coma nga agtrabaho dagiti nagannac a mangibagnus kadagiti annacda iti panagbuteng iti Dios ket laglagipenda nga isuda ti ahenteNa.” – RH, March 13, 1894.
“Dagiti mangiturturong kadagiti pasdectao ti addaan iti karikutan a trabaho a mamagtalinaed iti urnos ken ti mangdisiplina kadagiti agtutubo nga adda iti aywanda. Dackel ti maaramidan dagiti kameng ti iglesia a mamagtalinaed a nakangato dagiti im-imada. No saan a naannugot dagiti agtutubo a sumurot iti pangdisiplina ti intitusyon wenno iti ania a banag makisuppiatda kadagiti ngatoenda a determinadoda a mangaramid iti kaykayatda, saan coma a sibubulsek a mangkanonong ken makisimpatia kadagiti annacda.” – 7T, p. 185
Lunes
Hunio 3
2. PANANGATOR KADAGITI ANNAC
a. Ania ti masansan a kasapulan iti peksatayo a mangator kadagiti annactayo? Provrbio 19:18.
“Kalpasan a maaramidmo ti pagrebbengam a sipupudno kadagiti annacmo, isangbaymo ida iti Dios ket kiddawem Kencuana a tulongannaka. Ibagan Kencuana a naaramidmon ti pasetmo, ket kiddawem a sipapammati iti Dios nga aramidenNa ti pasetNa, dayta saanmo a maaramid. Kiddawen Kencuana a mangtimbeng iti ug-ugalida, pagbalinen ida a naalumanay ken naamo babaen ti Espiritu Santona. DenggenNa ti kararagmo. PagaayatNa a sungbatan dagiti kararagmo. Babaen kadagiti balikasNa imbilinNa kenca nga aturem dagiti annacmo, tapno ‘isalakan ida saan a para iti sangsangitda,’ ket ti saoNa maipangag kadagitoy a banbanag.” – RH, Sept. 19, 1854.
b. Ania dagiti madi a panangiturong iti paset dagiti nagannac ti mabalin nga isaag iti kinasukir ti sumagmamano nga annac ti agkunkuna a Nacristianoan a pagtaengan? 2 Timoteo 3:2
“Maysa kadagiti tanda ti ‘maudi nga al-aldaw’ isu ti kinasukir dagiti annac kadagiti nagannacda. 2 Timoteo 3:2. Ket maamiris kadi dagiti nagannac ti pagrebbenganda? Kasla naawan iti imatangda ti panangsaluad a kankanayon coma nga ipaayda kadagiti annacda, ket saan ida a palugudan kadagiti dakes a rikriknada ken ti mangsukir kadacuada. Bassit laeng ti panangtamingda kadacuada agingga a kumaro ti bukodda a rikrikna ket dusaendanto ida iti pungtotda….
“Nagannac, atorenyo dagiti annacyo. Irugiyon kabayatan nga ubbingda pay, a nalaka pay a maaramid dagiti kapanpanunotanda, ket maparukma dagiti dakes a rikriknada sacbay a dumackel iti idadackelda ken pumigsa bayat ti panagpigsada. Rumbeng nga atorenyo dagiti annacyo a buyogan ti ayat.” – Ibid.
k. Bayat ti pannakasukog dagiti annacda iti pinagtangkenda, ania ti kasapulan dagiti nagannac tapno mabibig kadagiti pagannurotan ken wagas ti panangdisiplinada? 1 Corinto 13:11.
“Saanyo laeng a trataren dagiti annacyo iti kinagubsang, a liplipatanyon ti kinaubingyo ket liplipatenyon nga ubbingda. Saanyo a namnamaen ida a perpectoda wenno padasen a pagbalinen ida nga agtignay kas nataengan a lallaki ken babbai.” – AH, p. 196.
Martes
Hunio 4
3. TALGED BABAEN ITI DI AGBALBALIW NGA AYAT
a. Iti ania a tignay nga umasidegtayo kadagiti annactayo tapno suroan ida? Mateo 18:3 (umuna a paset). Ilawlawag ti sumagmamano a kangrunaan a prinsipio iti daytoy a punto.
“Inna, awan kadi ti trabaho a para kadacayo nga aramidenyo iti pamiliayo? Mabalinyo a saludsoden, kasano nga ipamuspusanmi dagiti addan a kinadakes? Kasano a rugianmi ti trabaho? No agkurangkayo iti sirib, mapankayo iti Dios; inkariNa a mangted a sibubuslon. Kaadduenyo ti agkararag ken sipapasnec para iti nadiosan a tulong. Ti maysa a pagannurotan ket saan a masurot iti amin a kaso. Ti pannakaipakat ti napasanto a pangusig ket kasapulan ita. Saan nga agdardaras ken mariribok ket asitgan dagiti ubbing a mangbabbabalaw. Ti kasta a wagas pataudenna laeng ti panag-sukirda. Mariknayo coma a nalaing dagiti madi a wagas nga impakatyo, a nangilukat iti ruangan para kenni Satanas a mangiturong kadagiti annacyo kadagiti sulisogna….Sacbay nga isuroyo kadagiti annacyo ti leksion a mangkontrol iti bagida, sur-suroenyo pay nga umuna kadagiti bagbagiyo.” – AM, pp. 20, 21.
“Sumagmamano a nagannac ti nasapa a mangisuro iti panagtulnog kadagiti annacda. Masansan a mapalubosan ti ubing nga agtawen iti dua wenno tallo nga irugi dagiti nagannac, nga agkedked a mangdisiplina, mangipagpagarup nga ubing pay unay nga agsursuro nga agtulnog. Ngem kadagitoyen a tiempo ti bagi ket pumigpigsan, ket tunggal aldaw aramidenna a rumigrigat ti trabaho para kadagiti nagannac a mangkontrol iti ubing.
“Iti nasapa unay a tawen a makaawaten dagiti ubbing no ania ti silalawag a maibaga kadacuada, ket babaen iti naayat ken natanang a panangimaton, masuroanda nga agtulnog…. Saan a palubosan ti ina ti anacna a makagundaway kencuana iti uray maysa laeng a kanito; ket tapno mapagtalinaed daytoy a turay, saan a nasisita nga agaramat kadagiti nagubsang nga addang; natibker ken natalna nga ima ken kinaayat a mangallukoy iti ubing a maipatungpal iti panggep….
“Pulos a saan a palubosan dagiti ubbing a mangipakita iti saan a panagraem kadagiti nagannacda. Pulos a saan a palubosan ti bukod a pagayatan a di matubngar. Ti masacbayan a pagimbagan ti ubing gutogutenna ti naasi, naayat ngem natibker a disiplina.” – CG, pp. 82, 83.
b. No ti bileg ni ayat ti maipakat babaen kadagiti maseknan a nagannac, ania ti maaramidna para kadagiti annnacda? 1 Corinto 13:7, 8 (umuna a paset); Roma 15:1.
Mierkules
Hunio 5
4. PANANGIPEKSA ITI AYAT KADAGITI KAMENG TI PAMILIA
a. Ania ti maysa kadagiti kangrunaan a rason a maadaan iti naballaigi a biag ti pamilia? Filipos 2:2. Ilawlawag no kasano ti kankanayon a panangipakitada iti ayatda kadagiti annacda.
“Kasapulan dagiti inna nga ibagnus dagiti annacda tapno ibilangda dagiti bagbagida kas paset ti pamilia….Kankanayon nga imaldit kadagiti annacyo ti kinapudno nga ay-ayatenyo ida; nga agtrabtrabahocayo para kadacuada; ta ti ragsacda ket napateg kadacayo; ket panggepyo nga aramidenyo laeng ti aniaman a para iti pagimbaganda. Penkenyo dagiti babassit a kasapulanda no la ketdi ta nainkalintegan nga aramidenyo.” – AH, pp. 197, 198.
“No ti bassit nga anacmo ket agay-ayam iti banag a saan a maiparbeng pay kencuana nga aramatenna kas maysa nga ay-ayam, saanmo a gursoten manipud kencuana, no di ket alaem ket sukatan iti sabali a maikanatad kencuana, nga ad-adda a makaay-ayo kencuana.”- ST, April 30, 1894.
“Sursuroan dagiti annnacyo manipud iti kinatagibida nga agbalin a naragsac ken natulnog. Suroan ida a tumulong kadacayo. Ibaga kadacuada a pasetda ti pamilia, ket kasapulanyo ti tulongda, tapno mailasatka a mangtaraken kadacuada. ‘O,’ kuna ti sumagmamano nga inna, ‘dagiti ubbingko riribokendac no padasendak a tulongan.’ Kasta met kaniac, ngem panagkunayo kadi ipalubosko a maammoanda a kasta? Padayawanyo dagiti annacyo. Isuroyo ida uged iti rabaw ti uged, alagaden a mainayon iti alagaden. Nasaysayaat daytoy ngem ti panagbasa iti nobela, nasaysayaat ngem ti makitintinnawag, nasaysayaat ngem iti panangsurot iti moda ti lubong. Lumabastayo iti daytoy a lubong iti maminsan laeng. Saantayo a kabaelan ti mapaay a manggaw-at iti panggep nga imbaga ni Cristo nga ikagumaantayo.” – 1 ST, pp. 325, 326.
b. Kasano nga ipeksa dagiti kameng ti Nacristianoan a pamilia ti ayatda iti maysa ken maysa? Efeso 4:32; Santiago 3:17.
“Kadagiti adu a pampamilia adda naindaclan a pagkurangan iti inda panangipeksa iti ayatda iti maysa ken maysa. Idinto a saanen a kasapulan ti kinasentimentalismo (nalaka a pannakatignay), kasapulan ti panangipeksa iti ayat ken panangipateg iti nadalus, natarnaw ken napno iti respeto a wagas. Adu ti mangtaraken iti natangken a puso iti sao ken aramid ipalgacna ti sinasatanas a sikigan ti kababalinda. Naumbi a pammateg coma ti kankanayon nga adda iti nagbaetan ti agassawa, nagannac ken annac, kakabsat a lallaki ken babbai. Maatur coma ti nadarasudos a sao, ket awan uray iti langa ti nakurang nga ayat para iti maysa ken maysa. Pagrebbengan ti tunggal maysa iti pamilia ti agbalin a makaay-ayo, naayat nga agsao.” – AH, p. 198.
Hueves
Hunio 6
5. ADDAAN ITI ESPIRITU SANTO A MANGKONTROL
a. Ania nga ehemplo ti iparang dagiti amma ken inna iti sangoanan dagiti annacda? Mateo 11:28-30.
“Iti pamilia, dagiti amma, ken inna kankanayonda nga iparang iti sangoanan dagiti annacda ti ehemplo a kayatda a tuladenda. Kasapulan nga iparangarangda ti respeto iti tunggal maysa iti sao ken ikikita ken tigtignay. Iparangarangda a ti Espiritu Santo ti mangkonkontrol kadacuada, babaen iti panangiparang kadagiti annacda ti kababalin ni Jesu Cristo.” – RH, March 13, 1894.
b. Ania a panggep ti kankanayon a panpanunoten dagiti nagannac iti panangisuroda kadagiti annacda, ken kasano iti panangaramidda iti daytoy? 2 Juan 4-6.
“Rumbeng nga iparangarang dagiti nagannac iti inaldaw a biagda no kasano nga ipangpangruna nga ayaten ti Dios ken kadagiti kaarruba kas iti panagayatda iti bagbagida. No ti relihion ket practikal a banag iti pagtaengan, naindaclan nga imbag ti maipatungpal. Ti relihion ti mangiturong kadagiti nagannac a mangramid iti trabaho a panggep ti Dios a maaramid iti pagtaengan. Mapadackel dagiti annac iti buteng ken balakad ti Dios.” – Ibid.
Viernes
Hunio 7
PERSONAL A PANGREPASO A SALSALUDSOD
1. Apay a kasapulan ti bassit nga ubing ti natibker a panangibagnus? Apay a rumbeng a maammoanna ti nagdumaan ti naimbag ken maawat nga ugali ken iti saan a maawat iti pagtaengan.
2. Paglasinen ti nagbaetan ti umiso ken madi a wagas ti panangator kadagiti annac.
3. Ania a prinsipio ti itag-aytayo iti sangoanan dagiti annac kas pundasyon ti amin a sirib?
4. Kasano kapateg ti panangipeksa iti ayat kadagiti miembro ti pamilia?
5. Kasano nga ipakita dagiti Nacristianoan a nagannac a kontrolado ida ti Nasantoan nga Espiritu?