Domingo
Hunio 9
1. “DAGITI PAGBANAGAN TI BIAG”
a. Apay a kasapulan a ti puso pagtalinaeden iti amin a regta? Proverbio 4:23. Ilawlawag no kasano a ti pamilia isu ti puso ti kagimongan, iti iglesia ken iti nascion?
“Ti sociodad ket buklen dagiti pamilia ken isu ti pagbalinen dagiti ulo ti pampamilia. Ta aggapu iti puso ‘dagiti pagbanagan ti biag’ (Proverbio 4:23); ket ti puso ti kagimongan, ti iglesia ken ti nascion isu ti sangakabbalayan. Ti pagimbagan ti kagimongan, ti ballaigi ti iglesia, ti rang-ay ti nascion, agsanggir iti inpluensia ti pagtaengan.” – MH, p 349.
b. Ilawlawag dagiti resulta ti makagun-guna nga inpluensia ti pagtaengan? Salmo 115:11-14
“No ti biag ti pagtaengan ket nalinis ken napudno, no dagiti annac a rumuar manipud iti salluadna ket nakasagana a sumabat kadagiti pagreb-bengan ken peggad, ania a pagbaliwan ti makita iti lubong!” – Ibid., p. 351.
“Dagiti kameng ti pamilia ipalgacda ti kinapudno, kinaprangka, kinaibtor ken kinaumbi iti maysa ken maysa. Babaen iti panagsasao kadagiti makapapigsa a sasao, tunggal maysa ikagumaanna a tulongan ti sabali. Ti kasta a sasao masansan a mangipaay iti inpluensia a mamagbalin iti babalaw a saanen a kasapulan. Kumita kadagiti banbanag iti naragsak a lawag, ikagkagumaan nga waknitan ti anniniwan a no maipateg, sallokubanna ti kararua. Pasantaken ti simpatia para iti sabali. Kinaragsak, kinaasi ken ayat ti agramaram iti pagaengan.” – ST, Sept. 1, 1898.
Lunes
Hunio 10
2. PRACTIKAL A PANNAKAIPARANG TI KINACRISTIANO
a. Kasano ti panangaramid dagiti Nacristianoan a pamilia ti practikal a pannakaiparang ti mangisalacan a pammati nga ikunkunada? Mateo 7:20, 21; Santiago 1:25, 27.
“Sursuroan dagiti Nacristianoan a nagannac dagiti annacda nga agtungpal iti linteg ti Dios. Dagiti rason iti daytoy a panagtungpal ken panangrespeto iti linteg ti Dios ti mabalin a maimaldit kadagiti ubbing apaman a maawatanda ti galadna, tapno ammoda no ania ti rumbeng nga aramidenda, ken no ania ti liklikanda nga aramiden.” - RH, May 10, 1898.
“Iti lalaki nga asawa ken ama, makunac, Siguradoem a nadalus, nasantoan a law-ang ti manglawlaw ita kararuam…. Inaldawka nga agsursuro ken Cristo. Pulos, pulos a saanka a mangipakita iti naulpit nga espiritu iti pagtaengam. Ti lalaki a mangaramid iti daytoy ket makipagtrabtrabaho iti ahencia ni Satanas. Isukom ta pagayatam iti pagayatan ti Dios. Aramidem iti amin a bilegmo a pagbalinen ti biag ti asawam a makaay-ayo ken naragsak. Alaem ti sao ti Dios kas balakadmo. Iti pagtaengan, pagbiagam dagiti panursuro ti sao. Iti kasta mapagbiagam ida iti iglesia ket itugotmo ida iti lugar ti negosio. Dagiti prinsipio ti langit ti mangpatan-oc kadagiti amin a pannakitulagmo. Dagiti angeles ti makitunos kenca, tumultulong a mangipalgac ken Cristo iti lubong.” – AH, pp. 213, 214.
“Maaddaantayo coma iti practical a relihion… No ti dayaw ti Dios ket adda iti sangakabbalayan, awanto ti peggad ti suppiat iti iglesia. Sadinoman nga ayan dagiti mamagkakappia, adda met sadiay dagiti nasantaoan nga angeles tapno agservi. Agbalbaliw; agbabawi; amirisen no ania ti relihion. Lukatanyo dagiti puspusoyo ket pastreken ni Apo Jesus. Saan a mabalin saan a naimpusoan a panagservi iti Dios ken nakasagana nga agtacder inton ocom. Kasapulan nga adda ni Cristo iti akin-uneg a paset, ket parrnuayen ti sagrado a presenciaNa ti nadalus a law-ang iti pagtaengan ken iti iglesia.” – YI, Jan. 9, 1896.
b. Ania a parang ti isaad dagiti Nacristianoan a pamilia iti sangoanan ti lubong? 1 Pedro 3:15, 16; 2 Corinto 2:15, 16.
“Kayat ti Dios nga agbalin dagiti pamilia a tanda ti pamilia sadi langit. Laglagipen coma dagiti nagannac, ken annac daytoy iti inaldaw, ikaykaysada ti bagbagida iti maysa ken maysa kas kameng ti pamilia ti Dios. Iti kasta ti biagda agbalin kas ti kababalin a mangipaay iti lubong iti maysa a parang no ania ti pagbalinan dagiti pamilia nga agay-ayat iti Dios ken mangsal-salimetmet kadagiti bilbilinNa. Maigloria ni Cristo; ti cappia, parbor ken ayatNa ti agramaram iti sibubukel a pamilia kas napateg a bangbanglo.” – AH, p. 17.
Martes
Hunio 11
3. TI INPLUENSIA TI NACRISTIANOAN A PAMILIA
a. Maibusor kadagiti mangdadael nga inpluensia ti lubong, ania dagiti rason a mangibingay iti nalawag a salacnib kadagiti annactayo? Mateo 5:13.
“Ti pudno a relihion isu ti lawag ti lubong, ti asin ti daga. Nacristianoan a nagannac, utobenyo kadi a ti asin ket addaan iti mangilasacan a bileg para iti pamiliayo? Awan coma ti nalaaw a boses nga agmandar iti pagtaengan. Awan coma ti agaon kadagiti bibigyo makapaunget kadagiti ananacyo. Awaten dagitoy nga annac dagiti umuna a leksionda manipud iti ama ken inada; ket awan coma ti mapaay kadacuada a nagubsang, naunget ken naliday a parang. Ti ayat ni Cristo coma ti mangsukog iti kababalinda.” – RH, Aug. 22, 1899.
“Iti agsapa ti umuna kadagiti kapanunotan dagiti Cristiano isu ti Dios. Mapan iti sangoananNa a sipapakumbaba, a ti pusoda napno iti ayat, ken kadagiti sulisog ken peggad a manglikmut kenca ken kadagiti annacmo. Bigat ken rabii, babaen iti napasnec a kararag ken napasnec a pammati, agaramidka iti alad iti aglawlaw dagiti annacmo. Siaanus a suroam ida; siaayat ken di agressat nga isuro kadacuada no kasano ti agbiag tapno may-ayoda ti Dios.” – ST, Nov. 18, 1886.
“Ti pagtaengan a dagiti kamengna ket naasi, nadayaw a Cristiano mangipaay iti adayo ti madanonna nga inpluensia para iti imbag. Sabali a pamilia ti mangmarka kadagiti resulta a nagun-odan ti kasta a pagtaengan ket surotenda ti naiparang nga ehemplo, ket bantayanda met dagiti pagtaenganda maibusor kadagiti dakes nga inpluensia…. Ti maysa a naurnos, disiplinado a pamilia ad-adu ti maibagana maipapan iti kinaCristiano ngem iti amin a sermon a mabalin nga icasaba… Ti inpluensia ti naan-anay ti pannakabantayna a Nacristianoan a pagtaengan kadagiti tawen ti kinaubing ken kinaagtutubo isu ti kasiguradoan a talged maibusor kadagiti pangdadael ti lubong.” – MLT, p. 124.
b. Kasano a pagtalinaeden dagiti Nacristianoan a nagannac ti makaisalacan nga inpluensia kadagiti kakaddua ken saan a mamati? 1 Timoteo 4:12-16.
“No makaipaayka iti makaisalacan nga inpluensia iti maysa a kararua, laglagipem adda ragsak sadi langit gapu iti maysa a nagbabawi… Mabalinmo a, babaen iti natanang a peksa, mapasubli ti napukaw a karnero iti arban ni Jesus…. Dagiti natibker a panggep nga adda kenca a mangipatpatungpal kadagiti naimbag a prinsipio addaan iti inpluensia a mangbalanse kadagiti kararua nga adda iti umiso a turong. Awan ti pagpatinggaan ti imbag a mabalin nga aramidem.” – Ibid., p. 122.
Mierkules
Hunio 12
4. CRISTIANOKAYO COMA ITI PAGTAENGAN
a. Iti ania a rukod nga ipalgac dagiti pudno a Cristiano ti Espiritu ti Dios ken addaan iti tunos iti pagtaengan? 1 Corinto 13:6, 7; 1 Juan 4:7.
“Dackel ti magun-odan ti bukod a disiplina iti pagtaengan…. Tunggal maysa armidenna ti biag a makay-ayo para iti sabali…. Kasapulan a maaddaantayo iti Espiritu ni Dios, wenno pulos a saantayo a maaddaan iti tunos iti pagtaengan… Saantayo a maipateg ti ayat ti pagtaengan babaen iti nalabes a saluad; ta ti pagtaengan, no agtaeng sadiay ti Espiritu ti Apo, maysa a kita ti langit…. Lapdan ti tunggal banag nga agduyos a mangperdi iti talna ken panagkaykaysa ti pamilia …. Naumbi nga ayat ti kankanayon coma nga ipateg dagiti agassawa, nagannac ken annac, kakabsat a lallaki ken babbai…. Pagrebbengan ti tunggal maysa iti pamilia ti agbalin a makaay-ayo, ti agsao a siaayat. Ti balay nga adda ti ayat kencuana, a maipeksa kadagiti sasao, ikikita ken ar-aramid, ket lugar a pagaayat dagiti angeles a panangipalgacan iti presenciada ken pasantoenda ti buya babaen iti raya ti lawag manipud Gloria…. Rumbeng a makita ti ayat kadagiti ikikita ken tigtignay ken mangngegan kadagiti tonada ti boses…. Panangtengngel iti bagi iti paset ti amin a kameng ti pamilia ti mamagbalin iti pagtaengan a ngannganin maysa a paraiso.” – MLT, p. 84.
b. Kasano a maipalgac ti pudno nga ayat? 1 Juan 5:2, 3; 2 Juan 6; Roma 13:10.
“Ti ayat a naipalgac iti pagtaengan ket maysa a pannakaipalgac iti ayat ni Cristo nga agayos babaen Kencuana manipud iti puso ti awan patinggana ng ayat a mangbendisyon kadagiti kameng ti pamilia. Ti ayat ti mangbukel iti ragsak ti nainlangitan a pamilia. Dagiti mangpasantac iti ayat iti pagtaenganda sukogenda ti kababalin a maiyasping ken Cristo, ket mapilitda a mangipaay iti makatulong nga inpluensia iti labes ti sibubukel a pamilia, tapno mabendisyonan ti sabali babaen iti naayat, naasi a panagservi, babaen kadagiti makaay-ayo a sasao, babaen iti kas ken Cristo a simpatia, babaen kadagiti tigtignay ti kinamanangngaasi…. Dagiti addaan iti nainlangitan a pangusig a mangwatwat iti naayat a panangibilang iti tunggal kameng ti pamilia, iti panangaramidda iti sibubukel a pagrebbenganda, itutopda ti bagida a mangaramid iti trabaho a mangparanyag kadagiti sabsabali a pagtaengan ken isuroda ti sabali babaen iti pagallagadan ken ehemplo no ania dayta mamagbalin iti pagtaengan a naragsak.” – RH, Oct. 15, 1895.
Hueves
Hunio 13
5. KINAMATALEK ITI INALDAW A PAGREBBENGAN
a. Iti ania a rukod a ti pudno a Nacristianoan a nagannac ket namatalek uray iti panangaramid kadagiti babassit a banbanag? Mateo 25:21.
“No aguummong ti pamilia para iti pammigat wenno iti lamisaan ti pangrabii, isu met la a panagdayaw ti rumbeng a mapapigsa a kunam no adda sangaili. Pukawen ti babalaw, reklamo, saan a makaay-ayo a panagsi-sinnungbat ken eskandalo, saan a nababbaba ngem iti nasimron nga ulimec. Naragsak coma ti panagsasao ken no mabalin, maitutop kadagiti babassit nga ubbing.” – HR, Feb. 1, 1874.
“Saoen ti kinapudno mainaig kadagiti kababassitan a banbanag. Inaldaw nga agaramid kadagiti naayat nga ar-aramid ken agsao kadagiti nararagsak a sasao. Iwara ti isem iti dana ti biag. Bayat iti panagtrabaho iti daytoy a wagas, isaad ti Dios ti yaanamongNa kenca, ket iti maysa a tiempo ibaganto ni Cristo kenca, ‘Naimbag, adipen nalaing ken mapagtalcan’ (Mateo 25:21).” MYP, pp. 144, 145.
b. Kas bunga ti naimbag nga inpluensiada, anianto ti mangngeg dagiti namatalek nga annac ti Dios manipud iti bibig ni Jesus? Mateo 25:34, 35, 40.
“Iti aldaw ti ocom, dagiti nagbalin a napudno iti inaldaw a biagda, a naalisto a makakita iti trabahoda ket aramidenda, a saanda a panpanunoten ti pammadayaw ken ganansia, mangngegdanto dagiti balikas, ‘Umaycayo bendito ni Amac, tawidenyo ti pagarian a naisagana cadacayo nanipud idi pannacabangon ti lubong’ (Mateo 25:34). Saan a padayawan ida ni Cristo gapu kadagiti nasalawitwit a panagbitlada, kadagiti nainsiriban a bileg nga imparangda wenno nabuslon a donasyon nga intedda. No di ket ti panangaramidda kadagiti babassit a banbanag a saanda a napupuotan a nagun-gunaanda.” – YI, Jan. 17, 1901.
Viernes
Hunio 14
PERSONAL A PANGREPASO A SALSALUDSOD
1. Iti ania a kaadayo a madlaw ti inpluensia ti pagtaengan nga adda iti uneg ti purok a pagnanaedan ti pamilia?
2. Iladawan ti practikal a pannakaiparang ti Kinacristiano.
3. Kasano a makaipaay ti pudno a Nacristianoan a pamilia iti makaisalacan nga inpluensia?
4. Ania ti pammanecnec a ti Espiritu ti Dios ti mangkonkontrol iti pagtaengan?
5. Kasano a ti inpluensiatayo para iti imbag ket marukodto inton aldaw ti ocom?