Domingo
Hunio 26
1. TI NAIPATPATEG A CAUVASAN
a. Para kadagiti ania a panggep nga impasdec ti Dios ti nacion ti Hebreo? Genesis 12:2; Deuteronomio 7:6-8; 26:17-19
b. Apay a daytoy a nacion nasneban coma ti panagyamanda iti Dios? Deuteronomio 32:9-12.
k. Kasano ti panagplano ti Dios para iti nacion ti Hebreo a mang-bendisyon kadagiti sabsabali a nacion, ken kasano daytoy a maipakat kadatayo ita? Deuteronomio 4:5-8; Mateo 5:16
“Addaan ni Jehova iti mata para ti tunggal maysa kadagiti tattaoNa; addaan Isuna iti plano para iti tungal maysa. PanggepNa a dagiti mangisanay kadagiti nasantoan nga allagadenNa agbalinda a naidumduma nga ili. . . .
“Saan laeng nga iti daytoy a lubong no di ket iti universo nga iparangarangtayo dagiti prinsipio ti pagarian ti Dios.” – 6 T, pp. 12, 13.
Lunes
Hunio 27
2. TI KASASAAD TI CAUVASAN ITA
a. Apay a nauppapay ti Dios iti cauvasan nga inay-ayatNa? Isaias 5:1-4.
“Kalikagum ti nacion dagiti Judio a tagikuaen dagiti bungbunga ti cauvasan nga imatonanda. Ti kinagamrud ken kinaagumda ti makagapu no apay a maum-umsida uray pay kadagiti pagano. Iti kasta naikkan dagiti Gentil iti okasyon a madi ti panangipatarusda iti ugali ti Dios ken kadagiti linlinteg ti pagarianNa.” – PK, pp. 20, 21.
b. Kaano a ti iglesia saan nga agbunga iti pudno nga uvas? Juan 15:4.
“Ni Jehova immulaNa ti iglesiaNa kas uvas iti nabunga a tay-ac. . . ngem daytoy nga uvas nga immula ti Dios nagduyos a nagpadaga ket insallapidna dagiti lanutno kadagiti nataoan a suporta. Dagiti sangsangana ket adayo ken nalawa ti dimmanonanda, ngem nagbunga iti bunga ti atap nga uvas. . . .
“Insagot ni Jehova dagiti naindaclan a bendisyonNa iti iglesiaNa. Gutoguten ti Justicia nga isublina dagitoy a talento nga addaan iti tubo. Kabayatan nga umad-adu dagiti gameng a naitalec nga imatonanna, immadu met dagiti obligasyona. Ngem imbes a pasayaatenna dagitoy a sagut ken agturong iti kinaperpecto, natnag manipud iti dayta nagun-odanna iti nasapsapa a kapadasanna. Ti panagbaliw iti naespirituan a kasasaadna simmangbay nga inut-inut ken nganngani saan a nadlaw. Iti panangrugina a nagsapul iti pammadayaw ken pannakigayyem ti lubong, bimmassit ti pammatina, ket ti regtana kimmaro ti panagkapoyna, ti napasnec a debosyonna nagbalinen a natay a pormalidad. Tunggal addang nga agpalubong ket addang met a yaadayo iti Dios. Bayat ti pannakaipateg ti kinatangsit ken nainlubongan nga ambisyon, sumina ti espiritu ni Cristo ket sumangbay ti salisal, saan a panagtutunos ken gura a mangsinga ken mangpakapoy iti iglesia.” – 5 T, pp. 240, 241.
k. Ania a kita ti bunga ti il-iliwen ti Dios a makita nga ibungatayo? Galacia 5:22, 23.
“Ti bunga a tontontonen ni Cristo kalpasan ti naanus a saluad a maisagot iti iglesia, ket pammati, anus, ayat, panagibtor, nainlangitan a pampanunot, kinaemma. Dagitoy a raay ti bunga nga agtangken iti baet ti bagyo ken ulep ken sipnget, kasta met iti nainit.” – Ibid., p. 117.
Martes
Hunio 28
3. PANANGLIKLIK ITI NARABAW A KAPADASAN
a. Iladawan ti kasasaad ti naespirituan a cauvasan ni Jehova iti nasapa a panagturay ni Uzzias, ari ti Juda? 2 Ar-ari 15:1-3; 2 Cronicas 26:1-7, 15.
“Ti napaut a panagturay ni Uzzias [maaw-awagan pay iti Azarias] iti daga ti Juda ni Benjamin ket nailadawan kas narang-ay a nain-indaclan ngem iti asinoman a sabali a nagturay sipud pay di ipapatay ni Solomon, nganngani dua siglo idi. Iti adu a tawtawen a nagturay ti ari a sililinteg. Iti babaen ti bendisyon ti Langit nagun-od dagiti sosoldadona ti sumagmamano a disso a napukawna kadagidi napalabas a tawtawen. Naipasdec ken napakired dagiti ciudad, ket ti saad ti nacion iti baet dagiti aglawlaw a tattao ket napapigsa unay. Nabiag manen ti komersio ket ti kinabacnanga dagiti nacion naglayusda a simrec iti Jerusalem.” – PK, p. 303.
b. Inaganan ti sumagmamano a naespirituan a tulaw a nangpalidem iti ladawan. 2 Ar-ari 15:4.
“Daytoy a parang a kinarang-ay [iti babaen ni Uzzias]. . . ket saan a napakuyogan iti maitutop a panangbiag iti naespirituan a bileg. Dagiti servicio iti templo ket nagtultuloyda kas di immun-una a tawtawen ket umariwecwec ti naguummong tapno agdayaw iti sibibiag a Dios; ngem kinatangsit ken pormalidad ti in-inut a nangala iti saad ni kinapakumbaba ken kinapudno.” – Ibid., pp. 303, 304.
k. Kasano a ti panagliway a mangilacsid iti dakes ket saplitannatayo? Canta ni Solomon 2:15.
“Adu dagiti mangtaraken ken mangekskyus kadagiti depekto ti kababalinda; ngem amin dagitoy kasapulan amin a maremedioan. Amin nga isisiasi iti nalinteg ket basol ket ti basol kasapulan a mailacsid. Saantayo a magna a sidadarasodos iti sangoanan dagiti kakabsattayo wenno iti sangoanan ti lubong.
Adu dagiti mangiconfesar kadagiti basbasolda a paulit-ulit ngem saanda met nga ilacsid babaen iti napudno a panagbabawi. Malacsid no maaddaantayo iti natibker a panggep ken tulong ti parabor ti Dos, napigsa a pangngeddeng ken naridam a panagbantay, mapaay no dagiti sulisog rautenda ti kararua.” – ST, March 6, 1884.
“Dagiti babassit a zorra ti mangsiba kadagiti cauvasan, dagiti babassit a panagliway, dagiti babassit a pagkurangan, dagiti babassit a panagulbod, ti bassit nga isisina iti prinsipio, bulsekanna ti kararua ken isinana daytoy iti Dios.” – HP, p. 226.
Mierkules
Hunio 29
4. NATULAWAN BABAEN ITI KINATANGSIT
a. Apay a didigra ti simmangbay kenni Uzzias? 2 Cronicas 26:16-21; Numeros 15:30.
“Ti basol a nangisangbay iti nakaam-ames ken Uzzias ket maysa a panagipapan. Iti panangsalungasing iti nalawag a bilin ni Jehova, nga awan ti agannong kas papadi no saan a dagiti kaputotan ni Aaron, simrec ti ari iti santuario tapno puuranna ti incienso iti rabaw ti altar. Ni Azarias a padi ken kadagiti kakaduana bimmusorda iti ari ket nagdawatda a saanna nga aramiden ti panggepna. ‘Nagsalungasingka’ kinunada; ket ‘saanto met a maipaay a pakaidayawam’ (2 Cronicas 26:16, 18)
“Napno ni Uzzias iti pungtot ta isuna, nga ari, matubngar a kasta. Ngem saan a mapalubosan a mangtabbaaw iti santuario maibusor iti nagkaysa a protesta dagiti adda iti turay. Bayat nga agtactacder sadiay, a nagrungsot, apagdarikmat a nadusa babaen iti nadiosan nga ocom. Cucutel ti nagparang iti mugingna. Dismayado a rimuar iti templo ket pulosen a saan a nagsubli, agingga a nadanon ti pannakatayna, kalpasan ti sumagmamano a tawtawen. Nagtalinaed ni Uzzias nga agcucutel – sibibiag nga ehemplo ti ubbaw nga isisina iti nalawag a “Kas insao ni Jehova.’ Saan met a naidawat ti nangato a saadna wenno ti nabayag a panagserbi kas eksyus para iti impagarup a basolna nga isu ti nangrugit kadagiti pangserra a tawtawen ti panagturayna, ket naisangbay kencuana ti ocom ti Langit.” – PK, p. 304.
“Pinusgan ni Jehova dagiti tattao para iti masinunuo a saad iti iglesiaNa, ket saanNa kayat ida nga umikkatda iti saad nga intudingNa kadacuada. No ipaayan ni Jehova ida iti balligi, saanda coma nga agpasindayag, ket ipatoda a maikarida a mangaramid iti trabaho a saanda a pakaitutopan ken saan a nangayaban ti Dios kadacuada.” – RH, Aug. 14, 1900.
b. Kasano ti panangibilang ti Dios iti kinatangsit? Proverbio 6:16, 17; Santiago 4:6.
“Isuna a matnag iti sumagmamano a nadagsen a basol makarikna iti bain ken kinapanglaw ken iti panagkasapulanna iti parabor ni Cristo; ngem ti kinatangsit saanna a kasapulan isu ti mangserra iti pusona maibusor ken Cristo ken iti bendisyon nga isangbayNa.” – SC, p. 30.
“Kinatngsit, panagtalec iti bagi, panagayat iti lubong, panagpabpabasol, gura, apal, bungbunga nga awit ti adu nga agibunbunannag iti relihion ni Cristo. Ti langada ket maisupadi iti kababalin ni Cristo. . . Ti kasta a kababalin saanto a maisilpo ken Cristo.” – RH, April 15, 1902.
Hueves
Hunio 30
5. SANGOEN TI IBANAGNA WENNO PILIEN TI PANNAKAICONSAGRAR?
a. Iladawan dagiti agdama a kasasaad ti Israel ken Juda iti tiempo a naayaban ni Isaias nga agserbi kas propeta? Isaias:1-9, 21-23.
“Ti panagturay ni Uzzias ket umadanin nga agpatingga, ket ni Jotam agaw-awiten kadagiti dadagsen ti estado, idi a naayaban ni Isaias, manipud iti naarian a linia, kabayatan nga agtutubo pay, para iti misyon nga agipadto. Ti nadiosan a salacnib ket naikkat, ket dagiti puwersa ti Asiria agsacnapdan iti daga ti Juda.
“Ngem dagiti peggad manipud iti ruar, nakakaskasdaaw ta nupay kasla saan met a kas kaserioso kadagiti peggad nga adda iti uneg. Ti kinasukir ti ilina ti nangisangbay iti adipen ti Dios iti kaindaclan a pakakumikoman ken kasaeman a ledaang.” – PK, p. 305.
b. Ania ti mamagdagup iti narikut a kasasaad dagiti namatalec, idi ken ita? Salmo 11:3.
“Kadua ti panangidadanes ken kinabacnang sumangbay ti kinatangsit ken naayat nga agpabuya, nalabes a panagbarbartec ken espiritu ti panagramrambac. . . . Naimbasolan a kannawidan ti nagsacnap iti amin a kita a dagiti sumagmamano a nabati a nagtalinaed a napudno iti Dios ket masansan a masulisog a sumuko a mangpukaw iti pusoda ket sumangbay da uppapay ken liday.” – Ibid., p. 306.
“Bayat nga agtarigagay dagiti dadduma kadagiti naindagaan a paglinglingayan, tarigagayanyo dagiti nalawag a tanda ti ayat ti Dios, sireregta, sigagagar nga ipukkaw: sino ti mangipakita kaniac no kasano a mapatibker ti pannacaawis ken pannacapilic.” – 2 T, p. 145.
Viernes
Hulio 1
PERSONAL A PANGREPASO A SALSALUDSOD
1. Ania ti manggubbuay nga agpababa ti pammati ti iglesia ti Dios?
2. Inaganan ti maysa a kasla bassit a nabaybay-an bayat ti panagturay ni Uzzias?
3. Apay nga ibilang ti Dios ti kinatangsit a nakana a basol? Kastatayo kadi?
4. Kasano a ti parparawpaw a kinarang-ay ti Juda ket ini-inut nga inapektaranna ida kas maysa a nacion?
5. Iti panawen a kumarkaro ti kinadakes, ania ti kasapulan nga amirisen dagiti sumagmamano nga agmatmatalec iti Dios?