Domingo
Setiembre 11
1. SINO TI NAKAITURONGAN DAYTOY A MENSAHE?
a. Ania ti kasapulan a pagtalinaedentayo iti panunot no ikagumaan nga itag-ay ti mensahe iti Isaias, capitulo 58? Isaias 58:1.
“[Naadaw iti Isaias 58:1.] Daytoy a mensahe kasapulan a maited; ngem bayat a maited, kasapulan a naannadtayo a saantayo a maiduron ken magulo ken macondina dagiti awanan iti lawag kas iti adda kadatayo. Saantayo a rumuar iti dalantayo tapno agaramid iti natangken a pangduron kadagiti Catolico. Kadagiti Catolico adda dagiti adu a napudno a Cristiano a pagbibiaganda dagiti amin a lawag nga agraniag kadacuada, ket agtrabaho ti Dios maigapu kadacuada. Dagiti addaan kadagiti naindaclan a pribilehio ken gundaway, ngem napaay a nangpasayaat kadagiti pannakablin ti bagi, panunot ken moral, ken nagbibiagda a nangparagsac kadagiti bagbagida ken nagkedkedda nga awiten ti pagrebbenganda, nakarkaro ti peggadda ken nain-indaclan ti pannacaocomda iti sango ti Dios ngem kadagidiay nga agbidbiddut kadagiti punto ti doctrina, a mangikagkagumaan nga agbiag nga agaramid iti pagimbagan ti sabali. Saan nga uyawen ti sabali, saan nga ocomen ida.
“No palubosantayo dagiti naimbukodan a panagut-utob, palso a panangikalintegan ken palso a pambar a mangisangbay kadatayo iti barusngi a kasasaad ti panunot ken puso, tapno saantayo a maammoan dagiti dalan ken pagayatan ti Dios, nakarkaro ti basoltayo ngem kadagiti layang a managbasol. Kasapulan nga agannadtayo a nalaing tapno saantayo a macondinar dagiti basbassit ti basolna iti imatang ti Dios ngem kadatayo.” – 9 T, pp. 243, 244.
Lunes
Setiembre 12
2. TI BALLAAG MASANSAN A MAPAULIMEC
a. Ania ti masansan a tignay a sangoen dagiti napasnec a mamati a mangikagkagumaan nga “agikkis iti natbag, ken di agmedmed” (Isaias 58:1)? Juan 3:19-21; Icompara iti Numeros 16:1-4. Ania ti impakita ti mensahero ti Dios mainaig iti kasasaad ti agkunkuna nga ili ida ti Dios?
“Adu dagiti mangipatpateg kadagiti didiosen kadagiti pusoda ken ar-aramidenda dagiti basol a nangisina kadacuada iti Dios ken nanggubuay kadacuada nga agbalin a bagi ti sipnget . Nakitac a sumagmamano laeng ti agtacder iti lawag, addaan pangilasin ken espiritualidad a mangtackuat kadagiti tubeng ken mangikkat kadacuada iti dalan. . . .
“Sumagmamano kadagiti adda iti saad a para-bantay ti mangballaag kadagiti tattao maipapan iti peggad ti nangisardeng iti panagbantayda ket naginana. Saanda a napudno a parabantay. Agtalinaedda nga awan tignayna, idinto a ti nasikap a kabusor simrec ket sibaballigi nga agtrabaho iti sibayda tapno dadaelenna no ania ti imbilin ti Dios a maibangon. Makitada nga al-allilawen ni Satanas dagiti awanan kapadasan ken saan a managatap; ket alaenda amin a siuulimec, a kunam no awananda iti interes, a kunam no dagitoy a banbanag awan pakasecnanda. Saanda a maawatan ti naisangsangayan a peggad, awan makitada a mangibayog iti alarma. Kadacuada, amin a banbanag kasla nasayaat laeng, ket saanda a makita ti kinasisita ti mangipaay iti napudno nga aweng ti trumpeta a mangballaag, no mangngegda ti anag ti nalawag a testimonia, ipalawag iti ilic ti ilalabsingna, ken iti balay ni Israel dagiti basbasolna. Dagitoy a tubngar ken ballaag singaenda ti ulimec dagitoy matmaturog, managayat iti nam-ay a para-bantay, ket saanda a maay-ayo. Ibagada iti puso, no saan nga iti sao: ‘saan a nainkalintegan daytoy. Nakaro unay, nagubsang unay. Dagitoy a tattao saan a kasapulan a maisturbo wenno makigtot ken kasla saan a naannugot a mangted kadatayo iti inana wenno ulimec. ‘Nalabes ti panagindadackelyo, idinto a ti amin a gimong nasantoanda, tunggal maysa cadacuada’ (Numeros 16:3). Saanda nga annugotan a maaddaantayo iti liwliwa, cappia wenno ragsac. Aktibo a trabaho, bannog ken di agressat a panagbantay laeng ti mangpennec kadagitoy saan a nainkalintegan, narigat a pakitunosan a parabantay. Apay a saanda nga agipato kadagiti nalag-an a banbanag ken ipukkaw: Talna, talna? Ket amin a banbanag agtignay a siaannayas’. . . .
“Dagiti tattao saan a nagibangon kadagiti kinitikitan a ladladawan, ngem ti basol saan a nababbaba iti imatang ti Dios. Dayawenda ti kuwarta. Pakarag-sakanda ti nainlubongan a ganansia. Sumamgmamano ti mangisacrificio iti konsiensia tapno magun-odda ti panggepda. Dagiti agkunkuna nga ili ida ti Dios ket managimbubukod ken managayatda iti bagida. Ay-ayatenda dagiti banbanag daytoy lubong, ket nakikaduada kadagiti ar-aramid ti sipnget. Maragsacanda iti kinakillo. Awan ayatda iti Dios wenno ayatda kadagiti kaarrubada. Agdidiosenda ken dumakesda a dumacdakes iti imatang ti Dios ngem kadagiti pagano nga agdaydayaw iti kinitikitan nga awan ammoda iti naim-imbag a dalan.” – 2 T, pp. 439-441.
Martes
Setiembre 13
3. TI TRUMPETA NAPAUMEL
a. Ania dagiti pactora a mamagbalin iti pagrebbengan a narigat para kadagiti amin a mangikagumaan a mangipaay iti nalawag nga aweng iti mangballaag a trumpeta? Isaias 58:2; Ezequiel 2:1-7.
“Saan nga iti nadangkes a lubong, no di ket kadagidiay dinutokan ti Dios kas ‘iliNa,’ isuda ti matubngar kadagiti salungasingda. ImpacdaarNa pay: ‘Nupay birokendac iti inaldaw, ket agrag-oda nga umammo cadagiti dalanco; cas maysa a nacion a nagaramid iti kinalinteg, ket dina indian ti impaannurot ti Diosda’ (Isaias 58:1, 2). Ditoy a naisangbay iti buya ti maysa a klase dagiti tattao a mangipagarup kadagiti bagbagida a nalinteg ken agparang a mangipaduyacyac iti naindaclan nga interes iti servicio ti Dios: ngem ti nainget ken solemne a tubngar ti Agsuksukisoc iti puso napanecnecanda nga ibaddebaddecda dagiti nadiosan a pagalagadan.” – GC, p. 452.
“Kuna ni Jehova kadagitoy a tattao: ‘Birokendac iti inaldaw, ket agrag-oda nga umammo cadagiti dalanco; cas maysa a nacion a nagaramid iti kinalinteg.’ Adtoy dagiti tattao a naallilaw kadagiti bagbagida, nalinteg iti bagida, mapnec iti bagida; ket ti ministro nabilin nga agikkis iti natbag, ken ipakita kadacuada dagiti salungasingda. Kadagiti amin a panawen daytoy a trabaho ket naaramid para iti ili ti Dios, ket kasapulan ita a nakarkaro ngem idi. . . .
“Ti Dios addaan a kankanayon kadagiti lalalaki a pangitalkanNa iti mensaheNa. Ti EspirituNa agtignay iti pusoda ket pilitenNa ida nga agsao. Pasiglaten ida babaen iti nasantoan a regta ken buyogan iti nadiosan a rikna, sumrecda a mangaramid iti pagrebbenganda a saandan a pattapattaen ti banagen ti panangisao kadagiti tattao ti sao nga inted ti Dios kadacuada. Ngem ti adipen ti Dios iti mabiit ammonanton nga inrisgona ti maysa a banag. Masaracanna ti bagina ken ti mensahena a naaramid a tampoc ti dillaw. Ti wagasna, ti biagna, ti sanikuana, ket mausisa amin ken makomentoan. Ti mensahena ket mapisang-pisang ken marejectar iti kakipetan ken saan a napasanto nga espiritu, kas makita dagiti nakuriteg ti panpanunotna a tattao a kaitutupanna. Naaramid kadi dayta a mensahe ti trabaho nga inranta ti Dios nga ipatungpalna? Saan; napaay agsipud ta ti puso dagiti dimngeg ket saan a napasanto.
“No ti rupa ti ministro ket awanan emosyon, no awanan iti natibker a pammati ken tured, no ti pusona saan a napapigsa babaen iti naynay a pannakisao iti Dios, mangrugi isuna a mangsukog iti testimonia a mangay-ayo iti saan a napasanto a lapayag ken puso. Iti panangikagumaanna a mangliklik iti dillaw a nakaipasangoanna, sumina iti Dios ket mapukawna ti kapanunotan ti nadiosan a pabor, ket ti testimoniana agbalin nga umel ken awanan biag. Masaracanna nga awanen ti tured ken pammatina ket awanen bileg ti panagtrabahona.” – 5 T, p. 299.
Mierkules
Setiembre 14
4. PARA KENNI TI PUDNO A PAGLADLADINGITAC?
a. Kasano a dagiti agibunbunannag nga ili ti Dios iti Isaias 58 namnamaenda Isuna a sumungbat iti servicioda a maipaay Kencuana – ken ania ti sungbatNa? Isaias 58:3; Malakias 3:14, 15. Ania dagiti pactora a rumbeng nga utubentayo ita maipapan iti bukodtayo nga ayo mainaig iti daytoy a banag – maiturong iti Dios ken iti sabali?
“[Naadaw iti Isaias 58:1-3.] Ti propeta iparangna iti sangotayo ti maysa nga ili a mangbirbiroc iti biddut iti Apo gapu ta saanNa nga inted kadacuada ti amin a naimbubukodan a tinarigagayanda. Ti Apo kas sungbatNa kadagiti reklamoda ipakitaNa a saanda a maikari iti amin a dawatenda Kencuana; ta saanda a tinaming a sililinteg.” – GCB, May 31, 1909.
“Dagiti panagayunar nga inaramid dagitoy nga agdaydayaw [iti Isaias 58] ket panaginkukuna laeng, panglais iti kinapakumbaba. Pagtalinaedenda amin a saan a mainugot ti kababalinda. Dagiti pusoda saan a nadalusan kadagiti rugitna. Saanda a naawat ti mangpalamuyot nga arbis ti parabor ti Dios. Naawananda iti Espiritu Santo, naawananda iti sam-it ti inpluensiana. Awan ti panagbabawi nga iparangarangda, awan ti pammati nga agtrabaho babaen iti ayat. Saanda a nalinteg ken managimbubukod ti pannakilangenda iti padada a tao, awananda iti asi a mangidadanes kadagiti ibilangda a nababbaba. Ita agreklamoda agsipud ta saan nga intag-ay ti Dios ida iti ngatoen ti amin gapu iti kinalintegda.” – RH, June 25, 1901.
“Ti ili a naibilin a ballaagan ni propeta Isaias. . . addaan iti porma ti kinasanto ken ibilangda dagiti bagbagida a maikari iti naisangsangayan a pabor ken bendisyon agsipud ta nangato ti panagibunannagda ken ar-aramidenda dagiti narelihionan a servicio. Daytoy ti mangbiag iti pannakapnecda iti bagida, ket mariknada kas ti agtutubo a napan ken Cristo, mangtontonton a salsalimet-metanna amin a bilbilin ket sinaludsodna, ‘ania pay ti pagkurangac?’. . . Daytoy nga agtutubo pasabloganna ti bagina a salsalimetmetanna amin a bilbilin ti Dios ngem; pudno kadi? – Saan. Saanna nga ay-ayaten ti Dios a nangnangruna; ta impatpategna ti kinabacnangna, a naitalec laeng kencuana, a nakarkaro ngem iti panagayatna iti Dios; ket saanna nga ay-ayaten ti kaarrubana kas iti bagina; ta saan a naannugot a mangiwaras iti kinabacnangna kadacuada. Inay-ayatna ti sanikuana a nakarkaro ngem iti panagayatna kadagiti kararua a nangisacrificioan ni Cristo iti bukodna a biag.” – Ibid., Oct. 13, 1891.
“Agannadtayo iti panangngaasi iti bagi. Pulos a di palugodan ti rikna a saanca a naipateg kas rebbengna, a dagiti peksam ket saan a nabigbig, a ti trabahom ket narigat unay. Ti lagip coma no ania ti inanduran ni Cristo para kadatayo ti mangpaulimec iti amin a tantanabutob ti panunot. Naim-imbag ti pannakatratartayo ngem iti Apotayo.” – MH, p. 476.
Hueves
Setiembre 15
5. TI MOTIBO ITI LIKUDAN TI TIGNAY
a. Iti Isaias 58, ania ti pudno a motibo iti likud ti panagayunar ti ili ti Dios? Isaias 58:4. Kasano a maliklikantayo ti espiritu ti kastoy a kannawidan? Lucas 7:33-35.
“Saan a dayawen ti Mannubbot ti lubong ti panagayunar ti nacion dagiti Judio. Agayunarda iti kinatangsit ken bukodda a kinalinteg, idinto a ni Cristo mangan a sipapakumbaba a kadua dagiti agsingsingir iti buis ken managbasol.
“Sipud di pannakatnag, trabahon ni Satanas ti mangpabasol, ket dagiti agkedked iti lawag nga impatulod ti Dios, itultuloyda ti isu met la nga aramid ita. Ilukatda iti sabali dagiti banbananag nga ibilangda a babac. Kasta met kadagiti Fariseo. No makabirocda iti banag a pangidarumanda kadagiti disipulos, saanda nga agsao kadagiti tattao nga ipagarupda nga agbidbiddut. Isaoda ken Cristo dagiti banbanag nga ipagarupda a nakana unay kadagiti disipulos. No ipagarupda a nasactan ni Cristo, acusaranda Isuna kadagiti disipulos. Trabahoda ti mamagsisina kadagiti puso.” – 5 BC, p. 1088.
“No dagiti karkararag ket maidatonda a nagameran iti panagtalec iti bagi, no mapaaytayo nga agbantay, ket isangbay dagiti tignaytayo a maitunos kadagiti karkararagtayo, saantayo a maibilang nga agdaydayaw iti imatang ti langit. Naawanantayo iti pammati nga agtrabaho babaen iti ayat ken mangdalus iti kararua; ta ti pudno a pammati iturongna ti agtagikua a mangpatay kadagiti ar-aramid ti lasag, ken mangilansa iti kinamanagimbubukod, panagayat iti bagi, kinalinteg iti bagi ken kinaawan-anus. Dagiti pudno a sumurot ken Cristo kasapulan nga inaldaw nga agsursuro kadagiti leksion ti kinaemma ken kinapakumbaba iti puso, addaan naayat a puso ken mangisangbay iti simpatia ken init iti pagtaengan. Amin a gura, amin a suppiat, amin a panangdangran babaen iti dila ken gemgem ti kinadangkes kasapulan a mailacsid. Ti naturay a pagayatan kasapulan a maisuko ket kinaamo ken nalaca a mabagaan ti kasapulan a mapasayaat.” – RH, June 5, 1894.
Viernes
Setiembre 16
PERSONAL A PANGREPASO A SALSALUDSOD
1. Ania a prinsipio ti Biblia ti mangikeddeng iti rukod ti panagsungbattayo iti Dios?
2. Apay a ti direkta a testimonia a mangtubtubngar iti basol ket maipasango ti babalaw?
3. No seryosotayo maipapan iti kinaagnanayon, kasano ti mariknatayo maipapan kadagiti prinsipio?
4. Ania ti madi iti panagayunar dagiti Judio iti Isaias 58?
5. Buyogan man ti panagayunar wenno saan, ania a kita ti ugali ti manglapped iti kararag?