Domingo
Setiembre 4
1. MAYSA A KINAPUDNO NAUSISA
a. Tapno maiyas-asideg iti Dios, ania ti kasapulan a maamiristayo? Isaias 59:1, 2.
“Ti basol a napalugodan a nalabes unay ken isu a nangisina kadatayo iti Dios ken nangpataud iti adu a makaakar a kinagulo espiritual, daytoy ket kinamanagimbubukod. Awanto ti pannakaisubli iti Dios malacsid iti panangilacsid iti bagi. Kadagiti bagbagitayo awan ti maaramidantayo; ngem babaen iti panangpappapigsa ti Dios kadatayo, mabalintayo ti agbiag nga agaramid iti imbag para iti sabali, ket iti daytoy a wagas maliklikan ti kinamanagimbubukod. Saantayo a kasapulan ti mapan kadagiti lugar dagiti pagano tapno iparangarang ti tarigagaytayo a mangisangrat iti amintayo iti Dios iti naserbi, naayat a biag. Aramidentayo daytoy iti uneg ti pagtaengan, iti iglesia, ken kadagiti makalangentayo ken makanegosiotayo. Iti kadawyan a pagna ti biag mabalintayo nga ilacsid ti bagi ket pagtalinaeden a paiturayan. Kuna ni Pablo, ‘Matayac nga inaldaw-aldaw’ (1 Corinto 15:31). Ti inaldaw a pannakatay iti bagi kadagiti babassit nga annuroten ti biag isu ti mamagballigi kadatayo. Rumbeng a lipatentayo ti bagi iti tarigagay nga agaramid iti imbag para iti sabali. Iti kaaduan adda ti nalawag a pagkurangan iti ayat para iti sabali. Imbes a simamatalec nga aramiden ti pagrebbenganda, sapulenda ketdi ti bukodda a pakaragsakan.” – 2T, p. 132.
“Kasapulan nga am-ammotayo ti bagbagitayo, pannakaammo a mangibanag iti panagbabawi, sacbay a masaracantayo ti pammakawan ken kappia.” – COL, p. 158.
Lunes
Setiembre 5
2. UMAY A NAAS-ASIDEG ITI DIOS
a. Kasano kapateg ti kinapakumbaba iti mata ti Dios? Isaias 57:14-17.
“No ti maysa nga ili kasapulan a magna a sipapakumbaba iti sangoanan ti Dios, isu ti iglesiaNa, a piniliNa iti daytoy a henerasyon. Kasapulan nga agunnoy iti kinangudel ti panunottayo, iti nakurag a panangbigbigtayo kadagiti prebilihio ken gundawaytayo. Awanantayo iti mabalin nga ipangastayo.” – CWE, p. 63.
“Amin a panangitag-ay iti bagi kasapulan a makita ken ilacsid. Kinapudno ken kinalinteg laeng ti makadaer iti suot para iti daytoy a tiempo. Kasapulan a maaddaantayo iti Espiritu ti Dios iti inaldaw, tapno maiyadayotayo kadagiti amin a dakes a kapanpanunotan ken nakillo a tigtignay, manipud iti panangitag-ay iti kararua nga agbalin nga ubbaw.” – 19 MR, p. 65.
“Iluklukat ni Jehova ti dalan para iti pannakairakurac ti Evangelio, ngem saantayo a nakasagana. Inaldaw a kasapulantayo ti mapalukneng ken mapapino babaen iti Espiritu Santo. Uray dagiti kapanunotantayo maisangbayda a paiturayan ken Cristo. Ti saan a naikonsagrar a bagi mailansa coma.” – ST, Oct. 24, 1900.
b. Ania ti kayat ti Dios nga aramiden para kadatayo babaen iti saoNa? Isaias 57:18, 19.
“Isentro ti pammatim a siuuneg ken sitatalged ken Jesu-Cristo tapno awan ti pasamac iti aniaman a kita ti mangkidag iti pammatim. Bay-am ta biagmo a nakalemmeng ken Cristo iti Dios.
“Saanyo a sayangen dagiti kapanunotanyo a mangtaming kadagiti madi nga ug-ugali ti sabali. Daytoy saanna a maagasan dagiti depecto ti kababalinyo. Babaen iti panangtaming kadagiti biddut ti sabali, mabaliwankayo a maipada kadacuada. Kadarato masulisogkayo nga agsao iti kinaubbaw ti sabali wenno pabasolen ida iti panangsugatda kadacayo, utobenyo a ti puso ni Cristo ti sinugatda iti kinatao dagiti sasantoNa. Ket alaenyo ti Bibliayo, luktanyo iti sango ti Dios ket agdawat Kencuana para iti makaagas a balsamo ti kappiaNa.” – 21 MR, pp. 24, 25.
“Ti Sao aramidenna ti natangsit a napakumbaba, ti nasukir naemma ken agbabawi, ti nasubeg natulnog. Dagiti naimbasolan nga ugali a kadawyan iti tao mailagada iti inladaw nga aramid. Ngem ti Sao ikkatenna ti linalasag a derrep. Mabigbigna dagiti kapanunotan dagiti panggep ti panunot. Isinana ti susuop iti pata, isinana dagiti derrep iti lasag, aramidenna dagiti tattao a naannugot nga agsagaba para iti Apoda.” – 7 BC, p. 928.
Martes
Setiembre 6
3. PAGTALINAEDEN ITI BUYA TI KINAAGNANAYON
a. Maisupadi iti liwliwa para iti naemma ken agbabawi, ania a sentencia ti sumangbay kadagiti mangrejectar iti dawat ti Dios? Isaias 57:20, 21. Kasano a maliclikan daytoy a kasasaad?
“Siaannugotka kadi a mangibelleng kadagiti didiosen nga ipatpategmo? Siaannugotka kadi a mangpalubos ken Jesus a sumrec dita pusom tapno madalusan kadagiti amin a rugit? Iti kadi amin a panawen ken iti amin a pasamac gun-gun-odem kadi ti mangituray ita bagim? Maibagam kadi, “Para caniac ti panagbiag isu ni Cristo,” Kukuanac? Aniaman nga adda kaniac, tiempo, wenno pigsa, wenno inpluensia, amin kukuaNa? Iparparangmo kadi Isuna babaen iti panagibtormo, anusmo, kinamanagayatmo?” – ST, Apr. 9, 1902.
“O para iti dayta debosyon ken kinapakumbaba ti puso a nangiturong iti ili ti Dios a mangaramid kadagidiay a banbanag nga imbilin ni Cristo ket iti amin a kinapakumbaba ken kinapudno kunaen pay laeng, awan serbimi nga adipen; inaramidmi laeng dayta pagrebbenganmi nga aramiden! Ngem adu, adu dagiti bumung-or iti kinatangsit ken kina-importante, nga iti pattapatta ti Dios apag-alem-emda. Panangpennec iti bagi ti naipalgac gapu kadagiti sumagmamano a banbanag a naileppas. Sadino ti pakangngegan iti testimonia ti puso a naburac iti panagbabawi ken panagconfesar iti sango ti Dios? Sadino ti pakakitaan kadagiti agkunkuna a mamati nga agus-usar iti sangol ni Cristo? Kasano kabassit ti tiempo a naipaay iti napasnec a kararag, a ti resultana daytoy ket panagtagikua iti naemma ken naulimec nga espiritu, nga iti imatang ti Dios naindaclan ti pategna.” – RH, Sept. 16, 1909.
“Saan a ti panagibunannagmo, no di ket dagiti ar-aramidmo ti mangikeddeng no Cristianoca wenno saan. Umas-asidegtayon iti ocom, ket ikagumaantayo ti mangbosbos iti bassit a tiempo nga adda iti baet ti agdama ken iti yaay ni Cristo, iti nainsiriban a wagas. Ikagumaantayo ti maaddaan iti panunot a napno iti napapateg a pannakaammo, saan a kayo, ruot ken garami. Babaen iti nainsiriban a panangpasayaat iti abilidadtayo dumackel, tapno maaddaantayo iti dumacdackel a bileg a mangawat kadagiti sagrado a panursuro ni Cristo. Agbalintayo a manursuro dagiti misterio ti evangelio” – Ibid., April 19, 1892.
b. Ania ti kankanayon a pagtalinaeden iti panunottayo iti buya ti kinaagnanayon? Roma 14:10.
“Agbibiagtayo iti pingir ti agnanayon a lubong. Ti kaso ti amin ket masusuotdan iti nainlangitan a korte, ket panawenen nga ilacsid ti basol ket sipapasnec nga agtrabaho para iti pannakisalacan ti mabalin a kaadu.” – RC, p. 121.
Mierkules
Setiembre 7
4. TI ESPIRITU SANTO AGTIGTIGNAY
a. Kasano nga iladawan ni Cristo kas pammanecnec nga agbalbalintayon a naagsepan iti nain-indaclan a paset ti Espiritu SantoNa – ti naikari a Mangliwliwa? Juan 16:8.
“No nadekdekket ti yaasidegmo ken Cristo, nakarkaro met a managbasol ti panagparangmo kadagita matam; ta ti panagkitam lumawlawag ket ti kinaimperpectom makita iti dackel ken nalawag a pannakaisupadi iti perpecto a galadNa. Ngem saan a mauppapay. Pammanecnec daytoy a dagiti allilaw ni Satanas napukawdan ti bilegda; ket ti mangbiag nga inpluensia ti Espiritu ti Dios ti mangibangbangon kenca ket mapukpukawen ti kinaliway ken saanmo a panangigin-gina.
“Awan ti natibker a panagayat para ken Cristo ti makapagtaeng iti puso a saan a makakita ken makaamiris iti bukodna a kinamanagbasol. Ti kararua a nabaliwan babaen iti parabor, dayawenna ti nadiosan a kababalin; ngem no saantayo a makita ti bukodtayo a kinarugit, nalawag a pammanecnec nga awanantayo iti buya iti pintas ken kinaindaclan ni Cristo. No basbassit ti panangrukod iti bagbagitayo, ad-adda met a makitatayo ti mangipateg iti awan patinggana a kinadalus ken kinamanagayat ti Mannubbotayo. Ti buya ti kinamanagbasoltayo ti mangiduron kadatayo Kencuana, Isu a mamakawan. Awatennatayo ni Jesus; ta inkari ti SaoNa.” – RH, Feb. 17, 1885.
b. Ilawlawag ti pagsupadian daytoy kinapakumbaba ken ayo a masansan a maiparangarang iti lubong – ken masansan unay nga uray iti iglesia – ken ania dagiti bungbunga ti naudi? Santiago 3:13, 14.
“Ania ti kinaulbod a maibusor iti kinapudno? Isu ti panangtonton a mamati iti kinapudno kabayatan a ti espiritu, dagiti sasao, dagiti panagkawkawes, saanda nga iparang ni Cristo no di ket ni Satanas. Ti mangpardaya iti dakes, ti awan a-anusanna ken saan a mamakawan ket agul-ulbod iti kinapudno, ngem ti ayat, anus ken nabayag nga agitured ket maitutop kadagiti prinsipio ti kinapudno.” – IMKH, p. 185.
“Adu dagiti mangipatpateg kadagiti saan a nasantoan a tarigagay a mangituray. Adu ti agayat a mapasablogan ken siaanep a mangbanbantay iti liway. Adda natangken ken saan a mamakawan nga espiritu. Adda apal, gura, panagtulad. . . .
“Sumagmamano ti umawat iti parabor ni Cristo a buyogan ti panangibaba iti bagi, buyogan ti nauneg ken permanente a kapanunotan iti saanda a pannakaikari. Saanda a maandoran ti pannakaipaduyacyac ti pannakabalin ti Dios, ta daytoy ti mangpabileg kadacuada a mangipateg iti bagida, kinatangsit ken apalda. Daytoy ti gapu no apay a bassit unay ti maaramidan ti Apo kadatayo ita.” – 5 T, pp. 50, 51.
Hueves
Setiembre 8
5. AGPAKUMBABA ITI SANGOANAN TI SABALI
a. Kasano nga agtignay dagidiay a napno iti Espiritu kadacuada a managbasol ken agbidbiddut? Galacia 6:1-3.
“‘Ket pacawanem cadacami dagiti basbasolmi, ta pacawanenmi met ti isuamin a nakautang cadacami’ (Lucas 11:4). Saantayo a maulit daytoy a kararag manipud iti puso ket agtalinaedtayo a di mamakawan; ta kiddawentayo ti Dios a pakawanenNa dagiti salungasingtayo Kencuana kas panangpakawan-tayo kadagiti nakabasol kadatayo. Nagbassit dagiti makaamiris iti pudno a kaipapanan daytoy a kararag. No dagiti saan a mamakawan mabigbigda ti kauneg ti kaipapananna, saanda nga uliten daytoy, a kiddawen ti Dios a tamingenNa ida kas iti panangtamingda iti padada a tao.” – YI, Dec. 7, 1899.
“No dagiti trabahador addaan iti pannakipagtaeng ni Cristo iti bukodda a kararua, no amin a kinamanagimbubukod ket natay, no awan ti salisal, awan ti susic para iti panangituray, no adda ti panagmaymaysa, no pasantoenda dagiti bagbagida, tapno ti ayat para iti maysa ken maysa isu ti makita ken marikna, iti kasta maiparocpoc ti parabor ti Espiritu Santo, ta sigurado a maipaay kadacuada kas kari ti Dios a saanto a mapaay ti maysa a jota wenno titulo. Ngem no ti obra ti sabali ket matagibassit, tapno maiparang ti bukodda a kinangato, panecnekanda a ti bukodda nga aramid saanna a magun-od ti rumbeng a pirma. Saan a mabendisyonan ti Dios ida.” – 1 SM, p. 175.
“Sacbay a maipaay kadatayo ti bautismo ti Espiritu Santo, suotenNatayo ti nainlangitan nga Amatayo, tapno makita no agbiagtayo a saan a mangibabain Kencuana. Umasideg iti Dios, ket Isu umasideg kenca. Saanyo a panunoten, annacco, a naawatyo aminen a naespirituan a kasapulanyo. Ken saan a panunoten a maaddaancayo iti naindaclan a naespirituan a bendisyon uray saanyo a matungpal dagiti kondisyon nga isaad ti Dios a mismo. Da Santiago ken Juan impagarupda a gapu iti panagkiddaw, matagikuada ti kangatoan a lugar iti pagarian ti Dios. O, Anian a nagkurang ti pannakaawatda iti kasasaad! Saanda a naamiris a sacbay a makipasetda iti gloria ni Cristo kasapulan nga awitenda ti sangol ket inaldaw nga agsursuro iti kinaemma ken kinapakumbabaNa.” – 1 MR, p. 178.
Viernes
Setiembre 9
PERSONAL A PANGREPASO A SALSALUDSOD
1. Babaen iti ania a tulbec a maipaay kaniac dagiti kari kadagiti agballigi?
2. Ania dagiti pagbaliwan a makita kadatayo babaen iti naimpusoan a panangadal iti sao ti Dios?
3. Iti buya ti nabati nga ababa a panawen ti probasyon, ania ti rumbeng a pangiturongan iti imatangtayo?
4. Kasano nga agpeggadtayo nga agulbod maibusor iti kinapudno?
5. Ania dagiti practikal nga addang nga alaec maipapan iti panangawat iti maudi a tudo?