Domingo
Agusto 28
1. SALLUAD TI DIOS
a. Iti ania a napintas nga ilustrasyon nga inlawlawag ni Isaias ti agtultuloy a salluad ti Dios iti uvasanNa – ken kasano daytoy a mangtinay iti pusotayo kas annacNa? Isaias 27:2, 3; Salmo 112:5-7.
“Pudno a ti lubong nasipnget. Ti oposisyon mabalin a pumigsa. Dagiti mangtagtagibassit ken mangnguyaw tumurturedda pay ken tumangkenda iti basolda. Ngem kadagitoy amin, saantayo a makir-in. Saantayo a tumaray a saan a sigurado. Saan, saan. Ti pusoc desididon, agtaltalec iti Dios. Addaantayo iti Mannubbot. Makapagrag-otayon iti nabacnang a kinaan-anayNa.” – RC, p. 351.
“No makitatayo laeng ken bigbigen ti kinaimbag ken ayat ken di agressat a saluad ti Dios para kadatayo, ania coman ti nagbaliwan ti lubong. No sapulentayo coma nga umuna ti pagarian ti Dios ken ti kinalintegNa, dagiti prinsipio ti kinalinteg coma ti mangibagnus iti biagtayo ket awan coma ti pagsaadan ti panangipateg ti bagi iti pusotayo. Ti tarigagay a mangaramid iti pagayatantayo ket nababbaba ngem iti tarigagay nga agaramid iti pagayatan ti Dios. Kasapulan nga ipategtayo ti naynay a panangamiris iti ayat ken imbag ti Dios. Kasapulan a laglagipentayo a pagsungbatenNatayo para iti panangiyusartayo kadagit sagot mga insagutNa kadatayo.” – 7 MR, p. 327.
Lunes
Agusto 29
2. KASAPULAN TI NARIDAM A PANAGBANTAY
a. Ania ti naipakita a mangbulbulsec kadagiti mata ti kaadduan ita, pakairamanan ti mata ti kaaduan nga agkunkuna a Cristiano? Isaias 29:9-12.
“Naipakita kaniac a nabartec dagiti palso a pastor ngem saan nga iti arac; agibar-ibarda, ngem saan a gapu iti napigsa a mainum. Ti kinapudno ti Dios ket naiserra kadacuada; saandan a mabasa daytoy.” – EW, p. 123.
b. Kasano a daytoy a kasasaad apektaranna ti adu nga agibunbunannag iti agdama a kinapudno kabayatan a rejectarenda dagiti paset daytoy – ken ania a ballaag ti mangkadua iti daytoy a pannakabigbig? Isaias 29:13-16.
“Dagiti nagduduma a partido ti agkunkuna a mamati Adventista addaanda iti bassit a kinapudno, idinto nga inted ti Dios amin a kinapudno kadagiti annacNa a nakasagana para iti aldaw ti Dios. ImpaayanNa pay ida kadagiti kinapudno naa awan kadagitoy a partido ti makaammo, sanda pay a maawatan. Dagiti banbanag a nairikep kadacuada, inlucat ti Dios kadagiti mayat a kumita ken nakasagana a mangawat. No addaan ti Dios iti baro a lawag nga iyammo, palubosanNa a maawatan dagiti piniliNa, a saandan a palawlawagan dagiti panunotda babaen iti panangdengngeg kadagiti tattao nga adda iti sipnget ken biddut.
“Naipakita kaniac ti kinasisita kadagiti mamati nga addaantayo iti maudi a mensahe ti asi, kas naisina kadacuada nga inaldaw nga umin-inum kadagiti baro a biddut. Nakitac nga awan coma ti tumabuno kadagiti gimongda agtutubo man wenno nataengan; ta biddut a pabilgen ida bayat nga agisursuroda iti biddut a makapatay a sabidong iti kararua ken mangisuro kas doctrina kadagiti bilbilin dagiti tattao. Ti inpluensia ti kakasta nga ummong ket saan a naimbag. No insalacanNatayo ti Dios manipud iti kasta a sipnget ken biddut, agtacdertayo a sititibker iti nangisaadanNa kadatayo a siwayawaya ken agragsac iti kinapudno. Saan a maay-ayo ti Dios kadatayo no mapantayo dumngeg iti biddut, idinto a saan met a nabilin a mapan; ta malicsid no ibaonnatayo kadagitdiay a gimong a ti biddut maipilit nga awataen kadagiti tattao babaen iti bileg ti pagayatan, saanNatayo nga isalacan. Isardeng dagiti angeles ti saluadda kadatayo, ket mabatitayo a dandanogen ti kabusor, tapno mapalidem ken kumapoy babaen iti bileg dagiti dakes nga angeles ket ti lawag iti aglawlawtayo malaockanen iti sipnget.
“Nakitac nga awanantayon iti tiempo a maipaay iti panangdengngeg kadagiti sarsarita. Dagiti panpanunottayo saan coma a maisiasi no di ket mapno coma iti agdama a kinapudno.” – Ibid., pp. 124, 125.
Martes
Augusto 30
3. DAGITI PADTO MAINAIG ITI MASINUNUO A KLASE
a. Ania a padto ti napaay maipapan kadagiti naemma ti Apo a maigidiat kadagiti tattao a nangpalugod iti managdillaw nga espiritu maibusor kadagiti kakabsat a lallaki ken babbai? Isaias 29:18-21.
“Isu a mangipagarup iti bagina a natalged iti ayat ken pannakigayyem ti kabsatna, masarakanna ti bagina a di mapagtalkan ken dagiti motibona saan nga husto ti pannakausigna. . . .
“Dagiti sayangguseng ti masansan a mangdadael iti panagkaykaysa dagiti agkakabsat. Adda dagiti sumagmamano nga agbantay a buyogan ti nakalukat a panunot ken lapayag a mangtiliw kadagiti tumaytayab nga eskandalo (maka-pagura nga aramid wenno sao). Ummongenda dagiti babassit a pasamac a mabalin a bassit ti kaipapananna kadacuada, ngem isu ti ulit-uliten ken padpadackelenda agingga a ti tao maaramid a nagbasol iti maysa a sao. Ti pagsasaoda kasla, ‘Agdarum cunada, ket isu idarumminto’ (Jeremias 20:10). Dagitoy a mamadpadakes ar-aramidenda ti trabaho ti diablo a buyogan ti nakakaskasdaaw a debosyon, bassit ti ammoda no kasano a makapagura ti aramidda iti Dios. No bosbosenda ti gudua ti pigsa ken regta a naipaay iti daytoy dakes nga aramid ket ipaayda iti panangamiris iti bukodda a puso, masarakanda nga adu unay ti rumbeng nga aramidenda a mangdalus iti kararuada manipud iti kinarugit ta awanen ti tiempoda wenno disposisyon a mangdillaw kadagiti kakabsatda, iti kasta saanda a matnag iti bileg daytoy a sulisog. Ti ruangan ti panunot rumbeng a nakaserra maibusor iti ‘kunada’ wenno ‘nangngegko.’ Apay a saantayo, imbes a palubosan ti imon wenno pammardaya a sumangbay iti pusotayo, mapantayo kadagiti kakabsattayo ket kalpasan nga iprangka ngem siaayat nga idatag kadacuada dagiti banbanag a nangngeg maibusor iti kababalin ken inpluensiada, makipagkararag para kadacuada? Idinto a saantayo a maayat ken makikadua kadagiti kabusor ni Cristo, rumbeng a pasantaken ti espiritu ni kinaemma ken ayat nga isu ti ugali ni Apotayo – ayat a saan nga agpanunot iti dakes ken saan a nalaka a maprobokar. ” – RH, June 3, 1884.
b. Ania ti makapabileg a padto ti naited para kadagitoy maudi nga al-aldaw mainaig kadagiti nasaet a Judio a sipupudno a mangsapsapul iti Dios? Isaias 29:22-24.
“Kadagiti Judio adda dagiti sumagmamano a, kas ken Saul ti Tarsus, maingel kadagiti Sursurat, ket dagitoy ipacdaarda a buyogan ti nakakaskasdaaw a bileg ti di agbaliw a linteg ti Dios. Ti Dios ti Israel ipaayNa a lumasat daytoy iti aldawtayo. Ti takkiagNa ket saan nga immababa a saan a mangisalacan. Bayat ti panagtrabaho dagiti adipenna a sipapammati para kadacuada a nabayagen a nabaybaya-an ken naumsi, ti panangilasacanNa ket maipaduyacyac.” – AA, pp. 381, 382.
Mierkules
Agusto 31
4. NABAYAG A PANAGITURED TI DIOS PARA KADATAYO AMIN
a. Kasano a nabilin ni Isaias a mangdakamat a sipupudno ti linalasag a pagduyosan dagiti agibunbunannag nga ili ti Dios – ken kasano a maipakat daytoy kadatayo ita? Isaias 30:8-16.
“Kayatmi nga imaldit kadatayo ti kinasisita ti panangdalus kadagiti bagbagiyo manipud iti tunggal tulaw ni basol. Ti iglesia nga iparang ni Cristo iti trono ti dayagNa ket awanan ‘tulaw wenno karetket, wenno sabali a pacapilawan nga umas-asping, (Efeso 5:27). Kayatmo kadi ti maibilang kadakuada a nangdalus iti cawes ti kababalinda iti dara ti Cordero? Ngarud, ‘agsardengkayo nga agaramid iti dakes, sursuroenyo ti agaramid iti naimbag’ (Isaias 1:16, 17); magna kadagiti bilbilin ken ordinasa ti awan pakapilawanna a Dios. Saanmo a damagen no maitunos iti pagnam-ayam ti mangsalimemet iti kinapudno ti langit. Awitem ti cruzmo ket suroten ni Jesus, aniaman ti gubuayenna. Masarakam a ti sangolna nalaca ken ti awitna nalag-an. No masalungasingmo ti sangolNa ken agsagaba iti dusa ni patay, saan nga impaidam ti Dios ti bugbugtong nga anacNa tapno maalawka manipud iti dana ni salungasing ket maipanka iti dalan ti biag ken kinasanto; bay-am kadi ti nagindaclan unay a pannakaisalacan, ket agkedked a tungpalen dagiti kondisyon ti biag nga agnanayon?. . .
“Ikeddengmo ita panunotmo a manipud ita dagita sakam mapan iti dana ti panagtulnog. Ti sipnget a nanggalut kenca kas iti napuskol nga ulep, maukasto, ket ti nainlangitan a lawag ti agranyag kadagiti amin nga agkalikagum a maaddaan iti kinapudno.
“Maawatan ti Apo ti amin a suotyo; ken nupay kasano kaimposible ti agbiag para iti Dios, masaracam nga agparang ti dalan. No masuot ti pammatiyo, bayat ti pananglukat ti Dios iti Red Sea, dagiti danum mabingay ket ti providenciaNa ti mangaramid iti dalan para kadagita sakayo. Natalged ti agserbi iti Dios. Mabalin a saan a para iti nainlubongan a pagimbagan a salimetmetan dagiti wagas ti Dios; ngem dagiti agsalungasing matagikuada ti agnanayon a pannakapukaw. . . . .
“Dagiti ammatayo nagsalungasingda, ket simmurottayo kadagiti tugotda; ngem ti Dios inlukatNa ti libro ti linteg, ket ti naglicud nga Israel ipangagna dagiti bilbilin ti Apo. Dagiti salungasingda agtacder a naipalgac ket ti pungtot ti Dios maipan iti tunggal kararua a saan nga agbabawi ken agreporma bayat nga agsilnag ti lawag iti dalanda. . . .
“Kasapulan nga agbabawitayo iti napalabas a dakes nga ar-aramidtayo ket sapulen ti Dios iti amin a pusotayo. Patientayo nga aramiden ti Dios ti imbagaNa ket saan a makikompromiso iti sairo iti aniaman a wagas. Ipacumbabatayo dagiti bagbagitayo iti sango ti Dios ket utoben ti aniaman a mapukaw a nangnangruna ngem iti pannakapukaw iti paborNa.” – RH, June 22, 1911.
b. Kasano nga imparangarang ti Dios ti naindaclan nga anusNa kadatayo? Isaias 30:18, 19
Hueves
Setiembre 1
5. IPANGAG TI BASSIT, NAALUMANAY A TIMEC
a. Kasano a ti kinapasnec iti kararag “Dinacam iyeg iti pannaca-sulisog, no di ket isalacannacami iti dakes” (Mateo 6:13), matulongannatayo kadi nga agtalinaed iti isu met la a dana? Isaias 30:21, 21.
“Ti nangidaulo iti panagalsa iti dakes ket kankanayon nga agtrabtrabaho a mangiyadayo iti imatangtayo dagiti sasao ti Dios ken ipabuya a naan-anay dagiti kapanunotan dagiti tattao. Kayatna a saantayo nga ipangag ti timec ti Dios nga agkunkuna: ‘Isu daytoy ti dalan, magnacayo kencuana’ (Isaias 30:21). Babaen iti proseso ti edukasyon aramidenna amin nga adda iti bilegna a mangpalidem iti lawag ti langit.” – 8 T, p. 305.
“Kalikagum ti Apo a maawatan coma ti amin a ti rang-ayda ket nakalemmeng Kencuana ken Cristo; nga agsanggir iti kinapakumbaba ken kinaemmada, naimpusoan a panagtulnog ken debosyonda.” – Ibid., p. 212.
“Iti panangidaton iti kararag nga inted ni Cristo iti [Mateo 6:13], isukotayo dagiti bagbagitayo iti panangibagnus ti Dios, kiddawen Kencuana nga iturongnatayo iti natalged a dana. Saantayo a maidaton daytoy a kararag a sipapasnec, sa ikeddengtayo ti magna iti aniaman a pilientayo a dalan. Urayentayo ti imaNa a mangiturong kadatayo; dumngegtayo iti timecNa nga agkuna, ‘Isu daytoy ti dalan, magnacayo kencuana’ (Isaias 30:21).
“Saan a natalged para kadatayo ti agtalinaed a mangut-utob kadagiti pagsayaatan a maapit babaen iti isusuko kadagiti singasing ni Satanas. Ti basol ipaawatna ti pannakaibabain ken pannakadadael ti tunggal kararua a mangpalugod iti basol; ngem makaallilaw ti galadna, ket gargariennatayo babaen kadagiti makaay-ayo a parang. No agpaspasaractayo iti disso ni Satanas, awan talgedtayo a masalacnibantayo. Agingga a kabaelantayo, serraantayo amin a dana a pakasarakan ti manulisog iti sumrecan kadatayo.” – MB, pp. 117, 118.
b. Bayat ti panaglikudtayo kadagiti didiosentayo, ania ti kari ti Dios kadatayo? Isaias 30:22-26.
Viernes
Setiembre 2
PERSONAL A PANGREPASO A SALSALUDSOD
1. Iti panangiyarbisNa kadagiti bendisyonNa kadatayo, ania ti kayat ti Dios nga utobentayo?
2. Apay a rumbeng nga agpanunottayo iti mamindua sacbay a mapan agbisita iti sabali a denominasyon?
3. Apay nga imposible nga agtsismis ti pudno a naemma a tao?
4. Ania ti iyun-una dagiti linalasag ti panpanunotna a tattao nga agcun-cuna iti relihion?
5. Kasano laeng a sungbatan ti Dios dagiti kararagtayo para iti pannakaibagnus?