Domingo
Agusto 21
1. KINATANGSIT KEN PAGARUP NAOCOM
a. Apaman a naisangbay dagiti Asirio iti pangocoman, ania ti impadto ni Isaias a mapasamac iti nakuspag a Babilonia? Isaias 13:1, 4-6, 17-22; 47:1-3, 7-9. Kaano ngarud a masabat ti naindaclan a ciudad ti ocomna? Daniel 5:1, 18-23, 28, 30.
b. Ilawlawag ti pagpadaan nga impacdaar ti Dios a sumangbayto iti spiritual a Babilonia? Apocalipsis 18:1, 2, 7-17; Ezequiel 7:9.
k. Apay a tunggal maysa kasapulan nga agbantay iti daytoy a banag? Proverbio 15:3.
“Ti mata ni Jehova ket adda iti tunggal parang. . . Ti tunggal sao ken tignay iti biagtayo, ti santo ken sibubusor iti basol a Dios ket agtacder kas sacsi. Saantayo a malibasan ti panagsungbattayo Kencuana, ta ti Dios adda iti sadinoman. Apay a saantayo nga agbiag iti wagas a makapagsungbattayo a siraragsac, ket saan a buyogan iti liday? Inted ti Dios kadatayo ti naituding a trabahotayo, ket aramidentayo dayta iti babaen ti panangiturongNa. No isaadtayo dagiti bilegtayo iti babaen ti kontrol ni Satanas, agsukirtayo iti Dios, ket masarakanto ti rekordtayo iti daydi nakarekord kenni Belsasar, nakana a pagkurangan no matimbang ti pagbilangan.” – ST, Sept. 14, 1888.
Lunes
Agusto 22
2. AD-ADDA NGA AGSANGGIR ITI DIOS, BASBASSIT ITI SOCIODAD
a. Iti napardas ken agdardaras a biag iti ciudad iti moderno a sociodad, iti ania a ballaag ti kasapulan a laglagipentayo? Isaias 17:12-14. Kas ehemplo, ania ti imbilin ti Dios nga isurat ti kaudian a mensahero mainaig iti maysa a ciudad (iti daytoy a caso, Melbourne, Australia) addaan iti nakurang a maysa a milyon a tattao idi sibibiag pay?
“Saan a pagayatan ti Dios nga agnaed dagiti tattaoNa kadagiti ciudad, lugar ti naynay a ririboc ken riro. Dagiti annacda mailiclic coma iti daytoy; ta ti sibubukel a bagi mapakapoy gapu iti panagdardaras, ken ariwawa.”
“Tarigagay ti Dios a mapan dagiti tattaoNa iti away ket agnaed iti daga a pakaalaanda iti bukodda a prutas ken natnateng, lugar a diretso a maidenna dagiti annac kadagiti ar-aramid ti Dios iti nakaparsuaan. Iyadayoyo dagiti pamiliayo kadagiti ciudad, isu ti mensahec.” – MD, pp. 310, 311.
“Agtignay kadi dagiti kakabsat a lallaki ken babbai idiay Melbourne nga awan ti balakad ti Dios? Agikalida kadi kadagiti dadackel a mulmula idiay Melbourne, no ti lubong ket dumacdakes, no dagiti ciudad ket agbalbalinen a Sodoma ken Gomora? Ikkatenda kadi dagiti mata dagiti tattao, tapno saanda a mailasin dagiti tanda ti panawen?
“Dagiti ciudad kasapulan a maobra. Dagiti agnanaed kadacuada kasapulan a maballaagan no ania ti adda iti masangoanan. Nainsiriban coma ti pannakabosbos dagiti tiempo ken kuwarta. Kitaen no awan ti maaramidan kadagiti kalkalsada ken eskinita dagiti ciudad a mangipacdaar iti mensahe ti agdama a kinapudno. Ngem saan nga isaad ti pamiliayo iti ciudad. Ket saan nga agibangon iti negosio sadiay. No aramidenyo daytoy, iti masacbayan manamnama a maitunoskanto a mangsalimetmet kadagiti nagduduma a fiesta. Maisaad dagiti agbantay a mangsapul iti okasyon nga agreklamo iti maibusor kadagiti tattao a mangsalsalimetmet iti bilbilin ti Dios. Ipakat ni Satanas ti bileg ken gurana, pannakaidadanes ti banagna. No dacdackel ti ciudad, dacdackel met ti pannakaidadanes. Iti panawen a kas iti daytoy innegosiotayo kadi ti kuwartatayo ken ti tiempotayo kadagiti negosio iti ciudad? Palubosan dagiti agisursuro iti kinapudno a mapanda kadagiti kalkalsada ken eskinita, ket piliten dagiti lallaki ken babbai a sumrec, ti balay nalabit a napunnon.” – 19 MR, pp. 336, 337.
b. Imbes nga agsanggir iti takkiag a lasag, sadino ti kumitaaantayo? Isaias 17: 7, 8.
Martes
Agusto 25
3. PANNAKAICONSAGRAR ITI ALDAW TI PANNACAABBONG
a. Ania ti impacdaar ti Dios maipapan iti pannangan iti “nadalus” a lasag a taraon iti antitipikal nga Aldaw ti Pannacaabbong? Isaias 22:12-14, 20-22 (ikompara iti Apocalipsis 3:8, 7). Idi a ti mensahero ti Dios nagparparmata, ania ti naipalgac maipapan iti daytoy “nakalukat” ken “nakapunit” a ruangan?
“Naiparocpoc ti Espiritu Santo kadatayo, ket innalanac ti Espiritu iti ciudad ti sibibiag a Dios. Ket naipakita kaniac a dagiti bilbilin ti Dios ken ti pammanecnec ni Jesu-Cristo mainaig iti nakapunit a ruangan a saan a mapagsina, a ti tiempo nga agraniag dagiti bilbilin ti Dios a buyogan ti amin nga importanciada, ken ti pannakasuot ti ili ti Dios iti kinapudno ti Sabbat, ket iti panawen a nakalukat ti ruangan iti kasasantoan a disso iti nainlangitan a santuario, nga ayan ti lacasa, a naglaon iti sangapulo a bilbilin. Daytoy a ruangan saan a malucatan agingga a malpas ti panangibabaet ni Jesus iti nasantoan a disso iti santuario idi 1844. Idi timmacder ni Jesus ket pinunitanNa ti ruangan ti nasantoan a disso, ket linuktanNa ti ruangan ti kasasantoan, ket simrec iti maikaddua nga abbong, nga agtactacder ita iti abay ti lacasa, a dumanonan ti pammati ti Israel ita.
“Nakitac a pinunitan ni Jesus ti ruangan ti nasantoan a disso ket awan ti tao a makailucat iti daytoy; ket linukatanNa ti ruangan ti kasasantoan, ket awan ti tao a makapunit iti daytoy’ (Apocalipsis 3:7, 8); ket yantangay ta linuctan ni Jesus ti ruangan ti kasasantoan, a naglaon iti lacasa, dagiti bilbilin ket agranraniag iti ili ti Dios, ket masubocda kadagiti saludsod ti Aldaw a Panaginana.” – EW, p. 42.
b. Ania ti kasapulan unay a pagrebbengantayo iti buya ti tiempo a pagbibiagantayo? Isaias 34:16. Dagdagupen ti misyon ti mensahero ti Dios para iti tiempotayo ken ilawlawag no apay a napateg unay?
“Saannac nga immay a mangipukkaw iti cappia; mangngegyo ti timecna sadinoman a papananyo. Adda dagiti maragsakan a mangpa-calma kadacayo a maturog iti linalasag a talged; ngem addaannac iti sabali a trabaho. Ti mensahec ket ti mangballaag cadacayo, ti mangibilin cadacayo a repormaenyo ti biagyo, ket isardeng ti panagsukiryo iti Dios. Alaen ti Sao ti Dios, ket kitaen no maitunos iti dayta. Ti kababalinmo kadi ket maandoranna ti panangsukisoc ti nainlangitan nga imbestagasyon?” – RH, June 22, 1911.
Mierkules
Agusto 24
4. TI ANGKLA ITI BAET TI ANGIN TI DOCTRINA
a. Kasano ti panagtacdertayo a natibker pra ken Cristo iti panawen a dagiti tattao agduyos nga agduadua iti Dios ken iti siribNa? Isaias 29:13-16; 30:8-11.
“Pulos nga awan idi ti tiempo nga imparangarang ti Dios ti naindaclan a paraborNa iti piniliNa a nakarkaro ngem kadagitoy maudi nga al-aldaw a ti lintegNa ket maaramid nga awan maayna.” – TM, p. 96.
“Ni Jehova awaganNa ti tunggal manursuro, tunggal ministro, tunggal maysa nga immawat iti lawag ti kinapudnoNa a markaanda a nalaing ti espiritual a tacderda. Addaanda iti naindaclan a lawag, ket no gun-odenda ti biag nga agnanayon, saandan nga agsanggir iti tao no di ket agibangonda iti sigurado a pundasyon.” – Ibid., p. 384.
b. Anianto ti talgedtayo kadagiti tiempo ti narelihionan nga allilaw? Isaias 8:19, 20.
“Awan ti pakicappian ni Cristo ken Belial. Ti saan a panagungar dagiti nadangkes ken dagiti naidumduma a kapanunotanda iti panawen a sumangbay ket dackel a biddut nga isu ti trinabaho ni Satanas a pangkillo iti pammati kadagitoy maudi nga al-aldaw tapno maipatungpal ti panggepna a mangdadael kadagiti kararua. Dagitoy a biddut ket awan pakaitunosanna iti mensahe a nagtaud sadi langit.
“Sumagmamano kadagitoy a tattao ti mangar-aramat iti dayta aw-awaganda iti sagot ken kunada nga insaad ti Dios ida iti iglesia. Addaanda iti awanan kaipapanan a kinaubbaw dayta aw-awaganda ‘saan nga am-ammo a pagsasao,’ saan laeng a dagiti tattao ti saan a makaammo no di pay iti Dios ken amin a langit. Dagiti kakasta a sagot ket inaramid laeng dagiti lallaki ken babbai, a binayabay ti naindaclan a manangallilaw. Panatisismo, palso a gagar, palso a panagsasao ken naariwawa nga ar-aramid naibilangda a sagsagot nga isaad ti Dios iti iglesia. Sumagmamano ti naallilaw ditoy. Ti bunga dagitoy ket saan a naimbag. ‘Maam-ammoyo ida babaen iti bungada’ (Mateo 7:16). Ti panaticismo ken ariwawa ket naibilangda a naisangsangayan a pammanecnec ti pammati. Sumagmamano ti saan a mapnec iti gimong malacsid no maaddaanda iti nabileg ken naragsac a tiempo. Itrabahoda daytoy ket maaddaanda iti makapasugargar a rikna. Ngem ti inpluensia ti kasta a gimong ket awan pagsayaatanna. Inton mapukaw ti naragsac a rikna, mapaksoyanda agsipud ta ti ragsacda saan a naggapu iti umno a pagtaudan. Ti makagun-guna a gimong para iti idudur-as espiritual ket addaan iti solemnidad ken nauneg a panangsukisok iti puso; tunggal maysa ikagumaanna nga ammoen iti bagina ken sipapasnec, iti nauneg a kinapakumbaba, ikagumaanna ti agsursuro ken Cristo.” – 1T, pp. 411, 412.
Hueves
Agusto 25
5. AGTALINAED NGA ADAYO MANIPUD BIDDUT
a. Ita, kas “Baro a Panawen” ti naespirituan a filosopia ken relihion kasla agrang-ay ken napaspas nga agsacnap, ania ti kasapulan a laglagipentayo? Isaias 47:10-15.
“Amin rumbeng a makarikna iti kinasisita ti panangsalimetmet iti galad a naimbag a pinatibker ti naynay a kinamagbantay. Kas namatalec a parabantay, bantayanda ti sarikedked ti kararua, pulos a dida marikna a mabalinda iti agaliwaksay iti panagbantayda uray apagbiit. Iti napasnec a panagkarkararag ken nabiag a pammati, isu laeng ti talgedda.” – CH, p. 411.
“Iti naindagaan nga aramid, ti adipen a mangikagumaan unay a mangaramid kadagiti gutoguten ti trabahona, ken mangipatungpal iti pagayatan ti amona, nangato unay ti pategna. Maysa a natacneng a lalaki ti nagkalikagum a mangala iti mapagtalkan a drayber. Sumagmamano a lallaki ti immay kas sungbat iti waragawag. Dinamagna iti tunggal maysa no kasano kaasideg a makapag-manehoda iti igid ti rangkis a saan a mabalinsuek ti karga. Maysa –maysa simmungbat a kabaelanda a lasaten ti kasta kapeggad a distancia; ngem ti naudi insungbatna nga ikagumaanna a lasaten iti amin a kabaelanna ti kasta kapeggad a dalan. Naawat iti dayta a saad. Ti tao kadi ket ad-adda a maay-ayo iti naimbag nga adipen ngem iti Nainlangitan nga Amatayo? Ti gagartayo ket saan a no kasano kaadayo ti isisinatayo kadagiti bilbilin ti Apo, ket gundawayan ti asi ti Nangted-linteg, sa pay la pasablogan ti kararuatayo nga addatayo pay laeng iti beddeng ti panagibtor ti Dios; ngem ti pakaseknantayo coma isu ti saan nga agsalungasing. Ikeddengtayo ti agtalinaed iti sibay ni Cristo ken iti Nainlangitan nga Amatayo, ket saan nga agrisgo babaen iti makabartek a pagarup.
“Ita, bayat a maiwarwaragawag ti maudi a mensahe nga isangbay dagiti adipen ti Dios a maitunos iti tunggal alagaden ti linteg, addanto mangnguyaw ken saan a mamati; ngem tunggal kararua kasapulan nga agtacder iti bukodna nga integridad. Kas ti kinapudno ni Noe a nangballaag kadagiti tattao idi sacbay layus, kasta met a napudnotayo iti naindaclan a talec nga inted ti Dios kadatayo. Nupay adda dagiti mangnguyaw ken mangob-oblag iti tunggal sikigan, saantayo nga agsarday a mangiparang iti kinapudno ti langit iti daytoy a kaputotan.” – RH, June 22, 1911.
Viernes
Agusto 24
PERSONAL A PANGREPASO A SALSALUDSOD
1. Bayat a kasla agrangpaya ti spiritual a Babilonia, ania ti laglagipentayo?
2. Ania nga addang ti alaek tapno mapalag-an ti estilo ti biagko ken agbalin a saan a nainlubongan ti panpanunotko?
3. Ania a pammanecnec iti Isaias ti mangikonecta iti kinavegetarian iti natda ti Dios?
4. Kasano ti sungbat ti langit iti doctrina ti Tignay Charismatic?
5. Ilawlawag ti katalgedan a pagannurotan no agraira ti biddut?