Domingo
Hulio 24
1. KINATALNA, NAKAIBATAYAN TI NAMNAMA
a. Ania ti naibaga ken Isaias a namnamaenna iti awag nga inawatnat? Isaias 6:9-12. Ania a talged ti ipategna nupay kasta? Versiculo 13; 10:20, 21.
“Ti dadagsen ti kararua ni [Isaias] gapu man iti agbidbiddut a Juda ket saan coma nga awan maayna. Ti misyona ket saan a naan-anay nga awanan bunga. . . . Iti unos ti panagbiagna, kasapulan a naanus isuna, natured a manusuro – propeta ti namnama kasta met iti ipapatay. Ti nadiosan a panggep iti udiana natungpalen, ti naan-anay a bunga ti bannogna ken iti inobra dagiti amin a namatalec a mensahero ti Dios, ket agparang Maysa a natda ti maisalacan.” – PK, pp. 308, 309.
b. Inaganan ti sumagmamano a kangrunaan a kapanunotan nga impaganetget ti propeta – ken apay a dagiti kakasta a makaitag-ay a tema ket ipaayanannatayo iti namnama? Isaias 40:9; 13-15, 21-31.
“Dagiti bitbituen addaan met iti mensahe a pangliwliwa para iti nataoan a parsua. Kadagidiay nga oras a sumangbay iti amin, a ti puso ket agkapoy ken ti sulisog nakaro a dumarup; no dagiti bangen kasla saan a malasat, dagiti panggep ti biag kasla imposible a magun-od, dagiti karkarina kas kadagiti mansanas ti Sodoma; sadino ngarud, ti pakabirocan iti kasta a tured ken kinatibker iti dayta a leksion nga imbilin ti Dios nga adalentayo kadagiti bituen iti saan a maririboc a tignayda.” – Educ, p. 115.
Lunes
Hulio 25
2. TI PUSO ITI LIKOD TI ULEP
a. Iti intero a pakasaritaan ti lubong, ania ti biddut a kapanunotan maipapan iti kababalin ti Dios ti kankanayon a kasapulan a malawlawagan? Ezequiel 18:25; Isaias 55:8, 9.
“Idi aldaw ni Isaias ti naespirituan a pannakaawat dagiti tattao ket nasipnget gapu iti saan nga umiso a pannakaawat iti maipapan iti Dios. Nabayagen nga ikagkagumaan ni Satanas nga iturong dagiti tattao a kumita iti Namarsuada kas namunganay iti basol ken panagsagaba ken ipapatay. Dagidiay a naallilawna, pagarupenda a ti Dios nakuspag ken nainget. Ibilangda Isuna nga agbanbantay tapno mangbabalaw ken mangocom, saan a naannugot nga umawat iti managbasol agingga nga adda pambar iti saan nga itutulong kencuana. Ti linteg ni ayat nga isu iti mangituray iti langit ket palso nga imparang ti manangallilaw, imbagana a maysa daytoy a lapped iti ragsac dagiti tattao, nadagsen a sangol a pakaragsakanda a libasan. Impacdaarna a dagiti pagalagadanNa ket saan a matungpal ket dagiti dusa ti agsalungasing maipakatda a situturay.
“Iti pannakapukaw iti imatang iti pudno a kababalin ni Jehova, dagiti Israelitas ket awanan pambar. Masansan nga ipalgac ti Dios ti Bagina kadacuada kas maysa a ‘napno iti asi ken managparabor, naanat nga agpungtot, ken aglaplaposanan iti kinamanagayat ken kinapudno’ (Salmo 86:15).” – PK, p. 311.
b. Ania ti pudno a ladawan maipapan ti Dios ti masansan a malipatantayo met? Isaias 49:13-16.
“No kasta a kasla pagduaduaantayo ti ayat ti Dios ken saan a pagtalkan dagiti karkariNa ababientayo Isuna ken paldaangentayo ti Nasantoan nga EspirituNa. Ania ti marikna ti ina no dagiti annacna ket kankanayon nga agrekreklamo kencuana, a kasla awanen ti naimbag a maar-aramidna kadacuada, idinto a ti sibubukel a biagna naigubet para iti pagimbagan ken tapno maipaayanna ida iti nam-ay? No ngay ta pagduaduaanda ti ayatna; dinudogdan ti pusona. Kasano ti marikna ti nagannac no kasta ti panangtratar dagiti annacda? Ket kasano ti panangibilang ti nainlangitan nga Ama no saantayo a pagtalkan ti ayatNa, nga isu ti nangipaayanNa iti bugbugtong nga Anacna tapno maaddaantayo iti biag? [Roma 8:32 naadaw]. Ngem mano, babaen iti tigtignay, no saan nga iti sao ti agkunkuna, ‘Ti Dios saanNa nga inranta para kaniac. Mabalin nga ay-ayatenNa ti dadduma, ngem saannac nga ay-ayaten.’
“Amin dagitoy ket panangdangran iti bukodyo a kararua; ta tunggal sao ni duadua nga iyebkasmo aw-awisenna ti panulisog ni Satanas; pappapigsaenna ti panagduyos nga agduadua, ken palpaldaangem dagiti angeles. No sulisogennaka ni Satanas, saanka a mangiyanges iti duadua wenno sipnget.” – SC, pp. 118, 119.
Martes
Hulio 26
3. MAYSA A NAAYAT NGA AWIS
a. Ania ti impalgac ni Isaias kas plano ti Dios para iti naiyaw-awan nga iliNa? Isaias 41:14; 48:4, 8-11.
“Ti puso ti Awan Patinggana nga Ayat segseggaanna dagiti tattao a makarikna nga awananda iti bileg a mangwayawaya kadagiti bagbagida manipud kadagiti palab-og ni Satanas; ket sipaparabor a nangidiaya a papigsaenNa ida atpno agbiagda para Kencuana. . . .
“Dagiti agnaed iti Juda ket awan ti pannakaikarida amin, ngem saan nga isuko ida ti Dios. Babaen kadacuada ti naganNa ket maitag-ayto kadagiti pagano. Adu kadagiti saan a makaam-ammo iti Dios ti makaimatangto iti dayag ti nadiosan a kababalinNa. Nairantada a mangilawlawag kadagiti naayat a panggepNa isu a kankanyon nga agipatpatulod kadagiti adipenNa a propeta ti mensahe, ‘agsublicayo ita tunggal maysa manipud iti dakes a dalanna’ (Jeremias 25:5). . . . .
“Ti awag ti panagbabawi ket naiyallangogan iti kasta unay a lawag, ket amin maawis nga agsubli.” – PK, pp. 316, 319.
b. Ania dagiti nagloriaan a talged ti naited iti tunggal maysa kadatayo laeng no awatentayo ida? Isaias 55:6, 7; 44:21, 22.
“Sica nga agbasbasa, pinilim kadin ti bukodmo a dana? Adayo kadin ti immadayoam iti Dios? Inkagumaam kadin ti nagfiesta kadagiti bungbunga ti salungasing, tapno mabirokam laeng nga agsublida a dapo kadagiti bibigmo? Ket ita, ti plano ti biagmo nadadaelda ket dagiti namnamam natayda, agtugawka kadi nga agmaymaysa ken agladladingit? Dayta timec a nabayagen nga agsasao dita pusom, a saanmo kayat a denggen, umay kenca a naidumduma ken silalawag, ‘Tumacdercayo, ket pumanawcayo; ta daytoy saan nga isu ti paginanaanyo; agsipud iti kinarugit a mangdadael, agraman maysa met laeng a nasaem a pannacarba’ (Mikias 2:10). Agsublicayo iti balay ni Amayo . . .
“Saan a dumngeg iti singasing ti kabusor nga umadayo ken Cristo agingga a maaramidmo ta bagim a naim-imbag, agingga a naimbagkan a nalaing nga umasideg iti Dios. No urayem ti kasta, pulos a dika umasideg. No itudo ni Satanas dagiti narugit a pagan-anaymo, ulitem ti kari ti Mannubbot, ‘Ti umay Kaniac diakto a pagtalawen’ (Juan 6:37). Ibagam iti kabusor a ti dara ni Jesu-Cristo ti mangdalus kadagiti amin a basbasol.” – Ibid., pp. 319, 320.
Mierkules
Hulio 27
4. AGPAKUMBABA ITI SANGO TI DIOS KEN ITI TUNGGAL MAYSA
a. Ilawlawag ti pagbaliwan a kayat ti Dios nga aramiden ti iliNa manipud iti panagdidiosen ken kinatangsit, tapno agbalin nga annac ti nainlangitan nga Ama. Isaias 57:13-21.
“Saan a palubosan ti kinatangsit, wenno pangipateg iti bukod a bagi, wenno kinalinteg iti bagi ti asinoman a mangikonfesar kadagiti basbasolna, tapno matontonda ti kari: ‘Ti mangabbong kadagiti salungasingna dinto rumang-ay; ngem ti mangipudno ken mangilacsid kadacuada maragpatnanto ti caasi’ (Proverrbio 28:13). Awan coma ti ipaidam iti Dios, ket saan a liwayan ti mangiconfesar kadagiti biddutyo kadagiti kakabsat no adda ti pannakainaigda kadacuada. . . .
“Maysa a nakakaskas-ang a kinapudno a dagiti agbidbiddut a puso ket saan a naanugot a madillaw, wenno mangisuko iti bagina tapno maipakumbaba babaen iti panangiconfesar iti basol. Sumagmamano ti makakita iti biddutda, ngem no mapanunotda a ti panagconfesar ket mangiyadayo iti dignidadda, ekskyusenda dagiti biddutda ket salacnibanda dagiti bagbagida manipud iti disiplina nga ipaay ti panagconfesar iti kararua. . . . Makitada dagiti biddut ti dadduma; ngem kasano a maaddaanda iti tured a mangted iti balakad, ‘Iconfesaryo dagiti biddutyo iti maysa ken maysa, ken ikararagan ti maysa ken maysa, tapno maagasankayo,’ no saanda met a suroten daytoy a bilin iti bukodda a biag? Kasano kaadu ti masursuro dagiti ministro wenno tattao maipapan iti kinapudno nga inlacsidda, ken lipatenda no mabalin agsipud ta saan a maitunos kadacuada; agsipud ta saanna a pasablogan ti tangsitda, no di ket mangtubngar ken mangsugat? . . . Kasapulan a mabisin ken mawawda iti kinalinteg ni Cristo, ti pangsilnag ti Espiritu Santo.” – FCE, pp. 239, 240.
b. Kasano ti naim-imbag a pannakitinnulongtayo iti Espiritu ti Dios tapno agbalin a paset iti naindaclan a plano ti Dios? Isaias 59:20, 21.
“Saan coma nga ipateg ti basol. Daytoy ti tiempo no ti ayat ti kaadduan ket aglamiisen, ket aniaman a pakapilawam pabilgenna ti sabali nga agturong iti biddut, ken mangiturong iti adu iti nadacdakes a salungasing. Saanka a mangisaad iti ehemplo ti kasasaad nga apag-alem-em; saan a paglikudan dagiti testimonia ti Espiritu ti Dios. Naitalec kadatayo ti solemne a mensahe nga ipaay iti lubong, ket adu ti makigasanggasat. Saantayo a natalged iti baet dagiti sulisog a nanglikmut kadatayo kadagitoy tiempo ti peggad, nga awan ti naynay a panagbantay nga agkararag. Kasapulan nga agbantaytayo di la ketdi ta awatentayo ti nababa a pagibibasarantayo imbes nga iti nangato a pagibasaran ti kababalin nga adda ti Biblia.”– GW (1892), p. 462.
Hueves
Hulio 28
5. PANAGSANGGIR ITI AGNANAYON A TAKKIAG
a. Ania ti naasi nga awis a naipaay kadagiti agnaed ti Juda ti agallangogan agingga kadatayo ita? Isaias 27:5.
“Naisangsangayan a wagas ni Satanas ti mangiturong iti tao iti pagbasolan, sananto panawan sadiay, awanan gaway ken agpigpigerger a mangsapul iti pammakawan. Ngem apay nga agbutengtayo. . . Tunggal sagana a naaramid para iti saksakittayo, tunggal pammapigsa idiayana kadatayo nga umasidegtayo ken Cristo. . .
“Inkari ni Cristo ti Bagina nga agbalin a suno ken talgedtayo, ket awan ti uray maysa a labsanNa. IsuNa a saan a makandor a kumita iti tao a maibaskag iti agnanayon a pannakadadael a saanNa nga iparocpoc ti kararuaNa inggat patay maigapu kadacuada, kumita a siaasi ken siaayat iti tunggal kararua a makaamiris a saanna a maisalacan ti bagina.
“Awan makitaNa nga agpigpigerger nga agdawdawat ti saanNa nga itag-ay. Isuna a babaen iti bukodNa a pangabbong naipaay iti tao ti awan patinggana a pundo ti pannakabalin moral, saan a mapaay a mangipakat iti daytoy a bileg maigapu kadatayo. Maisangbaytayo iti sakaananNa dagiti basbasol ken ladladingittayo; gapu ta ay-ayatenNatayo.” – COL, pp. 156, 157.
b. Babaen kadagiti ania a sasao nga inladawan ni Isaias ti kapadasan nga isu coma ti kukuatayo? Isaias 12:1-6.
“O mano daras a natignay ta pusom babaen iti pintas ti langa ti Mannubbot, napasudi iti kinaayat ti kababalinNa, ken napasuko iti kapanunotan ti panagsagabaNa. Ita kayatNa nga isanggirmo ti sibubukel a dagsenmo Kencuana.” – 2 SM, p. 232.
Viernes
Hulio 29
PERSONAL A PANGREPASO A SALSALUDSOD
1. Apay a nabaelan ni Isaias ti nagserbi iti iliNa a buyogan ti namnama?
2. Kasano a maliclicantayo ti magargari babaen iti kadawyan a biddut a kapanunotan maipapan iti Dios?
3. Apay a pakaguguran ti Dios nga ayaban ti napangas, nasukir a tattao tapno agbabawi?
4. Mabalintayo nga iconfesar dagiti basbasoltayo iti Dios, ngem kasano kasanksan ti pannakabaybay-a ti Santiago 5:16.
5. Iti lacsid dagiti tontontonen ni Satanas, apay a kayat ti Dios nga adalentayo daytoy leksion ita a lawas?