Domingo
Setiembre 18
1. DAGITI TANDA TI ARTIPISYAL A RELIHION
a. Kasano a maliclikantayo ti palso a kinapakumbaba? Isaias 58:5; Filipos 2:3, 14, 15.
“Awan coma ti mangipagarup a ti panangidumog iti ulo kas maysa a papyrus alaenna ti lugar ti pudno a kinapakumbaba. Ti kasta a panagpakumbaba ket sinsinan laeng; ta no awan ti kinaemma nga agtaeng iti puso awan met ti maiparangarang iti biag. Dagiti mangibunannag laeng iti kinapudno ngem saanda met nga itrabaho ti sao, dadaelenda ti altar ti pamilia ket kiburenda ti gura ken suppiat iti pagtaengan, ket addanto pannakatay dagiti tigtignay a nasantoan ken naimbag nga ar-aramid nga agayus manipud iti pammati ni Cristo. Ti makakombinsir unay a pammanecnec iti pannakabalin ti evangelio iti lubong ket ti epektona iti biag dagiti mamati itoy. Isuna a pudno a Cristiano ibagina ni Cristo ken isardengna amin a tantanabutob ken panagreklamo iti Dios wenno iti padana a tao. . . .
“Dagiti parparawpaw laeng a Cristiano ket saan a bendisyon kadagiti bagbagida ken iti sabali, uray no agayunar ken yukradna ti lupot a nakersang ken dapdapo iti babana. Ti daan nga ugali agsubli; ti nadarasudos a rikna, kinamanagipapan, imon, panangusig iti sabali – amin iparangarangda a saan ida a tengngel ti parabor ni Cristo. . . . No mapaayda a mangipaduyacyac iti tignay a kas ken Cristo, ibatoda ti pammabasol ken pagrebbengan kadagiti paspasamac a nanglikmut kadacuada wenno kadagiti tattao a makadennada. Imbes nga amirisenda dagiti bagbagida tapno makita no sadino ti pagtaudan ti saanda a pannakaitunos, isennaayda ti kasoda, ket ipagarupda a dagiti rigrigatda ti resulta ti madi nga ar-aramid ti sabali.” – RH, June 5, 1894.
Lunes
Setiembre 19
2. TI PINILI TI DIOS A PANAGAYUNAR
a. Ania a kita ti panagayunar ti mangipalgac iti kangatoan a rukod ti Nacristianoan a kinadebosyon? Isaias 58:6.
“Ti trabaho a makagun-guna ken naibilin iti daytoy a capitulo [Isaias 58] isu ti trabaho a gutoguten ti Dios nga aramiden ti iliNa iti daytoy a tiempo.” – 6 T, p. 265.
“No iparangtayo ti kinaan-anay nga adda kadagiti gutoguten ti Dios, kadagiti bilbilinNa, iti lintegNa, iparangtayo dayta mangketta iti galut ti kinadangkes ket iti saad a pagayunaren dagiti tattao, iti saad nga ikawar ida iti basol, warwaren dagiti galut ti kinadangkes, ken tulongan dagidiay nga indadanes ti kabusor.” – 5 MR, p. 38.
“Sapulen no ania ti kasapulan ti napanglaw ken agsagsagaba, ket iti ayat ken dungngo, tulongan ida nga agtured, mangnamnama ken agtalec babaen iti panangibingay kadacuada kadagiti agkakaimbag a banbanag nga inted ti Dios kenca. Iti kasta ar-aramidem ti trabaho a kayat ti Dios nga aramidem. ‘wayawayaam dagiti mailupitlupit’ (Isaias 58:6) Saan nga aginana agingga a mapekkam amin a sangol. Saan a mabalin a baybay-am daytoy a trabaho sa agtulnog iti Dios.” – PUR, July 21, 1904.
b. Aniapay ti iraman ti pudno a panagayunar? Isaias 58:7.
“[Naadaw iti Isaias 58:6, 7.] Daytoy ti reseta nga isuro ni Cristo para iti naupay ti pusona, agduadua, agpigpigerger a kararua. Palubosan ti agladladingit a magna nga agledleddaang iti sango ti Dios a bumangon ket tumulong iti asinoman nga agkasapulan iti tulong. . . .
“Awagan ni Jehova ti iglesia a maaddaan iti nangatngato a debosyon, naindaclan a kapanunotan iti pagrebbengan, nalawlawag a pannakaamiris iti obligasyonda iti Namarsuada. Awaganna ida nga agbalin a nadalus, napasanto, agtrabtrabaho a tattao. Ket ti Nacristianoan a panagtulong ket maysa a wagas a mangisangbay iti daytoy, ta ti Espiritu Santo ti mangiyammo kadua dagiti amin a mangar-aramid iti servicio ti Dios.” – 6T, pp. 266, 267.
“Laglagipen nga adda ti lubong nga isalacan. Akmentayo ti pasettayo, agtactacder a nadekket iti sibay ni Cristo kas katrabahoanNa. Isuna ti ulo; datayo dagiti tumultulong nga imaNa. PanggepNa a datayo, babaen iti panangaramid iti trabaho misyonero medico, mapalag-an dagiti dadagsen ken mawayawayaan dagiti mailuplupit. Saantayo nga ikidem dagiti matatayo iti kinaay-ay iti aglawlawtayo wenno iserra dagiti lapayagtayo kadagiti ikkis dagiti maidadanes nga agtultuloy nga agpangpangato. Ni Cristo ti kaindaclan a misionero nga am-ammon ti lubong. Immay a mangitag-ay kadagiti agladladingit ken nauppapay ket iti trabahoNa makitinnulongtayo Kencuana.” – WM, 118.
Martes
Setiembre 20
3. NAAN-ANAY A PANANGTARIMAAN ITI PANAGSASAOTAYO
a. Ania ti abunaw a kari ti sumangbay kadagiti amin, a babaen iti pammati, ituloyda ti ragsac ti practikal a panagservi iti sabali nga agkasapulan? Isaias 58:8.
“[Naadaw iti Isaias 58:8.] Kas kameng kadagiti iglesiatayo tunggal maysa alaenna ti naituding a trabahona, napalikmutanda iti sabsabali a law-ang. Maysa a bendisyon ken pannakabalin ti tumulong iti trabahoda. Mapadasanda ti nangatngato nga adal ti panunot ken puso. Ti kinamanagimbubukod a nanggalut iti kararuada ket mapagballigian. Ti pammatida agbalin a nabiag a prinsipio.” – 6 T, pp. 267, 268.
b. Apay a kasapulan a naan-anay a pagballigian ti saan a Nacristianoan nga ugali ti “panangitudo iti ramay”? Isaias 58:9, 10; Mateo 7:1-5.
“Dagiti bulsec kadagiti bukodda a biddut ti masansan a napartac a mangdillaw iti biddut ti sabali, alisto a manguyaw kadagiti saoda ken mangusig kadacuada iti maysa a banag a naaramidda wenno saanda a naaramid. . . .
“Tunggal naulpit a pangdillaw iti sabali, tunggal sao a mangipateg iti bagi, ket ‘panangitudo iti ramay a panglais ken, panagsao a sidadangkes’ (Isaias 58:9). Ti panangitag-ay iti bagi a sitatangsit, a kasla awanankan iti biddut, ti panangpadackel kadagiti biddut ti sabali, ket basol iti Dios. . . .
“Awanantayo iti karbengan a mangikkat iti panagtalectayo iti maysa a kabsat gapu iti sumagmamano a dakes a damag a nangngegtayo, sumagmamano a pammabasol wenno maysa a pagarup a nagaramid isuna iti biddut. Masansan a ti dakes a damag a maidanon kadatayo ket aramid dagiti tattao a bumusor iti Dios, dagidiay a makitipon iti kabusor iti trabahona a mangpabasol kadagiti kakabsat, dagiti barusngi a panunotda a mangipagarup iti biddut, ken ti dakes a dilada nga agipadamag iti ulbod.
“Adu kadagiti mangpabpabasol kadagiti kakabsat ti saan a rumuar a silalayang tapno makisao kadagiti tattao nga ipagarupda nga agbidbiddut, no di ket mapanda iti sabali, ket iti maskara ti pannakigayyem ibakalda ti babalawda kadacuada. No dadduma dagitoy nga agpabpabasol ket makikanunongda kadagiti tatao a sililimedda a sactan. Isaoda a kasla pudno, dagiti pammabasol a pagarup laeng, ken saanda met a makaited kadagiti tattao nga ak-akusaranda iti malawag a sarita iti dayta ipagarupda a pagbiddutanda, tapno saanda a maikkan ida iti gundaway a sumungbat kadagiti maipabpabasol kadacuada.” – RH, May 7, 1895.
Mierkules
Setiembre 21
4. AGIBANGON IMBES NGA MANGDADAEL
a. Ania a pagbaliwan ti sumangbay iti kapadasantayo bayat ti pananggun-odtayo iti balligi a mangikkat iti “sangol ti panangitudo iti ramay a panglais ken panagsao a sidadangkes”? Isaias 58:10, 11.
“Dagidiay a mabalin nga agaramid iti naimbag a servicio a mangidur-as iti calintegan ni Cristo, no di ket usarenda dagiti talento ken inpluensiada a mangdadael imbes a mangibangon, mariknadanto ti pungtot ti Dios. Mapadasanda ti sinagaba ni Cristo a nangisalacan kadagiti tattao manipud iti dusa a nagsalungasing iti linteg. Ti pateg ti tao ken ti rukod ti sungsungbatanna ket maammoan laeng babaen iti cruz ti calvario.” – SW, March 31, 1908.
“Ti panagaramid iti nasayaat ket nabileg nga agas ti sakit. Dagiti sumrec iti daytoy a trabaho ket naawis nga umawag iti Dios, ket inkariNa ti Bagina a sumungbat kadacuada. Ti kararuada mapnecto inton tikag, ket kasladanto nadanum a minuyongan, a ti danumda saan nga agatian.
“Agriingkayo kakabsat a lallaki ken babbai. Saan nga agbuteng nga agaramid iti naimbag. ‘Ditay ngarud mabannog iti panagaramid iti naimbag; ta into tiempona agapittayo, no ditay maupay’ (Galacia 6:9). Saanyon nga urayen a maibaga ti pagrebbenganyo. Luctan dagiti matayo ket kitaen no sinno ti adda iti aglawlawyo; sanayenyo dagiti bagbagiyo a tumulong kadagiti marigrigat, agsagsagaba ken agkasapulan. Saanyo nga ilemmeng dagiti bagbagiyo kadacuada, ket saan nga ipangag ti kasapulanda. Sino ti mangted iti pammanecnec a nadakamat iti Santiago nga addaan iti nadalus a relihion, saan a natulawan iti kinamanagimbubukod? Sino ti nagagar a mangaramid iti amin a bilegna a tumulong iti naindaclan a plano ti pannakaisalacan?” – 2 T, p. 29.
b. Iladawan ti naituding a misyontayo ken ti kari a kumuykuyog iti daytoy? Isaias 58:12, 13(umuna a paset).
“Ti ili ti Dios addaan iti naisangsangayan a trabaho nga aramiden a mangtarimaan iti gutbaw a naaramid iti lintegNa; ket iti yaasidegtayo iti panungpalan, ad-adda met nga agganat daytoy a trabaho. Amin nga agayat iti Dios ipakitada nga awitda ti tandaNa babaen iti panang-salimetmet kadagiti bilbilinNa. Isuda ti agtarimaan kadagiti dalan a pagnaedan. . . [Isaias 58:13, 14]. Iti kasta ti pudno a trabaho ti medico misyonero ket naisinggalut iti panangsalimetmet iti bilbilin ti Dios, isu a naisangsangayan a nakadacamatan ti Aldaw a Panaginana, yantangay ta isu ti naindaclan a pakalaglagipan iti trabaho ti Dios a nagparsua. Ti pannakasalimetmetna ket naisinggalut iti trabaho a mangisubli iti tao a maiyasping iti Dios. Daytoy ti trabaho nga isayangkat ti ili ti Dios iti daytoy a tiempo.” – Ibid., pp. 265, 266.
Hueves
Setiembre 22
5. CAPPIA BABAEN ITI PRINCIPE TI CAPPIA
a. Ania ti maawatantayo maipapan iti pudno a Nacristianoan a kinamanagtulong kas paset ti pudno a panangsalimetmet iti Aldaw a Panaginana? Isaias 58:13, 14.
“Amin a langit ket naiparang kaniac a kumitkita ken agbanbantay iti Aldaw a Panaginana dagidiay a mangbigbig kadagiti tontontonen ti maikapat a bilin ken mangsalsalimetmet iti Sabbat. Marmarkaan dagiti angeles dagiti interesda, ken ti nangato a panangibilangda iti daytoy nadiosan nga institusyon. Dagidiay a mangpasanto iti Dios kadagiti puspusoda babaen iti nainget a panagdebosyon kadagiti panpanunotda, ken mangikagumaan a mangpasayaat kadagiti sagrado nga oras babaen iti panangsalimetmet iti Sabbat iti amin nga abilidadda, ket dayawenda ti Dios babaen iti panangawagda iti Sabbat a ragsac – dagitoy ipaayan dagiti angeles iti naisangsangayan a bendisyon ti lawag ken salun-at, ken naisangsangayan a pigsa ti maipaay kadacuada. Ngem iti sabali a bangir, umadayo dagiti angeles kadagiti saan a mangbigbig iti kinasagrado ti aldaw a pinasanto ti Dios, ket ik-ikkatenda ti lawag ken pigsa kadacuada. Nakitac ida a nalangeban iti ulep, agladladingit ken masansan a naliday. Mariknada nga awan ti Espiritu ti Dios.” – 2 T, pp. 704, 705.
“Dagidiay a nagbiag, a saan a nangparagsac kadagiti bagbagida, no di ket agbalin a bendisyon kadagiti awanan gasat nga addaan laeng iti sumagmamano a bendisyon – kasano nga agragsac ti pusoda iti pannakapnec! Maamirisda ti kari: ‘ket nagasatcanto: ta awan ti maisupapacda kenca; ta, gun-gunaancanto inton panagungar dagiti nalinteg’ (Lucas 14:14).” – Ibid., vol. 6, p. 312.
“Kadagiti amin nga umawat iti Sabbat kas tanda iti pannakabalin ni Cristo a mangparsua ken mangsubbot, maysanto a ragsac. Makita ni Cristo iti daytoy, agragsacda Kencuana. Itudo ti Sabbat kadacuada dagiti ar-aramid ti panagparsua kas pammanecnec ti pannakabalinNa a mangsubbot. Bayat a maipalagip ti napukaw a cappia ti Eden, ibagana ti cappia a maisubli babaen iti Mannubbot.” – DA, p. 289.
Viernes
Setiembre 23
PERSONAL A PANGREPASO A BASBASAEN
1. Mangted iti sumagmamano nga ehemplo ti palso a kinapakumbaba – ken iti pudno a kinapakumbaba.
2. Ania ti managinsisingpet a kita ti panagayunar a kondinaren ti Dios?
3. Kasano a makipasetnak iti kasayaatan a kita ti panagayunar a kayat ti Dios para kaniac?
4. Ania ti nataoan a pagduyosan a mangrebba ti mapagbalin nga agibangonto?
5. Dagdagupen ti nagloriaan a plano ti Dios para kadagiti mang-salsalimetmet iti Aldaw a Panaginana ita?