Domingo
Hulio 17
1. KINAANNUGOT TI PUSO
a. Kadaldalusna unay kalpasan ti pannakakitana iti sirmata iti nainlangitan a santuario, ania ti sungbat ni Isaias iti awag ti Dios? Isaias 6:8-10.
“Ni propeta [Isaias] napatured para iti trabaho iti sangona. Ti lagip iti daytoy a sirmata [iti templo sadi langit] naikuykuyog kencuana iti unos ti atiddog ken naganetget a misyonna.” – 5 T, p. 751.
b. Kasanotayo met a sumungbat iti dawat ti Dios ita? Hebreo 3:12-15.
“Nabayagen nga agur-uray dagiti nainlangitan nga angel para kadagiti nataoan nga ahente – dagiti miembro ti iglesia – a makitinnulong kadacuada iti naindaclan a trabaho a kasapulan a maaramid. Agur-urayda kenca.” – Ibid., vol. 9, pp. 46, 47.
“Adda trabaho nga aramiden iti tunggal maysa. Tunggal kararua a mamati iti kinapudno ket agtacder iti pasetna ken lugarna ket kunaen: ‘Adtoyanac; ibaonnac.” – Ibid., vol. 6, p. 49.
Lunes
Hulio 18
2. NAINSIRIBAN A PANANGIKALINTEGAN
a. Ilawlawag no kasano ken apay a sitatarus nga agkiddaw ti Dios cadatayo? Isaias 1:18.
“Gutoguten ni Jehova iti iliNa nga usarenda ti isipda, ket saan a bay-an para iti impresyon. Ti trabahoNa ket nalaca a maawatan dagiti amin nga annacNa. Ti panursuroNa ket wagas a nalaca a sumrec iti pannakaawat dagiti nasaririt nga isip. Napattapatta nga itag-ayna ti panunot.” – 1 T, p. 230.
“Ginatang ni Cristo ti pusotayo. Ginatang ni Cristo ti nataoan a sirib. Ginatang ni Cristo dagiti bileg a makirinnason; ken intalec ni Cristo cadatayo dagiti siglat ken bileg. SaanNa a kayat a dagitoy a bileg ken siglat a maaramat kadagiti kadawyan a banbanag ditoy daga, ket mapukaw iti panunot dagiti nainlangitan.” – 1 ST, p. 251.
“Ti Maysa a naindaclan a nagan kadagiti tattao ket kas kadagiti letra a masurotan iti kadaratan, ngem ti awanan tulaw a kababalin makaandor iti amin a kinaagnanayon. InikkanNaca ti Dios iti sirib ken panunot a mangikalintegan, a mabalinmo a panggammatan kadagiti karkariNa; ket nakasagana ni Jesus a tumulong kenca a mangporma iti napigsa ken nasimbeng a kababalin.” – GAG, p. 81.
b. Kasano a bendisyonannatayo ti evangelio iti nalawlawag a kapanunotan? 2 Timoteo 1:7.
k. Ania ti pagnaigan ti puso ken panunot? Hebreo 10:16; Ezequiel 36:26.
“Ania ti baro a puso? Isu ti baro nga isip. Ania ti isip? Isu ti pagayatan. Ania ti pagayatam? Mabalin nga adda iti sibay ni Satanas wenno iti sibay ni Cristo. Ita adda kenca. Ti saludsod isaadmo kadi ta pagayatam ita iti sibay ni Cristo? Dayta ti baro a puso. Isu ti baro a pagayatan, baro nga isip. .”– 1 ST, p. 210.
“Dagiti balikas, ‘Iccancayto met iti baro a puso’ (Ezequiel 36:26), kayatna a saoen, Baro nga isip ti itedco kenca. Daytoy a pannakabal-baliw ti puso ket kankanayon a mapakuyogan iti nalawag a pannakaawat iti Nacristianoan a pagrebbengan, pannakaawat iti kinapudno.”– CPTS, p. 452.
Martes
Hulio 19
3. DAGITI NATADEM A SAO, NADAGSEN TI IPAAWATNA
a. Ania ti simple a panagpili ti naibilin nga ilawlawag ni Isaias ken ania ti maipada a panagpili ti naited kadatayo? Isaias 1:19, 20; Josue 25:14, 15.
“Ti pagayatan ti mangituray a bileg iti galad ti tao, ti bileg a mangngeddeng wenno agpili. Tunggal tao naaddaan iti panunot a mangpili iti nalinteg. Iti tunggal kapadasan ti biag, ti sao ti Dios kadatayo ket, ‘Agpilicayo ita nga aldaw no siasino ti pagservianyonto’ (Josue 24:15). Tunggal maysa mabalinna nga isaad ti pagayatanna iti sibay ti pagayatan ti Dios, mabalinna a pilien ti agtulnog Kencuana, ket babaen iti kasta a panangisilpona iti bagina kadagiti nadiosan nga ahencia, mabalinna ti agtacder iti lugar nga awan ti mabalin a mangpilit kencuana nga agaramid iti dakes. Iti tunggal agtutubo, tunggal ubing, agsadag ti pannakabalin, babaen iti tulong ti Dios, a mangporma iti natibker a kababalin ken agbiag iti biag a naserbi.” – Educ., p. 289.
“Saantayo mapattapatta ti pateg ti simple a pammati ken ti di marupir a kinatulnog. Babaen iti panangsurot iti dana ti panagtulnog iti simple a pammati a ti kababalin magun-odanna ti kinaan-anay.” – 4 BC, p. 1137.
b. Ania dagiti basbasol ti ili ti Dios a dinakamat ti propeta? Isaias 1:21-23.
“Nakana a basol ti adda iti baettayo, kinaan-anay iti bagi, – Kinafariseo – rikna a nalintegtayo, ken amin a tignaytayo ket maitutop a maikkan iti pammadayaw, no adayotayo iti maipatpateg a nalinteg nga Espiritu maiturong iti Dios wenno maiturong kadagiti kakabsattayo. . . Naipateg ti panangitan-oc iti bagi ket maaddaanca iti espiritu ti panagdillaw kadagiti sabsabali agsipud ta saan a sica ti umuna. Napaadda ti apal, imon, panagipapan, panagpabasol iti sabali ken panagsacsi iti ulbod. Adda dagiti addaan iti saan a naiconsagrar a puso, a mangiturong iti biddut a dana kadagiti amin a banag a naisao wenno naaramid, uray pay iti babaen ti naisangsangayan a pammilin ti Dios. . . Paragsakenda ti kabusor. . . . babaen iti panangaramidda iti maysa a tao a makabasol iti maysa a sao. Iti kaadduanna kadagitoy a kaso a nadillaw ket awan ti pudno a basol; ti panagipapan ket bunga ti panunot a mangsangaili iti dayta. No ti maysa agkuros iti danada, awan ti pannakitunos wenno pannakikaduada kencuana. Marurodda kadagiti amin a saoen wenno aramidenna. . . . idinto a dagiti kasta a mangparparnuay iti panaggugura ken panagsisina, ken agimulmula kadagiti bukbukel ni imon, pagam-ammoan tontonenda a sititibkerda a mamati iti kinapudno. Dagiti kakasta saanda nga isanay ti espiritu ti kinapudno.” – RH, Dec. 18, 1888.
Mierkules
Hulio 20
4. MAYSA A NAAN-ANAY, NAINSIRIBAN A TRABAHO
a. Ania ti nasisita tapno maaddaantayo iti naan-anay a panagbabawi? Salmo 119:18.
“[Naadaw iti 1 Juan 3:2, 3.] Adtoy ti trabaho nga aramiden ti tao. Kasapulan a sangoenna ti sarming, ti linteg ti Dios, ilasinna dagiti depekto iti kababalinna, ket ilacsidna dagiti basbasolna, ugasanna ti kawwes ti kababalinna iti dara ti Cordero. . . .
“Ngem ti inpluensia ti namnama ti evangelio ket saanna nga iturong ti managbasol iti pannakaisalacan ni Cristo kas banag ti libre a parabor, kabayatan nga itultuloyna ti agbiag a mangsalsalungasing iti linteg ti Dios. Inton agbannawag ti lawag ti linteg iti panunotna ket naawatanna a nalaing dagiti gutgutoguten ti Dios ken maamirisna ti pagpatinggaan ti salungasingna, repormaenna dagiti kannawidanna, agbalin a napudno iti Dios babaen iti pigsa a nagun-odna manipud iti Mannubbot, ket turongenna iti baro ken nadaldalus a biag.” – 4 T, pp. 294, 295.
“Iti panagadalmo iti sao, idatagmo iti ruangan ti imbestigasyon dagiti dati a balabalam ken dagiti natawid ken napasayaatmo a kapanunotam. Pulos a saanmo a madanon ti kinapudno no adalem ti Nasantoan a Surat tapno pasingkedam ti bukodmo a kapanunotan. Ibati dagita iti ruangan, ket buyogan iti sibabawi a puso sumrecka ket denggem no ania ti ibaga ni Jehova kenca. Kas ti napakumbaba a mangsapsapul iti kinapudno, agtugaw iti sakaanan ni Cristo ket agsursuro Kencuana, ti sao ti mangted kenca iti pannakaawat. Kadagidiay a nasirib unay iti bukodda a kinatangsit nga agadal iti Biblia, kuna ni Cristo, kasapulan nga agbalincayo a naemma ken napakumbaba ta pusoyo no tarigagayanyo ti agbalin a nasirib iti pannakaisalacan.
“Saan a basaen ti sao iti lawag ti sigud a kapanunotanyo; no di ket iti panunot a nawaya kadagiti madi a panagipato. Sukisoken daytoy a siaannad ken sikakararag. No, bayat iti panagbasayo, sumangbay ti pannakaconvictar, ket makitayo a ti impategyo a kapanunotan ket saan a maitunos iti sao, saanyo nga ikagumaan nga itutop ti sao kadagita a kapanunotan. Dagiti kapanunotanyo ti itutop iti sao. Saan a palubosan a dagiti patpatien ken insanayyo idi iti mangkontrol iti pannakaawatyo. Luctan dagiti mata ti isip ken imatangan dagiti nakakaskasdaaw a banbanag nga adda iti linteg. Ductalen no ania ti nakasurat ket imulayo dagiti sakayo iti agnanayon a Bato.” – MYP, p. 260.
b. Kasano a ti determinasyontayo a manglikod iti basol ket mangipalagip iti naindaclan a repormasyon idi aldaw ni Nehemias? Nehemias 4:6 (maudi a paset).
“O, awan coma ti mangdepdep iti aldaw ti panagbabawi ken panagreporma! Itan ti naawat a tiempo.” – ST, July 30, 1894.
Hueves
Hulio 21
5. PAKPAKAUNA A RAMAN TI PUDNO A PANAGTUTUNOS
a. Iladawan ti rukod ti napasnec a panagbabawi nga il-iliwen ni Cristo a makita kadatayo, kabayatan nga agbibiagtayo iti daytoy a panawen ti pakasaritaan ti daga. Apocalipsis 3:19.
“‘Maysa a naindaclan a trabaho ti kasapulan a maaramid para iti natda. Adu kadacuada ti agtataeng kadagiti babassit a pannuboc.’ Kinuna ti angel, ‘Rineprep a dakes nga angeles ti adda iti aglawlawyo, ket padpadasenda nga iserrec ti nakabutbuteng a sipnget, tapno masiloan ken maalacayo. Saanyo a palubosan dagiti panunotyo a maisiasi a daras manipud iti trabaho nga agsagana ken kadagiti kapatgan a kinapudno para kadagitoy maudi nga al-aldaw. Ket agtaeng kadagiti babassit a pannubok ket mapan nga apagkanito kadagiti detalye dagiti babassit a pakarikutan tapno ilawlawag ida para iti pannakapnec daytoy maysa wenno dayta.’ Maibayag ti panagsarita iti mano nga oras iti nagbaetan dagiti dua a masecnan a partido, ket saan laeng a nasayang ti orasda, ngem dagiti adipen ti Dios, napilitan a dimngeg kadacuada, idi a dagiti puso dagiti agpada a partido ket saan a napasuko babaen iti parabor. No ti kinatangsit ken kinamanagimbubukod ket mailacsid, lima a minutos mabalin a maikkat iti kaaduan a pakarikutan.” – EW, p. 119.
“Umayen ni Cristo. Malagipko idi nga impagarupmi a sumangbay ti panungpalan idi 1844, ken idi naguummongkami iti gimongmi ti saludsod naamad babaen iti maysa ken sabali, ‘Kakabsat, nakitayo kadi kaniac ti aniaman a madi? Ammoc a saantayo a makita ti bukodtayo a biddut, ket no asinoman kadagiti kakabsat ti nakakita iti aniaman a madi kaniac, kayatco nga ibagada.’ No dadduma adda dagiti biddut a naiconfesar, ket agkurnokami iti Dios ket agkiddaw iti pammakawanNa. Ket makita dagiti kakabsat nga addaan iti sumagmamano a susic a mapanda iti maysa a disso wenno hardin ket agpakaasida iti Dios. Ket agsublida nga agin-inniggem, agin-innayat iti maysa ken maysa ken sikakapiada. Mariknami a saankami a makapagsisina agingga a saan nga agtutunos amin a banag. Adda iti nagbabaetanmi ti nasam-it a cappia, ket ti dayag ti Dios adda iti aglawlawmi. Makita nga agranyag dagiti rupa.” – 2 ST, p. 24.
Viernes
Hulio 22
PERSONAL A PANGREPASO A SALSALUDSOD
1. Apay a mapabilegtayo iti gagar ni Isaias nga umawat iti awag ti Dios?
2. Ania ti maaramid ti pudno a Nacristianoan a relihion iti nataoan a panunot?
3. Kasano a ti pudno a panagbabawi baliwanna ti pannakirelasyontayo iti maysa ken maysa?
4. Ilawlawag ti kangrunaan a tulbek no kasano a magun-odantayo ti pudpudno nga idadackel iti panagbasatayo iti Biblia.
5. Ania a kapadasan manipud kadagiti nasapa nga Adventista ti maulittayo a nalaing?