Domingo
Agusto 7
1. NAMNAMA NAPABARO
a. Ania ti naamiris ni Ezekias, anac a lalaki ni Acaz, idi nagbalin nga ari ti Juda? 2 Cronicas 29:1, 6-9.Ania dagiti immuna nga addangna? 2 Corinto 29:2-5, 10
“Idi nagtugaw ni Ezekias iti trono inkeddengna nga aramidenna amin a bilegna nga isalacan ti Juda manipud iti keddeng a mangkamkamakam iti akin-amianan a pagarian. Dagiti mensahe dagiti propeta awan ti idiayana a mangpabileg uray bassit laeng. Babaen laeng iti nalawag a repormasyon a maliklikan ti mangbutbuteng a pannakaocom.
“Iti tiempo ti krisis, napanecnekan ni Ezekias a maysa a lalaki ti gundaway. Apaman nga immuli iti trono rinugiannan ti nagplano ken nagipatungpal. Immuna nga inturongna ti imatangna iti pannakaisubli dagiti servicio ti templa a nabayagen a nabaybay-an.” – PK, p. 331.
b. Ania a dawat ti inturong ti Dios iti Juda? Isaias 31:6. Kasano ti isusungbat dagiti “naimbag a natda”? Mikias 7:7-9; 2 Cronicas 29:16-20, 27-31, 35, 36.
“Talaga ngag insagana ti Dios dagiti puso dagiti pangpanguloen a lallaki ti Juda a mangidaulo iti nalawag a tignay ti repormasyon, tapno mapasardeng ti atab ti apostasia.” – Ibid., p. 333.
Lunes
Agusto 8
2. TI RAGSAC TI REPORMASYON
a. Ania ti naipadto a kararag, a naidatonen idi naidedicar ti templo, ti naipatungpal iti repormasyon ni Ezekias? 1 Ar-ari 8:33, 34; 2 Cronicas 7:14.
“[Naadaw iti 1 Ar-ari 8:33, 34.] Ti selio ti nadiosan a yaanamong a naisaad iti daytoy a kararag ta idi maileppas bimmaba ti apoy manipud langit a mangtalipopos iti mapuoran a daton ken sacrificio, ket ti dayag ni Jehova pinunnona ti templo. Kitaen ti 2 Cronicas 7:1. Ket iti rabii nagparang ti Dios ken ni Solomon tapno ibagaNa kencuana a nangngeg ti kararagna, ket asi ti maipaay kadagiti agdawdayaw sadiay. . . . Dagitoy a karkari ket siaabunaw a naipatungpal kabayatan iti repormasyon idi panawen ni Ezekias.” – PK, p. 335.
b. Iladawan ti panagballigi ti repormasyon ni Ezekias. 2 Cronicas 30:1, 9-13, 21-23, 26, 27.
“Ti pito nga alaldaw a masansan a maipaay iti rambac ti Pascua ket nabiit unay a naglabas, isu nga inkeddeng dagiti agdaydayaw a mangbosbosda pay iti sabali a pito nga aldaw tapno adalenda pay a nalaing ti dalan ti Dios. Dagiti manursuro a papadi intultuloyda ti trabahoda a mangisuro iti libro ti linteg; inaldaw nga aguummong dagiti tattao iti templo tapno mangidatonda iti pagdaydayaw ken pagyaman; ket iti yaasideg ti panagleppas ti naindaclan a gimong, nalawag unay ti panangisangbay ti Dios iti nakakaskasdaaw a pannakabalbaliw ti panaglikud ti Juda ken iti panagrangpaya ti panagdidiosen a namutbuteng a mangsagad iti amin. Dagiti solemne a ballaag dagiti propeta ket saan a napaay a naan-anay.” – Ibid., pp. 337, 338.
k.Kalpasan ti Pascua, ania pay dagiti addang a nangmarka iti kinapudno ti repormasyon ni Ezekias? 2 Cronicas 31:1, 5, 6. Kasano a nailadawan ti administrasyonna? Versiculo 20, 21; 2 Ar-ari 18:4-7.
“Ti panagturay ni Ezekias ket iladawan dagiti serye ti nakaskasdaaw a providencia a nangipalgac kadagiti aglawlaw a nacion a ti Dios ti Israel makikadua iti iliNa.” – Ibid., p. 339.
Martes
Agusto 9
3. ASI KEN MAYSA A MISYON
a. Ania a mensahe ti simmangbay kenni Ezekias idi nagsakit isuna, ken kasano a naipakita kencuana ti asi? 2 Ar-ari 1-7. Kasano ti panangipeksana iti panagyaman? Isaias 38:9-20.
“Naisubli iti sigud a pigsana, ti ari ti Juda binigbigna dagiti asi ti Dios babaen iti kanta, ken inkarina a bosbosenna dagiti nabatbati pay nga alaldaw ti biagna iti naannugot a panagserbi iti Ari dagiti ar-ari. Ti siyayaman a panagbigbig iti kinamanagayat ti Dios iti panangtamingNa kencuana ket maysa nga inspirasyon kadagiti amin nga agtarigagay a mangbosbos iti biagda iti gloria ti Namarsuada.” – PK, p. 342.
b. Babaen iti ania tanda a pinasingkedan ti Dios ti kariNa ken Ezekias, ken ania a tignay a nagdalipato iti adayo a daga? 2 Ar-ari 20:8-12.
“Kadagiti naabuno a tantanap ti Tigris ken Eufrates agnaed sadiay ti daan a puli a, numan pay iti dayta a tiempo iturayan ida ti Asiria, nairanta a mangituray iti lubong. Kadagiti ilina adda dagiti mamasirib a tattao a nangigubet iti adu a panawenda iti panagadal iti astronomia; ket idi a nadlawda ti anniniwan iti init a nagsubli iti sangpulo a geger, napalalo ti siddaawda. Ti arida, Berodac-baladan, apaman a naammoanna a daytoy a milagro a naisangbay kas maysa a tanda iti ari ti Juda nga inikkan ti Dios ti langit iti sabali pay biag, nangibaon kadagiti embajador kenni Ezekias a mangkablaaw kencuana iti pannakapaimbagna ken mangammo, no mabalin, ti ad-adu pay a maipapan iti Dios a makabael a mangaramid iti kasta kaindaclan a milagro.
“Iti ibibisita dagitoy nga embajador manipud iti ari manipud iti adayo a daga, nangted kenni Ezekias iti gundaway a mangidayaw iti sibibiag a Dios. Nakalaclaca para kencuana nga ibaga kadacuada ti maipapan iti Dios, ti mangtaptapaya iti amin a naiparsua a banbanag, babaen iti paraborNa naispal ti bukodna a biag idin a napukaw ti amin a namnama! Ania ti nakallalagip a panagbalbaliw ti naaramid no dagitoy nga agsapsapul iti kinapudno a naggapu kadagiti tanap ti Caldea ket naiturong a mangbigbig iti kinaturay ti sibibiag a Dios!” – Ibid., p. 344.
k. Ania ti masursurotayo manipud iti gundaway nga agmisionero nga inted ti Dios kenni Ezekias? Colosas 4:5; Apoclipsis 3:18 (maudi a paset)
“Kasapulan a mapulotan dagiti mata iti nainlangitan a sapsapo ti mata ken ti kapanunotan kadagiti gundawayda.” – 9 T, p. 130.
Mierkules
Agusto 10
4. MAYSA A DACKEL A BIDDUT
a. Ania a biddut ti nangmantsa iti napintas a rekord ni Ezekias? 2 Cronicas 32:25, 31; Isaias 39:1-4.
“Kinatangsit ken kinaubbaw ti nangtagikua iti puso ni Ezekias, ket iti panangitag-ayna iti bagina, imparangna kadagiti nagamrud a mata dagiti gameng a nangpabaknangan ti Dios iti iliNa. . . . [Naadaw iti Isaias 39:2] Saan a tapno maigloria ti Dios nga inaramidna daytoy, no di ket tapno maitag-ay ti bagina iti mata dagiti gan-gannaet a prinsipe. Saan a nagsardeng a nangutob a dagitoy a lallaki ket mangibagi iti nabileg a nacion nga awan iti buteng ken panagayat iti Dios kadagiti pusoda, ket kinaawan annad ti mamagbalin kadacuada a pangitalkanna iti palimed maipapan kadagiti temporario a kinabacnang ti nacion.
“Ti ibibisita dagiti embajador ken ni Ezekias ket maysa a suot iti kinamanagyaman ken debosyonna. . . . [2 Cronicas 32:31.] No coma ta pinasayaat ni Ezekias ti gundaway a naipaay kencuana nga agsacsi iti bileg, imbag, kinamanagayat ti Dios iti Israel, ti report dagiti embajador ket masya coma a lawag a mangsarut iti sipnget. Ngem intag-ayna ti bagina a nangatngato ngem iti Apo dagiti buybuyot. Saan ‘a nagsubad cas mayannurot iti imbag a naaramid kencuana ta ti pusona nagpalangguad’ (Versiculo 25).
“Anian a nagpeggad ti resulta a simmaruno! Kenni Isaias a naipalgac nga iti panagsubli dagiti embajador awitda ti damag mainaig iti kinabacnang a nakitada, iti kasta ti ari ti Babilonia ken dagiti mamalbalacadna, implanoda a pabacnangen ti bukodda a pagilian kadagiti gameng ti Jerusalem. Nakadagdagsen ti basol ni Ezekias; ‘gapuna nga adda idi pungtot a maicanniwas kencuana, ken maicanniwas iti Juda ken iti Jerusalem’ (versiculo 25).” – PK, pp. 344-346.
b. Ania a padamag ti kasapulan nga ibaga ni Isaias kenni Ezekias – ken kasano nga impakita ti ari a pagbabawianna ti kinaawan annadna? Isaias 39:5-8; 2 Cronicas 32:26.
“Kabayatan dagiti nabatbati a tawtawen ti ari ti Juda, addaan coma iti naabunaw a rang-ay gapu iti kinatibker ti panggep a mangsubbot iti napalabas ken mangisangbay iti dayaw iti nagan ti Dios a pagserservianna; ngem ti pammati kasapulan a masuot, sursuroenna a babaen laeng iti panangisaad iti naan-anay a talec ken Jehova, a manamnamana ti balligi maibusor kadagiti bileg ti sipnget a mangdadael iti ilina.” – Ibid., p. 347.
Hueves
Agusto 11
5. KANKANAYON A NAKASAGANA A SIEEMMA
a. Ania ti masursurotayo amin manipud iti kapadasan ni Ezekias kadagiti embajador ti Babilonia? Salmo 14:3; 1 Corinto 10:12; 1 Pedro 3:15.
“Ti pakasaritaan ti pannakatnag ni Ezekias iti suot a mangpanecnec iti kinapudnona iti panawen nga ibibisita dagiti embajadores ket nangisangbay iti napateg a leksion para iti amin. Ad-adayo ngem iti aramidtayo, kasapulan a patangentayo dagiti napapateg a benneg ti kapadasantayo, ti kinaasi ken kinamanagayat ti Dios, iti awan kapada a kanauneg ti ayat ti Mannubbot. . . .
“Tunggal aldaw, dagiti sasao ken tigtignaytayo ket agar-aramid iti maldit kadagiti makalangentayo. Anian a nagindaclan ti kinanasken a panangbantay kadagiti bibigtayo ken panangalluad kadagiti addangtayo! Maysa a saan a naadnad a tignay, maysa a nadarasudos nga addang, dagiti dadackel a dalluyon ti napigsa a sulisog ti mangisagad iti kararua iti agpababa a dana. . . .
“Iti sabali a bangir, no babaen iti ehemplotayo tulongantayo ti sabali iti pannakasukog kadagiti naimbag a prinsipio, ikkantayo ida iti bileg nga agaramid iti imbag. Ket isuda met aramidenda ti isu met la a makagun-guna nga inpluensia iti sabali. Gapuna a ginasut ken rinibo ti matulongan babaen iti saan a mapupuotan nga inpluensia.” – PK, pp. 347, 348.
“Ket immawag ti timec ti Apo a kinunana, Asino ti ibaonco, ken asino ti mapan gapu cadatayo? Idin kinunac, Adtoyac; Ibaonnac (Isaias 6:8). Ngem laglagipen a ti nabiag a beggang manipud altar sagidenna nga umuna dagita bibigmo. Iti kasta dagiti balikas a saoem ket nainsiriban ken nasantoan a sasao. Ket maaddaanca iti kinasirib a mangammo no ania ti isao ken no ania ti saan nga isao. . . .
“[Naadaw iti 1 Pedro 3:15.] Apay a mabuteng? Agbuteng amangan ta dagiti saoyo ket angot ti panangipateg iti bagi, maibalikas ti saan a maiparbeng a sasao, di la ketdi ta dagiti sasao ken tigtignay ket saan a maipada ken Cristo. Makisilpo a sititibker ken Cristo ken iparang ti kinapudno nga adda Kencuana.” – 6 T, p. 325.
Viernes
Agusto 12
PERSONAL A PANGREPASO A SALSALUDSOD
1. Apay a mapabilegtayo babaen iti nadisnudo a tignay ti pinagtawid ni Acaz?
2. Apay a ti panagturay ni Ezekias ket nabalangatan iti ragsac ken balligi?
3. Kalacsidan iti panangtulong iti ari ti Juda, sino pay ti kalikaguman ti Dios a matignay?
4. Ania ti nalipatan ni Ezekias idi nagbisita dagiti embajadores?
5. No kalikaguman ti agsacsi para iti Dios, apay a kasapulan nga agbantaytayo?